Утрински: Слободата го претвори Интернетот во нов медиум во Македонија

Пратеникот на ДУИ Хисен Џемаили, кој е еден од обвинетите за случајот „Мавровски работници“, можеби е недостапен за полицијата, но е една од главните фаци на „Фејсбук“, социјалната мрежа за Интернет-комуникација. На оваа информација деновиве посочи и Интернет-порталот „Он нет“, на чиј сајт стои коментарот: „Не можеле никако да го најдат Хисен Џемаили. А, типот не дека се крие нешто темелно како Радован Караџиќ. Да го побараа на ’Фејсбук‘?“ Блогови, „Фејсбук“, „Јутјуб“... Интернет-сајтовите се' повеќе добиваат на цена во македонскиот медиумски простор каде што бројот на членовите секојдневно расте. Ако некогаш важеше правилото дека медиумите се „watchdog“ (чувари) на општеството, сега може да се каже дека блоговите се „watchdog“ на медиумите. Долга е листата на политичари, интелектуалци, новинари кои буквално во секој момент „висат“ на некоја од веб-страниците преку кои или се вклучуваат во жестока јавна дебата и полемизираат или, пак, разменуваат фотографии. Моментно најкористена социјална мрежа за Интернет-комуникација е „Фејсбук“, за кој експертите посочуваат дека го користат дваесетина илјади луѓе во земјава. Генерално, непознатост е колку многу се користат другите Интернет-страници. Но, кога станува збор за дебатите, тука водат блоговите, а ги има многу, бидејќи важи правилото дека на Интернет секој може да каже се' што сака и тоа без цензура.
Меѓу најактивните на Интернет е Филип Петровски, директор на Градската библиотека „Браќа Миладиновци“ во Скопје. Постојано можете да го најдете на некој од веб-сајтовите, каде што испраќа видео, аудио и пишани коментари, но вели дека „ниеден не е доволно ефикасен за да се потпреш само на него“. Оние што користат Интернет најмногу го препознаваат преку неговиот блог. „Ги користам сите канали. Блогови, ’Фејсбук‘, ’Јутјуб‘. Имам повеќе од 200 постови, односно наслови на блогот. Тоа е една област која допрва политичарите ќе сфатат дека може да ја користат. Тие немаат инвентивност и комуникација со луѓето“, смета Петровски. Тој нема слушнато дека некој политичар користи блог, за разлика од другите држави каде што блоговите имаат значајно влијание во вкупните општествено-политички збиднувања. Како пример ни го посочи изборот на Барак Обама за претседател на САД, чиј успех, според анализите, се должи на неговиот настап на Интернет.
Различни коментари можеа да се прочитаат за актуелниот вицепремиер Ивица Боцевски, кој по назначувањето за портпарол во Владата, престана да го користи блогот. Некои македонски блогери не можеа да му го простат тоа и сметаат дека „тој го предал блогерството“. Боцевски вели дека додека бил портпарол, не се занимавал со блогерство, бидејќи сметал дека тоа е неспојливо со новата функција. Но, сега откако стана вицепремиер, размислува повторно да му се врати на блогерството. „Блогерството е едно од најдобрите места за дебатирање, каде што запознав многу пријатели. Блогот го подразбирам како предизвик, место каде што се судруваат ставови, идеи, теми што го скокоткаат секој посетител“, објаснува вицепремиерот. Поранешната лидерка на СДСМ Радмила Шекеринска веќе подолго време користи Интернет-комуникација. „Интернетот нуди можност за пишување без цензура, да пишуваш, а да останеш анонимен. Предноста на Интернет-комуникацијата е што ти нуди шанса да се сконцентрираш на човекот со кого контактираш и на темата за која контактираш“, ни кажа Шекеринска. Таа додава: „Некогаш можеш да препознаеш политичар или партија која се користи под друго име блог за да го нападне противникот. Но, ако има аргументи, барем треба да има храброст да се потпише“, вели таа.
Шекеринска е најактивна на „Фејсбук“, веб-сајтот за социјална интеракција, каде што секој посетител може да создаде личен профил, оставајќи лични податоци, по кои подоцна и се пронаоѓаат пријателите. „Фејсбук“ го употребува за да се заштити од можноста за крадење идентитети, но и тоа не било гаранција, бидејќи со сопругот на своја кожа ги почувствувале злоупотребите. „Се смеевме со сопругот како е можно некој во негово име да направи профил на ’Фејсбук‘“, вели Шекеринска. Таа објаснува дека преку „Фејсбук“ станала член на форуми каде што се дискутира непартиски. Интернет-порталот за испраќање видеосодржини „Јутјуб“, кој е релативно нов за нашиве простори, го користела изминатава година за следење други кампањи и занимливости. Чита и некои од блоговите, но повеќе странски отколку домашни. Премиерот Никола Груевски е честа тема на Интернет-форумите и блоговите каде што можат да се најдат пофални зборови за него, од тоа дека е четврти најмлад лидер во светот до погрдни зборови за неговите лични карактеристики. А, ако некој сака да дојде до премиерот Никола Груевски, тоа најлесно може да го направи ако се приклучи на „Фејсбук“, каде што премиерот има цела страница на која секој може да влезе и да најде податоци од неговата биографија. На „Фејсбук“ се и голем број други сегашни и поранешни политичари, како што се директорот на Центарот за комуникации на ВМРО-ДПМНЕ, Илија Димовски, потоа лидерот на ДУИ, Али Ахмети, и портпаролката на партијата, Ермира Мехмети, како и многу други. Меѓу блогерите многу активни се поранешната претседателка на Хелсиншкиот комитет Мирјана Најчевска со нејзиниот блог „Црна овца“ и професорката Билјана Ванковска.
Колку реално созреваат македонската блогосфера и, воопшто, македонскиот Интернет-простор? И дали Македонија наскоро би можела да извлече некакви поуки од Хрватска, каде што пред неколку недели хрватските блогери организираа протести во неколку града под мотото „Стегнете ги вие ремените, бандо лоповска“, како израз на незадоволство од политиката на премиерот Санадер. Експертите велат дека Интернет-порталите се' повеќе се на цена кај публиката, пред се' поради убеденоста дека медиумите се подложни на секакви влијанија. „Блогосферата, дефинитивно, е алтернатива за стеснетиот простор за јавна дебата и критичко размислување во класичните медиуми. Тоа не значи дека не е подложна на влијанија“, коментира Филип Стојановски од фондацијата за одржливи ИТ-решенија „Метаморфозис“. Според него, постојат технички можности за анонимно ширење информации од прва рака, па затоа тој прогнозира дека можеби во иднина ќе се појават такви блогови на „whistleblowers" („тастери“ или поткажувачи), односно луѓе кои ќе укажуваат на корупција или злоупотреби во институциите или фирмите во кои работат со презентирање доволно докази за да поттикнат и официјални истраги. Сепак, Стојановски предупредува дека ваквите напори се бесполезни се' додека не профункционира Законот за слободен пристап до информациите.

Извор: (31.12.2008). Слободата го претвори Интернетот во нов медиум во Македонија. Утрински Весник.

Утрински: Мобилното „ало“ на „Космофон“ пак најевтино за административците

„Космофон“ даде најевтина понуда за разговор меѓу административците во наредните две години. Сепак, допрва ќе се прави евалуација, а одлуката кој ќе биде избран за опслужување на државната администрација со мобилни разговори ќе се знае по Нова година. „Мобилниот оператор ’Космофон‘, по одредени ставки, достави најниска цена на тендерот за избор на оператор преку кој во наредните две години ќе разговара државната администрација, но допрва ќе се врши евалуација и по други критериуми“, изјави Слободан Буковски, претседател на Комисијата што ја спроведува набавката, по отворањето на понудите на тендерот, распишан од Службата за заеднички и општи работи на Владата. Покрај „Космофон“, понуди имаат доставено и „Т- мобиле“ и ВИП. Според Буковски, сите три мобилни оператори доставиле валидни понуди, а отворањето поминало без никакви проблеми. „Официјалната одлука за победникот на тендерот ќе се знае во првите денови по Нова година, до кога ќе бидат комплетно евалуирани понудите. Главниот критериум во евалуацијата ќе биде цената што ја нудат операторите според три критериуми, во национален сообраќај, во роаминг и во меѓународен сообраќај“, информира Буковски.Тој нагласи дека победникот на тендерот ќе опслужува разговор за 3.300 броеви во Владата и другите органи од државната управа. Горан Андревски, директор на правна регулатива во „Космофон“, изјави дека неговата компанија повторно дала најдобра понуда за услуги во мобилната телефонија за Службата за заеднички и општи работи на Владата. „Очекуваме во наредните две години, како и досега, да останеме провајдер за услуги на Владата. ’Космофон‘ уште еднаш се докажа како технолошки лидер во мобилната технологија и очекуваме така да остане“, изјави Андревски. Победник на минатогодишниот тендер беше „Космофон“, кој тогаш понуди најевтин телефонски импулс.

Извор: (30.12.08). „Космофон“ пак најевтино за административците. Утрински Весник.

Вест: Досие Тониќ на Именденска бб

Случајот писмо на Слободан Томиќ до Премиерот Никола Груевски, објавено на Интернет, како пример на сервилно новинарство мотивираше и други изрази на јавно мислење преку хумор за работата на Владата. Така еден блогер со псевдоним "рибаро" ги искористил завршните сцени од филмот "Последните денови на Хитлер" и со превод на македонски се исмејува на состојбата со медиумите во Македонија. Клипот блогерот го пуштил на познатиот интернет сајт "Јутјуб".Во наводното писмо, авторот Томиќ го нарекува Груевски "пастир" на македонскиот народ и му се заблагодарува што го прифатил интервјуто за неговата емисија "Гласот на народот" која се емитува на јавниот сервис МТВ.Емисијата закажана за во саботата, сепак, не се емитуваше, иако имаше целодневни најави. Од Владата објаснија дека премиерот ниту потврдил учество во емисијата, а рекоа и дека во тој термин имал други обврски. Во клипот со наслов "Досие Именденска бб", кој е пуштен на Интернет, Хитлер прашувајќи каде Јанкуровска ги собира околу себе блиските соработници Боцепски, Ставрепски, Славепски и ги обвинува дека не сработиле добро тоа што требало, па им вели:"Викнете ја Јанкуровска да ги најде интернетџиите?", но добива одговор дека таа си ја повредила раката садејќи дрвца."Каде се сега платените медиуми? Каде е мајчиниот портпарол Бичиклипски? Сигурно цмиздри некаде? Да се мобилизираат веднаш МРТВ, Сител и Вечер! 24/7 исполнуваме. А што исполнувате вие позери?", им вели Хитлер.Потоа приказната продолжува:"Каде се сега Латас, Ивона, Миленко и другите придружни сателити? Очајно ми требаат, да ми ги донесете одма. Инаку ќе ги избришам од платниот список".Потоа монологот на Хитлер оди вака:"Што ќе кажувам сега во 'Гасот на Народот', а да не се избламирам. Смислил Тониќ цело сценарио за емисијата, го видов. Ќе воспоставел линк и со нашите во Германија? Фино скоцкана лага за глупавиов народ да зајдува. Ама недоветен е тој Тониќ. Што мислел кога му го давал сценариото на Бичиклипски. Како сега да се вадам пред народов? ", вели Хитлер и му наредува на Ивица да им даде лопати на Тониќ и на Бичиклипски и да ги прати да садат дрвца. Ваков сличен клип со истите сцени од филмот за Хитлер на Интернет се вртеше и за хрватскиот премиер Иво Санадер, а во Србија за претседателот на радикалите Воислав Шешељ.

Извор: Д.Д. (30.12.2008). Досие Тониќ на Именденска бб. Вест.

Утрински: Во 2008 ќе се избере четврт мобилен оператор

Избор на тендер за четврт мобилен оператор, почнување на постапката за дигитализација на терестријалната телевизија, либерализација во железничкиот сообраќај, давање под концесија на двата аеродрома, изградбата на делницата Демир Капија-Смоквица од Коридорот 10.

Ова се само дел од зацртаните проекти на Министерството за транспорт и врски за 2008 година кои вчера ги најави министерот за транспорт и врски при отчетот што е сработено годинава и кои се приоритетите за идната година.

Влегувањето на четврт мобилен оператор во државава, според министерот за транспорт и врски, Миле Јанакиески, ќе следува откако ќе заврши тендерот за 3Г- технологијата, затоа што тоа е приоритет. Дури потоа ќе се распише тендерот за четврт мобилен оператор.

На повикот од Агенцијата за електронски комуникации се пријавиле 4 странски и 2 домашни компании.

Либерализацијата во железницата е обезбедена со донесувањето на сите клучни закони, така што од идната година сите компании кои ги исполнуваат условите можат да вршат транспорт на стока и патници.

Предлогот за дигитализација на терестријалната телевизија ќе се најде на една од наредните владини седници, по што во јануари ќе се распише тендер за почнување на постапката. За изградбата на делницата Демир Капија-Смоквица преку грчкиот план за економска обнова на Балканот се обезбедени над 50 милиони евра.

В.Г. (28.12.2008). Во 2008 ќе се избере четврт мобилен оператор. Утрински.

Дневник: Јужна Африка ни е поблизу со „Т-мобиле“

Македонската фудбалска репрезентација во „Т-мобиле“ доби партнер што ќе помогне за да извади виза за Јужна Африка, домаќинот на завршницата од СП во 2010 година. Челниците на ФФМ застапувани од претседателот Харалампие Хаџи-Ристески и двоецот директори кај водечкиот мобилен оператор во нашата земја, Мајкл Лоренс и Жарко Лукоски, потпишаа договор со кој прво една година меѓусебно ќе се тестираат. - Во овој момент средствата што ќе бидат одвоени за подобри услови за работа на репрезентацијата и не се толку важни. Поважно е што се создава клима и меѓусебна доверба за подолгорочна соработка. Фудбалската репрезентација е најголемиот спортски бренд на домашната сцена, а нашиот партнер е број еден во својата област. Заеднички ќе создаваме услови за да обезбедиме учество на СП. Имаме потенцијал за такво нешто. Шансите во групата не се загубени. Вистинските натпревари допрва претстојат - рече Хаџи-Ристески, откако си честитаа за договорот со новите партнери. Сумата пари со кои ќе биде помогната македонската репрезентација двете страни не ја соопштија. - Нашата компанија одвојува средства за развојот на спортот. На овој начин им возвраќаме за довербата на македонските граѓани што ги користат нашите услуги. Фудбалот е најинтересниот спорт и затоа сакаме да му помогнеме да постигне поголеми резултати - рече во кусото обраќање Мајкл Лоренс, главниот извршен директор во македонскиот „Т-мобиле“. За успешна 2009 година ФФМ и „Т-мобиле“ наздравија со шампањско, а претходно си разменија пригодни подароци. Договорот беше официјализиран во присуство на македонските репрезентативци Игор Митрески, Влатко Гроздановски и Александар Васоски. Претходно ФФМ потпиша договор за соработка со „Тојота“, од која доби на користење автомобил „јарис“.

Извор: (23.12.08). Јужна Африка ни е поблизу со „Т-мобиле“ . Дневник.

Вечер: Телекомуникациите ќе преживеат

Глобалната економска криза ќе има ефект врз македонската економија, но таа нема силно да се одрази врз телекомуникацискиот бизнис. Вака размислува главниот извршен директор на Македонски телеком, Николај Бекерс, кој очекува во 2009 година, во услови на економска криза, граѓаните да продолжат во иста мера да ги користат телекомуникациските услуги, во чиј развој компанијата планира да инвестира значителни средства. Сепак, кај него превладува претпазливост во однос на тоа каква година ќе биде 2009. - Искрено кажано, јас сум многу претпазлив бидејќи во светот има "силна бура", што во голема мера има влијание на САД, Западна Европа и на останатиот свет. Да се надеваме дека ефектот врз Македонија нема да биде силен. Јасно е дека некаков ефект ќе има, но мислам дека Македонија се наоѓа во добра позиција и со соодветни економски мерки може да се стабилизра состојбата и да се минимизираат ефектите од кризата. Потребно е да се направат соодветни подготовки за 2009 година - смета Бејкерс.
Според негово мислење, засега не може доволно да се истакне сериозноста на глобалната криза. Сепак, тој посочи на примерот на Индонезија во која работел во телекомуникациите во периодот 1997-1998 година, за време на големата азиска економска криза. - Индонезија претходно беше просперитена земја во развој, но кога настапи кризата, валутата падна за 80 проценти и сиромашните луѓе странаа многу сиромашни и имаше навистина тешки проблеми во земјата. Зачудувачки, нашиот телекомуникациски бизнис успеа да опстои, наспроти кризата. Имавме проблем, бидејќи бевме финансирани во американски долари, но општо земено, бизнисот функционираше навистина добро - вели Бејкерс..
Имајќи го предвид индонезискиот пример, Бејкерс, во поглед на телекомуникациите, од моменталнава криза не гледа никаков проблем. - Луѓето и сега се навикнати на потребата на мобилни телефони, да имаат пристап до интернет. Прочитав студии за економската криза во различни земји - Филипини, Кенија, Украина и други земји за односот помеѓу пушењето и користењето на телекомуникациските услуги. Во услови на криза, луѓето во овие земји се уште користеа телефонски услуги во иста мера, но затоа пушеа помалку - вели Бејкерс.
И покрај кризата која се очекува да трае и во цела 2009 година, Бејкерс вели дека нема да се откажат од планираните инвестиции, како што е проектот за оптички кабел до дома, во 3-Г технологијата во мобилната телефонија. - И нешто ексклузивно. Во 2009 година ќе промовираме интерактивни услуги, ќе се обидеме да влеземе во бизнис сегментот што е поразлично од сегашниот тип на работа. Телекомуникациите и интернетот се многу брзи технолошки процеси, така што треба многу да се биде внимателен и флексибилен, да не се премине границата - нагласува Бејкерс.

Извор: Светлана Блажевска. (22.12.08). Телекомуникациите ќе преживеат. Вечер.

Дневник: „Ало“ без претплата секој втор месец

Корисниците на фиксната телефонија „Ало“ кои до 31 декември ќе склучат договор на 36 месеци ќе може во наредните три години секој втор месец да зборуваат без месечна претплата. Корисниците, пак, кои ќе изберат договор на 24 месеци, добиваат можност за разговори без месечна претплата секој втор месец во наредната година.Услугата „Ало“ почна да се нуди во јуни годинава, со што мобилниот оператор „Космофон“ го прошири опсегот на работењето и во сферата на фиксната телефонија.

Извор: (20.12.08). „Ало“ без претплата секој втор месец. Дневник.

Утрински: Космофон со плус поволности за „Ало“

Сите нови корисници на „Ало“ добиваат уште една можност за разговори без претплата. Корисниците на „Ало“ кои ќе се активираат до 31 декември годинава и ќе склучат договор на 36 месеци добиваат единствена можност во наредните три години секој втор месец да зборуваат без месечна претплата.

Извор: Ек.Р. (20.12.08). Космофон со плус поволности за „Ало“. Утрински Весник.

Вест: Турк телеком достави понуда за Космофон

Турската телекомуникациска компанија "Турк телеком" достави прелиминарна необврзувачка понуда до грчки ОТЕ за купување на мобилниот оператор Космофон, информираше турската компанија. Во информацијата што "Турк телеком" ја достави до Берзата во Инстанбул нема други детали за понудата. "Турк телеком" на 1 декември објави дека ја ангажирал компанијата ЈП Морган како консултант во обидот за купување на Космофон, фирма ќерка на грчки ОТЕ, чиј сопственик е Дојче телеком.Интерес за Космофон досега искажаа и Телеком Австрија и Телеком Словенија. Грчки ОТЕ очекува од продажбата на Космофон, што треба да заврши во првите три месеци од 2009 година, да инкасира од 250 до 300 милиони евра. Со влезот на Дојче телеком во грчки ОТЕ, во Македонија се создадоа услови за враќање на монополот на германскиот оператор кој управува со Македонски телеком и Т-Мобиле Македонија, поради што и Комисијата за заштита на конкуренцијата неодамна наложи продажба на Космофон. Според бројот на претплатници во земјава Космофон е втор по големина оператор и заедно со Т-Мобиле покриваат речиси 90 отсто од пазарот. Единствена конкуренција е третиот оператор Вип, кој покрива над 10 отсто од пазарот

Извор: Т.Ј. (19.12.08). Турк телеком достави понуда за Космофон. Вест.

Вечер: Турк Телеком доставил прелиминарна понуда

Турската телекомуникациска компанија Турк Телеком соопшти дека поднела прелиминарна понуда за купување на македонскиот мобилен оператор Космофон.
Во соопшението доставено до Берзата во Истанбул се вели дека прелиминатрната понуда била дадена завчера, но не се наведуваат други детали.
Турк Телеком на 1 декември објави дека ја ангажирал компанијата ЏиПи Морган како консултант во обидот за купување на Космофон, фирма-ќерка на грчки ОТЕ, чиј сопственик е Дојче Телеком.
Интерес за Космофон искажаа и Телеком Австрија и Телеком Словенија. Според македонските антимонополски закони, Космофон мора да ја смени сопственичката структура по преземањето на ОТЕ од Дојче Телеком, бидејќи со тоа германскиот телекомуникациски гигант, кој е сопственик и на Т-Мобиле, би имал монополска позиција во Македонија.

Извор: (19.12.08). Турк Телеком доставил прелиминарна понуда. Вечер.

Дневник: „Турк телеком“ со понуда за „Космофон“

Турската телекомуникациска компанија„Турктелеком“поднесе необврзувачка прелиминарна понуда за купување на македонскиот мобилен оператор „Космофон“, јави Ројтерс.Во соопштението на компанијата доставено до Берзата во Истанбул се вели дека прелиминарната понуда била дадена вчера, но не се посочуваат други детали. По турскиот мобилен оператор „Турксел“, ова е втора компанија од оваа земја што е заинтересирана за да го купи „Космофон“.„Турк телеком“ на 1 декември објави дека ја ангажирал компанијата „Џи Пи Морган“ како консултант во обидот за купување на „Космофон“, фирма-ќерка на грчки ОТЕ, чиј сопственик е „Дојче телеком“.Заинтересирани за „Космофон“ беа и „Телеком Австрија“, кој во земјава е сопственик на мобилниот оператор „Вип“ и Телекомот на Словенија, кој го поседува „Он.нет“.„Космофон“ мора да ја смени сопственичката структура по преземањето на ОТЕ од „Дојче телеком“ бидејќи со тоа германскиот гигант, кој е сопственик и на „Т-мобиле“ би имал монополска позиција во Македонија.

Извор: (19.12.08). „Турк телеком“ со понуда за „Космофон“. Дневник.

Вечер: Од јуни достапни услуги од 3-Г технологијата

За половина година и Т-Мобиле Македонија ќе почне со комерцијално нудење услуги од третата генерација мобилна телефонија (3-Г). В.д. директорот на Агенцијата за електронски комуникации, Петар Ивановски вчера му го издаде одобрението за користење радиофреквенции на Мајкл Лоренс, главниот извршен директор на Т-Мобиле Македонија со што започна да тече шестмесечниот период до кој компанијата треба да стартува со понуда до корисниците за услугите што ги овозможува 3-Г технологијата. -Нашата понуда ќе биде многу конкурентна, како што впрочем и секогаш правиме во Т-Мобиле. Условите ќе бидат изненадување за корисниците - увери Жарко Луковски, главниот оперативен директор во Т-Мобиле Македонија.
Со добивањето на одобрението, според Лоренс, Т-Мобиле праќа јасна порака до Владата, до Агенцијата како регулаторно тело и до корисниците дека ќе биде изградена најдобрата телекомуникациска мрежа во земјата. -Со 1,3 милиони корисници, Т-Мобиле во голема мерка придонесува за високата стапка на пенетрација од 107 проценти на мобилната телефонија во Македонија. Ние можеме на корисниците да им понудиме одлични услуги за нивните пари и висококвалитетна мрежа за што, и покрај глобалната криза, планираме во 2009 година да инвестираме 30 милиони евра - истакна Лоренс.
Изразувајќи задоволство што инвестицијата на Т-Мобиле ќе допринесе во развој на пазарот на електронските комуникации, на информатичкото општество, како и воопшто на економијата, Ивановски рече дека АЕК целосно ја следи стратегијата на Владата и во потполност го спроведува акциониот план за развој на широкопојасниот интернет.

Извор: С.Бл. (18.12.08). Од јуни достапни услуги од 3-Г технологијата. Вечер.

Дневник: Осумдесет отсто од фирмите имаат интернет-пристап

Повеќе од 80 отсто од деловните субјекти од финансискиот и нефинансискиот сектор од земјава годинава имале пристап до интернет, покажуваат податоците на Државниот завод за статистика. Статистиката покажува дека 83,4 отсто од фирмите со десет или повеќе вработени имале пристап до интернет. Од нив, 68,3 отсто најчесто го употребувале за банкарски и за финансиски услуги, а своја интернет-страница имале 55,5 отсто. Автоматска размена на податоци со други деловни субјекти имале 30,9 отсто од фирмите, а внатрешна размена на информации во рамките на деловниот субјект имале 41,3 отсто од нив.

Извор: (18.12.08). Осумдесет отсто од фирмите имаат интернет-пристап. Дневник.

Дневник: „Т-мобиле“ ја доби лиценцата за 3Г-телефонија

Македонскиот телекомуникациски пазар ќе се надгради и прошири откако најголемиот домашен мобилен оператор „Т-мобиле“ вчера и официјално ја доби дозволата да нуди комуникациски услуги за третата генерација мобилни телефони. Според конкурсот, „Т-мобиле“ треба да почне со комерцијална понуда на услугите од 3Г-технологијата во рок од шест месеци. Главниот извршен директор на „Т-мобиле“ Мајкл Лоренс најави дека компанијата ќе настојува услугите да ги понуди и пред рокот, по конкурентни цени. Одобрението ја чинеше компанијата 10.000.100 евра како еднократен надомест.- Стапката на пенетрација на мобилната телефонија во Македонија изнесува 107 отсто, што значи дека државата се приближува до процентот во европските земји - вели Лоренс. Лиценца за услугите од 3Г- технологијата има и мобилниот оператор „Космофон“. Операторот ВИП засега се изјаснува дека не е заинтересиран за таа технологија, за која оценува дека е во залез.

Извор: (18.12.08). „Т-мобиле“ ја доби лиценцата за 3Г-телефонија. Дневник.

Утрински: „Т - мобиле“ доби лиценца за 3-Г

Агенцијата за електронски комуникации (АЕК), вчера на мобилниот оператор "Т - мобиле Македонија", му додели одобрение за користење радиофреквенции за обезбедување јавни комуникациски мрежи и услуги. Според тендерските правила, „Т - мобиле Македонија" треба да започне со комерцијално нудење на услугите од технологијата 3-Г во рок од шест месеци. Главниот извршен директор на компанијата, Мајкл Лоренс, по добивањето на лиценцата рече дека компанијата ќе настојува услугите да ги понуди и пред рокот, по конкурентни цени. За одобрението што го доби компанијата преку јавен тендер, плати еднократен надомест од 10.000.100 евра. Стапката на застапеност на мобилната телефонија во земјава изнесува 107 отсто што, според Лоренс, значи дека Македонија се приближува до процентот во европските земји.

Извор: МИА. (18.12.08). „Т - мобиле“ доби лиценца за 3-Г . Утрински Весник.

Дневник: „Вип“ очекува поголем пазарен удел

Мобилниот оператор „Вип“ очекува значително да ги зголеми приходите и пазарниот удел во 2009 година и најави дека ќе воведе нови технологии.- Ако оваа ни беше година на сеидба, очекуваме 2009-та да ни биде година на жнеење, кога би требало да ги собереме плодовите од инвестициите - вели Никола Љушев, извршен директор.„Вип“ има 11 отсто од пазарниот удел во мобилната телефонија, а плановите им се до 2013 година да достигнат до 25 отсто.„Вип“ вчера ги промовира новите деловни простории, кои се лоцирани во Трговско-деловниот центар „Соравија“ во Скопје.

Извор: (17.12.08). „Вип“ очекува поголем пазарен удел. Дневник.

Утрински: Телекомуникациите засега отпорни на кризата

Светската економска криза засега не го погодува телекомуникацискиот сектор, кој е стабилен и не е подложен на циклични влијанија, како што се другите сектори, сметаат луѓето на двата мобилни оператора во земјава „Т-мобиле“ и ВИП. Тие се едногласни во оцената дека ефектите од кризата допрва ќе бидат видливи, но се надеваат дека ударот за нивниот бизнис нема да биде уништувачки. Според луѓето од овој сектор, Македонија е стабилна и на некој начин недопирлива за кризата поради ниското ниво на инвестиции и банки кои се конзервативни и кои претставуваат сигурносна брана што го спречува прелевањето на негативните последици од економската криза врз нашето стопанство, вклучително и телекомуникациите. „Економската криза ја нема зафатено телекомуникациската индустрија во Македонија и сега за сега не се чувствуваат посебни ефекти од неа во нашето работење. Останува да видиме каков ефект ќе има кризата наредната година“, информираат од „Т-мобиле“ - Македонија. Со идентичен став е и раководството на ВИП. „Светската финансиска криза се продлабочи повеќе отколку што очекував лично. Луѓето станаа попретпазливи во трошењето пари. Но, телекомуникациите, како основно добро на луѓето, не се подложни на циклични влијанија и ќе останат стабилни“, вели извршниот директор на најмладиот мобилен оператор ВИП, Никола Љушев. Според него, економската криза ќе се продлабочува, а како држава ќе имаме сериозен проблем во 2009 и 2010 година, иако засега успешно се менаџира целиот процес на справување со кризата.Дека најмладиот мобилен оператор во Македонија ВИП не чувствува последици од кризата, говорат амбициозните планови за наредната година, за кога тие очекуваат значително зголемување на приходите и пазарниот удел, најавувајќи воведување нови технологии. До 2013 година ВИП очекува да надмине 25 отсто од пазарниот удел. Овој оператор годинава има достигнато 11 отсто од пазарниот удел, а покриеноста на населението со мрежа е 90 отсто. Според Љушев, по влезот на ВИП на македонскиот пазар, во мобилната телефонија многу работи се сменети, особено во поглед на цените, додавајќи дека според нивните процени, цените на одредени услуги паднале и до 80 отсто. Целна група за наредната година на ВИП ќе бидат постпејд-корисници.Во врска со евентуалното преземање на вториот мобилен оператор „Космофон“, Љушев изјави дека колку што му е познато, се' уште не е започнато длабинско снимање на состојбите во компанијата од страна на консултантските куќи на неговите сопственици.

Извор: (17.12.08). Телекомуникациите засега отпорни на кризата. Утрински Весник.

Утрински: Компјутеризацијата на училиштата чини над 40 милиони евра

Компјутеризацијата на училиштата во земјава ќе чини најмалку четириесет милиони евра, сума што произлегува поради дополнителните проекти на Владата за доопремување на училишните објекти. Според она што може да се види досега, очигледно, Владата е подготвена по која било цена да ги компјутеризира училиштата. Иако, реално, првиот бран инсталирани компјутери се покажаа нефункционални поради редица пропусти, меѓу кои и немањето обука за наставниците и неподготвениот софтвер. Сега проблемот дополнително се комплицира поради зачестените кражби во училиштата на компјутерската опрема, за што ресорното Министерство испратило предупредување до директорите дека штетата ќе треба да си ја платат тие.Првично, Владата за проектот за набавка на компјутерите одвои 21 милион евра, иако околу оваа сума имаше контрадикторни информации, па се спомнуваше и цифрата од 24 милиони евра. Беа обезбедени компјутери за средните и за околу 40 отсто од основните училишта. Со првата набавка за училиштата беа набавени 18.000 персонални компјутери и 80.892 тин-клиенти (кои работат како компјутери, но без куќиште) и дополнителна опрема. Потоа Владата одвои и 9 милиони евра за компјутерската мрежа во училиштата, но ЈП „Македонска радиодифузија“ ја стопираше распределбата на дел од овие пари, со што доцнеше и проектот за инсталација во основните училишта. Како што потоа се објасни, проблем било тоа што парите не биле одобрени за префрлување од страна на Министерството за образование. Владата сега планира повторно набавка на компјутери, но само за основните училишта, бидејќи мрежата во средните веќе е покриена. Едниот тендер е за набавка на 75 илјади лаптопи за основците од прво до трето одделение и за наставниците. Во исто време е објавен и друг тендер за набавка на дополнителни 65 илјади компјутери, со што би требало да се заокружи проектот за компјутеризација во основните училишта. Упатените наведуваат дека за двата тендера Владата ќе одвои уште најмалку дваесетина милиони евра. Само за транспорт на компјутерите во училиштата Владата ќе плати 365 илјади евра, што е договорено со фирмата „Хајер“, преку која се набавени компјутерите за училиштата. Наплатата за транспортот ќе се исплаќа сукцесивно, како што ќе се пренесуваат компјутерите до училиштата.Кога ќе се соберат сите суми, цифрата ни малку не е за занемарување, а секако е поголема од 40 милиони евра. Којзнае која ќе биде крајната сума со која ќе се заокружи целиот проект за компјутеризација ако се знае дека за компјутерите се плаќа и осигурување, но и лежарина за нивното чување во магацините. Но, секогаш останува и можноста за непредвидливи трошоци.Министерот за образование и наука, Перо Стојановски, уверува дека нема простор за грижи, бидејќи гаранцијата на компјутерите важи три години, што значи може да ги покрие евентуалните дефекти во тој период. А, ако се случат оштетувања, тоа ќе падне на товар на директорите, до кои е испратено писмо со предупредување за евентуалните оштетувања на компјутерите. Според него, осигурувањето за компјутерите е платено за цела година. Тој ги демантира тврдењата на Државниот завод за ревизија, кој во последниот ревизорски извештај наведува дека во моментот на ревизијата извршена пролетоска складираните компјутери не биле осигурани. Односно, дека по претходна опомена од Владата, МОН ги осигурало компјутерите само за периодот од јануари до март годинава.

Извор: (15.12.08). Компјутеризацијата на училиштата чини над 40 милиони евра. Утрински Весник.

Дневник: „Ало“ без претплата секој втор месец

Новите корисници на фиксната телефонија „Ало“ ќе може да зборуваат 6 месеци без месечна претплата. Сите нови претплатници што ќе склучат договор до 31 декември, добиваат можност секој втор месец во 2009 година да не плаќаат претплата.Услугата „Ало“ почна да се нуди во јуни годинава, со што мобилниот оператор „Космофон“ го прошири опсегот на работењето и во сферата на фиксната телефонија.

Извор: (13.12.08). „Ало“ без претплата секој втор месец. Дневник.

Вечер: Мобипазарот во Македонија оди во добра насока

Мобилниот пазар во Македонија се движи во добра насока. Стапката на пенетрација е 107 проценти и полека се движи кон онаа во Европската унија, вели главниот извршен директор на Т-Мобиле Македонија, Мајкл Лоренс. Според него, за ваквата висока стапка голема заслуга имаат над 1,3-те милиони претплатници на Т-Мобиле Македонија, кои постојано добиваат пониски и конкурентни цени на услугите. - При пејд цените се прифатливи и мошне примамливи, а нудиме и телефонски апарати според највисоките стандарди - рече Лоренс.
Т- Мобиле вчера ги претстави најновите поволности за пост пејд, бизнис и при пејд корисниците. Со новите пост-пејд тарифни модели Флекс корисниците можат да разговараат по иста цена кон сите мрежи преку цел ден почнувајќи од 3,1 денар/минута. Со склучување на договор од 24 месеци на некој од Флекс моделите, корисниците добиваат гратис разговори од 1.500 денари. Пост пејд корисниците добиваат и поволна веб енд вок понуда за користење мобилен интернет, која вклучува лап-топ, УСБ модем и 1ГБ интернет по промотивна цена од 999 денари месечно во Доверба 24.
Намалени се и цените за повици кон сите мрежи во Македонија и за 50 проценти кај тарифните модели Бизнис и Тим Бизнис и воведена е иста цена за разговори во текот на денот. Цените се намалени до само 2,5 денари во Бизнис 4000 и до 5,3 денари во Бизнис 350. Т-Мобиле стартуваше со новогодишна кампања за при пејд корисниците со која секој од нив ќе може да ја надополни својата сметка со ваучер од 3.000, 6.000 или 9.000 денари и добива бесплатен телефон.

Извор: С.Бл. (13.12.08). Мобипазарот во Македонија оди во добра насока. Вечер.

Вечер: Без претплата секој втор месец

Космофон ќе привлекува нови корисници за својата фиксна мрежа АЛЛО преку понуда на бесплатна месечна претплата. Од вчера Космофон им нуди можност на новите корисници на АЛЛО да зборуваат шест месеци без месечна претплата.
Како што појаснуваат од Космофон, сите оние кои ќе станат АЛЛО корисници до крајот на овој месец, ја добиваат единствената можност, секој втор месец во текот на целата година да не плаќаат месечна претплата. - Со едноставната и евтина комуникација овозможена со фиксната телефонија АЛЛО, уште еднаш ја докажуваме својата посветеност да креираме и воведуваме нови, поконкурентни и атрактивни новини на пазарот - велат од Космофон.
АЛЛО е лансирана во јуни годинава, со што Космофон го прошири опсегот на своето работење и во сферата на фиксната телефонија со што ја зацврсти својата позиција на технолошки лидер на пазарот.

Извор: (13.12.08). Без претплата секој втор месец. Вечер.

Вест: Електронски потписи за работодавците

Министерот без ресор Иво Ивановски информираше и за доделувањето електронски потписи за работодавците
"Целта на проектот за доделување електронски потписи за сите работодавци во Македонија е доставување авторизиран дигитален идентитет на сите правни и физички субјекти кои имаат правна обврска да пријавуваат и да плаќаат данок. Сертификатот е јавно признат со членот 13 од Законот за податоци во електронски облик и електронски потпис", рече Ивановски.
Со електронскиот потпис работодавците, како што истакна Ивановски, наместо да одат на шалтери, ќе можат да ги вршат услугите по електронски пат, но ќе мора да поседуваат електронски сертификат за тоа. Услугите ќе можат да се реализираат во фондовите за пензиско и за здравствено осигурување, Централниот регистар, Царината, Агенцијата за вработување, каде што ќе може да се најави вработување или отказ за вработените, и новиот систем за електронски јавни набавки.

Извор: (11.2.08). Електронски потписи за работодавците . Вест.

Вечер: Дневно се купуваат по 1.000 компјутери

На пет дена до крајниот рок (15 декември) за искористување на владините ваучери за апсолвентите за купување на компјутери, досега само половина од предвидената бројка се пуштени во ИТ продавниците. Како што информираат од Министерството за информатичко општество, до овој момент, до факултетите во земјава се испратени 10.680 ваучери колку што и биле побарани од сите високообразовни институции. Факултетите пак, до студентите дистрибуирале 10.050 ваучери што значи дека во рацете на апсолвентите кои за прв пат запишале завршна студиска година, се наоѓаат дури 94 проценти од ваучерите. - Искористеноста до овој викенд беше 5.840 ваучери што е нешто над 50 отсто. Ова се должи на фактот што студентите ја чекаат последната недела да го искористат дадениот ваучер. Сепак, интересот расте, а тоа се гледа по фактот дека последните денови се искористуваат по илјада ваучери дневно - велат од Министерството за информатичко општество.
Оттаму, но и од ИТ компаниите што се пријавија да се вклучат во оваа владина акција очекуваат дека планираната сума на ваучери до 15 декември целосно ќе се искористи. Неискористените ваучери ќе бидат поништени.
Според податоците што ги добивме од Министерството за информатичко општество, речиси на сите државни и приватни универзитети доделените ваучери се и стопроцентно распределени на студентите, освен на Правниот факултет во Скопје и Државниот универзитет во Тетово каде останале неподелени уште 14 проценти од ваучерите. На Машинскиот факултет во Скопје, каде 96 проценти од апсолвентите си ги подигнале ваучерите, велат дека ги контактирале студентите што не се пријавиле. Дел од нив изјавиле дека ваучерите не им требаат, некои се правдале дека биле болни, а некои изјавиле дека немаат важечка лична карта за идентификација.
Од компанијата АМЦ сметаат дека 15.500 денари колку што е вредноста на ваучерот се доволни да се купи компјутер со солидна конфигурација или лаптоп. Кај нив се јавувале и студенти кои покрај ваучерот доплатувале од 150 до 300 евра за појак компјутер или лаптоп и притоа плаќањето го вршеле со банкарски кредит или кредитни картички.
Извор: Светлана Блажевска. (10.12.08). Дневно се купуваат по 1.000 компјутери. Вечер.

Дневник: Ни застаруваат корупциските случаи

Светскиот ден на борбата против корупцијата 9 Декември, Македонија годинава го дочекува во хаотична состојба. Од една страна има интервенции во регулативата за заострување на санкциите, давање преширока легална можност за употреба на прислушувањето и на други специјални истражни мерки за откривање на корупцијата, а, од друга - недоволно транспарентни државни органи, апсурдни „застарувања“ на вакви случаи и образложенија дека нема доволно докази за покренување и судење на дел од корупциските скандали. Во Извештајот за Македонија, Европската комисија (ЕК) констатира напредок во борбата против корупцијата, но и дека таа останува сериозен проблем, особено во делот на финансирањето на политичките партии и на изборните кампањи. Иако кај нас постои дебата за оправданоста на прешироката примена на прислушувањето во гонењето и на најбаналните корупциски дела како што е примањето и давањето мито, ЕК како позитивни чекори ги наведува измените на законите за кривична постапка и за следење на комуникациите. Сепак, Комисијата е внимателна, па вели дека во овие случаи треба да се засили улогата на судијата како коректив на „забегувањето“ на полицијата. Но, во Извештајот сњ нагласува дека извештаите на Државниот завод за ревизија и препораките на Државната комисија за спречување на корупцијата многу ретко се следат. Нагласена е „загриженоста“ за политизација на некои случаи на корупција и начинот на кој се обработуваат. Транспареноста на државните институции и органи и понатаму е во фокусот на интерес на Европската комисија како превентивна мерка и стеснување на можностите за корупција. Додека во Македонија јавно се зборува за партизација на судството, Комисијата дипломатски констатира дека судството и понатаму е слабо, а изрекувањето и извршувањето на судските одлуки е со недостатоци. Ваквите мекоизречени забелешки на ЕК во практика изгледаат многу погрубо. Случаите на намерно или поради небрежност застарување на корупциски случаи е само дел од синџирот корупциски дела што остануваат несанкционирани иако биле откриени.

Извор: (9.12.08). Ни застаруваат корупциските случаи. Дневник.

Дневник: „Ту би“ и „Т-хоум“ партнери

Компанијата „Ту би“ потпиша стратегиско партнерство со „Т-хоум“. Со договорот, на сите 15 продажбени места на „Ту би“ низ државата, секој корисник освен стандардната понуда на фиксна телефонија од „Т-хоум“ ќе може да се снабди и со новата понуда на Макс АДСЛ интернет-пакети. Во продавниците на „Ту би“ може да се нарача и пакет на новата дигитална телевизија Макс ТВ. „Ту би“ од септември е партнер и на „Т-мобиле Македонија“.

Извор: (6.12.08). „Ту би“ и „Т-хоум“ партнери. Дневник.

Вечер: Финансиските извештаи на Телеком усвоени со задоцнување

Со задоцнување од две години, Собранието на акционери на Македонски телеком го усвои консолидираниот финансиски извештај на компанијата за 2005 година. Ова е сторено, како што изјави претседателот на Собранието на акционери, Зоран Трајчевски поради тоа што немало мислење од овластениот ревизор за да може да се пристапи кон усвојување на извештајот. - Има задоцнување, но не може да бидат усвоени консолидирани финансиски извештаи без мислење од ревизорот бидејќи имаше истрага од страна на американската компанија Њхите анд Цасе и истата не е завршена - рече Трајчевски.
Акционерите вчера ги усвоија консолидираните финансиски извештаи на компанијата и за 2006 и 2007 година. Избрана е ревизорска куќа Прајсвотерхаус Куперс да направи ревизија на консолидираните финансиски извештаи на Македонски телеком за 2008 година и разрешен е членот на Бордот на директори, Игор Билбиловски и на негово место е назначен Борис Ставров. Некои акционери тврдеа дека од 1999 година до 2005 година е намален бројот на вработени во компанијата, но е зголемена масата за плати за 12 милиони евра. Трајчевски објасни дека е тешко да се споредуваат финансиски резултати за таква временска разлика. -Во 1999 година платежно средство беше марката, а сега е еврото. За компанијата не е битно колку пари се трошат за плати, туку колку е приходот и профитот на компанијата. Ова е во судир со изјавите што ги даде акционерот бидејќи приходите и профитот на компанијата се зголемуваат - потенцира тој.

Извор: С.Бл. (5.12.08). Финансиските извештаи на Телеком усвоени со задоцнување. Вечер.

Вест: Македонски Интернет портали на меѓународна конференција

Македонските Интернет портали за култура њњњ.цултуре.ин.мк и њњњ.плагиј.ат ќе бидат учесници на регионалната конференција "Културите на регионот-Иднината минува" која ќе се доржи во понеделник и вторник во Белград. Конференцијата е под покровителство на гете институтот од Белград и порталот за култура на Југо-источна Европа СЕЕцулт.орг. Конференцијата го третира значењето на порталите за култура, потребата за комуникација и користењето на Интернет медиумот, како и значењето на он-лајн општеството. Ќе учествуваат околу 20 портали од регионот како и други учесници кои ќе говорат за нет-културата.

Извор: (5.12.08). Македонски Интернет портали на меѓународна конференција . Вест.

Вест: Ѓорче ќе прави информативен бизнис центар

Општина Ѓорче Петров доби донација од околу 20.000 евра од Владата на Кралството Норвешка за реализација на проектот "Општински инфо-бизнис центар". Локалните власти од Ѓорче велат дека со овој проект треба да се подобри локалната економска клима, преку креирање општинска база на податоци за регистрираните фирми на територијата на Општината. Во оваа база на податоци ќе има информации за дејност со која се занимаваат фирмите во Ѓорче, колкав број вработени имаат, дали имаат потреба од нови вработувања и дали постои можност за соработка со други компании од земјава и од странство. Со донацијата од Норвешка општинските власти ќе ја набават потребната компјутерска и техничка опрема за реализација на проектот. Надлежните во Ѓорче Петров велат дека реализацијата на проектот треба да почне следната недела, а да заврши на почетокот на следната година.
Извор: Е.А. (4.12.08). Ѓорче ќе прави информативен бизнис центар. Вест

Утрински: Пријавување работници на Интернет

Пријавувањето и одјавувањето работници во Македонија, како и објавувањето огласи за нови работни места, во иднина ќе се врши со посредство на Интернет. Вчера беше одржана промоција на новиот он-лајн процес, кој ќе биде од голема корист за фирмите и за вработените, кои на овој начин ќе заштедат и време и пари. Агенцијата за вработување веќе целосно е подготвена за новиот процес. Особена полза од проектот, кој е поддржан од агенцијата УСАИД, ќе имаат претпријатијата во кои често се менуваат вработените, оние што вработуваат сезонски работници и оние што нудат услуги за вработување.

Извор: (4.12.08). Пријавување работници на Интернет. Утрински Весник.

Дневник: Он-лајн регистрација на вработувања

Работодавците од приватниот сектор од денеска може да ги пријавуваат и одјавуваат вработените преку систем за електронска регистрација на вработувања, www.avrm.gov.mk/PrijavaOdjava.Софтверот е изработен за потребите на Агенцијата за вработување, преку проектот е-Влада, финансиран од УСАИД. За да можат да ја користат, работодавците мора да поседуваат валиден дигитален сертификат и компјутер поврзан на интернет.Според директорката на Агенцијата за вработување, Билјана Јовановска, работодавците што немаат услови да го користат системот, овие услуги и понатаму ќе ги добиваат во центрите за вработување.

Извор: (4.12.08). Он-лајн регистрација на вработувања. Дневник.

Вест: 400 денари месечно за телевизија

МРТ ги подготвува сметките за радиодифузна такса за 2008 година. Директорот на Македонската радио-телевизија Ефтим Гашев вели дистрибуцијата на сметките ќе биде околу новогодишните празници, а висината на радиодифузната такса ќе биде пресметана и по новата цена и по старата, која беше во сила до август годинава. "Согласно законската регулатива, до август годинава висината на радиодифузната такса е 2,5 отсто од просечната плата, додека од август до крајот на 2008 година таа изнесува 130 денари месечно. Ќе се предвиди и одредена динамика на уплата на износот за целата година, и таа, најверојатно, ќе биде во договор со физичкото лице. Ако се земе предвид дека таксата се пресметува на период од три месеци, тогаш веројатно и уплатата ќе треба да се направи на четири рати", објаснува директорот Гашев. "Вест" направи груба пресметка на износот на таксата за првите седум месеца врз основа на фактот дека просечната плата во 2008 година беше во пораст и се движеше над 15 илјади денари. Според тоа, и месечната такса треба да се движи околу 400 денари. Според директорот Гашев, во интерес на граѓаните е да ја платат радиодифузната такса. "Ако наплатата на таксата се прави преку извршители, тие наплаќаат и надомест кој значително го зголемува вкупниот износ", вели Гашев.

Извор: Т.Ј. (3.12.08). 400 денари месечно за телевизија. Вест.

Вечер: Космофон со приход од 48 мил. евра

Космофон го зголеми бројот на претплатници на 662.592 корисници, што е за 22,5 проценти повеќе во однос на предходните три месеци. Во однос, пак, на истиот период лани, Космофон придобил нови 121.731 корисници. Најголем процент од новите корисници се во пост пејд сегментот, чиј број пораснал за 23,5 проценти.
Приходите на Космофон, како што објави во Атина грчката компанија ОТЕ, во првите девет месеци од годинава достигнале 47,6 милиони евра што е пораст за скромни 1,2 милиони евра. Во извештајот на ОТЕ се наведува дека порастот на приходите се должи на остварените средства од појдовни повици во пост пејд и тоа за 15 проценти и тоа делумно го искомпензирал падот на приходите од при пејд сегментот.- Ако пред една година корисниците на Космофон во просек зборувале на мобилен телефон по 85 минути месечно и трошеле по 11 евра, за една година тој број пораснал на 99 минути и 10 евра - стои во извештајот.
Од ОТЕ потсетуваат дека Групацијата Космоте е во процес на продажба на Космофон што следи по аквизицијата на контролниот пакет-акции на ОТЕ од страна на Дојче телеком, кој во Македонија го поседува Т-Мобиле.

Извор: С.Бл. (28.11.08). Космофон со приход од 48 мил. евра. Вечер.

Дневник: ИТ-инвестициите ќе ја ублажат кризата

Инвестициите во информатичката технологија ќе ја одиграат главната улога во надминување на економската криза, изјави министерот за информатичко општество Иво Ивановски вчера на отворањето на првата мрежна конференција „Циско експо Македонија 2008“. Каан Терзиоглу, потпретседател на „Циско“ за Источна Европа, порача дека компанијата е целосно посветена на изградбата на економија заснована на наука и солидно информатичко општество во сите земји во кои има свои претставништва. На конференцијата како иновација беше претставен системот за видеоприсутност, најнапреден сиситем на комуникација во светот.

Извор: (27.11.08). ИТ-инвестициите ќе ја ублажат кризата. Дневник.

Вечер: Македонија со нови инвестиции во ИКТ секторот

И покрај светската економска криза, Владата не отстапува од инвестициите во информатичките и комуникациските технологии (ИКТ) бидејќи сакаме Македонија да биде меѓу првите 15 развиени ИКТ земји до крајот на 2012 година. Ова го изјави министерот за информатичко општество, Иво Ивановски на отворањето на првата конференција на Циско, посветена на најновите достигнувања во мрежните технологии.-Планираме да ги поврземе државните институции во безбедносна мрежа. За елиминирање на дупликати на база на податоци ќе направиме поврзување на регистрите што ги поседуваат државните институции, а до крајот на 2009 година ќе воведеме електронски систем за раководење со документи. Долгорочно работиме на намалување на дигиталниот јаз и во тек се изработува стратегија за развој на комуникациските мрежи во руралните средини - потенцира Ивановски.
Министерот Ивановски ја повика деловната заедница повеќе да инвестира во ИКТ, посебно малите и средни претпријатија. Тој се повика на еден од извештаите на infoDev, европска реномирана консултантска куќа која се бави со студии за ефектите од инвестициите во ИКТ во државите во транзиција. -Во извештајот е објаснет позитивниот ефект што го доживуваат компаниите што одлучиле да инвестираат во ИКТ и со тоа добиле зголемено производство, подобра профитабилност и побрз развој. Фирмите што изјавиле дека нивното производство се зголемило за половина, дури 13,4 отсто се должи на инвестициите во ИКТ. Оние што пријавиле пораст на профитабилноста за 44 проценти, рекле дека 10,5 отсто се должи на ИКТ. Оние пак, што го подобриле квалитетот на производот за 63,8 проценти, рекле дека информатичката технологија е заслужна за 10 отсто. Со ова станува јасно дека новите маркетинг стратегии, капиталните инвестиции во опрема и огранизационите промени преставуваат три важни фактори за абдејтирање и користење на Икт за позитивни економски промени во секоја компанија - нагласи Ивановски.
Харис Пињо, генерален директор на Циско системс за Македонија, БиХ, Албанија и Косово објасни дека присуството на ИКТ технологиите во македонскиот мал и среден бизнис е се уште на ниско ниво, главно поради недостиг на финансиски ресурси, како и интерни ИТ вештини. Пред присутните беше презентиран системот за видео конференции Teleprence. Учесниците на конференцијата беа сведоци на состанок во живо на оддалеченост од 1.000 километри, на релација Скопје-Љубљана. По тој повод, потпретседателот на Циско за Источна Европа која опфаќа 19 земји, Каан Терзиоглу рече дека ова е прва презентација на најнапредниот телекомуникациски систем на денешницата кој има повисок квалитет од ХД телевизијата. Ваков систем во Македонија единствено поседува Македонски телеком. Главниот извршен директор на Македонски телеком, Николај Бекерс рече дека Циско опремата ја користат и за ИП телевизијата која беше лансирана пред една недела и досега има над 6.000 барања за нејзино користење.

Извор: (27.11.08). Македонија со нови инвестиции во ИКТ секторот. Вечер.

Вечер: Потешкотии со АДСЛ

Македонски Телеком ги информира корисниците дека завчера настанале технички проблеми на Интернет мрежата во Скопје. Поради тоа, во текот на вчерашниот ден имаше одредени потешкотии кај АДСЛ корисниците во делови на Центар, Буњаковец, Козле, Транспортен центар, Водно, Автокоманда, Момин Поток и Пржино. Екипи на Македонски Телеком веднаш излегле на терен за отстранување на проблемот кој ја оневозможува Интернет услугата

Извор: (26.11.08). Потешкотии со АДСЛ. Вечер

Дневник: Информатичкиот пазар лани вредел 164 милиони долари

Македонскиот пазар на информатичка технологија лани оствари приход од 164 милиони долари, со што достигна „небесен“ раст од 63,8 отсто. Ова се вели во анализата на консултантската агенција „ИДЦ Адријатик“.Според анализата на агенцијата, рекордниот пораст се должи пред се' на големите инвестиции во ИТ-секторот на Владата и на телекомуникациските компании, на финансискиот сектор, како на намалувањето на цените на информатичката опрема и намалениот данок на додадената вредност за неа.- Македонската Влада презеде неколку забележителни акции во минатата година, вклучувајќи голема набавка на ИТ-опрема за образовниот сектор и намалување на ДДВ за компјутерската опрема и софтвер, кофинансирање на набавката на компјутери за апсолвентите и ја зголеми потрошувачката на преносни компјутери. За 22.000 жители беше финансирана обуката за основни ИТ-вештини и интернет. Овие развојни проекти го подигнаа ИТ-пазарот во Македонија, правејќи го најбрзо растечки пазар во Адријатик-регионот- вели Борис Житник, генерален директор на „ИДЦ Адријатик“.Според него, динамичната економија, заедно со владините напори за градење информатичко општество, ќе бидат и понатаму придвижувач на растот на ИТ-пазарот и во наредните години.На македонскиот ИТ- пазар најмногу се продава хардвер, кој со годишен пораст од 88,3 отсто опфаќа речиси три четвртини од вкупниот промет. ИТ-услугите се вториот најголем сегмент, со 16 отсто од вкупната ИТ-потрошувачка и со 22,6 отсто годишен пораст во 2007 година. Пакуваниот софтвер е трет со 10 отсто од вкупниот пазар и со 15,2 отсто годишен пораст.ИДЦ очекува зголемување на ИТ-потрошувачката во Македонија со просечна годишна стапка од 8 отсто во тек на четиригодишниот период на прогноза, а ќе достигне 240 милиони американски долари во 2012 година.

Извор: (26.11.08). Информатичкиот пазар лани вредел 164 милиони долари. Дневник.

Вечер: Македонскиот ИТ пазар со небесен раст во адриатик регионот

Македонскиот ИТ пазар расте најбрзо во адриатик регионот поради инвестициите на Владата во овој сектор, соопшти компанијата ИДЦ, водечки глобален провајдер за истражувања на пазарот, советнички услуги и настани за информатички технологии. Според ИДЦ, ИТ пазарот во Македонија достигна "небесен" годишен раст од 63,8 отсто во 2007 година, на речиси 164 милиони американски долари. Според студијата на компанијата, рекордниот пораст се должи пред се и на големите инвестиции на телекомуникациските компании, континуираната потрошувачка во финансискиот сектор, како и намалувањето на цените на ИТ опремата, заедно со намалениот ДДВ.- Македонската Влада презеде неколку забележителни акции минатата година, вклучувајќи голема набавка на ИТ опрема за образовниот сектор и намалување на ДДВ-то за компјутерската опрема и софтвер. Потоа ја кофинансираше набавката на компјутери за апсолвентите, што ја зголеми потрошувачката на преносни компјутери и ја финансираше обука на 22.000 жители за основни ИТ вештини и интернет. Овие развојни проекти го подигнаа ИТ пазарот во Македонија, правејќи го најбрзо растечки во адриатик регионот - вели Борис Житник, генерален директор на ИДЦ Адриатик. Според оваа компанија, хардверот продолжил да биде најголем и најдинамичен сегмент од македонскиот ИТ пазар, со годишен пораст од 88,3 отсто, опфаќајки речиси три четвртини од вкупниот ИТ пазар. Услугите во овој сектор беа вториот најголем сегмент кој го подигна ИТ пазарот, опфаќајки 16 проценти од вкупната ИТ потрошувачка, со 22,6 отсто годишен пораст во 2007 година. Пакуваниот софтвер,пак, е трет со 10 отсто од вкупниот пазар и со 15,2 проценти годишен пораст.ИДЦ очекува зголемување на ИТ потрошувачката во Македонија со просечна годишна стапка од 8 отсто во тек на четиригодишниот период. Се очекува тој да достигне 240 милиони американски долари во 2012 година.ИДЦ Адриатик е истражувачка компанија со седиште во Загреб, канцеларии во Љубљана и Белград и аналитичари под договор во Скопје, Сараево и Тирана. ИДЦ Адриатик го следи, анализира и прогнозира ИТ пазарот и индустријата во Хрватска, Словенија, Србија, Македонија, Босна и Херцеговина, Црна Гора и Албанија.
Извор: (26.11.08). Македонскиот ИТ пазар со небесен раст во адриатик регионот. Вечер

Утрински: Пречки во АДСЛ - Интернетот на „Т-хоум“

Корисниците на „Т-хоум“ во одредени делови од Скопје во изминатите два дена не можат да користат Интернет-услуга. Ова го потврдија во „Македонски телеком“ од каде што информираат дека АДСЛ- корисниците имаат проблеми со Интернет зашто се појавиле технички проблеми на мрежата во Скопје. Проблемите со користење на Интерент-услугата посебно се јавиле кај АДСЛ- корисниците во делови на Центар, Буњаковец, Козле, Транспортен центар, Водно, Автокоманда, Момин Поток и Пржино. „Екипите на ’Македонски телеком‘ се на терен и целосно посветени на отстранување на проблемот“, се вели во соопштението од оваа компанија.
Извор: (26.11.08). Пречки во АДСЛ - Интернетот на „Т-хоум“. Утрински Весник.

Дневник: „Он.нет“ заинтересиран за „Космофон“

Словенечкиот телеком сака да го купи мобилниот оператор „Космофон“, кој ќе се продава по зделката помеѓу „Дојче телеком“ и грчки ОТЕ, со која се создаде монопол на пазарот за мобилна телефонија во Македонија. Сега сме концентрирани на најавената продажба на вториот мобилен оператор во Македонија. Се очекува „Космофон“ да биде продаден во февруари или во март - изјави Даринка Павлич Камиен, портпаролка на словенечкиот телеком.Словенечкиот телеком во Македонија ја поседува компанијата „Он.нет“, преку која нуди интернет-услуги и фиксна телефонија. Словенците во март 2006 година платија 4,7 милиони евра за 76 отсто од акциите што ги поседуваше американскиот инвестициски фонд СЕАФ и вложија уште еден милион евра како докапитализација. Телеком Словенија во април 2007 година инвестира дополнителни 4 милиони евра со што го зголеми уделот во „Он.нет“ на 83,38 отсто.Процесот на потрага по нов сопственик за „Космофон“ ќе почне откако македонската Комисија за заштита на конкуренцијата официјално ќе го објави решението со кое се утврдува дека се создава монопол во земјава со влезот на „Дојче телеком“ во ОТЕ. Со купувањето 25 отсто од акциите на грчката влада во ОТЕ за 3,2 милијарди евра, Германците, кои во Македонија веќе ги поседуваат фиксниот оператор „Македонски телеком“ и мобилниот „Т-Мобиле“, ќе го преземат и „Космофон“. Во тој случај, „Дојче телеком“ во земјава ќе поседуваа два мобилни оператора, кои заедно држат дури 92 отсто од пазарот, и доминантниот фиксен оператор.Според некои пресметки, „Космофон“ е проценет на 250 до 300 милиони евра, односно е земена цена од 50 евра за секој од неговите околу 600.000 корисници. Самиот процес на продажба на компанијата би се одвивал во три фази. Специјално ангажирани консултантски куќи би направиле длабинска анализа на компанијата, по што ќе се распише конкурс за прибирање првични необврзувачки понуди. Потоа изборот ќе се стесни на три кандидати, од кои ќе се побара да дадат крајна понуда за купување на мобилниот оператор.„Космофон“ ќе се продава со опремата и мрежата на базни станици, која ја покрива целата земја. Во Македонија „Космофон“ поседува лиценца за втора и за трета генерација на мобилна телефонија, но е и фиксен и вајмакс-оператор. За негово купување веќе е заинтересиран „Телеком Австрија“, кој е сопственик на „Вип“.Се очекува постапката за продажба на „Космофон“ да заврши во период од шест до десет месеци и ќе биде будно набљудувана од соодветните институции на Европската Уија.Новата словенечка вада се откажа од планот за продажба на совенечкиот телеком и сега преговара со банките за да обезбеди 400 милиони евра заем наменет за планираните преземања во регионот на поранешна Југославија. Телеком Словенија, покрај за „Космофон“, е заинтересиран и за купување на најголемиот босански телеком-оператор „БХ Телеком“. Словенците барааат можност за инвестирање и во Хрватска, во интернет и телеком-операторите, „Метронет“, „Х1 Телеком“ и „Оптима телеком“.Телеком Словенија е најголем фиксен, мобилен и интернет-оператор во Словенија, со пазарна капитализација од 951,4 милиони евра.

Извор: (25.11.08). „Он.нет“ заинтересиран за „Космофон“. Дневник.

Утрински: Телеком Словенија сака да го купи Космофон

Словенечки „Телеком“ соопшти дека сака да го купи вториот оператор за мобилна телефонија во Македонија „Космофон“. „Сега сме концентрирани на најавената продажба на вториот мобилен оператор во Македонија“, се наведува во соопштение на „Телеком Словенија“.„Космофон“, кој е сопственост на грчки ОТЕ, се очекува да биде продаден во февруари или во март идната година поради заштита на конкуренцијата откако „Дојче телеком“ купи 25 отсто од ОТЕ“, рече портпаролката на словенечки „Телеком“, Даринка Павлишиќ-Камиен.Словенечки „Телеком“ преговара со банките за обезбедување 400 милиони евра заем наменет за планираните преземања во регионот на поранешна Југославија.„Телеком Словенија“, покрај за „Космофон“, заинтересиран е и за купување на најголемиот босански телеком-оператор „БХ телеком“ и бара можност за инвестирање и во Хрватска. „Телеком Словенија“ е најголем фиксен, мобилен и Интернет-оператор во Словенија, со пазарна капитализација од 951,4 милиони евра.

Извор: (25.11.08). Телеком Словенија сака да го купи Космофон. Утрински Весник.

Нова Македонија: ИП-телевизија - реприза кога ќе посакате

Дека ќе можат да паузираат директен пренос од фудбалски натпревар за да тркнат по храна и пијалак или да репризираат постигнат гол кога ќе посакаат се услуги за кои до пред извесно време не ни сонуваа македонските интернет-корисници. Ако до пред неколку години дајалап-врската беше единствена опција за сурфање, денес со воведувањето на услугата ИП-телевизија (телевизија преку интернет-протокол) неизбежен е заклучокот дека Македонија по интернет-услугите воопшто не заостанува зад најразвиените земји во светот. Телефонски разговори, Интернет и телевизија на едно место, на иста сметка, со една точка за поддршка и одржување овозможува трипл плеј-услугата на „Македонскиот телеком“ наречена „3 макс“. Онлајн-видеотека, снимање содржини што ги нудат домашните и странските телевизии, единствена опција за снимање на програмите кога корисникот не е дома, паузирање на програмите дури и кога се во живо, враќање наназад на програмата што се гледа се само дел од можностите што ги нуди ИП-телевизијата. На корисниците им се нудат околу 70 ТВ-канали во рамките на макс-пакетите, и тоа македонски национални и локални канали, канали на соседните држави, како филмски, спортски, музички, детски, информативни, едукативни, забавни и документарни странски канали. Во телекомот во понудата ги издвојуваат филмскиот канал „МГМ“, едукативниот канал „Да Винчи“, спортскиот канал „ЕСПН класик“ и повеќе канали наменети за децата. Трите услуги на едно место технички се овозможени преку платформа-ресивер, која се базира на мајкрософт-решенија, како и на решенија од други познати компании како „Ериксон“ и „Алкател“. Со услугата корисниците добиваат на располагање и „ХД ДВД“-рекордер, кој овозможува снимање голем број разновидни содржини, со меморија од 160 гигабајти. Се добива и безжичен рутер, а програмите од ИП-телевизијата можат да се гледаат на два телевизора во домот. Телекомот на корисниците им нуди два пакета од „3 макс“-услугата. Првиот е „3 макс комфорт“, со кој по цена од 1.999 денари се добиваат 25 гигабајти Интернет, 500 минути разговор на локално и национално ниво, како и 20 отсто попуст на меѓународните разговори и разговори кон мобилната мрежа. Вториот пакет „3 макс комфорт плус“, по цена од 2.499 денари, овозможува неограничен Интернет, неограничени разговори во мрежата на „Македонскиот телеком“, 30 отсто попуст на меѓународните и 20 отсто попуст на разговорите кон мобилните мрежи. Во телекомот информираа дека како резултат на огромниот интерес на граѓаните за најновата услуга „максТВ“ одлучиле да го зголемат бројот на корисници што ќе добијат еден месец бесплатно користење „максТВ“ доколку склучат договор за користење на услугата. Наместо првопријавените 500 корисници, можност за еден месец бесплатно користење ќе имаат првопријавените 1.000 корисници.

Извор: (21.11.08). ИП-телевизија - реприза кога ќе посакате. Нова Македонија.

Вечер: Ваучерите чекаат нов дизајн, студентите компјутери

Ќе се доцни со доделувањето на вредносните бонови - ваучери за апсолвентите како директна субвенција од државата при купување на компјутери. Програмата за доделување на вредносните бонови ќе почне да се реализира со задоцнување од неколку денови, иако требаше да стартува од 15 ноември, бидејќи се уште не е изработен дизајнот, и не се испечатени ваучерите. Од Министерството за финансии, кое е задолжено од Владата да го одработи овој дел од акцијата, тврдат дека проектот ќе доцни малку.
- Собранието доцнеше со носењето на Законот за издавање на вредносни бонови-ваучери и ние моравме да почекаме регулативата да стапи во сила за да можеме да ангажираме печатница која ќе го направи дизајнот и ќе ги испечати ваучерите. Подготовките ги почнавме навреме, но за ваква работа како што е изработка на ваучери потребно е време бидејќи тие треба да бидат добро испечатени и заштитени за да се спречи нивно фалсификување - објаснува портпаролот на Министерството за финансии, Мартин Мартиновски.
Претставници на Министерството за финансии завчера имале состанок со надлежните во ректоратите на сите државни и приватни универзитети во земјава за да ги информираат за причините за пролонгирањето на рокот. Мартиновски уверува дека има доволно време до 15 декември студентите да ги искористат ваучерите.
Министерството за информатичко општество е директно задолжено од Владата да ја реализира оваа програма која се спроведува втора година по ред. Со намера да добиеме информација дали таму се подготвени за реализација на програмата, во отсуство на министерот Иво Ивановски, кој е на службен пат во странство, само кусо ни одговорија дека 15 ноември не значи дека е и датум за почеток на доделување на ваучерите и вината за пролонгирањето ја префрлаат во Министерството за финансии.
Ваучерите се со вредност од 15.500 денари и се наменети за редовни студенти кои по прв пат запишуваат апсолвентска година, а такви се очекува да бидат околу 14.000 студенти. Минатата година пак, беа доделени 12.222 ваучери, а нивната вредност беше 12.300 денари. И при ланската распределба на ваучерите имаше проблеми, но тие не беа од истата природа. Наместо први декември како краен рок за искористување на ваучерите, тогаш студентите добија дополнителни 15 дена.

Извор: (19.11.08). Ваучерите чекаат нов дизајн, студентите компјутери. Вечер.

Утрински: Владата набавува нови компјутери, а старите стојат негибнати

Владата не запира во своите грандиозни најави за масовни набавки на нови компјутери во училиштата. Ова и покрај тоа што и претходно набавените и поставени компјутери во училиштата стојат негибнати и се практично неупотребливи. Најновиот момент во проектот „Компјутер за секое дете“ е набавката на дополнителни шеесет и пет илјади нови компјутери со кои Владата има намера целосно да ја покрие компјутерската мрежа во училиштата. СДСМ вчера обвини дека некој дебело се збогатил од овој проект. Поради овие сомневања, опозициската партија побара формирање анкетна комисија за да се испитаат можни елементи на корупција. Оттаму тврдат дека проектот кој бил најавен уште пред две години е пробиен два пати со роковите, а тоа ги чини граѓаните 35 милиони евра.Министерството за образование вчера експресно организираше прес-конференција на која кажа дека набавката на сите компјутери потребни за училиштата е при крај. Тие се пофалија дека со новата Влада средствата за образованието се далеку поголеми од порано. СДСМ на вчерашната прес-конференција праша кој ќе ја понесе одговорноста за штетноста и лошото планирање и спроведување на проектот „Компјутер за секое дете“. „Нема 150.000 компјутери, а веќе денес незавршениот проект ги чини граѓаните цели 35 милиони евра. За инсталацијата беше одговорно ЈП ’Македонска радиодифузија‘, кое распиша дополнителен тендер од седум милиони евра. Некои сериозно се збогатија од овие пари“, обвини вчера Горанчо Паунов, претседавач на Централниот одбор на СДСМ. Тој потсети дека СДСМ во март 2008 година ги повикал јавниот обвинител и државниот ревизор да поведат постапка за испитување евентуална корупција во владиниот проект „Компјутер за секое дете“. „СДСМ знаеше во каква состојба ги остави училиштата“, порачаа вчера од Министерството за образование и наука. Портпаролката во Министерството, Маја Корубин, рече дека во 2006 година наследиле долг од 150.000 денари, а Владата го намирила. „Моментално во сите средни училишта е поставена компјутерска опрема. ’Мактел‘ го доби тендерот за инсталирање Интернет-конекција во училиштата, која е поставена во сите 93 средни училишта во државата“, изјави Корубин. Таа уверува дека до крајот на месецов ќе бидат готови компјутерските алатки. Според Корубин, досега се набавени две третини од предвидените компјутери за основните и средните училишта, а во текот на идната недела ќе биде отворен тендерот за набавка на преостанатата една третина.Наскоро се очекува Владата да распише меѓународен тендер за набавка на 65.000 компјутери. Но, упатените појаснуваат дека е несигурно дали повторно ќе бидат набавени преку истата фирма. Владата претходно издвои дваесетина милиони евра за набавка на 18.000 компјутери и 80-ина илјади тин-клиенти кои функционираат како компјутерските машини. Премиерот пред повеќе од една година најави дека компјутерите ќе бидат инсталирани во училиштата, а досега заврши инсталирањето само во средните училишта. И тоа неуспешно, барем според тврдењата на директорите, кои велат дека компјутерите наместо за настава се користат за сурфање на Интернет. Згора на тоа, министерот за образование, Перо Стојановски, допрва најавува дека за десетина дена ќе почне обуката на наставниците за компјутерите во училиштата!?

Извор: (18.11.08). Владата набавува нови компјутери, а старите стојат негибнати. Утрински.

Дневник: На компјутерите се учат само игри

Игра за секое дете. Ваква неочекувана намена добија компјутерите што Владата ги обезбеди за модернизирање на наставниот процес и за информатичко образование на учениците во земјава. Освен за прикажување презентација, учениците најчесто ги користат компјутерите за игри или за разговор со своите соученици.Министерството за образование со проектот „Компјутер за секое дете“ постави компјутери во сите средни училишта. Но, поради лошата интернет-врска и други недостатоци, тие многу малку се користат во наставата. Во скопското средно училиште „Ѓорѓи Димитров“, кое го посетивме за да утврдиме како се одвива наставата со компјутери, учениците своите лекции ги запишуваа во тетратки. Велат дека компјутерите најчесто ги користат за да играат, а многу ретко за потребите на предавањето. Велат дека им пречи тоа што работат со програмата „Линукс“.- Повозрасните професори ни велат да не ги вклучуваме компјутерите и затоа на повеќето часови не ги користиме. Имавме само две-три компјутерски презентации досега. Играме игри и се допишуваме меѓусебно, затоа немаме што што друго да правиме со нив. Интернетот е слаб и ништо не може да се отвори - велат средношколците.Тие се жалат дека компјутерите им ја зафаќаат целата клупа, па немаат каде да ги стават тетратките и учебниците, а честопати се препнуваат од каблите што висат од сите страни.Професорите нагласуваат дека е најважно да имаат стабилен интернет, бидејќи целта е децата сами да доаѓаат до информации и така полесно да учат. - Идејата на проектот е децата да можат да истражуваат, а како да го прават тоа кога интернетот е слаб. Не можам да им покажувам слики за материјалот ако нема добар интернет. Работиме на програмата „Линукс“, а обуката што ја имавме беше за „Виндоус“. Сега ќе не' обучуваат за овој софтвер - велат професорите.Директорката на училиштето, Валентина Муцунска, вели дека и покрај тоа што наставниците не биле обучувани за „Линукс“ тоа не претставува проблем за работа со компјутерите. - До 20 ноември треба да се изработат сите алатки што ќе можат да се применуваат за подобрување на квалитетот на наставата и за користење на компјутерите во текот на часот. Очекуваме обуките за новиот софтвер да почнат од 20 ноември - вели Муцунска. Таа се надева дека до средината на декември ќе добијат нови специјални клупи, по што ќе се реши и проблемот со каблите.Професорите се жалат и дека поради компјутерите, немаат добра прегледност, па тешко им е да контролираат што прават учениците за време на часовите. - Кога имаат писмена работа, ќе ги наведнат главите и од компјутерите не се гледа што прават. Кога прават тестови им ги собираме мобилните телефони, ги исклучуваме од струја компјутерите, зашто може да се допишуваат со ученици од другата училница и оттаму да добиваат одговори - велат професорите.Според нив, не може да има квалитетна настава со 35 ученици во еден клас и затоа е потребно паралелките да имаат по дваесет ученици.

Извор: Анета Тодевска. (17.11.08). На компјутерите се учат само игри. Дневник.

Утрински: Долговите го запреа проектот за компјутерите

Проектот „Компјутер за секое дете“ е во застој поради неисплатени долгови кон фирмите-изведувачи на опремата и инсталацијата во основните училишта, тврдат доброупатени извори за „Утрински весник“. Со месеци Јавното претпријатие „Македонска радиодифузија“ не им исплаќало фактури на фирмите за набавената опрема и инсталација, а ситуацијата сега се комплицира и поради директорската смена во претпријатието кое е под лупа на ревизорите. Трпението на фирмите е при крај и тие сега се закануваат дека ќе ја тужат „Македонска радиодифузија“ ако не им бидат исплатени побарувањата. Извори во Министерството за информатичко општество потврдија дека проектот за компјутерите е во застој поради хаотичната состојба во „Македонска радиодифузија“. Според нив, причини за задоцнетата исплата биле бирократските процедури околу одобрувањето на пристигнатите побарувања на фирмите, чиј вкупен износ изнесува 320 милиони денари или 5,2 милиона евра. „Ако во текот на идната недела ’Македонска радиодифузија’ не ни префрли пари во износ од 150 милиони денари, колку што ни должи, ќе се повикаме на договорот и побарувањата ќе ги наплатиме по судски пат“, велат во скопската фирма „Електроелемент“, која набавила опрема за инсталирање на мрежата во училиштата на која треба да се приклучат компјутерите. Оваа фирма испорачала 80 отсто од опремата за основните училишта, а не им е исплатен ниту денар. Во договорот со „Македонска радиодифузија“ стои дека на фирмата ќе и' бидат исплатени средства по пристигнувањето на фактурите. Од „Електроелемент“ велат дека досега на сметка не им легнале пари за изведената работа, иако досега испратиле неколку фактури. „Сега имаме и усно и писмено уверување од сегашната директорка во ’Македонска радиодифузија‘ дека парите ќе ни бидат исплатени“, велат во „Електроелемент“, која е само една од неколкуте фирми што работат на набавка на опрема и инсталација во скопските основни училишта. Деновиве „Македонска радиодифузија“ е под лупа на ревизорите кои, меѓу другото, проверуваат и зошто досега не им се исплаќани пари на изведувачите кои не сакаат отворено да зборуваат за причините за задоцнетата исплата. Новата директорка во ова претпријатие, Јулијана Спировска, вчера беше на состаноци и не сакаше да даде каква било изјава за целиот случај. Молчат и во Министерството за образование и наука.Надлежните во Министерството за информатичко општество признаваат дека проектот е во застој, но тие не очекуваат негово целосно блокирање. Оттаму уверуваат дека проектот ќе продолжи да се реализира како што е предвидено, но со задоцнување поради директорската смена во „Македонска радиодифузија“. Во Министерството објаснуваат дека исплатите на фирмите претходно доцнеле поради изборите, а сега доцни поради смената на раководството во „Македонска радиодифузија“. Поради овие бирократски пречки, според нив, досега парите лежеле на сметка на Министерството за образование наместо да бидат префрлени на„Македонска радиодифузија“. „Проектот не е стопиран. Во ’Македонска радиодифузија‘ имаше промена на раководството и нормално е новата директорка да направи примопредавање за да биде начисто со работите. Затоа и побараа од ревизорите да ја прегледаат обемната документација. Тоа малку ќе ги забави работите, но се надеваме дека од понеделник ќе продолжиме со проектот“, велат во Министерството за информатичко општество. Во Владата најавија дека од понеделник ќе почне компјутеризацијата на шеесетина основни училишта во урбани средини. Со проектот „Компјутер за секое дете“ е предвидено да бидат опфатени вкупно 350 основни училишта.

Извор: (15.11.08). Долговите го запреа проектот за компјутерите. Утрински Весник.

Дневник: Само „Т-мобиле“ заинтересиран за 3Г

„Т-мобиле“ е единствениот заинтересиран за 3Г-лиценца, дозвола за трета генерација на мобилнателефонија.Компанијата е единствениот пријавен понудувач на јавниот оглас за доделување на лиценците, кој го распиша Агенцијата за електронски комуникации. Технологијата 3Г подразбира побрз и поголем проток на видео, говор и на податоци преку мобилен телефон. Операторот што ќе ја добие 3Г-дозволата ќе ја користи 10 години и ќе треба да овозможи безжичен пристап до глобалната телекомуникациска инфраструктура.

Извор: (14.11.08). Само „Т-мобиле“ заинтересиран за 3Г. Дневник.

Вечер: Македонскиот ИТ пазар најбрзорастечки во ЈИЕ

Македонскиот пазар на информатичка технологија (ИТ) е најбрзорастечкиот во Југоисточна Европа. Според проценките што ги направиле во SIF - private equity fund, кој е еден од 18-те фондови на SEAF, вкупниот ИТ пазар во Македонија минатата година вредел околу 163 милиони долари и е речиси двојно поголем во однос на 2006 година. Оливер Костуранов, менаџер во SIF, очекува дека ИТ пазарот во иднина ќе биде еден од најдинамичните во земјава.- Очекувам дека на ИТ пазарот во Македонија ќе има раст во просек од 15 до 20 проценти годишно во наредните четири-пет години. Таква експанзија има(ше) и во регионот. Пример за тоа е хрватскиот ИТ пазар кој за шест години е зголемен за 250 насто - нагласува Костуранов.
Ваквите очекувања на луѓето во SEAF придонесоа овој фонд да инвестира значителни финансиски средства во домашната ИТ компанија ИНет во наредните три години. Костуранов вели дека станува збор за 700.000 долари, од кои 150.000 долари се за докапитализација на ИНет со што SIF во наредните четири години ќе има од 15 до 20 проценти од сопственоста на оваа ИТ компанија. За имплементација на SAP/ERP во ИНет ќе бидат инвестирани 300.000 долари. - Со овој пример SEAF покажува дека продолжува да инвестира во Македонија и покрај глобалната криза и со тоа ги охрабруваме домашните инвеститори да вложуваат во земјата бидејќи е добра бизнис дестинација - смета Костуранов.
ИНет од вчера е авторизиран дистрибутер на софтвер на ИБМ. По тој повод, Горан Бабиќ, директор на канцеларијата на ИБМ во Скопје рече дека очекува од ИНет да им помогне на македонските компании да го зголемат својот бизнис и да станат конкурентни преку примена на интегрираните и иновативни решенија на ИБМ. Тој откри дека софтвер на ИБМ користат УЈП, но и МВР при изработка новите македонски пасоши. Бабиќ рече дека во ИБМ сериозно размислуваат за влез во земјава со производство на софтвер откако екипи на овој софтверски гигант неодамна направиле снимање на можностите во Македонија од аспект на имањето на стручен кадар.
Извор: Светлана Блажевска. (14.11.08). Македонскиот ИТ пазар најбрзорастечки во ЈИЕ. Вечер.

Утрински: „Мајкрософт“ промовира алатка со правопис и речник на македонски

Локаланата канцеларија на „Мајкрософт“ вчера промовираше алатка која на корисниците на „мајкрософт офис“- пакетот им овозможува да ги избегнуваат печатните или правописните грешки при пишување текст на македонски јазик со кирилица. Алатката, позната кај корисниците по нејзиниот назив на англиски како спелчекер се базира на вграден речник на македонскиот јазик и функционира и на македонската и на англиската верзија на „офис 2007“.Пакетот за јазичен интерфејс на македонски јазик може бесплатно да се симне од веб-страницата на „Мајксософт“ www.microsoft.com.mk/lip, но услов е корисниците да поседуваат лиценциран оперативен систем „виндоус“. Според првиот човек на „Мајкрсофт“ во Македонија, Илијанчо Гаговски, иницијативата е резултат на заложбата за зачувување на кирилското писмо, како и подобрување на деловната комуникација, за што во основа е и наменет пакетот „мајкрософт офис“ во кој спаѓаат програмите „ворд“, „ексел“, „аутлук“ и „пауер поинт“. Како што објаснија вчера претставниците на „Мајкрософт“ на брифинг со новинарите, фондот на македонски зборови може да се надополнува со едноставно додавање зборови при користење на новата алатка, а истовремено може да се испраќаат зборови за кои корисниците сметаат дека недостигаат, за што постои форум на страницата на „Мајкрософт“ www.microsoft.com.mk/recnik. Пакетот функционира на стандардните фонтови, како што „тајмс њу роман“, „ариел“ и слично, за кои постои македонска поддршка, додека не може да се применува на изведените фонтови кои имаат предзнак „мак“, како на пример „максвис“ и слично, појасни Димитар Грозданов, специјалист за технологии во „Мајкрософт“. На проектот работи стручен тим од шест лица од Филолошкиот факултет. Се очекува новата алатка да биде прифатена посебно од оние кои почнуваат да работат со компјутери, како и лицата на кои англискиот јазик не им е доволно познат. За тоа особено ќе помогне целосниот превод на менијата на македонски јазик, како и едноставното префлање од англиската верзија на македонска и обратно.

Извор: М.Ј. (13.11.08). „Мајкрософт“ промовира алатка со правопис и речник на македонски . Утрински.

Дневник: „Мајкрософт“ со алатка за правопис и речник на македонски јазик

„Мајкрософт“ вчера ја претстави алатката за проверка на правописот на македонски јазик во пакетот „Офис 2007“. Пакетот е превод од англиската верзија, а алатката за проверка на македонскиот правопис е изработена во соработка со професори од Филолошкиот факултет во Скопје. Пакетот за интерфејс на македонски јазик и на кирилица може да се преземе на www.microsoft.com.mk/lip.Димитар Грозданов, специјалист за технологии во „Мајкрософт“, појасни дека корисниците што не знаат многу англиски јазик со алатката може да ги префрлаат менијата на македонски јазик, но секогаш може да се вратат на основната ставка на англиски јазик.- Вграден е речник на зборови, опфатени по род, член и по други граматички категории на македонскиот јазик. Со инсталираниот правопис се обележуваат непознатите зборови или интернационализмите во текстот, а корисникот може да направи своја база на зборови - вели Грозданов.„Мајкрософт“ отвори и јавен онлајн-форум за предлози за внесување нови зборови и изрази што ќе го збогатат и надградат македонскиот речник во јазичниот интерфејс

Извор: (13.11.08). „Мајкрософт“ со алатка за правопис и речник на македонски јазик. Дневник.

Вечер: Нов пакет на македонски јазик

Компанијата Мајкрософт го претстави новиот пакет за јазичен правопис и речник (интерфејс) во 2007 Office system на македонски јазик. Пакетот за интерфејс на македонски јазик и на кирилица кој е превод од англиската верзија, може да се преземе од веб сајтот www.microsoft.com.mk/lip. Од Мајкрософт велат дека алатката за проверка на македонскиот правопис е изработена во соработка со професори од Филолошкиот факултет во Скопје. Додатоците на македонски јазик во Office system компанијата почна да ги вградува во 2004/2005 година и оттогаш развива подобрени верзии на пакетите.
Димитар Грозданов, специјалист за технологии во Мајкрософт појасни дека корисниците кои добро не знаат англиски јазик, со алатката можат да ги префрлаат менијата на македонски јазик, но во секој момент можат да се вратат на основната ставка на англиски јазик. - Вграден е речник на зборови, опфатени по род, член и по други граматички категории на македонскиот јазик. Со инсталираниот правопис се обележуваат непознатите зборови или интернационализмите во текстот, а корисникот може да креира сопствена база на зборови - вели Грозданов.
На www.microsoft.com.mk/recnik, до средината на февруари ќе може да се внесуваат предлози од јавноста за зборови и изрази што ќе го збогатат и надградат македонскиот речник во јазичниот интерфејс. Директорот на Мајкрософт Македонија, Илијанчо Гаговски рече дека иницијативата е резултат на заложбите за зачувување на кирилското писмо и подобрување на деловната комуникација на корисниците на нивната технологија.
Извор: (13.11.08). Нов пакет на македонски јазик. Вечер.

Нова Македонија: „Интел“ ќе инвестира во македонските информатичари

Американската компанија за информатичка технологија „Интел“ од Сан Франциско ќе инвестира во образованието на младите кадри од Македонија. Ова е дел од содржината на Меморандумот за разбирање и соработка меѓу македонската влада и „Интел“, кој беше потпишан завчера во Сан Франциско.
- Ова е само почеток, а барањата и очекувањата на „Интел“ околу идната соработка ќе бидат дефинирани по истражувањата што ќе ги направи оваа компанија - изјави премиерот Никола Груевски по средбата со менаџерскиот тим на „Интел“. Македонскиот премиер на средбата на која присуствуваа и неговиот заменик Зоран Ставрески, и министрите за економија и за информатичко општество и претставници од бизнис-заедницата го запознал менаџментот на „Интел“ со предностите и можностите за инвестирање во нашата држава. Притоа тој се осврнал за даночните олеснувања за странските инвеститори, како и за реформите што се прават во образовниот процес, како што е компјутеризацијата на училиштата и зголемениот број студенти.
- Одлуката за инвестирање не зависи само од брзината на администрацијата и даночните олеснувања. За тоа е потребен и високообразован кадар. На американските компании им објаснивме дека од наредната година ќе биде отворен факултетот за информатика, на кој ќе се предава на англиски јазик - вели Груевски.
Во „Интел“ биле многу заинтересирани за помагање на високото образование за информатика и најавиле дека тие ќе испраќаат свои експерти кои би држеле предавање на факултетот за информатика.
Македонската бизнис-делегација, на првиот ден од посетата на САД, го посети и седиштето на „Оракл“, каде што во разговор со нивната менаџерка Сафра Катз, се задржаа повеќе од еден час. Од менаџментот на „Оракл“ било соопштено дека Македонија би можела да влезе во нивните планови за проширување во нашиот регион.
Слаѓан Михајловски, извршен директор на „Инфинити солушн“, смета дека потенцијалите за соработка со американските фирми е преку извозот на ИТ-технологијата на европскиот пазар.
- Нашиот потенцијал е во давањето информатички услуги. Постои тренд на селење на оваа индустрија од источноевропските земји во другите држави во регионот. Русија и Украина, поради нискообразованиот кадар и ниската деловна дисциплина, не се повеќе атрактивни за компаниите за производство на ИТ-технологија. Нашата иднина е во извозот на услуги и развојот на софтверската технологија - вели Михајловски.
Програмата за економското претставување на Македонија во САД вчера продолжи со одржување на ИТ-форумот во Силиконската долина и со предавање на универзитетот Стенфорд за „Поврзаноста на науката, универзитетот и приватниот бизнис“.
Извор: (12.11.08). „Интел“ ќе инвестира во македонските информатичари. Нова Македонија.

Утрински: Груевски најави дека „Интел“ влегува во Македонија

САН ФРАНЦИСКО - Американскиот гигант во информатичката технологија „Интел“ ќе инвестира во образованието во Македонија, најавува премиерот Никола Груевски, кој со тим свои соработници неделава престојува во работна посета на САД. Како доказ за оваа најава, Владата на Македонија и „Интел“ потпишаа Меморандум за разбирање во Сан Франциско. „Со овој меморандум треба да имаме поддршка од ’Интел‘ со одредени инвестиции во образованието“, изјави премиерот Груевски по потпишувањето на документот со претседателот на Управниот одбор на компанијата, на кого македонската владина делегација му ги презентирала можностите за инвестирање во Македонија.Раководството на „Интел“, јави известувачот на МИА, било запознаено со инвестициските можности од секаков аспект, пред се' даночен, но и за тоа дека македонската Влада инвестира многу во ИТ-образованието, при што биле посочени детали во врска со зголемувањето на квотите на студенти по информатичка технологија, како и за отворањето нов информатички универзитет, кој од октомври 2009 година ќе почне да работи само на англиски јазик.„Сите овие инвестиции во образованието упатуваат на тоа дека големите мултинационални компании, особено оние од ИТ-бизнисот, во иднина може да сметаат на Македонија како одлична дестинација за бизнис“, истакна премиерот Груевски, додавајќи дека за компаниите е важно не само да им се овозможат ниски даноци или брза регистрација туку да им се понуди и добар кадар, и по квалитет и по квантитет.За македонскиот премиер, учеството на американскиот амбасадор во Македонија Филип Рикер во делегацијата дава поддршка во напорите во привлекување на компаниите во нашата држава, отворање нови работни места и продлабочување на економските релации меѓу Америка и Македонија.Македонската владина делегација, во чиј состав се и вицепремиерот задолжен за економски прашања, Зоран Ставрески, министрите за економија, за странски инвестиции и за информатичко општество, Фатмир Бесими, Веле Самак и Иво Ивановски, и директорот на Агенцијата за странски инвестиции, Виктор Мизо, во Сан Франциско имале средби и со раководствата на американските гиганти „Хјулит Пакард“, „Оракл“ и „Сан мајкросистемс“.Според програмата, се најавува дека во Силиконската долина, центар на американската и на светската ИТ-технологија, ќе се одржи Бизнис-форумот „Македонија - земја на ИТ-експерти“, на кој ќе бидат презентирани економските политики со посебен фокус на реформите за унапредување на информатичкото општество и образованието насочени кон подобрување на вкупната бизнис-клима и привлекување реномирани американски инвеститори.

Извор: МИА. (12.11.08). Груевски најави дека „Интел“ влегува во Македонија. Утрински Весник.

Нова Македонија: Телефонска линија за корупција во спортот?

Изградба на маалски игралишта, акции против дрогата, против сидата, финансирање книги, омасовување на извидниците, отворена линија за корупција во спортот се дел од идеите што ги дале македонските граѓани на отворениот ден во Агенцијата за млади и за спорт (АМС) т.н. Ден на идеи. „Денот“ АМС го направи по урнек на Владата на Македонија, која, исто така, имаше отворен ден со граѓаните за да го слушне гласот на народот.
За пет часа околу 500 граѓани на возраст од 18 до 70 години (ученици, пензионери, универзитетски професори...) продефилирале во АМС во неделата со свои идеи како да се унапреди спортот во државава и како да се подобри квалитетот на животот на младите. Некои од нив биле неинформирани, па од АМС барале изградба на нови спортски игралишта (Агенцијата веќе гради 50 типски фудбалски игралишта). Нивните идеи биле за изградба на игралишта по скопските маала, но тоа се веќе ингеренции на општините.
Имало предлози и на пензионери што имаат богата архива за училишни настапи и резултати, па од АМС барале финансиска поддршка за издавање книга или брошура во која ќе се најдат на едно место собрани сите резултати.
Во просториите на АМС на средба со директорот на Агенцијата бил и еден извиднички одред со предлог за омасовување на оваа активност. За Агенцијата најприфатлив бил предлогот за бесплатна телефонска линија за корупција во спортот.
- Оваа идеја засега е најприфатлива за АМС и таа најмногу н? заинтересира. Ќе ги разгледаме и другите, па оние што заслужуваат ќе бидат промовирани во јавноста - изјави , портпарол на АМС.

Извор: (11.11.08). Телефонска линија за корупција во спортот?. Нова Македонија.

Нова Македонија: „Македонски телеком“ воведе телевизија преку интернет-протокол

Вест: Телеком почнува со Интернет телевизија

Македонски телеком од 17-ти овој месец ќе понуди Интернет телевизија "Макс ТВ". Станува збор за услуга слична на кабелската телевизија, но во овој случај претплатниците на Телеком 70-ина телевизиски канали ќе добиваат преку Интернет. Услугата овозможува снимање на програмата кога корисникот не е дома, паузирање на програмите кои се емитуваат во живо, без да се пропушти дел од преносот, премотување на програмата што се гледа наназад, нарачка на филм (познато како "видео он деманд") и слично. Приклучокот за телевизијата чини 1.290 денари, но ќе се наплаќа од следната година, кога завршува промоцијата на услугата. Месечната претплата само за телевизијата изнесува 999 денари, додека претплатата за пакетите во кои се вклучени сите три услуги - телевизија, Интернет и фиксна телефонија се движи од 1.999 до 2.499 денари. Цената на оваа услуга во Германија изнесува околу 50 евра.

Извор: (8.11.08). Телеком почнува со Интернет телевизија. Вест.

Утрински: „Македонски телеком“ нуди интерактивна телевизија

„Македонски телеком“ ја воведува услугата телевизија преку Интернет протокол ИПТВ, под брендот МаксТВ. Комерцијалниот старт на услугата ќе биде дел од трипл плеј пакетот, сервис со кој компанијата, исто така, првпат настапува на пазарот, и ќе нуди, покрај ИПТВ, фиксна телефонија и Интернет. Во рамки на овие пакети корисниците ќе добиваат три услуги на иста сметка, преку два пакета, 3 Макс комфорт по цена од 1.999 денари и 3 Макс комфорт плус по цена од 2.499 денари. Ќе се наплаќа и еднократен надомест од 1.299 денари за инсталирање на потребниот приклучок и опрема. Според главниот извршен директор на „Македонски телеком“, Николај Бејкерс, со воведувањето на Макс ТВ-услугата, граѓаните на Македонија ќе уживаат во производите и бенефитите на најсовремената технологија. „Со Макс ТВ-услугата се добиваат различни мултимедијални и интерактивни телевизиски и видеосодржини со многу подобар квалитет на ТВ-сигналот“, објасни Манче Трендафилов од „ Македонски телеком“. Пакетот 3 Макс комфорт содржи Интернет од 25 гигабајти сообраќај, 500 минути разговор на локално и национално ниво, 20 проценти попуст на меѓународни разговори кон мобилните мрежи, бесплатни меѓународни разговори кон 10 земји и 70 телевизиски канали. Содржината на 3 Макс комфорт плус пакетот опфаќа неограничен Интернет и разговори во мрежата на „Телеком“, 30 проценти попуст на меѓународни разговори и 20 проценти попуст на разговорите кон мобилните мрежи, како и 70 телевизиски канали.

Извор: МИА. (8.11.08). „Македонски телеком“ нуди интерактивна телевизија. Утрински.

Вечер: Откажани 26.000 фиксни линии за една година

Растат приходите на Т-Мобиле Македонија, а натаму опаѓаат на Македонски телеком. Заклучно со 30 септември годинава, приходите на мобилниот оператор достигнале 132,7 милиони евра што е за 4,3 проценти повеќе од истиот период лани. Приходите на Телеком, пак, опаднале за 2,7 проценти и на крајот на септември годинава изнесувале 119,6 милиони евра.
Како што стои во финансискиот извештај што го објави вчера Маѓар Телеком, падот на приходите на Македонски телеком се должи на намалениот говорен сообраќај од 11,6 проценти. Опаднат е и бројот на претплатници за 5,2 проценти или откажани се 26.120 фиксни линии. Ако на 30 септември 2007 година Телеком имал 498.910 претплатни телефонски линии, за една година бројот опаднал на 472.790 што е последица од мигрирањето на корисниците во мобилната телефонија.
Многу подобри се бројките што се однесуваат на интернет услугите што ги дава Телеком. Заклучно со 30 септември годинава, бројот на интернет претплатници изнесувал 93.112 што во однос на истиот период лани е пораст за 94 проценти. Зголемување од 243,1 процент е забележан кај АДСЛ конекциите и за првите девет месеци изнесувал 85.223.
Сепак приходите остварени од интернет услугите не можат да го компензираат намалениот број претплатници на фиксни линии и на опаднатиот телефонски сообраќај од 16 проценти. Тоа се рефлектирало на добивката пред оданочување од 51,5 милиони евра која Телеком ја има остварено за деветте месеци од годинава. За разлика од истиот период лани, таа е пониска за 7,7 милиони евра или 13,1 процент.
Финансиските резултати на Т-Мобиле Македонија и покрај континуираното намалување на тарифите и работењето со уште два конкурента на мобилниот пазар, покажале нагорна линија. За 22,1 процент е пораснат бројот на корисници и заклучно со 30 септември годинава изнесувал 1.301.183. Добивката пред оданочување на компанијата достигна 74,4 милиони евра што е за 3,5 милиони евра повеќе од истиот период лани.

Извор: Светлана Блажевска. 07.11.08. Откажани 26.000 фиксни линии за една година. Вечер.