Дневник: Основци пишуваат домашно на лаптопи

Невообичаена тишина и работна атмосфера без звуци на гребење со моливи по хартија ве пречекуваат при влегувањето во училницата на второ Б-одделение во скопското училиште „Војдан Чернодрински“. Дваесет и пет второодделенци, по двајца во клупа, наведнати напред сконцентрирано пишуваат текст. Но, никаде нема моливчиња, тетратки, гумички. Пред нив има само лаптоп-компјутери.Учениците од ова одделение наставата комплетно ја изведуваат преку специјалните лаптопи што им ги донираше фондацијата ОЛПЦ (One Lap Top Per Child), за потребите на студијата што ја спроведува преку УНДП. Во студијата е вклучена уште една паралелка второодделенци од скопското училиште „Дитурија“. Идејата беше во текот на целата учебна година секое дете од двете паралелки, заедно со наставничките, пред себе да има лаптоп што ќе го користи по сите предмети, а по завршувањето на часовите, ќе го носи дома. Компјутерчињата навидум изгледаат како играчки. Малечки се, пластични, шарени. Работат на батерии, така што нема потреба од дополнителни кабли. Иако се многу поинакви од лаптопите на кои сме навикнати, можностите што ги нудат позитивно ќе ве изненадат.На компјутерот пишувам домашно, прераскажувам текстови, цртам, играм. Дома се снимам, а ја сликам и сестра ми. Најмногу сакам да пишувам. Има едно програмче со кое можам да ставам какви сакам букви - дебели, искривени. А можам да внесам и цртежи и слики во текстот. Најмногу ме радува што не мора да се пишува се' од почеток ако згрешам и не мора да ја кинам страницата. Ако згрешам, го притискам ова копче за бришење - објаснува малечката Сара. Децата со воодушевување зборуваат за компјутерите. Зачудува нивното познавање на термините од информатичката технологија, кои со леснотијата ги употребуваат. Иако имаат само осум години, нивните прстиња вешто „командуваат“ со стрелките на мониторот додека покажуваат што се' можат да работат на лаптопите. Моментно прераскажувам текст за тоа како месечината ни дошла на гости. На компјутер многу побрзо ми оди. Дома го користам за цртање и за да ја сликам мачката Маки. На почетокот ми беше малку тешко зашто се' што ќе напишав ми се бришеше. Тогаш го викав брат ми, тој се разбира во компјутери. Ама сега се навикнав и сакам, ако може, да ни ги остават и за во трето одделение - вели Дарија. Нивната наставничка Билјана Нелоска е презадоволна од резултатите што децата ги постигнале откако ги имаат компјутерите. Таа објаснува дека ги користат за сите предмети, освен за физичко воспитување. Со нив пишуваат, цртаат, сметаат, снимаат, пребаруваат по интернет. Деветнаесет години работам со деца, но искуството со лаптопите е најпозитивно досега. Скратено е времето за учење, решаваме многу повеќе задачи за еден час, грешките побрзо се коригираат, а креативноста на децата повеќе доаѓа до израз. И реакциите на родителите се многу позитивни. Нивното користење во наставата не му штети на воспитно-образовниот процес. Ништо не е запоставено во однос на наставната програма. Секако дека би сакала вака да работиме и следната година - вели Нелоска.

Извор: Даница Тунтевска. (31.5.08). Основци пишуваат домашно на лаптопи. Дневник.

Утрински: Наместо 500 вработени, засега „Телеком“ го напуштаат само 400

Од „Македонски телеком“ засега доброволно ќе си заминат само 400 вработени. Имено, во речиси едномесечниот период даден од компанијата за прибирање барања за излегување од фирмата со испратнина, наместо 500, се пријавиле 100 вработени помалку. На дел од вработените веќе им тече отказниот рок и се планира тие да го напуштат „Телеком“ до средината на јуни. Апликациите на дел од вработените се' уште се во фаза на разгледување заради организирање на понатамошната работа преку согледување кои работни места ќе се испразнат.

Од „Македонски телеком“ велат дека пријавените 400 вработени за заминување од фирмата се задоволителна бројка, иако тие првично имаа проекции за заминувања на 500 лица од работа.

Оттаму не сакаа да коментираат што ќе се случи со 100 вработени, кои како бројка се' уште го оптоваруваат работењето на компанијата.

Паралелно со акцијата за доброволно заминување, компанијата сака да се ослободи и од дејностите за кои смета дека повеќе не и' се потребни. Се бараат надворешни фирми да ги преземат секторите напојување и информации, а се планираат и 100 нови вработувања во согласност со плановите за реструктурирање на компанијата.

Процесот на внатрешните промени во „Македонски телеком“ преку намалување на бројот на вработени со исплата на испратнини ќе ја чини компанијата 11 милиони евра. Од компанијата најавија дека идната година ќе има мали корекции на бројот на вработени.

Извор: А.С. (30.5.2008). Наместо 500 вработени, засега „Телеком“ го напуштаат само 400. Утрински Весник.

Нова Македонија: Марко Чаласан - најмладиот компјутерски стручњак на планетата

Малиот Марко Чаласан, кој на 24 јули ќе наполни осум години и е ученик во второ одделение во ОУ „Блаже Конески“ во скопската населба Аеродром, е најмалиот компјутерски стручњак на нашата планета. Ова дете-генијалец со чекори од седум милји ита кон новите знаења од областа на информатиката. Како сунѓер ги впива многубројните податоци и комплицирани формули, дефиниции, изрази и операции и со секојдневно учење, но и со примена на знаењето во практиката, користејќи ги компјутерите што ги доби на подарок од македонската влада, под будното око на својот татко Милан Чаласан, кој е систем-оператор, прави напори да ги совлада тајните и да се обучи за користење на современите технологии. По полагањето на стручните испити, од кои се стекна со три сертификати на „Мајкрософт“, Марко секојдневно се подготвува за четвртиот испит, кој треба да го полага кон крајот на 2008 година, по што ќе биде само чекор пред звањето систем-администратор и ќе може да поставува мрежи, сервери и компјутерски системи во големи фирми.
Пред Марко Чаласан се голема иднина и успеси, кои ќе ја прослават Македонија во светот во областа на информатиката. Државата веќе му даде поддршка и стипендија со желба Марко еден ден да биде наша национална гордост, иако и сега веќе има многу причини да се гордееме со неговиот талент и натпросечна интелигенција. На 8 јуни Марко ќе ја прими наградата „златна петка за најуспешните“ заедно со други деца-таленти од Македонија на возраст до 18 години. Неодамна доби награда и од словенечката фирма „Астек“ од Љубљана, каде што го полагаше третиот стручен испит на „Мајкрософт“.Второодделенецот Марко Чаласан го посетивме во неговиот дом, во Скопје, каде што вредно учи и се подготвува за четвртиот испит за систем-администратор. Со сегашните дипломи тој може да работи како техничка поддршка, т.е. да им помага на корисниците при специфични проблеми со технологијата.
- Уште два испита ќе администрирам на сервери и ќе решавам проблеми, а потоа кога ќе станам систем-инженер ќе планирам мрежи - вели Марко.

Имаш ли практично искуство по добивањето на сретификатите на „Мајкрософт“?
- Да, во организацијата „Полио плус“ поставив компјутерска мрежа и сега ја одржувам преку ВПН. Пристапувам и ја контролирам поставената програма и постојано го изучувам и го надградувам она што претходно ќе го извежбувам во мојата компјутерска лабораторијата.

На што работиш сега?
- Сега работам на „Виндоус флот“, ги изучувам технологиите за испитот 70-390. Тие технологии опфаќаат доменски групи, кориснички налози, доменски компјутерски налози, решавање проблеми со печатачи лап и дајрект три, кориснички налози, компјутери, групи.

Како изгледа еден твој ден кога не одиш на училиште?
- Па учам по четири часа на ден, два часа теорија и два часа практика. Татко ми Милан ме учи, тој има многу адаптибилна програма. Затоа со дел од компјутерите што ги добив како подарок од Владата на Македонија, кои останаа во моето училиште „Блаже Конески“, отворивме компјутерска школа, во која се запишани деца на возраст од 5 до 10 години. Тие одлично ја прифаќаат програмата и брзо напредуваат. Понекогаш и јас им објаснувам, но сега малку поретко, зашто сум зафатен со подготовките за испитот. Се одморам и со изучување на моите омилени бинарни броеви, навистина го сакам тоа.

Слушнавме дека многу те интересира изучувањето на безбедноста на компјутерите.
- Тоа е моја омилена област. Компјутерите се заштитуваат со четири чекори. Првиот чекор е да се вклучи „Виндоус фајр“, втор да се апдејтува системот со помош на „Виндоус апдејтинг“ или „Мајкрософт апдејт“, да ги има најновите заштити, да се инсталира антивирусна програма што штити од вируси и црви и други работи и, на крајот, последниот чекор е да се инсталира антиспајдер-програма.

Што би сакал да работиш кога ќе пораснеш?
- Кога ќе пораснам сакам да истражувам во областа на компјутерите.

Дали ти е здодевно на училиште?
- Па не, наставничката Александра и другите деца дури ми приредија забава кога го положив испитот за вториот „мајкрософт“-сертификат. Но ми беше доволен само еден ден ги исчитам учебникот по математика и читанката. Мои омилени книги се „Виндоус сервер 2003“, „Виндоус ХР профешнал“ и за да ги прочитам ми треба многу повеќе време, а освен тоа со нив постојано откривам нешто ново за компјутерите.

Играш ли компјутерски игри?
- Не играм за да не ми се испомеша материјалот што го учам, а немам ни желба за тоа.

Точно ли е дека кај вас дома се јавуваат луѓе што сакаат ти да им инсталираш компјутер?
- Многу луѓе се јавуваат кај нас дома и на неколкумина им инсталирав компјутери. Ги конфигурирам, инсталирам софтвер и се е ОК.

Имаш ли време за играње?
- Да, еве сега учам да возам ролерки. Сакам и да пливам, да пешачам... Понекогаш со моите родители Милан и Радица одиме пеш до крстот на Водно. Се допишувам со другарите на Скајп. На телевизија сакам да го гледам каналот Дискавери и да читам енциклопедии за деца, како што е „Илјада зашто, илјада затоа“.

Дали планираш да ја скратиш долгата коса?
- Не, не ми пречи и не сакам да ја скратам косата. Мене ми се допаѓа.


Супербебе

Од многу мал многу брзо учеше, паметеше, но јас во почетокот мислев дека тоа е нормално. Се уште ја чуваме снимката на диктафон на која тогаш 18-месечниот Марко ги кажува буквите на латиница: ова е зет, ова е икс, ова е ипсилон. Уште како бебе уживаше да седи пред компјутерот, а на две години ги распознаваше марките автомобили, вели Радица Чаласан, мајката на малиот генијалец и додава:
- Марко е дете со визија, секогаш забележува нешто ново, открива грешки. Сака да чита енциклопедиски податоци, брзо памети и лесно учи стручни изрази и зборови. Има огромен фонд странски зборови. Најпрво научи да чита латиница и англиски јазик, па потоа кирилица. Освен компјутерите, ги сака астрономијата, географијата, биологијата, анатомијата. Ги знае сите планети, нивните температури, гравитацијата, растојанието една од друга...

Извор: Марија Таушанска. (27.5.2008). Марко Чаласан - најмладиот компјутерски стручњак на планетата. Нова Македонија.

Нова Македонија: Владата ќе бара отштета за проневерите во телекомот

Владата ќе поведе постапка за обесштетување поради финансиските малверзации во „Македонски телекомуникации“, со кои од касата на компанијата од 2004 до 2006 година биле проневерени околу 6,7 милиони евра. Правници велат дека Владата, која е сопственик на акционерски капитал во компанијата, има легитимно право да бара одговорност и обесштетување за финансиските проневери. Во телекомот немаат коментар за овој случај.
Ивица Боцевски, портпарол на Владата, вели дека дефинитивно ќе се поведе постапка.
- Апсолутно ќе поведеме постапка за обесштетување. Ќе ги следиме сите наоди од истрагата. Откако ќе има конечни наоди, ќе следува постапка - вели Ивица Боцевски, портпарол на Владата.
Борче Давитковски, професор на Правниот факултет и поранешен член на одборот на директори на телекомот, вели дека одлуките за вакви услуги никогаш не биле одобрувани од одборот. Тој додава дека во купопродажниот договор имало клаузула со која доминантните сопственици можеле извесна сума пари да ја трошат на консултантски услуги без претходно одобрување од одборот на директори. Давитковски вели дека државата има право да бара отштета од „Маџар телеком“.
- Во тоа време државата поседуваше речиси 49 отсто од капиталот во телекомот. Така што, како оштетен акционер има легитимно право во судска постапка да побара одговорност и финансиски средства како обесштетување - вели Давитковски.
Завчера „Маџар телеком“, мнозински акционер во телекомот, објави дека од „Македонски телекомуникации“ од 2004 до 2006 година незаконски се одлеале 6,7 милиони евра. Оттаму презентираа дел од извештајот на американската ревизорска куќа „Вајт и Кејс“, ангажирана да открие нерегуларности во работата на телекомот, во кој се вели дека има потврдени докази за незаконитост во формирањето и спроведувањето шест договори за советодавни и маркетинг-услуги, извештаи за работата на компанијата и лобирање во Македонија во периодот 2004-2006 година. Во извештајот се вели дека спорните договори биле склучени со консултантска компанија од Кипар. Финансиските малверзации во телекомот беа извршени кога прв човек на компанијата беше Атила Сендреи. Откако беа откриени незаконските исплати од касата на телекомот, на „Маџар телеком“, компанија што котира на берзата во Њујорк, и беше наложено да ја ангажира познатата ревизорска куќа од САД за детално да го испита случајот. Тогаш Атила Сендреи беше сменет и од функцијата, а според официјалната верзија тој се повлече од здравствени причини. Според неофицијалните податоци, токму со одобрување од Сендреи во неколку наврати на сметката на кипарската „Чаптекс холдинг лимитед“ биле префрлани суми од по еден милион евра. Неколкуте договори со консултантската куќа биле потпишувани на оваа сума за да не се бара одобрување од одборот на директори. Се испитува дали телекомот воопшто добивал некакви услуги од оваа фирма. Истрагите за финансиските проневери во телекомот предизвикаа дополнителни штети, бидејќи „Маџар телеком“ не можеше навреме да ги подготви финансиските извештаи, поради што добиваше казни од надлежните институции. Во телекомот велат дека нема да го коментираат случајот, со оглед на тоа што истрагата ја води „Маџар телеком“ и се уште е во тек.

Извор: В.Н. (23.5.08). Владата ќе бара отштета за проневерите во телекомот. Нова Македонија.

Дневник: Од македонскиот телеком украдени 6,7 милиони евра

Од „Македонски телеком“ незаконски се одлеале 6,7 милиони евра за консултантски договори во периодот од 2004 до 2006 година, официјално објави мнозинскиот сопственик, унгарската компанија „Маѓар телеком“. Во извештајот подготвен од американската ревизорска куќа „Вајт и Кејс“ се истакнува дека „има потврдени докази за незаконитост во формирањето и спроведувањето шест договори за советодавни услуги, маркетинг-услуги, извештаи за работата на компанијата и лобирање во Македонија во периодот 2004-2006 година“.Според извештајот, сомнителните договори биле направени со консултантска куќа од Кипар. Во „Вајт и Кејс“ посочуваат дека извештајот не е конечен и не се однесува на сите договори што биле испитувани.

Извор: (22.5.2008). Од македонскиот телеком украдени 6,7 милиони евра. Дневник.

Време: Невработени струмичани ќе учат информатика

Институт за применета технологија наскоро ќе биде отворен во Струмица, во кој за една и пол година 40 до 60 невработени со високо образование ќе го доусовршат своето знаење од областа на информатиката и на менаџментот. Во овој проект, поддржан од КАРДС-програмата за добрососедство, ќе бидат инвестирани 137.000 евра, од кои 117.000 евра се донација од ЕУ. Остатокот е обезбеден од општинскиот буџет преку Одделението за локален економски развој, јави МИА. Институтот, кој ќе биде опремен со компјутери, печатачи, ЛЦД-проектори и други современи уреди, ќе им помага на невработените низ забрзани курсеви да го подобрат и збогатат знаењето за да може полесно да најдат работа. За обучувачи ќе бидат ангажирани стручни лица од земјава и од странство. По завршувањето на обуката учесниците ќе добијат меѓународен сертификат за завршен курс.

Извор: (22.5.08). Невработени струмичани ќе учат информатика. Дневник.

Вечер: Опаѓа процентот на нелегален софтвер во Македонија

Шеесет и осум отсто од софтверот инсталиран во Македонија во 2007 година е нелегален, покажуваат податоците од глобалната студија за пиратски софтвер на меѓународната компанија за истражување и предвидување во ИТ-секторот, БСА.
Ова претставува намалување за 4 отсто, споредено со 2004 кога 72 проценти од софтверот инсталиран во Македонија бил нелегален. Заедно со уште неколку земји од регионот, Македонија бележи најголем пад во процентот на нелегално инсталиран софтвер. Загубата за државата која ја предизвикал пиратскиот софтвер се зголемила од 10 милиони долари во 2006, на 11 милиони долари минатата година. Споредено со државите од регионот, Македонија има пониска стапка на пиратско софтверство од Србија, 76 проценти, Црна Гора 83% и Албанија 78 отсто. Стапката на нелегален софтвер е иста како и во Македонија, во Бугарија, Босна и Херцеговина и Романија, а полошо од нас стојат и Русија и Украина со 83%.
Подобро рангирани се Словенија и Хрватска со 48%, односно 54%, но кај нив поголеми се и загубите, кои низнесуваат 39 и 68 милиони долари.
Според податоците во студијата, на глобално ниво, процентот на инсталиран пиратски софтвер во светот пораснал од 35% на 38 отсто.Иако стапката на пиратерија опаднала во 67 од 108 земји, загубата во светски рамки изнесува 47 милијарди долари и е поголема во однос на онаа од 2006 година за дури 7 милијарди долари.
Држави со највисок степен на нелегален софтвер се: Ерменија со 93%, Бангладеш 92%, Зимбабве 91% и Шри Ланка 90%.Од друга страна, држави со најголем степен на легално инсталиран софтвер се: САД со 20%, Луксембург 21%, Нов Зеланд 22%, Јапонија 23% и Австрија, Белгија, Данска, Шведска, Финска и Швајцарија со 25% илегален софтвер.

Извор: Г.Ма. (20.5.08). Опаѓа процентот на нелегален софтвер во Македонија. Вечер.

Утрински: Пријави против мобилните оператори за личните податоци

Дирекцијата за заштита на лични податоци вчера поднесе три прекршочни пријави против телекомуникациски оператори поради злоупотреба на лични податоци при склучување претплатнички договори за мобилната телефонија. „Се случува да бидат склучени претплатнички договори со лични податоци, кои се злоупотребени од други лица. Се користат фотокопии од лични карти, односно се користат нечии туѓи податоци за склучување договори. Тука станува збор за класична измама и крадење идентитет“, изјави вчера директорката на Дирекцијата Маријана Марушиќ. Директорката објаснува дека кај нив реагирале лица што добивале високи сметки, бидејќи тврделе дека не склучиле договори, а на адресата им стигнуваат енормно високи сметки за користени мобилни телефони на одреден оператор.„Оваа појава е честа и од тие причини се поведени овие прекршочни постапки со цел мобилните оператори да ги преземат потребните мерки за да се спречи ова“, вели Марушиќ. Како пример, таа го наведе случајот на еден граѓанин кој докажал дека во моментот на склучувањето на претплатничкиот договор бил во странство. Моментно, Дирекцијата работи на 55 случаи за кои постојат сомневања дека се злоупотребени личните податоци. Во врска со случајот на двојниците на СДПМ, Дирекцијата го завршила увидот во Државната изборна комисија, при што евидентирале дека постојат изјави со потписи на кандидатите, при што не навлегува во веродостојноста на изјавите. Дирекцијата се' уште го очекува одговорот од судот дали СДПМ има регистрирано друга адреса на седиштето на партијата, бидејќи на адресата која е наведена во официјалните документи не постои седиште на оваа партија.

Извор: Ж.Х.З. (19.5.08). Пријави против мобилните оператори за личните податоци. Утрински.

Дневник: Секој против секого во Македонската радио-телевизија

Управниот одбор на Македонската радио-телевизија подготвува обемно досие со документација за финансиски малверзации на извршниот директор Јанез Сајовиц, што ќе го достави до државните органи. Досието се подготвува како одговор на завчерашните обвинувања изречени од Сајовиц дека другите раководни кадри од сметката на јавниот сервис незаконски извадиле големи суми пари и набавувале опрема без да се знае за која намена.Додека раководството на МРТ е во кавга, вработените најавија дека во вторник ќе стапат во штрајк ако не им се исплатат две плати и хранарината за првите пет месеци од годинава. Синдикатот побара извршните директори и Управниот одбор да си поднесат оставки ако не ги решат овие проблеми до понеделник, за да преговараат со Владата.Директорот Сајовиц им порача на синдикалците да не бараат пари од него, туку од претседателот на Управниот одбор, Леонид Наков. Тој го обвини Наков дека го понижувал, му ги суспендирал менаџерските права, незаконски му го поништил менаџерскиот договор, а на крајот му ги суспендирал ингеренциите. Во УО велат дека членовите на комисиите што биле задолжени за определување на технолошки вишок им укажале дека Сајовиц погрешно ја водел процедурата. Членовите на комисиите ќе достават докази до УО за малтретирањата и за притисоците на кои биле изложени од страна на Сајовиц.Во досието ќе има докази за склучени штетни финансиски договори од страна на Сајовиц. Тој отстапувал поголемо рекламно време без наша согласност и потпишувал договори надвор од неговите ингеренции. Членови на Комисијата за систематизација на работните места се жалеа дека директно влијаел врз нивната работа - велат членови на УО.Во управата на МРТ тврдат дека е неточна изјавата на Сајовиц дека донел 33 милиони денари, туку дека последниот прилив на средства од 61 милион денари е наменски побаран и одобрен од Владата од други високи структури во јавниот сервис.Извршната директорка на МРТ, Маја Мишковска, во реакцијата на обвинувањата од Сајовиц, вели дека со својот интегритет гарантира дека сите активности што досега ги презела се во согласност со законот.

Извор: Марјан Блажевски. (17.5.08). Секој против секого во Македонската радио-телевизија. Дневник.

Дневник: „Вип“ во загуба од 6,9 мил.евра

Третиот мобилен оператор „Вип“ во првите три месеци годинава има оперативна загуба од 6,9 милиони евра. Според официјалниот извештај од „Мобилком Австрија“, сопственикот на „Вип“, приходите во првите три месеци од годинава изнесуваат 1,8 милион евра, а трошоците од почнувањето со работа во земјава достигнале шест милиони евра.„Вип“ почна да работи во Македонија во септември лани. На крајот од март имаше пазарен удел од 8,1 отсто.

Извор: (17.5.08). „Вип“ во загуба од 6,9 мил.евра. Дневник.

Вест: Владата ја дрибла антикорупциската комисија

Уште од 2006 година за кампањата "100 дена Влада" Антикорупциската комисија чека отчет од Владата за потрошените народни пари за оваа реклама. На вчерашниот прес претседателката на Комисијата Мирјана Димовска потврди дека се уште тој случај не е затворен, бидејќи се чекале одговорите на потпрашањата кои биле испратени до Владата, откако таа не дала комплетен извештај.
Антикорупциската комисија кон крајот на минатиот месец побарала информација од Владата дали владината кампања "Во каква Македонија живееш? - Од тебе зависи" е согласно Законот за јавните набавки, дали таа била предвидена со годишниот план за јавни набавки и за кој период колку буџетски средства биле предвидени за неа?...
"Одговор нема", рече Димовска.
Комисијата препорачала за време на предизборната кампања да се запрат огласите за вработување во министерствата за култура и за здравство, во Струшката болница, како и на 70-темина лица во ЈП "Охридски комуналец", а укажала да се запре и владиниот оглас за стипендирање помлади асистенти до завршувањето на изборниот процес.
Димовска соопшти дека од вкупно 120 пратеници, на кои пред еден месец им престана мандатот, 91 пратеник поднеле анкетен лист за имотната состојба. Од нив 67 се наоѓале на новите листи на пратеници.

Извор: С.К.Д. (17.5.2008). Владата ја дрибла антикорупциската комисија. Вест.

Вест: Телеком во јуни ќе дели дивиденда

Акционерите кои до 19 јуни годинава ќе се запишат во акционерската книга на Македонски телеком, ќе добијат дивиденда од 56,71 денар по акција од профитот на компанијата за 2007 година. Дефинитивната одлука за исплата на дивиденда во вредност од 50 отсто од добивката околу девет милијарди денари (околу 160 милиони евра) од 2007 година треба да ја донесе Собранието на акционери на 11 јуни годинава. Потоа, најдоцна до 30 јуни треба да стартува исплатата на дивидендата на сите акционери.
Од Телеком вчера немаше официјално информација како ќе се делат 80-те милиони евра, но грубо пресметано според бројот на акции, Владата, која поседува околу 34 отсто од капиталот, треба да добие околу 30 милиони евра, додека странскиот партнер "Камени мост" (во ликвидација) ќе изнесе околу 45 милиони евра. Околу 1,5 милиони евра ќе му следат на ИФЦ. Околу 3.000 мали акционери треба да поделат околу 2 милиона евра.
Телеком, пак, самиот себеси ќе си исплати дивиденда над 8 милиони евра.
Телеком за 2006 година не исплати дивиденда. Управниот одбор во средината на декември 2007 предложи исплата на дивиденда за 2006 година, но Собранието на акционери не го прифати предлогот и одлучи парите да останат во Телеком. Околу 30 милиони евра од Телеком и 50 милиони евра од "Т-Мобиле Македонија", односно вкупно 80 милиони евра се префрлија на сметката за 2007 година, како акумулирана добивка. Тогаш акционерите најавија дека околу 72 милиона евра од нив ќе бидат распредели како дивиденда од добивката од 2007 година.

Извор: Т.Ј. (17.5.2008). Телеком во јуни ќе дели дивиденда. Вест.

Утрински: Новата влада ќе ја троши дивидендата од „Телеком“

„Македонски телеком“ одлучи да дели дивиденда во износ од 79,5 милиони евра за акционерите, од добивката искажана за 2007 година. Од вкупната добивка која за 2007 година достигнала 147 милиони евра, компанијата како дивиденда ќе подели 50 проценти, односно 79,5 милиони евра. Исплатата на дивидендата ќе стартува од 30 јуни оваа година.

Инаку, познато е дека за 2006 година акционерите на „Македонски телеком“ одлучија нето-добивката за таа година да се распредели во акумулирана добивка. Односно, од неа не беше поделена дивиденда. Сега, пак, при утврдувањето на дивидендата за 2007 година, ќе се имаат предвид и акумулираната добивка од 2006 и нето-добивката за 2007 година.

Од ова може да се изведе заклучок дека „Македонски телеком“, всушност, сега заедно ќе ја дели дивидендата и за 2007 и за 2006 година.

Притоа, треба да се има предвид дека станува збор за вкупна добивка што ја оствари „Македонски телеком“, односно заедно со својата фирма-ќерка „Т-мобиле“.

Колкава сума ќе добие македонската Влада, која е втор по големина акционер во „Телеком“, засега се' уште точно не се прецизира. Но, со оглед на фактот што Владата поседува акционерски пакет од околу 35 - 36 проценти, доколку се направат пресметки согласно со нејзиното учество во капиталот, тие покажуваат дека таа би можела да се надева на дивиденда од околу 28 милиони евра. Но, таа сума засега останува само во сферата на шпекулациите, бидејќи точниот износ ќе се утврди на Собранието на акционери.

Тоа значи дека во државниот буџет во почетокот на јули годинава би требало да легнат околу 28 милиони евра. Што ќе се прави со нив, ќе одлучи новата влада, што ќе ја формираат победничките партии на претстојните парламентарни избори.

„Македонски телеком“ вчера информираше дека одлуката за распределба на дивидендата треба да ја верификуваат уште и акционерите, на нивното Годишно собрание што треба да се одржи на 11 јуни годинава.

„Одборот на директори на ’Македонски телеком‘ донесе одлука да му предложи на Собранието на акционери исплата на дивиденда за 2007 година. Според одлуката, Одборот предлага да се исплати 50 отсто од добивката за 2007 година, која изнесува 9.043.912.770 денари, или за исплата на дивиденда за изминатата година се предвидени 4.891.535.769 денари. Вредноста по една акција е во висина од 56,71 денар“, се вели во соопштението од компанијата.

Инаку, неофицијално се дознава дека покрај „Маѓар телеком“ и Владата, како два најголеми акционера во „Македонски телеком“, дивиденда ќе добијат и околу 3.000 малцински акционери на компанијата. Или поточно, сите акционери кои ќе бидат евидентирани во книгата на акционери на „Македонски телеком“ на 19 јуни 2008 година имаат право на дивиденда за 2007 година.

По информацијата дека ќе се дели дивиденда, акцијата на „Македонски телеком“ вчера на Македонската берза порасна за 3,82 процента во однос на претходниот ден, а се продаваше по цена од 621,37 денари за акција. Беше истргувана количина од 3.169 акции на компанијата.

Извор: (17.5.08). Новата влада ќе ја троши дивидендата од „Телеком“ . Утрински Весник.

Вечер: Т-Хоум ќе донесе комуникација, знаење и забава во домовите

Со спектакуларен концерт на Здравко Чолиќ и на групата Шугабејбс на градскиот плоштад во Скопје, утре официјално завршува процесот на ребрендирање на Македонски Телекомуникации во Македонски Телеком. За очекувањата што тоа ќе и донесе на компанијата, на нејзините корисници и на државата, разговаравме со главниот извршен директор на Македонски Телеком, Николај Бекерс.
Што за компанијата значи влезот на Т-Хоум брендот и какви поволности ќе им донесе на граѓаните?-Процесот на ребрендирање е важен за компанијата, но пред се за сегашните и идни корисници како и за Македонија. Ребрендирањето се прави за да се подобрат услугите кон корисниците, поефикасно да се задоволат сегашните потреби, но и да се одржи чекор и прилагодување на услугите со иновациите во фиксната телефонска индустрија. Тоа ќе ни овозможи услови за напредни технолошки достигнувања, како и за низа производи и услуги за корисниците. Т-Хоум на македонските граѓани им овозможува комуникација, знаење и забава директно во нивните домови со тоа што ќе им понуди фиксна телефонска линија, интернет и интерактивна телевизија, истовремено. Нашите корисници можат да уживаат во најнапредниот пакет за комуникациски и конекциски решенија, кој е изготвен за нивните потреби и желби. Тоа ќе придонесе за економски и технолошки развој на земјата.
Најавивте дека ребрендирањето ќе донесе нови услуги. Со што планирате да ги изненадите корисниците?-Ребрендирањето ќе значи вистинска експлозија на производи и услуги во кои, меѓу другото, спаѓаат значително надградена телекомуникациска инфраструктура, привлечен и поволен телекомуникациски пакет, интернет и ИП телевизија, попристапни и достапни телефонски услуги со фиксни тарифи и најразлична опрема збогатена со привлечна понуда (најмодерни телефони, преносни компјутери, безжични ЛАН рутери итн.).
Се повеќе корисници преминуваат од фиксната кон мобилната телефонија. Кои се вашите планови за ублажување на оваа појава?-Обичните корисници и нивните потреби остануваат во фокусот на нашето работење. Колку подобро ги задоволиме нивните потреби, толку поголем ќе биде успехот на нашата компанија. Ова е пред се една од клучните идеи на ребрендирањето. Затоа на корисниците на фиксната телефонија им нудиме пакет услуги - фиксна телефонска линија, интернет и ИП телевизија. Во фиксната телефонија нудиме нови, поволни пакети, во рамките на интернет услугите пак, поголеми брзини и за прв пат во Македонија воведуваме ИП телевизија со богата и разновидна понуда на канали.
Македонски Телеком ќе биде првата компанија на пазарот која ќе почне со понуда на разговор преку интернет и ИП телевизија. Сметате дека ќе има интерес за овие услуги кај македонските граѓани?-Со ребрендирањето, нашата компанија на македонските граѓани ќе им понуди најмодерна и врвна телекомуникациска технологија која ја добиваат и другите корисници на Т брендот во светот. Уверени сме дека македонските граѓани со нетрпение очекуваат да уживаат во овие придобивки, тоа особено се однесува на услугите за разговори преку интернет и ИП телевизијата. Овие две услуги се создадени да ги задоволат потребите на модерните граѓани.
Колку Македонски Телеком е подготвен да се соочи со конкуренцијата од трипл плеј услугите што ги нудат кабелските и Вајмакс операторите?-Македонски Телеком е прилично конкурентен на овој пазар, пред се поради тоа што обезбедува квалитетни услуги и има стратегија за понуда на нови производи што ќе бидат од голема полза за корисниците. Компанијата ќе биде конкурентна со тоа што на корисниците ќе им овозможи голем избор од широк спектар на производи. Затоа една од главните идеи за ребрендирањето е да понудиме квалитетни сервиси на корисниците, со што ќе ја зацврстиме нашата водечка позиција на македонскиот пазар.
Истовремено со процесот на ребрендирање се имплементираше програмата за доброволно напуштање на вработените со поволни услови. Дали совпаѓањето на овие два настана е случајност?-Во тек сме на замена на дел од вработените со поквалификуван кадар, со цел да одговориме на динамичните барања на телекомуникацискиот пазар. Со ова, всушност го следиме светскиот тренд. Македонскиот пазар со воведувањето на Т-Хоум е во чекор со светските пазари. Вработените што ќе ја напуштат компанијата ќе потпишат договор во кој стои дека во иднина може да ни ги нудат нивните услуги по потреба. Како дел од ребрендирањето сакаме да создадеме подобри интерни услови за работа во кои искусни и квалификувани вработени ќе воведат подобрувања во компанијата во сите аспекти на работењето, како и зголемување на ефикасноста со подобра тимска работа. Синдикатот не поддржа во целиот процес. Македонски Телеком не единствената компанија која преземала мерки за освежување на компанијата со нови и квалификувани кадри.
Како го гледате македонскиот телекомуникациски пазар во наредните неколку години?-Македонскиот телекомуникациски пазар се уште е во развојна фаза, но со многу потенцијал. А со тоа што Македонски Телеком стана член на глобалното комуникациско семејство Т, идниот развој на македонскиот пазар ќе може да одржи чекор со светските трендови. Македонија ќе ги искористи сите можности што и стојат на располагање преку Групацијата на Дојче Телеком, една од водечките светски телекомуникациски семејства кое е присутно во повеќе од 50 земји.
Вие дојдовте од Дојче Телеком кој, со исклучок на Македонија и Грција, не е присутен во другите земји од регионот. Мислите дека Македонски Телеком е доволно моќен да се прошири и на соседните пазари?-Таква одлука е одговорност на Дојче Телеком. Дојче Телеком е присутен во неколку земји од Балканот меѓу кои се Хрватска, Црна Гора, Србија, Грција и Македонија.

Извор: Светлана Блажевска. (16.5.08). Т-Хоум ќе донесе комуникација, знаење и забава во домовите. Вечер.

Вест: Дојче телеком го купи и Космофон

Претставници на "Дојче телеком" в понеделник доаѓаат кај Комисијата за заштита на конкуренцијата (КЗК) да ја информираат за преземањето на управувањето во грчкиот оператор ОТЕ. "Дојче телеком" ќе плати околу 3,2 милијарди евра за вкупно 25 отсто од капиталот на ОТЕ и управувањето со компанијата, а грчката Влада задржа за себе 25 отсто. Со тоа "Дојче телеком" под свое ќе ги има единствениот фиксен оператор Македонски телеком, и двата најголеми мобилни оператора "Т-мобиле Македонија" и "Космофон", кои заедно имаат 92 отсто од мобилниот пазар во земјава. Претседателот на КЗК Чедомир Краљевски вели дека од содржината на информацијата од германскиот телекомуникациски гигант ќе зависи решението со кое антимонополците треба да го спречат враќањето на телекомуникацискиот монопол во Македонија. "Не е важно колкаво ќе биде учеството на 'Дојче телеком' во грчката телекомуникациска компанија, битно е дека има промена во управувањето со компанијата. Обврската за информирање на Комисијата за концентрација на моќ на пазарот настанува бидејќи го преземаат управувањето со грчкиот оператор. Комисијата потоа има рок од 30 дена да донесе решение за спречување на евентуалниот монопол, а решението ќе зависи од информацијата што ќе ја добиеме в понеделник", вели претседателот на Комисијата Краљевски.Според законот, КЗК, откако ќе направи анализа на пазарот, може да му дозволи на "Дојче телеком" во Македонија истовремено да биде газда и на двата мобилни оператора "Т-Мобиле Македонија" и "Космофон", односно, наместо да ја продаде, да ја издава инфраструктурата на "Космофон" по регулирани цени. Краљевски потенцира дека е се уште рано да се каже кое решение ќе се одбере. Ана Бисхоф од канцеларијата за информирање на "Дојче телеком" вели дека не може да зборува за плановите на "Дојче телеком" во Македонија, се додека за акционерскиот договор меѓу германскиот и грчкиот оператор не се изјаснат надлежните регулаторни тела и грчкиот Парламент. "'Дојче телеком' и грчката Влада во вторникот потпишаа акционерски договор, според кој 'Дојче телеком' ќе ја преземе управата со ОТЕ и целосно ќе ја консолидира компанијата", вели Бисхоф.Во телекомуникациските кругови инстантно се проширија и шпекулации дека германската компанија веќе преговара за продажба на "Космофон", како и дека меѓу најзаинтересирани се "Теленор" (присутен е на пазарот во Србија), "Водафон", руски компании, па и "Мобилком Австрија", кој е газда на третиот мобилен "Вип оператор".

Извор: Т.Ј. (16.5.08). Дојче телеком го купи и Космофон. Вест.

Вечер: ВИП работи со загуба

Третиот мобилен оператор ВИП кој со работа почна во септември лани, на крајот на март годинава имал 163.000 претплатници и удел од 8,1 процент од мобилниот пазар во земјава, кога пенетрацијата на мобилната телефонија изнесуваше 99 проценти.

Според финансиските резултати што вчера ги објави Групацијата Телеком Австрија во чии рамки е ВИП, во првиот квартал е остварен приход од 1,8 милиони евра, додека трошоци за овој период резултирале со загуба од шест милиони евра. Оперативните загуби пак, во истиот период изнесуваат 6,9 милиони евра.

Извор: (15.05.2008). ВИП работи со загуба. Вечер.

Дневник: „Дојче телеком“ и ОТЕ пред договор

Договорот за купување акции во грчката телекомуникациска компанија ОТЕ од „Дојче телеком“ ќе биде потпишан до четврток, објави весникот „Имерисија“. Владата во Атина и германската компанија преговараат за идниот удел и за управувањето со ОТЕ, јави МИА. Во минатата недела Комисијата за приватизација даде зелено светло за зделката, која треба да биде одобрена и од Владата, но и од грчкиот парламент. „Имерисија“ тврди дека преговорите се во крајна фаза и дека е договорено „Дојче телеком“ да купи три отсто од акциите што сега се сопственост на државата. Германската компанија веќе постигна договор за купување 20 проценти од акциите на ОТЕ, кои се сопственост на „Марфин инвестмент груп холдингс“.Според весникот, во овој договор се дава можност „Дојче телеком“ до 2011 година да купи 40 проценти од акциите на ОТЕ. „Нафтемборики“ пишува дека моделот за приватизација на телекомот ќе биде употребен и во други случаи.„Министерството за економија планира да направи серија од помали зделки за приватизација. Први на списокот се пристаништата во Пиреја и во Солун, чии делови ќе бидат дадени на концесија и до 30 години“, објави весникот.

Извор: (13.5.08). „Дојче телеком“ и ОТЕ пред договор. Дневник.

Дневник: „Онтел“ понуди поевтина телефонија

Телекомуникацискиот оператор „Онтел“ од вчера почна да нуди услуги во фиксната телефонија со месечна претплата од 990 денари. Во овој пакет се вклучени 300 бесплатни минути разговор кон броеви на „Македонски телеком“, бесплатен приклучок и неограничени локални разговори во мрежата на „Онтел“.По искористувањето на бесплатните минути кон телекомот, разговорите ќе чинат 0,8 денари за минута. Од „Онтел“ соопштија дека цените на разговорите кон мобилната телефонија ќе бидат пониски за 15 до 20 отсто, а националните и меѓународните разговори ќе бидат поевтини до 60 отсто во споредба со тие на „Македонски телеком“. Минута разговор кон мобилните мрежи ќе чини 8,5 денари, а кон првата зона во странство шест денари. Телеком наплаќа 9,9 денари за мобилни разговори, а 12, 8 денари кон странство. Сите цени се без пресметан ДДВ од 18 отсто.Вториот фиксен оператор бара Агенцијата за електронски комуникации и Комисијата за заштита на конкуренцијата да преземат мерки за регулација на интерконекциските цени за граѓаните да добијат вистинска либерализација на телекомуникацискиот пазар.Силно ќе притискаме тие што поскоро да ги регулираат големопродажбените цени што ги нуди телекомот. Апсурдно е големопродажбените цени да се поголеми од малопродажбените. Со тоа телекомот директно ја спречува конкуренцијата и може да се казни со седум до десет отсто од вкупниот приход бидејќи ја злоупотребува доминантната позиција на пазарот - вели Предраг Чемерикиќ, директор на „Онтел“.Раководството на „Онтел“ истакна дека свесно почнуваат да работат со загуба, а очекуваат до есенва да се создадат фер услови за работа. Месечната претплата на „Македонски телеком“ е 400 денари. За да ја користиме нивната жица бараат да им плаќаме по 582 денари за корисник. Уште поапсурдно е што телекомот наплаќа по 1.200 денари за инсталација на телефон во нов стан. Кога „Он.нет“ ја бара веќе поставената жица за свој корисник, нам ни наплаќаат 3.500 денари - рече Чемерикиќ.„Онтел“ ќе функционира како посебен бренд во рамките на интернет-провајдерот „Он.нет“, кој од 2006 година е сопственост на групацијата „Телеком Словенија“.Услугите на вториот фиксен оператор на почеток ќе може да ги користат само граѓаните во Скопје. Според Чемерикиќ, високите цени за интерконекција и за пристап до централите на „Македонски телеком“ се пречка за да услугите бидат достапни и во другите градови.Пазарот на фиксната телефонија, иако законски е либерализиран од пред неколку години, во пракса е монополизиран. Граѓаните досега немаа можност да избираат алтернативен оператор.

Извор: М.Б. (13.5.08). „Онтел“ понуди поевтина телефонија. Дневник.

Утрински: Стартуваше со работа вториот фиксен оператор „Онтел“

Конечно, се појави конкуренција и во фиксната телефонија. Под брендот „Онтел“ од вчера почна да функционира долгонајавуваниот втор фиксен оператор во државава, под капата на „Он.нет“, а во сопственост на групацијата „Телеком Словенија“. „Онтел“ се промовираше како оператор што ќе дава поевтини услуги од оние на „Македонски телеком“, а во догледно време од објективни причини негови корисници ќе можат да станат единствено претплатниците од Скопје. Новиот фиксен оператор засега нуди само еден пакет за корисниците, и тоа по цена од 990 денари без пресметан ДДВ, кој вклучува бесплатен приклучок, бесплатни неограничени разговори со сите корисници на „Онтел“ и 300 минути бесплатен разговор кон броевите на конкурентскиот „Македонски телеком“. Доколку претплатникот зборува повеќе од предвидените гратис-минути во пакетот, секоја дополнителна минута разговор ќе го чини 0,89 денари плус ДДВ. Една минута разговор, пак, со кој било мобилен оператор ќе се наплаќа по 8,5 денари плус ДДВ. Предраг Чемерикиќ, генерален директор на „Он.нет“, на вчерашната промоција на „Онтел“ посочи дека неговите цени во споредба со оние на „Македонски телеком“, кои се однесуваат на разговори кон мобилните оператори, ќе бидат пониски за 15-20 отсто, а за 60 отсто ќе бидат поевтини разговорите кон странство. Карактеристично за новиот оператор, во споредба со конкурентот, е тоа што цената на разговорите нема да зависи од времето кога тие се водени, односно не постои евтина и скапа тарифа, а истовремено не се плаќа ниту месечна претплата. Од „Онтел“ изјавија дека се' додека Агенцијата за електронски комуникации и Комисијата за заштита на конкуренцијата не ги ребалансираат цените за интерконекција, тие ќе можат да го нудат засега единствениот промовиран пакет.„За да можеме да дадеме пакет каде што нема вклучени минути, АЕК и Комисијата за заштита на конкуренцијата треба да поработат на делот на злоупотреба на доминантната позиција. За нов број од ’Телеком‘ плаќате 1.200 денари, а „Онтел“, ако сака да земе свој корисник, плаќа 3.500 денари“, изјави Чемерикиќ, кој посочи дека во инсталирањето на потребната оптичка инфраструктура во Скопје компанијата инвестирала 5 милиони евра. Новиот оператор ќе работи со сопствена телефонска централа, користејќи ја мрежната структура на „Македонски телеком“. Од „Онтел“ очекуваат во наредниот период барем 35 отсто од телефонските корисници во државава да станат дел од нивната мрежа. Чемерикиќ објасни дека постапката за преминување на корисниците од „Македонски телеком“ на „Онтел“ е едноставна, односно заинтересираните треба да ги имаат намирено сите сметки со МТ, да потпишат договор со новиот оператор и да поседуваат макар и најобичен телефонски апарат. Броевите од вториот фиксен оператор обично ќе почнуваат на „51“. Министерот за транспорт и врски, Миле Јанакиески, кој присуствуваше на промоцијата на „Онтел“, рече дека зголемената конкуренција во секој сегмент од економијата е чекор кон усовршување на понудите и услугите, но и намалување на цените што ги плаќаат граѓаните за тие услуги.

Извор: (13.5.2008). Стартуваше со работа вториот фиксен оператор „Онтел“. Утрински Весник.

Утрински: Грчки „Космоте“ ќе се преименува во „Т-мобиле“

Атина – Грчкиот мобилен оператор „Космоте“, во чија сопственост е македонскиот оператор „Космофон“ наскоро ќе биде преименуван во „Т- мобиле“, пишува весникот „Елефтерос типос“. Ребрендирањето е предвидено со договор за стратегиско партнерство за државната компанија ОТЕ, што наскоро треба да биде потпишан помеѓу грчката влада и раководството на германската компанија „Дојче телеком”.Надлежната комисија за приватизација даде зелено светло за склучување на договорот, кој треба уште да биде одобрен од посебна владина комисија и да биде ратификуван од грчкиот парламент, пишува „Елефтерос типос”.Според истиот извор, предвидено е ОТЕ да си го задржи името, а неговата компанија ќерка „Космоте”, која е присутна на неколку балкански пазари, вклучително и во Македонија, ќе биде преименувана во „Т-мобиле”. Грчкиот весник пишува дека „Дојче телеком” не бил многу заинтересиран за фиксната телефонија на ОТЕ, колку што силно посакува да има контрола над „Космоте”. „Т-мобиле” е сопственик и на најголемиот мобилен оператор во Македонија, а останува нејасно како понатаму ќе се развива пазарот, доколку и вториот мобилен оператор го добие истиот име. Во Македонија од неодамна се формираше и трет мобилен оператор, по што Владата најави дека ќе оди кон понатамошна либерализација со распишување на тендер за четврт мобиле оператор.
Извор: (12.5.08). Грчки „Космоте“ ќе се преименува во „Т-мобиле“. Утрински Весник.

Утрински: Од 17 мај „Македонски телеком“ со нови пакети

Со ребрендирањето, „Македонски телеком“ ќе почне со воведување новини што ќе опфаќаат надградба на телекомуникациската инфраструктура во Македонија. Оттаму најавуваат воведување атрактивни пакети на интегрирани производи на телекомуникации, Интернет и Интернет- телевизија, поедноставни телефонски услуги со подостапни фиксни тарифи, понуди на атрактивна комуникациска опрема, како и најкомплетни и технолошки напредни пакети на решенија за комуникации и поврзување за потребите на нашите деловни корисници, итн.Почнувајќи од 17 мај, на резиденцијалните и на бизнис- корисниците ќе им се понудат нови тарифни модели. Резиденцијалните корисници ќе имаат можност за минимална месечна претплата да користат бесплатни локални и национални разговори секој ден во периодот од 19 до 8 часот. Овој тарифен модел најмногу им одговара на корисниците кои сакаат долго и безгрижно да разговараат на телефон, како што се домаќинки, тинејџери и слично. Понудата овозможува долги разговори, без страв од големи телефонски сметки, едноставност и заштеда, како и намалување и контрола на телефонските месечни сметки. Прв пат на пазарот, „Македонски телеком“ нуди различни тарифни опции за сегментот на мали деловни корисници. Станува збор за два нови тарифни модели кои нудат целосно нова шема на тарифирање, со вклучени разговори во месечната претплата и атрактивни цени. Малите бизнис-корисници на тој начин ќе стигнат до заштеда - намалување и контрола на сметките, но истовремено тарифните модели овозможуваат атрактивни цени кон поскапите дестинации.
Извор: (12.5.08). Од 17 мај „Македонски телеком“ со нови пакети . Утрински Весник.

Утрински: Доаѓа нов монопол во мобилната телефонија

Македонија се наоѓа на добар пат да добие монопол во мобилната телефонија по преземањето на грчки ОТЕ од страна на „Дојче телеком“, што најверојатно ќе се случи наскоро. Имено, инвестиционата компанија „Марфин инвестмент груп“, која поседува 20 отсто од капиталот на ОТЕ, кои се предмет на разговори за купопродажба со „Дојче телеком“, најавила склучување на договорот до крајот на месецов, што значи дека „Дојче телеком“ веќе добил зелено светло за купување на акциите. Според „Елефтеротипија“, зделката за продажба на грчката компанија на „Дојче телеком“ се очекува да се финализира. Весникот наведува дека владината комисија треба да ги разгледа и последните детали од оваа зделка, и покрај противењето на опозицијата и на вработените во ОТЕ.Минатата седмица грчката влада соопшти дека преговара со „Дојче телеком“ за идниот удел во акциите. Државата моментно е најголем акционер во ОТЕ со 28 проценти од акциите и има право да назначува претседател на компанијата.Во март „Дојче телеком“ соопшти дека планира да купи 20 отсто од акциите на ОТЕ од грчката „Марфин инвестмент груп холдингс“ за цена од 2,5 милијарди евра, но оваа зделка зависи од тоа дали ќе биде постигнат договор со грчката влада. Со преземањето на ОТЕ од страна на „Дојче телеком“, „Т-мобиле“ и „Космофон“ ќе имаат ист газда, а единствен конкурент ќе им биде операторот ВИП. Во земјава Германците преку „Т-мобиле“ имаат повеќе од милион корисници, а Грците преку „Космофон“ повеќе од половина милион корисници, што вкупно означува држење на околу 90 проценти од пазарот. Според Законот за заштита на конкуренцијата, монопол може да се појави ако некој субјект има контрола на повеќе од 40 проценти од клиентите и услугите, но за да се утврди монопол, треба да се проверат дополнителни критериуми. „ВИП го следи развојот на настани во врска со можната аквизиција на дел од акциите на ОТЕ од страна на ’Дојче телеком‘. Доколку овој развој на глобално и регионално ниво почне да влијае врз македонскиот пазар на електронски комуникации, веруваме дека Комисијата за заштита на конкуренцијата професионално и во согласност со својата ориентираност за заштита на конкуренцијата ќе преземе соодветни мерки да го заштити пазарот на мобилна телефонија, а, пред се' корисниците, од евентуално монополистичко однесување“, велат од ВИП.Доколку Комисијата за заштита на конкуренцијата утврди дека е воспоставен монопол и дека постои опасност потрошувачите во Македонија да имаат повисоки цени, Комисијата може да побара од „Дојче телеком“ да ја врати состојбата пред воспоставената концентрација.„Процедура во вакви ситуации е откако ќе се потпише договорот за купување на некоја фирма, купувачот да влезе во фирмата, да воспостави свој менаџерски тим и потоа да ја пријави концентрацијата во земјата во која има фирми, во случајов Македонија. Потоа ние ја започнуваме процедурата за испитување на концентрацијата и доколку има такви обиди, наше е да не дозволиме создавање монопол кој подоцна би можел да ја злоупотреби својата доминантна положба“, вели претседателот на Комисијата за заштита на конкуренцијата, Чедомир Кралевски.

Извор: А. Стевковска. (9.5.08). Доаѓа нов монопол во мобилната телефонија. Утрински Весник.

Вечер: ОУ "Васил Главинов" доби 16 лаптоп компјутери

Американската агенција за развој, УСАИД, во рамките на проектот Компјутер за секое дете на велешкото училиште "Васил Главинов" му подари 16 лаптоп компјутери и друга придружна опрема. Вредноста на донацијата изнесува 20.000 долари.

Одговорните во училиштето велат дека со добивањето на лаптоп компјутерите ќе се подобри образовниот процес. Во ова велешко училиште учат над 2.000 ученици, и е едно од 14. осмолетки во земјава во кои УСАИД со проектот Компјутер за секое дете донираше лаптопови.

Од УСАИД велат дека во периодот од 1993 година па досега тие во Македонија имаат инвестирано над 500 милиони долари, од кои најголем дел се за набавка на компјутери и друга опрема за училиштата.

Извор: С.А. (5.5.2008). ОУ "Васил Главинов" доби 16 лаптоп компјутери. Вечер.

Утрински: Драмски театар нуди Интернет- продажба на билети

Светот е виртуелно глобално село, но единствениот виртуелен контакт кој што во моментов можете да го остварите со некоја од театарските институции во земјава е Драмскиот театар од Скопје. Ова е единствената театарска куќа во земјава која деновиве доби нов, функционален сајт(www.dramskiteatar.com.mk ) на кој можат да се најдат информации за претставите на репертоарот, за актерскиот тим, за гостувањата, за наградите... Сепак, она што е исклучително значајно е фактот што со посредство на овој сајт Драмски театар веќе нуди и Интернет-продажба на билети. Оваа театарска куќа е единствената во земјава која е фискализирана и вмрежена преку „Дајнерс“, така што на самиот систем кој го има поставено „Дајнерс“ може да се врши наплата на билетите со „виза“ и „мастеркард“.

Токму овој многу значаен сегмент, не само што нуди комодитет на потенцијалната публика, која наместо да мора да го набави својот билет од билетарницата на театарот, ќе може да го стори тоа он-лајн, туку ги намалува и финансиските трошоци на институцијата и го зголемува нејзиниот профит. Се намалуваат трошоците за печатење билети, но и цената на чинење на билетот е загарантирана. Досега, со вклученоста на аквизитерите во процесот на продажба на билетите, нивната цена се намалуваше. Поточно, генерално околу 40 отсто од билетите во македонските театри се продаваат преку аквизитери, а 60 отсто од продажбата се остварува на благајната. Билетите кои ги земаат аквизитерите се организирани билети со пониска цена. Исто така, аквизитерите во просек земаат 25 отсто од цената на билетот. Со изземање на аквизитерите од кругот на продажбата и со имплементирање на Интернет-продажбата на билетите по нивната стандардна цена, расте профитот на институциите.

Покрај Драмски, во овој период беше најавуван и стартот на новиот сајт на МНТ, но изработката на овој сајт доцни. „Интернет-страницата во моментов се гради и се дигитализира целото театарско наследство. Преку спонзорство ги обезбедивме техничките средства, компјутери, скенери и се' што ни е потребно за дигитализација на видео и печатените материјали, но поради одредени технички проблеми изградбата на сајтот се' уште не е завршена“, вели директорот на МНТ, Сашо Миленковски.

Тој вели дека, како и во случајот со Драмски, по промовирањето на новиот сајт на МНТ ќе стартува и Интернет-продажбата на билети. „На овој план ќе соработуваме со австриската фирма ’Тикет лајн’ која има своја филијала во земјава. МНТ ќе ја користи како аутсорсинг фирма на која и оставаме мал процент од секој продаден билет. Продажбата на билети ќе се врши преку линк на сајтот на МНТ“, вели Миленковски. Тој додава дека во план е до септември оваа година продажбата на билетите на МНТ да се врши само на билетарницата и он-лајн.

Токму во овој временски период, во втората половина на годинава, и Стопанска банка стартува со воведување на заштитни механизми на платежните картички за сигурно плаќање на Интернет.

Извор: Лилјана Митевска. (5.5.2008). Драмски театар нуди Интернет- продажба на билети. Утрински Весник.

Вест: Т-Мобиле и Космофон не даваат пониски цени

Двата мобилни оператора ги обжалија ценовниците на Агенцијата за електронски комуникации, според кои треба ги намалат цените кон ВИП операторот за околу 50 отсто, со што ќе паднат и цените кон граѓаните

"Т-Мобиле" и "Космофон" ги обжалија поевтините ценовници кои им ги наложи Агенцијата за електронски комуникации. Станува збор за цените кои мобилните оператори си ги наплаќаат меѓусебно за секој реализиран повик. Агенцијата им наложи на "Т-Мобиле" и "Космофон" да ги намалат нивните цени кон ВИП операторот за околу 50 отсто, додека ВИП и понатаму на двата оператора треба да продолжи да им испорачува за 50 насто повисоки фактури. Ваквиот пад на цените треба да овозможи и намалување на малопродажните цени во за граѓаните.
По жалбите кои двата оператори ги доставија до Комисијата за електронски комуникации минатата недела, согласно законската постапка, Комисијата треба да одлучи во рок од два месеца. Одлуката на Комисијата е извршна и операторите имаат обврска да ја применат во рок од 30 дена.
Практично, ако Комисијата го искористи максималниот рок за нејзината одлука, "Т-Мобиле" и "Космофон" ќе ја развлечат постапката за намалување на цените до август годинава, со што ќе се заглави понатамошниот пад на малопродажните цени за граѓаните.
Неофицијалните коментари се дека операторите сметаат на тоа дека Комисијата нема да брза со носење на одлуката поради престојните избори. Односно, иако станува збор за независно регулаторно тело, се говори дека регулаторот ќе го чека резултатот од изборите пред да пресуди по жалбите.

Извор: Т.Ј. (01.05.2008). Т-Мобиле и Космофон не даваат пониски цени. Вест.