Вечер: Студентите да пријавуваат корупција во образованието

Хрватската афера Индекс, во која беа уапсени професори, асистенти, студенти за купување и продавање на универзитетски дипломи почна да ги отвора очите на земјите од регионот. Корупцијата во образованието стана тема на разговор меѓу надлежните институции. И од македонското Министерство за надворешни работи апелираат студентите кои се нашле во ситуација професор да им бара пари за да положат испит да го пријават веднаш. За една година МВР реши две големи корупциски афери во образованието. Професорот од Педагошкиот факултет од Штип и професорот од Техничкиот факултет од Битола кои заработија кривични пријави за примање и посредување при поткуп се доказ дека во сферата на спречување на корупцијата во образованието се преземаат сериозни чекори, споредено со минатото кога корупцијата на факултетите се сметаше за табу тема.
Во двата случаи студентите побарале помош од полицијата. Во едниот било побарано мито од 200 евра. Во вториот случај се барале 900 евра за професорот и уште 600 евра за други двајца колеги за кои обвинетиот ветил дека ќе помогне студентот да добие преодна оцена. "МВР крајно сериозно постапува по сите случаи и со ист интензитет ќе продолжи да работи на откривање и процесуирање за сите за кои има сомнение дека биле инволвирани во корупција. Би сакале да ги охрабриме студентите да дојдат и да пријават. За нас е важно тие пријави да бидат навремени пред да се даде поткуп зашто подоцна е многу тешко да се докаже дека било побарано и дадено мито за оценка" - вели Иво Котевски, советник во МВР. Добро е што студентите почнаа да пријавуваат. Тоа до сега не се случуваше - велат од проектот Антикорупциски мерки во образованието финансиран од Владата на Кралството Норвешка. Со нивните активности за зголемување на јавната свест за корупцијата сметаат дека значително е подобрена комуникацијата студентите со надлежните институции.
"За неколку пати е зголемена актуелноста на темата како меѓу невладините организации така и во медиумите. Сега за нас останува уште еден предизвик а тоа е да се донесе финалната рамка - Законот за Студентски правобранител. Студентскиот Правобранител ќе биде тој во кого студентите ќе веруваат и ќе пријават доколку им биде побарано мито - вели Марија Петреска од проект Антикорупциски мерки во образованието.
Македонија годинава го достигна 72-то место според степенот на перцепција на корупцијата. Корупцијата во образованието е се уште проблем на кој треба да се работи.

Извор: Б.З. (26.9.08). Студентите да пријавуваат корупција во образованието. Вечер.

Нова Македонија: Господ нека му е на помош на новиот директор на МРТ

Неблагодарно е уште сега јавно да кажувам какви чекори ќе следуваат во Македонската радио-телевизија, со оглед на тоа што само што ме избраа на оваа функција, изјави за „Нова Македонија“ Ефтим Гаштев, кој од пред неколку дена е извршен директор на националниот сервис. Тој има завршено одбранбени и мировни студии при Филозофскиот факултет. Гаштев на јавноста ѝ е познат како водител на забавно-контактни емисии што во изминатиов период во организација на „Лимиер продукција“ се емитуваа на повеќе приватни телевизии. Македонските граѓани најмногу го паметат Гаштев по квиз-емисијата „Суперишка“. Тој веќе 18 месеци работи како главен програмски продуцент во МРТ.
Реакциите на вработените во куќата не се баш најповолни од изборот на првиот човек на МРТВ. Господ нека му е на помош и на овој директор, велат тие и се чудат на ваквиот избор на власта.
Гаштев доаѓа на местото од Словенецот Јанез Сајовиц, кој за да биде на чело на националниот сервис зеде македонско државјанство. Сајовиц беше избран за извршен директор на МРТ во мај минатата година. Според договорот, тој добиваше месечна плата од 6.500 евра, а покрај тоа му беа исплатени уште и околу 30.000 евра за изработката на санациската програма.
Иако дојде на ова место како експерт од ОБСЕ, Сајовиц не најде заеднички јазик со членовите на управниот одбор. Наместо санирање на националната куќа, во изминатиов период таму се случуваа секојдневни конфликти меѓу УО и Сајовиц, како и чести штрајкови на вработените. На сметка на Сајовиц имаше многубројни обвинувања за незаконско работење. Тој, пак, по разрешувањето бараше од МРТ да му бидат исплатени заостанатите плати во согласност со менаџерскиот договор. Вработени во МРТ велат дека само Господ може да му помогне на новиот директор, со оглед на катастрофалната состојба во која се наоѓа јавниот сервис.

Извор: В.Н. (25.09.2008). Господ нека му е на помош на новиот директор на МРТ. Нова Македонија.

Утрински: Скромен прогрес во борбата со корупцијата

Македонија и во 2008 година постигна скромен прогрес во справувањето со корупцијата. На антикорупциската скала од 180 земји што вчера истовремено насекаде во светот ја објави реномираната меѓународна организација „Транспаренси интернешенел“, Македонија го зазеде 72. место и освои 3,6 индексни поени.

Ова покажува дека Македонија е подобро рангирана во споредба со 2007 кога бевме на 84. место и имавме 3,3 поени. Сепак, скокот нагоре за 12 места не придонесе Македонија да се наоѓа во групата држави кои бележат посилна отпорност спрема корупцијата.

Од земјите во регионот Македонија се наоѓа пред Србија, Црна Гора, Албанија и Босна и Херцеговина. „Наспроти крупните реформи и надворешните поттикнувања во рамките на претпристапниот процес за влез во ЕУ, се чини дека овие земји не ја подобриле значително сликата за корупцијата“, се потенцира во извештајот.

Хрватска, Словенија, Турција и Романија заземаат повисоки позиции од Македонија, која според резултатите се дружи и со Бугарија, Мексико, Кина, Перу, Суринам, Свазиленд и Тринидад и Тобаго. Сите балкански земји имаат постигнато под пет поени на скалата од вкупно десет поени, што „покажува дека повеќето од нив се соочуваат со сериозни нивоа на корупција“.

Напредокот можеби изгледа висок ако ги гледаме местата за кои сме отишле погоре, потенцира вчера на прес-конференција Слаѓана Тасева, претседател на невладината организација „Транспарентност - нулта корупција“, презентирајќи ги вкупните резултати од извештајот.

Таа објасни дека годинава има промена во методологијата и дека се искористени истражувања кои се спроведени во крајот на 2006, 2007 и 2008 година.

„Индексот кај Македонија е променет за само 0,3 индексни поени, што е мало подобрување, а крајниот скор е изведен од шест истражувања. Напредокот во најголем дел се должи на промените во легислативата, она што значи формално усвојување на нови закони, менување на законите и усвојување нови процедури. Ако гледаме според државите во регионот, Македонија е добро рангирана“, нагласи Тасева.

Но, според неа, „не треба да се залажуваме дека добро ни оди“, бидејќи објективно се' уште имаме многу да покажеме на планот на заживувањето на прописите во практика, а со тоа и на вистинската ефикасност во борбата против корупцијата.

„Да имаме ефикасно завршени случаи, судски постапки, изречени пресуди и да имаме јасни, транспарентни и ефикасни процедури во јавната администрација“, објасни Тасева.

Таа посочи дека од Центарот за истражување на „Транспаренси интернешенел“ дале објаснување според кое Македонија се' уште има доста да работи за да биде во првата половина на Индексот за перцепција на корупцијата и да се најде погоре на ранг-листата.

Премиерот Никола Груевски со цела Влада вчера одржа прес-конференција за да го прослави успехот и да ги пофали сите институции кои придонеле за напредокот на нашата држава во антикорупцискиот фронт.

„Ова е уште една потврда за заложбите на Владата за нулта толеранција за корупцијата која во наредниот период ќе продолжи да се одвива уште позасилено, имајќи предвид дека Македонија има уште многу работа на овој план“, нагласи Груевски. Премиерот очекува подобрување на позициите на Македонија во однос на индексот на перцепција на корупцијата, но со помали скокови, бидејќи, како што вели, „Македонија сега не само што се наоѓа во првата половина од рангираните држави, туку и длабоко е навлезена во таа група на земји“.

„Само со реформи, а без имплементација не можеме да покажеме подобри резултати во антикорупцискиот фронт“, изјави вчера за „Утрински весник“, професорот на Правниот факултет, Никола Тупанчески.

„Свесни сме сами како напредуваме на овој план. Сите знаеме колку крупни случаи сме финализирале“. Тупанчески нагласува дека исчекорот треба да се поздрави, но сами треба да заклучиме колку соодветствува на реалноста.

На прво место земји со најмала корумпираност се Данска, Нов Зеланд и Шведска со високи 9,3 поени.

Извор: Катица Чангова. (24.9.2008). Скромен прогрес во борбата со корупцијата. Утрински Весник.

Нова Македонија: Старата професорска гарда бега од компјутер како од ѓавол

Постарата генерација професори во основните и во средните училишта не сакаат да има компјутери на клупите на нивните ученици. Нивните објаснувања се клише на сите оние што во историјата биле или се против прифаќање каков било напредок за човекот. Алиби-изговорите против новото информатичко општество се: уште нема наставни програми, учениците ќе може да препишуваат на тестовите и наместо да учат ќе играат компјутерски игри, ќе им се искриви ‘рбетот на децата... Сето тоа според упатените е резултат на нивната неедуцираност, која пред учениците би се манифестирала со поткопување на нивниот „знаечки и непогрешлив“ авторитет. Во некои скопски училишта, и покрај тоа што помина цел месец од почетокот на учебната година, компјутерите стојат на клупите без да се вклучат во струја. На владиниот проект за осовременување на наставата „Компјутер за секое дете“ по с? изгледа ќе му треба повеќе време за да заживее.

СИТЕ НАПРЕД, А НИЕ НАЗАД

Во дел од основните училишта с? уште се местат инсталациите, а тамошните наставници велат дека децата од основните училишта се премногу мали за да работат на компјутерите и може да дојде до искривување на ‘рбетот. Во исто време отпорот оди дотаму што наводно децата можеле да добијат сосема различна претстава за тоа што е училиште и што се прави таму. А на учениците од средните училишта што разбираат и сакаат да има компјутери не им се веруваше дека има и родители што ќе бидат против тоа да се компјутеризираат училиштата, да бидат против напредокот.

- За постарите професори разбирам зошто се против, не им е лесно на стари години да учат некои работи, но за родителите навистина не ми е јасно како е можно да сакаат нивните деца да стојат во место. Само кај нас постојат дилеми дали треба да има компјутери. Наместо да прават работи што се добри и за нас и за нашиот напредок, некои професори и родители се бунат дека не е добро да имало компјутери, оти нема да сме внимавале на часовите - се пожалија учениците од гимназијата „Јосип Броз-Тито“.

Во средното хемиско училиште „Марија Кири Склодовска“, пак, компјутерите с? уште не се приклучени, но сите професори ја поздравуваат идејата и мислат дека така децата ќе можат да научат повеќе работи.

- Кај нас во училиштето сите се среќни за компјутерите, сите професори мислат дека сите ќе имаат корист од нив - истакна Милена Атанасова, ученичка во средното хемиско училиште.

ДЕЦАТА ЌЕ СИ ГО РАСИПАТ ВИДОТ

Многу мал дел родители чии деца учат во основните училишта не ја одобруваат употребата на компјутерите во образованието на нивните деца. Образложенијата на тезата е дека децата можат да си го расипат видот и оти можат да добијат сосема нова претстава за училиштето. Здравствениот аспект е зачинет со добивање насилство кај учениците што играле компјутерски игри.

- Наместо нашите деца да учат низ игри, да прават проекти и да работат во групи, уште од мали им го одземаме детството.Тие уште не знаат да пишуваат и да читаат, а ќе ги учиме да работат на компјутер. За с? си има свое време- кажа еден родителите.

Психолозите велат дека не треба да се поставува возрасна граница за тоа кои деца треба да користат компјутер.

- Компјутери може да има во училиштето, но не во секоја училница и на секоја клупа. Кога наставата би била организирана така што компјутерите би биле на една страна од училницата, за да можат децата да гледаат што се пишува на таблата и што кажува наставникот, тоа е она што е потребно. Треба да се организира настава во групи, игри преку кои децата би можеле да научат и други работи, за дружењето, за групната работа и други квалитети што се учат на таа рана возраст - истакна психологот Тамара Перинска-Илиевска.

ПРОФЕСОРСКИ АВТОРИТЕТ

Професорите, пак, што знаат како да работат на компјутер велат дека авторитетот на професорите што не се толку упатени во компјутерската работа кај децата може за миг да се урне.

- Ние сме авторитативни фигури, веднаш по родителите, децата треба да учат од нас. Јас ги знам основните програми за работа на компјутер, но имам постари колеги што не се толку упатени и во неколку разговори што ги имавме тие велат дека треба да одат на дополнителни подготовки. Ако се случи некој ученик да праша нешто, а професорот не знае да одговори, би било многу непријатна ситуација. Слична ситуација може да има и со некој повозрасен ученик, кој кога ќе види дека професорот не е упатен може да прави шеги на сметка на професорот и да го доведе во прашање неговиот углед - објасни една од наставничките во основното училиште „Петар Здравковски-Пенко“.

Извор: (24.9.08). Старата професорска гарда бега од компјутер како од ѓавол . Нова Македонија.

Дневник: Македонија на 72. место по корупцијата

Македонија годинава е на 72. место меѓу 180 земји по индексот на перцепција на корупцијата што секоја година го мери „Транспаренси интернешнел“. Тоа значи скок на земјата за 12 места погоре на скалата за мерење на корумпираноста во државите.

- Македонија покажа напредок, кој можеби изгледа висок ако го гледаме само бројот на местата за кои сме отишле погоре. Но, Индексот е подобрен за само 0,3 поени и тоа се должи најмногу на промените во законодаството, на формално усвојување нови закони и процедури - рече Слаѓана Тасева, преседателка на невладината организација „Транспарентност - нулта корупција“ на вчерашната прес-конференција. Тасева рече дека од Центарот за истражување на „Транспаренси интернешнел“ објасниле оти на Македонија и' претстои уште многу работа ако сака да се најде повисоко на ранг-листата според Индексот за перцепција на корупцијата.

- Објективно ние се' уште имаме многу да покажеме на планот на имплементација и вистинска ефикасност во борбата против корупцијата. Да имаме ефикасно завршени случаи, судски постапки, изречени пресуди и да имаме јасни, транспарентни и ефикасни процедури во јавната адмистрација - рече Тасева. Македонија годинава е меѓу Бугарија, Кина, Мексико, Перу, Суринам, Свазиленд, Тринидад и Тобаго. Албанија, Србија и Црна Гора се на 85. место, Бугарија и Романија, кои имаат сериозни проблеми со корупцијата, се рангирани повисоко од Македонија. Од земјите во регионот најдоброрангирана е Хрватска, која е на 62. место. Босна и Херцеговина е на 92. место, а Турција на 61. место. Ваквото рангирање премиерот Никола Груевски го оцени како успех на неговата влада.

- Од 105-тото место, кое го делеше со Свазиленд, во времето на владеењето на претходната влада, сега е на 72. место и е на исто рамниште со европски држави, а убедливо пред земјите од регионот - рече Груевски.

Извор: Н.Н.С. (24.9.08). Македонија на 72. место по корупцијата. Дневник.

Дневник: „Епл“ продира на македонскиот пазар

Доказ дека „Епл“ се' подлабоко продира и на македонскиот пазар е „Изак“, скопска компанија-дистрибутер на најновата палета производи на гигантот во информатичката технологија. Игор Заковски, сопственик и раководител на фирмата, вели дека на домашниот пазар има голем простор и интерес за продуктите на „Епл“.

- Сега е вистинското време на македонските потрошувачи да им се понудат продуктите на „Епл“, кои веќе уживаат голема популарност на американскиот и европскиот пазар на информациски технологии. Нашата земја се доближува до светските трендови и домашните купувачи стануваат се' позаинтересирани за оваа технологија - вели Заковски.И додека на глобално ниво од ден на ден се' повеќе се разгорува битката меѓу „Мекинтош“ и персоналните компјутери (ПС), „Епл“ бележи голем комерцијален успех бидејќи секоја година голем дел од корисниците одлучуваат нивниот нов компјутер да го носи логото на популарното „Јаболко“.Заковски објаснува дека предноста на производите „Мекинтош“ е во нивниот уникатен дизајн, високата репутација на стабилни компјутерски системи што не се ранливи на малициозниот софтвер (вируси и штетни програми), кои се шират преку интернет и стануваат се' поголема закана за сопствениците на персоналните компјутери.

- Првичната претстава на корисниците дека компјутерите „Мекинтош“ се многу поскапи од ривалските ПС е погрешна. Ако се направи паралела меѓу двата производа, тогаш конфигурациите на „Епл“ нудат многу повеќе можности од соодветната варијанта на персоналните компјутери - објасни Заковски.Тој додава дека најважните услужни програми што се користат во секојдневната работа постојат и за „Мекинтош“, а некои од нив, како пакетот „Опен офис“ се бесплатни и лесно достапни.

- И за оние корисници што се навикнати на „Виндоус“, оперативниот систем на „Мајкрософт“, компјутерите на „Епл“ нудат целосна компатибилност и може без проблем да работат под „Виндоус“-системот, што е чекор напред до целосно преминување од ПС на „Мекинтош“ - истакна Васил Поповски, софтверски инженер во „Изак“.Освен во бизнис-секторот, „Епл“ нуди и широка палета продукти наменети за домашна забава. Тука доминира „Ајпод“, уред за слушање музика и за прегледување на видеосодржини. Нивната предност е во тоа што во овој дигитален свет, благодарение на нивната практичност, наоѓаат примена во многу случаи. Мобилноста, односно лесната преносливост, е клучниот фактор за огромниот комерцијален успех на „Ајпод“ во светот. Можат да се користат во возило или, пак, на џогирање.Од „Изак“ очекуваат голем интерес кај домашните потрошувачи токму за овој продукт, бидејќи најновите модели имаат огромен капацитет за снимање видеоматеријали и аудиоснимки. Последниот модел „Ајпод“ нуди простор од дури 160 гигабајти, каде што може да се сместат околу 40.000 музички нумери во МП3-формат. Поради ова, се' почесто го употребуваат и професионалните диџеи - додаде Заковски.Во понудата на „Изак“ свое место најде и „Епл ТВ“, софистициран уред што овозможува безжичен пренос на дигитални содржини од компјутер на екранот на домашните телевизори.

Извор: Владимир Лочев. (24.9.08). „Епл“ продира на македонскиот пазар. Дневник.

Утрински: На Македонија и' недостигаат информатичари

ОХРИД - Околу 200 експерти од 13 земји од регионот на Југоисточна Европа од вчера во Охрид дебатираат за горливи теми од информатичката технологија и зголемувањето на работната сила. На конференцијата на Асоцијацијата СЕЕИТА ќе се промовира и првиот правен сектор во рамките на Асоцијацијата за информатички и комуникациски технологии во Југоисточна Европа, што е голем напредок во регионалното организирање, а прв претседател ќе биде претставник на Република Македонија.

„Една од темите ќе биде либерализацијата на телекомуникацискиот пазар. Тука е важно да се процени колку е достапен европскиот пазар за македонските фирми. Минатата година на Петтата конференција потпишавме меморандум за промовирање заеднички комуникациски бренд на земјите од овој дел на Европа и ги очекуваме првите резултати“, смета претседателот на Стопанската комора за информатички и комуникациски технологии МАСИТ, Васко Кроневски.

„Македонија има солидна позиција во регионалниот информатички и телекомуникациски пазар, но погрешно е да се мисли дека имаме вишок кадри кои би се селеле во други земји“, вели Кроневски. Реално гледано во глобални рамки, бројот на информатичари е се' помал. Според него, загрижува фактот што во Македонија на локално ниво нема доволно информатичари, па затоа сериозно треба да се разговара за недостатокот на квалификувана работна сила. Затоа, според Кроневски, треба да има планирани активности за задржување на талентираните, пред се' млади луѓе, за да останат во Македонија.

Ваквите процеси на регионално обединување на оние што се занимаваат со информатичка технологија во регионот се добро проценети и неопходни. Заменик-амбасадорот на САД во Македонија, Томас Навратил, на отворањето рече дека преку УСАИД тие го поддржуваат процесот и очекуваат брза имплементација зашто станува збор за светски процес во кој интензивно се развива јавно-приватното партнерство во информатиката.

Во регионот Словенија е водечка земја во примената на концептот за информатичко општество. Претставникот на нивното Министерство за јавни работи, Алеш Добникар, рече дека тие не само што први воведоа електронска влада туку се и пионери во т.н. електронско управување со јавните работи, што е тренд во развиените земји.

Извор: С.И. (23.9.2008). На Македонија и' недостигаат информатичари . Утрински Весник.

Вечер: Кејблтел од октомври нуди бесплатно ало

Кабелскиот оператор Кејблтел од први октомври ќе почне со нудење на два нови сервиси за своите корисници - pay per view (плати за да гледаш) и фиксна телефонија. Првиот сервис за прв пат се појавува на македонскиот пазар и популарно е наречен домашно кино бидејќи им овозможува на корисниците на Кејблтел да гледаат до 40 филмови од најпознати светски филмски куќи и тоа преведени на македонски јазик и не постари од шест месеци.

Стојан Ѓорговски, оперативен директор во Кејблтел, вели дека засега сервисот pay per view им е овозможен на корисниците од Скопје, Велес и Куманово и ќе биде бесплатен во тримесечниот промотивен период.

Од наредниот месец, Кејблтел ќе стартува и со фиксна телефонија која ќе биде бесплатна за корисниците на мрежата на овој провајдер. Ѓорговски вели дека тест периодот за интерконекција со Македонски Телеком завршува неделава по што ќе може да се стартува и со овој сервис кој на корисниците ќе им биде понуден со избор на повеќе пакети. Повиците кон броеви на други оператори ќе се наплатуваат.

Со овие сервиси, покрај кабелската телевизија и интернетот, Кејблтел станува оператор на трипл плеј услугата која прва ја воведува во земјава. Поради зголемување на разновидноста на услугите, Кејблтел најави дека од идниот месец го поскапува основниот пакет од сегашните 350 на 450 денари.

Кејблтел лани инвестираше 13 милиони евра за купување на 13 кабелски оператори и уште пет милиони евра во надградба на нивната мрежа. Главниот извршен директор на Кејблтел, Џеф Финли најави преземање на уште 10 кабелски оператори во текот на ноември и инвестиција од 20 до 22 милиони евра. Ширење на мрежата, Финли најави и за 2009 година кога планираат купување на уште 20 кабелски оператори.

Извор: С.Бл. (23.9.08). Кејблтел од октомври нуди бесплатно ало. Вечер.

Дневник: Јакимовска го закопала „Е-катастар“

Лиценцата за развој и имплементација на интегриран електронски катастар, вредна над два милиона евра, пред четири години со непосредна спогодба ја набавила поранешната директорка на Државниот завод за геодетски работи (ДЗГР), Бисера Јакимовска. Ова го утврдија државните ревизори, а е посочено во извештајот за работењето на оваа институција во минатата година. Ревизорите посочуваат дека проектот „Е-катастар“ сега е сопрен бидејќи не може да се имплементира на целата територија на земјава.

„Поради склучен договор без системска спецификација може да се случи ДЗГР да мора да и' плати 2.054.000 евра на фирмата „Експортфинанс“ и камата за ненавремена исплата на ратите, а за возврат да добие некомплетен електронски катастар, што е докажано и во извештајот од стручниот консултант и од работните групи шти ги спровеле тестирањата. За да се стави во функција целиот систем, ќе бидат потребни дополнителни средства“, пишува во ревизорскиот извештај.

Ревизијата не се уверила во оправданоста на платените рати од 193.000 евра до крајот на минатата година врз основа на договорот за лиценцирање од 2003 година што го склучиле ДЗГР и Норвешкиот развој на регистри. Новиот директор на Заводот, Љупчо Георгиевски, го сопрел проектот „Е-катастар“, кој требаше да овозможи давање услуги за граѓаните во рок од три дена, бидејќи доставувачот не ги исполнил договорените услови. Георгиевски презел нова ИТ-стратегија за воспоставување електронска база на податоци и ја известил Владата дека треба да продолжи со исплатите по стариот договор.

Јакимовска и Георгиевски вчера не беа достапни за коментар.

Ревизорите откриваат и други неправилности во работењето на Јакимовска. Според нив, договорот за „Е-катастар“ ги штител главно правата на продавачот.

„Во јануари 2005 година од директорот на ДЗГР потпишал протокол за конечна испорака на ‘модул 3’ без да се изврши тестирање. Со тоа неосновано овозможил плаќање надомест за лиценца за систем што се' уште не е во функција, освен пилот-проектот во Куманово. Работната група го известила директорот дека „модул 3“ не е применлив за имплементација“, се посочува во извештајот.

Ревизорите открија и дека плаќањето се вршело на норвешката фирма „Експортфинанс“ АСА од Осло, која воопшто не била спомната во договорот за лиценцирање. Фирмата со која бил склучен договорот, Норвешки развој на регистри НРД АС, била избришана од регистарот на трговски друштва во Норвешка во 2005 година.

Според ревизорскиот извештај, Катастарот лани незаконски и ненаменски потрошил околу 50.000 евра, од кои 8.900 евра за дневници за службени патувања, без доказ дека патувањето се остварило, за аванси за службени патувања и за гориво, а 1.200 евра чинело сервисирање возило што било под гаранција. Во одредени случаи Заводот не го почитувал Законот за јавните набавки и набавувал материјали што веќе ги имал во магацините. Во 2005 и во 2006 година биле набавени имотни и поседовни листови со несоодветен квалитет и количини. Не бил почитуван Законот ни при набавката на услугата за сервисирање возила, за што биле потрошени 15.000 евра, при потпишувањето на договорот за сервисирање компјутери со фирмата „Неоком“, вреден околу 5.000 евра, за одржување и надградба на софтверот со фирмата „ГИС ДАТА“ од околу 34.000 евра, како и договорот за сервисирање со „Астра Мак“ од околу 5.000 евра.

Бидејќи не постоела соодветна документација, ревизорите не можеле да се уверат во реалноста и објективноста на посочените расходи за гориво од над 50.000 евра. Тие истакнуваат дека Катастарот имал 114 возила, а нема реверси на кого биле издадени 30 од нив, ниту се знае за што ги користеле. Не е потврдена ни оправданоста на околу 16.000 евра потрошени за поправка на возила и на 180.000 евра за 57 луѓе ангажирани преку агенции за привремени вработувања.

Извор: Александра Филиповска. (19.9.2007). Јакимовска го закопала „Е-катастар“. Дневник.

Нова Македонија: Годишните сметки по електронски пат до Централниот регистар

Правните лица ќе можат годишните сметки за годинава по електронски пат да ги испратат до Централниот регистар, најави Иво Ивановски, министер за информатичка технологија при вчерашната посета на оваа институција. Тој информира дека со проект за поедноставување на едношалтерскиот систем на крајот на 2009 година во Македонија ќе може да се регистрира фирма преку Интернет, пренесе МИА.

- Услугите што сега ги нуди Централниот регистар по електронски пат се неколку, но доста значајни. Корисниците може да ја проверат зафатеноста на името, односно називот на правното лице што сакаат да го регистрираат, електронски да резервираат име за определен временски период и најголемата новост е што годишните сметки за годинава по електронски пат ќе можат да ги испратат до Централниот регистар - рече Ивановски.

Тој нагласи дека Централниот регистар има голем напредок и додаде дека за идната година се предвидува тој да биде уште позначаен.

- До крајот на 2009 година ќе има поедноставување на едношалтерскиот систем, со што во Македонија ќе може да се регистрира фирма преку Интернет - рече Ивановски.

Тој појасни дека со измените сите правни лица што претходно требаше да одат на шалтер, да чекаат таму, да ги пополнат сите документи и да платат надомест од 1.000 денари, сега тоа ќе можат да го направат електронски. Фирмите со користење дигитален електронски потпис од својот компјутер ќе можат да ги симнат и пополнат формуларите, да платат 400 денари и со тоа да заштедат време и средства.

Директорот на Централниот регистар Зоран Алексов рече дека до крајот на октомври годинава, кога во Кардиф, Велика Британија, ќе се одржи генералното собрание на Европскиот бизнис-регистар, Централниот регистар ќе биде поврзан со Европскиот и сите податоци за македонските активни компании ќе бидат ставени на располагање на околу 20 милиони компании што се регистрирани во Европа. Сите заинтересирани субјекти од Македонија што имаат деловни партнери во Европа ќе можат да ги гледаат податоците за работењето на странските компании преку овој регистар.

Извор: (18.9.2008). Годишните сметки по електронски пат до Централниот регистар. Нова Македонија.

Вечер: Сурфање на планина и во автомобил

Космофон воведе три нови пост-пејд тарифни модели наменети, пред се, за корисниците кои сакаат да имаат брз интернет пристап од својот компјутер или лап топ, независно од нивната локација. Ова го овозможува услугата 3-Г интернет и претставува едноставно решение за брз безжичен интернет. Тие што ја пробале оваа услуга, која е достапна од средината на минатиот месец, велат дека е убава работа да сурфаш на планина или на пат во автомобил или автобус со 3 мегабајти во секунда. Од Космофон уверуваат дека благодарение на најголемата интернет - брзина на пазарот која ја овозможи само 3-Г технологијата, можна е висока брзина на симнување на видео и аудио содржини како и симултан пренос на гласовни повици и податоци.
- Значи, може да зборувате на телефон преку звучник или слушалки, а во исто време да сурфате на интернет, праќате имеил, да го гледате и слушате соговорникот - објаснуваат од Космофон.За користење на 3-Г интернет (возможно е да се користи и во странство преку роаминг врска), потребен е УСБ модем кој е бесплатен. Интернет врска се добива со негово едноставно приклучување на компјутер или лап топ. До крајот на годинава, пост-пејд корисниците промотивно добиваат и до 5 гигабајти бесплатен интернет сообраќај секој месец. Месечните претплати се 290, 490 и 890 денари.

Извор: (6.9.08). Сурфање на планина и во автомобил. Вечер.