Вечер: Студент од ЕУРМ дизајнираше компјутер во форма на топка

Апостол Тноковски, студент на Првиот приватен универзитет Европски универзитет РМ, на само 25 години дизајнираше компјутер во форма на топка, со која на натпревар на Мајкрософт за дизајн на нова генерација на персонални компјутери постигна забележителен успех. Од 1000 конкуренти влезе во тесниот избор од 80-тина.

Студентот во трета година на отсекот графички дизајн, на Факултетот за арт и дизајн, го изработи визуелниот идентитет на тренинг центарот ЦС Глобал од Скопје, извесен период работеше во маркетинг агенција, каде дизајнираше печатени материјали. Ја дизајнираше и веб-страницата на годинашниот Скопски филмски фестивал во соработка со доц. Гордана Вренцоска. Моментално работи во продукцијата "Наше маало" како графички дизајнер.

Учествуваше на натпревар на Мајкрософт. Појасни ни за што станува збор?
- NEXT GENERATION PC DESIGN COMPETITION е натпревар организиран од Мајкрософт за дизајн на нова генерација на персонални компјутери. Овој натпревар се организира со цел да се генерираат нови идеи, кои би придонеле за развојот на компјутерската индустрија во иднина. Оваа година беа пријавено над 1000 концепти од целиот свет, а јас успеав да влезам во 80-те најдобри. Влегов со мојот концепт за многу мал персонален компјутер со невообичаен облик на топка. Концептот е наречен E-BALL, односно електронска топка.

Објасни ни го концептот на твојот проект
- E-ball е производ со дијаметар од 16 сантиметри. Целата идеја ми беше тоа да биде најмалиот компјутер со најчуден облик. Кога велам најмалиот, не мислам на ПДА компјутер кој има релативно ограничени карактеристики, туку мислам на најмал персонален компјутер со карактеристики на десктоп/лаптоп компјутер: ДВД рекордер, Хард диск со голем капацитет, многу рам меморија, солидна графичка картичка, голем екран и сл. Основна карактеристика на овој производ е компактноста на елементите.

Дали мислиш дека проектираше практичен и атрактивен производ?
- Овој производ би бил доста примамлив за бизнисмените, како и за тинејџерите. Еве некои карактеристики кој го прават овој производ примамлив: мала димензија (можеме да го носиме в џеб, кога не го користиме да го чуваме во фиока), уникатна форма, можност да се користи за презентации без носење на дополнителни елементи како звучници и проектор, можност да се користи како целосен мултимедијален центар (за слушање музика, гледање филмови на проектор, сурфање и сл.).

Од каде дозна за конкурсот и дали ова Ти е прво учество на ваков конкурс?
- Во последниве неколку години многу често учествувам на конкурси за индустриски дизајн и мислам дека веќе ми станаа навика. Бидејќи се работи за конкурси на кои проектите се праќаат преку интернет, преку интернет пребарување доаѓам до информација за некои конкурси, така го открив и конкурсот на Мајкрософт.

Извор: (26.7.08). Студент од ЕУРМ дизајнираше компјутер во форма на топка. Вечер.

Дневник: Државната телевизија пред стечај

Владата предложила законски промени со кои ќе се дозволи ликвидација на презадолжениот и нефункционален јавен сервис.

Македонската радио-телевизија ќе оди во стечај бидејќи веќе не е во состојба да ја извршува функцијата на ефикасен јавен радиодифузен сервис. Стечајната постапка ќе почне штом ќе бидат усвоени промените во Законот за радиодифузната дејност, кои вчера беа доставени во Собранието. Со измените во Законот што ги предложила Владата ќе се воведе „стечај и ликвидација на јавно радиодифузно претпријатие и трговско радиодифузно друштво“. Таквата можност досега не постоеше. Владата предвидува во иднина да може да се одвојуваат и „државни буџетски пари за постигнување и одржување поголем степен на програмски и технолошкиот развој на јавниот радиодифузен сервис“. Истовремено, се предлага граѓаните да плаќаат радиодифузна такса од 130 денари.„И покрај активностите за реализација на санациската програма ЈП МРТ се соочува со проблемот на сервисирањето на обврските. Во вакви услови, поради напластените долгогодишни проблеми и долгови не е во состојба да биде транспарентен и независен јавен сервис. Нема ниту систем што би овозможил прибирање на радиодифузната такса. МРТ повеќратно е празадожена и со евидентна превработеност и несоодветен стручен кадар“, пишува во предлогот на Владата.

Според сознанијата, сценариото на Владата за МРТ предвидува целосна ликвидација на фирмата и отпуштање на сите околу 1.110 вработени. Потоа, би се формирало ново јавно радиодифузно претпријатие со помалку вработени. Се навестува оти тогаш ќе се решава и за името на новиот јавен сервис и за евентуалното преименување во Радио-телевизија Македонија.Долгот на МРТ кон различни доверители сега се движи од 10 до 15 милиони евра, а е најголем кон комуналните претпријатија. Вработените веќе неколку месеци не примиле плата и повеќе недели штрајкуваат. Кризата со финансирањето Владата досега ја решаваше со префрлување на парите позајмени од другите јавни претпријатија. Една од причините за лошата финансиска состојба е неможноста да се наплатува радиодифузната такса. Влошувањето на состојбите во МРТ, која своевремено беше една од најразвиените национални информативни куќи, трае цели петнаесетина години.

Укинати се повеќе сектори и служби, а се отпуштени и голем број вработени. Состојбите наликуваат на хаос поради постојаниот конфликт помеѓу синдикатот и директорот Јанез Сајовиц околу предвидените отпуштања како една од мерките за санирање на состојбите. Во минатиот месец, во МРТ околу 130 вработени беа прогласени за технолошки вишок, а откази беа најавени и за сите дописници. Нивното отпуштање, според најавите, требало да се изврши во септември.Генералниот директор Јанез Сајовиц вчера не беше достапен на мобилен телефон за коментар на намерата на Владата за стечај на МРТ. Во МРТ неодамна се случи и промена на чело на Управниот одбор при што на местото на сменетиот Леонид Наков беше назначен Тренчо Миленкоски. Во круговите на МРТ тогаш имаше неофицијални навестување дека наскоро ќе се изврши стечајот на претпријатието. При ова, не се предвидува прекин на работата на јавниот сервис бидејќи веднаш ќе се основа нов јавен радиодифузер, без долгови и со нов совет и управен одбор.Од пратеничката група на владејачката ВМРО-ДПМНЕ вчера изјавија дека тие побарале „консултации“ за предложените промени на законот.

Извор: М.Т. - Б.Ѓ. (25.07.2008). Државната телевизија пред стечај. Дневник.

Вечер: Компјутери за деца со оштетен вид и слух

ДОНАЦИЈА КОСМОФОН

Штитениците на Државниот училишен центар за образование и рехабилитација на деца со оштетен слух "Партенија Зографски" од Скопје, Заводот за рехабилитација на деца со оштетен слух "Кочо Рацин" во Битола и Државното училиште за рехабилитација на деца и младинци со оштетен вид "Димитар Влахов" во Скопје ќе добијат 35 компјутери, донација од КОСМОФОН. Целта на овој хуман гест е да се подобрат условите на часовите по информатика во овие установи, а специјалниот софтвер кој ќе биде инсталиран во компјутерите наменети на училиштето "Димитар Влахов", ќе овозможи нивно користење од страна на децата со тешко оштетен вид. Од КОСМОФОН потенцираат дека ќе продолжат со спроведување на проекти за подобрување на ИТ инфраструктурата во земјава, со посебен акцент врз грижата за децата и нивното образование.

Извор: (25.07.2008). Компјутери за деца со оштетен вид и слух. Вечер.

Утрински: Телевизиите со нови канали во битка за гледачите

Телевизиите со нови канали во битка за гледачите А2 стартува на 1 септември, сега експериментално ја проверува реакцијата на гледачите Македонскиот медиумски простор се збогатува со нови канали што ги добија постојните телевизии кои обезбедија концесии за емитување програма преку сателит. Советот за радиодифузија им издаде вакви дозволи на телевизиите А2, на Канал 5 плус и на Сител 3, но прва ќе стартува новата ТВ-куќа А2 на Велија Рамковски. Од неодамна А2 почна со експериментална програма, а од 1 септември, како што вели Александар Чомовски, главниот и одговорен уредник, кој заедно со засилена новинарска екипа во иднина ќе се појавува само на новиот канал, ќе стартуваат информативните содржини. Телевизиите кои добија концесија за нови канали кои ќе ја емитуваат програмата преку сателит, ќе мора да понудат сосема поинакви содржини, не смеат да емитуваат нелиценцирана програма, туку само свои или купена програми од директни дилери, без посредници. Тоа значи дека не смеат да реемитуваат симнати програми, туку многу повеќе ќе мора да ги осмислуваат сопствените содржини и да ги почитуваат законите за оваа сфера. Без тоа може да ја изгубат лиценцата за сателитски канал. А2 ќе понуди содржини кои програмски, кадровски и уредувачки ќе бидат независни од оние што се емитуваат на А1 телевизија. Сателитската информативна програма А2 се концентрира околу Студио 2 од кое ќе се емитува секој ден во 18 и во 21 часот. Според Чомовски, станува збор за политичко информативно и лајф шоу, 50-минутни информативни магазини, чиј интегрален дел ќе бидат секојдневни шоуа од различни области на познати новинарски имиња. „Гледачите на А2 секој ден ќе имаат можност да ги следат Борјан Јовановски со евротеми, Атанас Кировски со регионални и теми од Македонија, поеднечните шоу-програми на Снежана Лупевска и на Чомовски, а уредници- водители ќе бидат Лирим Дулови и Љубиша Николовски. Освен тоа, ќе има и група водители и новинари - аналитичари“, вели Чомовски и објаснува дека основна уредувачка цел им е „да не ги заморуваме гледачите со егоцентризмот на македонските политичари, туку да го привлечеме програмскиот интерес на новата граѓанска средина, при што многу повеќе ќе се свртиме кон информациите од светот и од регионот“. Во оваа експериментална фаза во која новата телевизија се' уште се екипира со познати, но и млади новинари, во живо го тестираат и концептот и новите технички потенцијали на А2. И Канал 5 плус доби лиценца за сателитско емитување. Но, бидејќи програмата треба да ја подготват во рок од една година, директорката на Канал 5, Анита Каленикова, само кусо рече дека „програмските содржини ќе бидат од општ формат“, без да прецизира што ќе им понудат на гледачите. Горан Иванов, директорот на Сител беше недостапен за информации. Извор: Б.Ј. (14.7.2008). Телевизиите со нови канали во битка за гледачите. Утрински Весник.

Вечер: Донесовме конкуренција во мобилната, а сега и во фиксната телефонија

ПЕТРОС ЛЕФКОВИЦ, ГЕНЕРАЛЕН ИЗВРШЕН ДИРЕКТОР НА КОСМОФОН

Донесовме конкуренција во мобилната, а сега и во фиксната телефонија

Можеме да им понудиме на нашите корисници сеопфатни решенија што ги покриваат и најсофистицираните комуникациски потреби, не само во фиксната и мобилната телефонија, туку и интегрирани решенија во сферата на интернет, 3-Г и безжична комуникација, вели Лефковиц

Работиме со полна пареа со цел да ги финализираме сите неопходни работи и во следните неколку недели да ги воведеме услугите 3-Г и WiMax. И двете технологии ќе им овозможат на нашите корисници влез во еден нов свет на телекомуникации, полн со можности и придобивки. Ова го тврди генералниот извршен директор на Космофон, Петрос Лефковиц со кого поразговаравме за овие тековни и амбициозни проекти, со кои очекува неговата компанија да ја зацврсти позицијата на технолошки лидер во земјата.

Во текот на последните пет години, Космофон успешно се позиционираше на домашниот пазар на мобилна телефонија. Колку сте задоволни со постигнатото, имајќи предвид дека работите со конкуренција во текот на целиот овој период?
Работењето во конкурентна средина не е ништо ново за нас. Како дел од семејството на Космоте, кое е присутно на пет пазари во Југоисточна Европа, знаеме што значи вистинска конкуренција. Всушност, ние ја донесовме конкуренцијата во мобилната телефонија во земјата. Исто така, ние сега воведуваме вистинска конкуренција и во фиксната телефонија. Се разбира, конкуренцијата мора да биде фер, транспарентна и да важат исти правила за сите пазарни субјекти. Ако постојат вакви услови, корисниците се тие кои имаат најголема корист, што е секогаш наш прв приоритет. Имаме одлични производи и услуги, воведовме нови технологии, најсовремена мрежа, имаме високо квалитетен и исклучително посветен персонал. Поради сите овие аспекти, ние сме силни и конкурентни на пазарот, со што ја стекнавме довербата на над 620.000 корисници.

Што се однесува до нашите резултати, тие зборуваат сами за себе. За само пет години постоење на пазарот, Космофон ја прошири својата телекомуникациска мрежа која во моментов покрива 99,8 проценти од населението низ целата земја, нуди широко портфолио на конкурентни производи и квалитетни услуги, истовремено развивајќи силна малопродажна мрежа од 218 продавници и околу 5.500 продажни места низ целата земја. Преку партнерството Космоте - Германос, се создаде значајна основа за придобивање на нови корисници. Ова се исклучителни резултати и достигнувања. Во Космофон сме навистина горди на тоа и мотивирани да постигнеме уште повеќе.

Минатата година беше многу успешна за Космофон. Го добивте тендерот за обезбедување телекомуникациски услуги на државната администрација; добивте 3-Г и WiMax лиценци и влеговте во фиксната телефонија. Кажете ни нешто повеќе за ова.
Последните 12 месеца беа многу важни за нас. Го добивме тендерот за обезбедување телекомуникациски услуги на Владата, добивме 3-Г и WiMax лиценци како резултат на тоа што имавме најдобри понуди. Влеговме во фиксната телефонија и понудивме конкурентни, технолошки напредни и едноставни решенија, со големи придобивки за корисниците.

Што се однесува до 3-Г и WiMax, работиме со полна пареа со цел да ги финализираме сите неопходни работи и да ги воведеме услугите во следните неколку недели. И двете технологии ќе им овозможат на нашите корисници влез во еден нов свет на телекомуникации, полн со можности и придобивки.

Со сите овие тековни и амбициозни проекти, Космофон ја зацврсти својата позиција на технолошки лидер во земјата, нудејќи најдобри и најконкурентни, технолошки напредни решенија по мерка, дури и на најпребирливите корисници. Со нашето широко и сеопфатно портфолио, кое покрај мобилните услуги вклучува и фиксна телефонија, 3-Г и WiMax, ние сме единствениот оператор кој може да понуди комплетно комуникациско решение на пазарот.

Кажете ни поконкретно, како може мобилен оператор да нуди фиксна телефонија?
Не е необично некоја компанија да го прошири своето портфолио и да влезе во друга бизнис сфера. Во нашиот случај, станува збор за телекомуникациска компанија која влегува во друг сектор на пазарот. Нашата фиксна телефонија ALLO се заснова врз ГСМ технологија, а се реализира преку најсовремена телекомуникациска мрежа која покрива над 99,8 проценти од населението низ целата земја. Фиксна телефонија преку ГСМ значи дека нема потреба од инсталирање на кабли, со што на корисниците им се заштедува време и пари. На овој начин, фиксната телефонија сега е лесна за користење и достапна за сите, дури и во најоддалечените области на земјата, исто како и мобилната телефонија.
Зошто корисниците би избрале мобилен наместо фиксен оператор за услуги на фиксната телефонија? Кои се причините за успехот на мобилните оператори низ цела Европа?
Мобилните оператори се повеќе се претвораат во место каде корисниците можат да ги покријат сите свои комуникациски потреби. На пример, Космофон влезе во фиксната телефонија и наскоро ќе воведе 3-Г и WiMax. Во тоа е нашата најголема моќ: ние можеме да им понудиме на нашите корисници сеопфатни решенија што ги покриваат и најсофистицираните комуникациски потреби, не само во сферата на фиксната и мобилната телефонија, туку и интегрирани решенија во сферата на интернет, 3-Г и безжична комуникација. Корисниците знаат дека какви и да се нивните комуникациски потреби, ние ќе им ја овозможиме вистинската услуга по вистинска цена. Ова создава многу важна конкурентна предност за нас и за сите оператори што го прошириле своето портфолио.

Станува се појасно дека Deutsche Telekom влегува во ОТЕ, со што тие стануваат сопственици и на Космофон. Во тој случај, Deutsche Telekom ќе ги поседува двата најголеми и најмоќни оператори во земјата, Т-Мобиле и Космофон, кои заедно држат 90 проценти од пазарот. Домашната регулатива предвидува дека секое групирање што надминува 40 проценти од клиентите и услугите на пазарот е предуслов за постоење на монопол. Се шпекулираше и дека Космофон ќе се затвора или ќе работи само како WiMax оператор. Што се случува со Космофон во вакви околности?
Да, ги слушнав тие шпекулации. Космофон категорично ги негираше како неосновани, а и јас самиот неколку пати го сторив истото. Неодамна и претседателот и извршен директор на ОТЕ и Космоте, г. Панагис Вурлумис ги карактеризираше тие шпекулации за Космофон како "неодговорни новинарски информации" и јасно ги негираше сите шпекулации за затворање на компанијата. Јас само уште еднаш ќе го повторам она што веќе е кажано: Космофон продолжува да работи, инвестира и расте. Ние имплементиравме и се уште работиме на бројни големи и амбициозни проекти, инвестиравме повеќе од 200 милиони евра во земјата и не постои бизнис логика која би го оправдала затворањето на компанијата.

Работите во Космофон веќе половина година. Кое е вашето мислење за потенцијалот на вашите вработени?
Јас сум многу горд на нашите вработени. Тоа се млади, динамични и предани луѓе кои ја извршуваат својата работа со висок професионализам, фокусирајќи ги својот ентузијазам и енергија кон остварување на компаниската визија и цели. Квалитетот и преданоста на вработените на Космофон ми беа познати и пред да станам генерален директор на компанијата. Сепак, навистина е убаво и инспирира фактот што моите очекувања се надминати. Пред нас е реализација на уште многу планови и јас навистина се потпирам на нивната преданост и професионализам во остварувањето на заедничките цели.

Сте биле на водечка позиција во многу познати компании, вклучувајќи и компании од телекомуникацискиот сектор. Како го гледате телекомуникацискиот пазар во регионот во следните пет до десет години?
Тоа е навистина долг период за еден динамичен пазар како што е телекомуникацискиот, каде работите се менуваат секојдневно. Иновации во технологијата се случуваат секој момент, а и на пазарот се случуваат пресврти многу често. Сведоци сме на консолидација на западните пазари веќе подолго време, а тој тренд сега стигнува и во Југоисточна Европа. Од друга страна, пак, очекувам дека многубројните технолошки иновации ќе станат секојдневие за потрошувачите на овие простори, како што се: т.н. Triple Play пакети (интернет, ТВ и телефонија), проширување на интерактивните услуги, како и поширока примена на м(мобилна)трговија, м(мобилно)плаќање итн, се разбира, доколку во тоа се вклучат и другите засегнати институции, како на пример банките. Тоа значи дека за еволуцијата ќе придонесуваат и другите индустрии, а не само мобилните оператори. Телекомуникацискиот пазар е и ќе остане многу возбудлив и интересен, ќе продолжи да носи бројни технолошки напредни производи и услуги што ќе ја олеснуваат нашата комуникација, ќе ни овозможуваат повеќе избор и извори за забава, образование и информации. Искрено, ме радува што сум дел од сето тоа.

Извор: Светлана Блажевска. (14.7.2008). Донесовме конкуренција во мобилната, а сега и во фиксната телефонија. Вечер.

Вечер: Телекабел - фиксен оператор

ОД 1 СЕПТЕМВРИ

Телекабел - фиксен оператор

Кабелскиот оператор Телекабел влегува во бизнисот со фиксна телефонија заедно со австриски партнер. Од фирмата најавија дека со комерцијална работа ќе почнат од 1 септември, но не прецизираат детали околу цените на разговорите освен тоа дека ќе бидат пониски од постојните на пазарот. Зоран Илиев, управител во Телекабел вели дека деновиве потпишале интерконекциски договор со Македонски Телеком со кој им е овозможено да остварат врска со телекомуникациски оператори од странство.
- И досега бевме подготвени за нудење на телефонија, но проблем беа високите интерконекциски цени. Не очекувам дека Телеком ќе ги намали цените за меѓусебното поврзување и сам да си забие нож во грб, но затоа на потег е Агенцијата за електронски комуникации која треба да ги следи примерите на регулаторните тела во земјите од Европската Унија - вели Илиев.

Од Телекабел ќе стартувале со фиксна телефонија секаде каде имаат поставено кабелска мрежа. Стопроцентна покриеност имаат во Битола, Штип и Свети Николе, а 70 проценти во Скопје. Деновиве Телекабел стартуваше со работа во Струмица, а од октомври и во Велес.
Австриската компанија Aicall со која Телекабел ќе работи на полето на фиксната телефонија има долгогодишно искуство во Австрија.
На пазарот на фиксна телефонија што до неодамна беше целосно под монопол на Македонски Телеком, сега работат уште два оператори: Космофон и Онтел, кој е под капата на Словенечки телеком.

Извор: С.Бл. (11.7.2008). Телекабел - фиксен оператор. Вечер.

Вечер: Промовиран првиот дигитален архив на македонски јазик

ВО МАНУ

Ваквиот потфат во годината на светските јазици во која е вклучен и македонскиот, е уште една потврда дека од овој момент па натаму светот ќе го има нашето писмо на дланка, рече на вчерашната промоција на Архивот, потпретседателот на МАНУ, Бојан Шоптрајанов

- Со "Дигиталниот архив на македонскиот јазик" се отвора нова страница на македонската историја, литература и култура кон светот. Ваквиот потфат во годината на светските јазици во која е вклучен и македонскиот, е уште една потврда дека од овој момент па натаму светот ќе го има нашето писмо на дланка. Ваквиот потфат е и чекор потаму во искоренувањето на нелогичностите и странцизмите во македонскиот јазик за кои имаме соодветни зборови, на пр. зошто дефинитивно, кога го имаме несомнено; зошто имплементација, кога имаме примена..., рече на промотивното отворање на проектот поддржан од МАНУ или поточно Истражувачкиот центар за ареална лингвистика (ИЦАЛ), потпретседателот на нашата највисока институција, Бојан Шоптрајанов.

Лилјана Поповска, претседател на организацискиот одбор на манифестацијата "Година на македонскиот јазик", рече дека најважно од се е дека секој ќе може најдиректно и најдостапно да види се што го интересира.

Според Марјан Марковиќ, координатор на проектот, сите оние кои сакаат да се занимаваат со македонскиот јазик и да дознаат повеќе за него и за работите кои се случувале на почетокот на 20 век ќе можат слободно да ги симнат од интернет и да ги испечатат.
- Ова се најголемите аргументи не само за постоењето и самобитноста на македонскиот јазик, туку и за неговата историја, бидејќи се работи за странски научници кои пред 70 - 80 години имале неверојатно голем интерес за македонските говори од јужните делови... додаде Марковиќ.

Во Архивот засега се внесени книги како што се: "Македонски студии" на Ватрослав Облак од крајот на 19 век, "За Македонцките работи" на Крсте Петков Мисирков, "Абецедарот" издаден 1925 во Атина, а од периодот по Втората светска војна имаме "Првата македонска граматика" од Круме Кепески од 1946 година, "Првиот македонски правопис" од Блаже Конески и Крум Тошев од 1950 година и "Првата македонска граматика на англиски јазик" од 1952 година...

Веб страницата на Архивот е http://damj.manu.edu.mk.

Извор: Б.Г. (10.07.2008). Промовиран првиот дигитален архив на македонски јазик. Вечер.

Дневник: Македонски софтвер ги прелистува плановите на НАСА

УСПЕШЕН ПРОЕКТ НА ФИРМАТА СИВУС

Прегледникот не е конкурент на Микрософт, туку додаток, кој на корисниците им нуди пристап до тоа што им е потребно, без да навл егуваат подлабоко во проблематиката

Доказ дека македонските програмери може да се справата со светската конкуренција е Seavus Project Viewer, алатка за прегледување планови, од која на глобалниот пазар на софтвер досега се продадени повеќе од 500.000 примероци. За овој продукт се одлучиле многу приватни компании, но и државни структури од западноевропските земји и од САД. Американската армија, администрацијата, вселенската агенција НАСА и Федералното биро за истраги (ФБИ) се само неколку од звучните имиња што му укажаа доверба на македонскиот софтвер. Од приватниот сектор помеѓу купувачите на прегледникот, чија прва верзија во 2003 година ја создадоа тројца македонски програмери, се и гигантските корпорации: „Волво“, „Сони“, „Ербас“, „Јамаха“, „Мишелин“, „Хонда“, „Самсунг“, „Рено“, „Теле 2“ и многу други

КОМПАТИБИЛНОСТА НАЈСИЛЕН АДУТ

- Првата верзија беше нарачка на Волво и беше наменета за интерните потреби на компанијата. На нејзиниот развој се работеше шест месеци, а набрзо откако од автомобилскиот гигант добивме позитивни реакции, решивме да го унапредиме производот и да го понудиме на глобалниот пазар. Seavus Project Viewer, кој е изработен во програмскиот јазик C++, денес го користат повеќе од 150 од 500-те најдобро рангирани компании на листата на угледниот бизнис-магазин „Форбс“ - вели Александар Благоевски-Тразоф, раководител на секторот за продажба и маркетинг на производи.

Најсилниот адут што го проби македонскиот прегледник на глобалниот пазар на софтвер се неговата компатибилност со Микрософт проект планерот, програма во која се изработуваат плановите и се внесуваат сите податоци за проектот што се подготвува.Интерфејсот е речиси идентичен и корисниците лесно се приспособуваат кон него. Маркетинг аналитичарите тогаш оценија дека на пазарот има празнина за прегледник од ваков тип. Факт е дека, без оглед за која индустриска гранка или државен сектор се работи, најголемиот дел од учесниците во проектот имаат потреба само да ги гледаат плановите од кои добиваат насоки за работните задачи, но не и да ги менуваат истите - објасни Благоевски-Тразоф.

Промоцијата на програмата се одвива преку интернет-порталот на македонската компанија на која на потенцијалните купувачи им се нуди и пробна верзија. По одреден временски рок, тие што ќе се одлучат да ја купат дозволата за истата треба да платат 30 евра. Оваа сума е десетпати помала од таа што компанија или физичко лице треба да ја издвои за Микрософт проект планер. На овој начин, менаџерите заштедуваат голем дел од проектираниот буџет, бидејќи не се принудени да плаќаат за опции што воопшто и нема да ги искористат во нивната работа. Нашиот продукт не е конкурент на Микрософт, туку, додаток, кој на одреден број корисници им нуди лесен пристап до тоа што им е потребно, без да навлегуваат подлабоко во проблематиката - додава маркетинг-менаџерот.

НОВИ РАБОТНИ МЕСТА

Поради големиот комерцијален успех на прегледникот, македонската компанија го зголеми тимот што работи на негов понатамошен развој. Сега, тимот чие јадро го сочинуваа само тројца програмери порасна на над триесетина луѓе. Освен програмери, дополнително се ангажирани етнолог, биоинформатичар, психолог, математичар и физичар. Нивна задача е да го приспособат производот на пазарот во согласност со културата, обичаите и навиките во одреден регион. Особено се карактеристични азиските компании, за кои треба да се обрне посебно внимание за боите, знаците и на симболите што се употребуваат, бидејќи не секаде во светот тие имаат исто значење вели Благоевски-Тразов. Оригиналната верзија на Seavus Project Viewer е на англиски јазик, а е преведен и на германски, француски, шпански, чешки и на јапонски.

Извор: Владимир Лочев. (9.7.2008). Македонски софтвер ги прелистува плановите на НАСА. Дневник.

Дневник: Аеродром отвори интернет-шалтер

Општина Аеродром воведе Граѓански сервис-центар на својата официјална интернет-страница.Преку овој центар граѓаните ќе може да пополнат барање и да пријават проблеми од сите сфери на работењето на општината. Системот ќе биде достапен 24 часа, а граѓаните ќе добијат одговор на поднесеното барање најдоцна за 48 часа. Во меѓувреме, дежурните служби ќе излегуваат на терен да направат увид на состојбите.Од Општината известуваат дека граѓаните ќе може да ги користат услугите на нивната страница *њњњ.аеродром.гов.мк, односно линкот „Граѓански сервис-центар - поднеси барање“ Таму ќе може да ги внесат личните податоци и начинот на кој сакаат да бидат известени за барањето и неговото извршување. Во меѓувреме ќе имаат можност да го проверат своето барање и да видат дали решавањето е во тек. Проектот е спроведен со донација од амбасадата на Кралството Норвешка во Република Македонија.

Извор: (5.7.08). Аеродром отвори интернет-шалтер. Дневник

Нова Македонија: Антикорупционерите предлагаат семинари за да се спречи судирот на интереси

Антикорупциската комисија вчера ја објави Државната програма за превенција и за намалување на појавата на судир на интереси. Антикорупционерите препорачуваат едукации, семинари, донесување етички кодекси, проверки на индиции за судир на интереси и измени на закони за да се спречат непотизмот и роднинските вработувања.
„При остварувањето на своите функции, службените лица треба да донесуваат одлуки исклучиво насочени кон остварувањето на јавниот интерес и не смеат да се раководат од етнички, религиозни, партиско-политички, семејни и други интереси. Од нив се очекува да се воздржат или изземат од какви било активности во кои имаат приватен интерес, со што би се одбегнал каков било сомнеж во објективното постапување“, се вели во програмата.
Антикорупциската комисија предлага да се направи водич со правила за однесување на службените лица кога ќе се најдат во ситуација на реален судир на интереси.
„Секогаш кога службеното лице може во процесот на одлучување да ја злоупотреби сопствената позиција за да изврши или да прикрие влијание со што може да оствари лична финансиска корист, постои судир на интереси“, заклучиле антикорупционерите.
Затоа тие предлагаат јасно да се дефинира непотизмот, начинот на постапување при неговото појавување и воведување обврска за пријавување на семејните и на роднинските релации од страна на службените лица.

Извор: (03.07.2008). Антикорупционерите предлагаат семинари за да се спречи судирот на интереси. Нова Македонија.

Вест: ДУП-ови од Гази Баба на Интернет

Општина Гази Баба постави дванаесет детални урбанистички планови на општинската веб страница. Граѓаните ќе можат на Интернет да најдат податоци за одредени локации за кои се заинтересирани.
На Интернет жителите ќе можат да ги видат ДУП-овите за Ќерамидница, и тоа за урбаните блокови 1, 2 и 3, потоа ДУП-от за дел од Маџари 2, локалитет Камник урбан блок 1, како и ДУП -от за изменување и дополнување на дел од месна заедница Маџари, урбан блок 3/1. Тука ќе може да се разгледаат и ДУП -овите за месна заедница Триангла и локалитет 2 од истата, ДУП -от со измена и дополна за дел од месната заедница Крсте Мисирков, урбан блок 4, како и ДУП -от за месната заедница Железара, локалитет А и Б.
Од Гази Баба велат дека Интернет ДУП-овите нема да служат како официјален документ и оти извод од истите ќе се издава како и досега во Секторот за урбанизам.
Оттаму најавуваат поставување на сите останати ДУП-ови на Интернет порталот на Гази Баба.
Извор: Б.Б. (03.07.2008). ДУП-ови од Гази Баба на Интернет. Вест.