Утрински: Мобилките и Интернетот растат, паѓа фиксната телефонија

Приходите на пазарот за електронски комуникации од година в година бележат значителен раст во сите сегменти, освен во фиксната телефонија. Најголем дел од вкупните приходи и' припаѓаат на мобилната телефонија и тоа 58 проценти, фиксната телефонија учествува со 32 отсто, Интернет-услугите со осум проценти, а најмал дел од два отсто има преносот на радио-телевизиска програма до крајните корисници. На пазарот за фиксна телефонија во Македонија во првото тримесечје од годинава активни биле шест оператори, на пазарот за мобилна телефонија три, како и 70 кабелски оператори, 52 Интернет провајдери и 42 даватели на јавно достапни телефонски услуги на фиксна локација. Овие податоци се наведени во Извештајот за развојот на пазарот за електронски комуникации за првиот квартал од годинава, што вчера го објави Агенцијата за електронски комуникации.

Раководителот на Секторот за анализа на пазар при АЕК, Васка Петровиќ, истакна дека кај фиксната телефонија е утврден значителен процент на опаѓање на фиксните линии во однос на првиот квартал од 2008 година, од 399.975 линии, на 375.461. Тоа не се однесува на деловните линии во фиксната телефонија, кои од квартал во квартал одат во нагорна линија, од 37.057 крајни корисници на 41.535.

Според уделот на пазарот на фиксна телефонија, „Македонски телеком“ бележи пад - од 95,49 отсто во првиот квартал од 2008 година на 88,81 отсто во првиот квартал оваа година, на сметка на учеството на алтернативните оператори чиј удел се зголемува и во овој квартал изнесува 11,19 проценти. „Учеството на ’Македонски телеком‘ постојано се намалува, меѓутоа, тоа се' уште е значително големо и е доволна причина моментно да ја правиме анализата во согласност со препораките од ЕК, со цел да се констатира дали на пазарот има ефикасна конкуренција или има оператор кој може да дејствува независно од останатите во однос на понудата и цените“, истакна Петровиќ.

Во однос на пристапот до Интернет, бројот на резиденцијални претплатници што користат теснопојасен пристап на Интернет континуирано се намалува, од 9.412 на 4.483 за анализираниот период. Тој тренд е присутен и кај деловните претплатници. Наспроти ова, континуирано се зголемува бројката на корисници на широкопојасен пристап на Интернет и кај резиденцијалните и кај деловните претплатници.

Во константен пораст е пазарот на мобилна телефонија каде што постојано се зголемува бројот на претплатници. Моментно во Македонија има 2.299.068 активни претплатници на мобилна телефонија.

Забележана е тенденција на намалување на припејт корисниците, за сметка на зголемувањето на постпејт претплатниците.

Од трите оператори во мобилната телефонија „Т-мобиле“ бележи незначително опаѓање во вкупниот удел на пазарот - од 61,03 проценти во првиот квартал 2008 година на 58,83 проценти од првиот квартал оваа година. „Космофон“ има пораст на уделот од еден процентуален поен и изнесува 31,91 процент, а учеството на ВИП од 8,15 проценти во првиот квартал лани, во првите три месеци од годинава бил 9,26 отсто.

Според АЕК, сите мобилни оператори ја почитуваат одлуката на АЕК донесена пред една година за асиметрична интерконекција во мобилната телефонија.

Извор: А.С. (29.7.09). Мобилките и Интернетот растат, паѓа фиксната телефонија. Утрински Весник.

Дневник: Јавниот сервис пак на јавна сметка

Граѓаните, сакале или не, ќе мора редовно да ги плаќаат сметките за радиодифузна такса, кои наскоро ќе ги добијат во своите поштенски сандачиња за цела измината година. Од МРТВ информираат дека тие веќе се доставени за над 70.000 фирми, а сега се очекува да ги добијат и околу 480.000 домаќинства, кои според законот треба да плаќаат по 130 денари месечно или три пати помалку отколку што беше одредено со претходното решение, секој 15-ти во месецот.

МРТ неплатениот износ присилно ќе го наплатува, со овластени извршители, кои ќе запленуваат предмети во домаќинствата. На фирмите долгот присилно ќе им се наплаќа преку тансакциска или каква било друга банкарска сметка. Од МТВ апелираат до граѓаните редовно да ги намируваат долговите за да се избегнат дополнителните трошоци за извршителите што паѓаат на сметка на должникот.

Според законот, секое домаќинство, фирма и угостителски објект е должно да плаќа радиодифузна такса, без разлика дали има телевизор, дали ги следи или не програмите на Македонската радио-телевизија или е приклучено на кабелска телевизија.

- Од минатиот месец, решенијата до обврзниците - правни субјекти ги доставивме преку Македонски пошти и почна со наплата на радиодифузната такса. Наплатата се однесува за периодот од јуни лани до јуни минатиот месец, а наскоро нив треба да ги добијат и домаќинствата. Плаќањата може да се извршат еднократно или на рати, најдоцна до 15-ти во месецот. За секое доцнење се плаќа камата утврдена со закон - објаснуваат од МРТ.

Според извршниот директор, Петар Каранаков, со редовната наплата на таксата ќе се овозможи финансиска независност на јавниот сервис, со што ќе се јакне создавањето политички урамнотежени дневни информативни емисии, како и нова продукција.

- Очекуваме ако граѓаните редовно ја намируваат обврската да собираме околу 15 милиони евра годишно, од кои 12 милиони евра би останувале за МРТ. Сметаме дека на овој начин ќе можеме редовно да им исплаќаме плати на вработените и да ја исполниме нашата должност како јавен сервис. Наша цел не е наплатата да оди преку извршители, не сакаме да отвараме пазар за извршителите бидејќи граѓаните ќе плаќаат многу повеќе од тие 130 денари за трошоците за извршителот. Но, наша законска обврска за која одговараме е да ја наплатиме таксата. Затоа апелираме до граѓаните да ја плаќаат таксата, а ние се обврзуваме дека со сите сили ќе ја оправдаме нивната доверба со поинтересни содржини за да го вратиме стариот лик на МРТ - вели Петар Каранаков, извршен директор на телевизијата.

Оттаму информираат дека за периодот од јуни лани до јуни годинава, граѓаните добиваат по две решенија, од кои едното се однесува за месеците јуни, јули и август лани, а таксата е пресметана по стариот закон, а второто решение е за периодот од септември лани до јуни годинава, каде што месечната РДТ изнесува по 130 денари.

Поради големите трошоци за печатење и за дистрибуција на овие решенија, МРТ во натамошниот период решенијата ќе ги доставува еднаш во годината.

„Долгот за радиодифузната такса како јавна давачка не застарува, како што е тоа случај и со другите сметки за комуналии. За правните и физичките лица што нема да ја извршуваат оваа законска обврска, МРТ ќе биде принудена наплатата да ја извршува преку извршители, при што не се исклучува и наплатата по судски пат“ - информираат од МРТ.

Неплаќањето на радиодифузна такса изминатиот период доведе до тешка финансиска криза во МРТ и другите корисници на парите. Од радиодифузната такса МРТ добива 76,5 отсто, за ЈП „Македонска радиодифузија“ одат 19,5 отсто, а за Советот за радиодифузија се одделуваат 4 отсто. Граѓаните неплаќањето на таксата го правдаа со незадоволството од програмата што ја добиваат од МРТ како јавен радиодифузен сервис.

Последен пат МРТ ја наплати радиодифузната такса во 2007 година, по што во 2008 година престанаа да доставуваат фактури, а јавниот радиодифузен сервис се финансираше со пари од буџетот.

Покрај домаќинствата, обврска да плаќаат радиодифузна такса имаат и сите правни лица и сопственици на деловен простор и тоа на секои 20 вработени по една радиодифузна такса. Хотелите и мотелите плаќаат по една радиодифузна такса за секои пет соби, а сопствениците на угостителски и други јавни објекти за секој приемник по една такса. Стопанствениците реагираа дека на овој начин дополнително се оптоваруваат со нови трошоци.

Извор: (29.07.2009). Јавниот сервис пак на јавна сметка. Дневник.

Вечер: Фиксната телефонија опаѓа

И во услови на економска криза приходите на пазарот на електронски комуникации бележат значителен раст. Најголем дел, 58 проценти од вкупните приходи, отпаѓа на мобилната телефонија, фиксната телефонија учествува со 32, а интернет услугите со осум отсто. Најмал дел од два отсто има преносот на радио телевизиска програма до крајните корисници.
Според Агенцијата за електронски комуникации на пазарот за фиксна телефонија во земјава во првото тримесечје од годинава активни се шест оператори. Ситуацијата на пазарот за мобилна телефонија е со три оператори, додека има 70 кабелски оператори, 52 интернет провајдери и 42 даватели на јавно достапни телефонски услуги на фиксна локација (ВОИП).

Овие бројки се дел од Извештајот за развојот на пазарот за електронски комуникации во Македонија за првиот квартал од годинава, што ги подготви и вчера ги презентираше АЕК. Васка Петровиќ, раководител на секторот за анализа на пазар при АЕК, укажа дека кај фиксната телефонија утврден е значителен процент на опаѓање на фиксните линии во однос на првиот квартал од лани и тоа од 399.975 линии на 375.461 линии.

Според Петровиќ нема намалување само кај деловните линии во фиксната телефонија, тие одат во нагорна линија и сегашната бројка достигнала 41.535 крајни корисници.
Македонски телеком бележи пад од 95,49 отсто во првиот квартал од лани на 88,81 отсто во првиот квартал оваа година. На сметка на тоа расте учеството на алтернативните оператори чиј удел во овој квартал изнесува 11,19 проценти.

Во однос на интернет услугите, односно пристапот до интернет бројот на резиденцијални претплатници кои што користат теснопојасен пристап на интернет континуирано опаѓа од 9.412 на 4.483 за анализираниот период. Од АЕК дополнуваат дека овој тренд е присутен и кај деловните претплати.

Изввор: (29.07.2009). Фиксната телефонија опаѓа. Вечер.

Вечер: Бесплатен концерт со Симон Трпчески на интернет

Две вести доаѓаат од нашиот маестро Симон Трпчески.
Прво, интересна и инспиративна критика за настапот како солист на Кралскиот филхармониски оркестар од Ливерпул, под диригентската палка на Василиј Петренко, неодамна е објавена во угледниот дневен весник "Liverpool echo".
-Македонецот Симон Трпчески стана чест и добредојден гостин во Хоуп Стрит; Трпчески има строг изглед, но неговото свирење е едноставно сублиматно, физички невидено но живописно како шарените сладоледи што се продаваат по плажите на главните туристички места во Македонија...; ...неговата лебдечка и лирична интерпретација е составена од повеќе префинети нивоа, и е нежна и прекрасно отсвирена изведба..., пишува критичарот Кетрин Џонс.

Втората вест е дека матине камерниот концерт во рамките на Музичкиот фестивал во Вербие, Швајцарија, закажан за денеска, ќе може со директен пренос од 11 часот бесплатно да се проследи на интернет страницата - www.verbierfestival.com.

Извор: Де.Т. (29.07.2009). Бесплатен концерт со Симон Трпчески на интернет. Вечер

Дневник: Отфрлен приговорот на „Вип“ за владините мобилни

Комисијата за заштита на конкуренција го отфрли како неоснован приговорот на мобилниот оператор „Вип“ дека понудата на конкурентот „Космофон“ за мобилна телефонија на владиниот јавен повик го урива телекомуницискиот пазар.

Мобилниот оператор „Вип“ се жалеше на одлуката за победа на „Космофон“ на јавниот повик за услуги од мобилната телефонија за државната администрација. Според раководството на „Вип“, „Космофон“ и „Т-мобиле“ доставиле дискриминаторски понуди со дампинг цени, кои се нефер и спротивни на пазарната логика. Поради таквите понуди, „Вип“ побара Комисијата за заштита на конкуренцијата да поведе постапка против двата оператора за злоупотреба на доминантната позиција. Поднесена е и жалба до второстепената владина Комисија за набавки, а ја информирале и Агенцијата за електронски комуникации.

Комисијата за заштитата на конкуренцијата утврди дека нема услови за поведување постапка согласно одредбите од Законот за конкуренцијата. Комисијата утврдила дека понудата на „Космофон“ не ја загрозува слободната пазарна конкуренција и во целост ги исполнува пазарните услови и основите на комерцијалното работење.

Според директорот на „Вип“, Никола Љушев, „Космофон“ понудил цена од нула денари за секунда, а „Т-Мобиле“ од 0,027 денари по секунда. Понудата на „Вип“ била 0,048 денари за секунда. Според условите, за секој свртен број на корисниците ќе им се наплаќаат по два денара. Директорот Љушев тогаш обвини дека ова се предаторски или дампинг цени.Во „Космофон“ велат дека дале најконкуретна понуда поради што биле прворангирани на листата.

- Сите наши инвестиции, кои во минатата година изнесуваа над 30 милиони евра, сега ги даваат своите резултати и ни овозможуваат да бидеме најконкурентни - велат во „Космофон“.Државната администрација следниве две години ќе ги користи услугите на овој мобилен оператор.

Извор: (25.7.09). Отфрлен приговорот на „Вип“ за владините мобилни. Дневник.

Утрински: Скопјани се жалат на комуналните услуги и на Интернет-провајдерите

Неосветлени и улици со дупки, обраснати паркови претворени во змијарници во периферните населби, а ЈП „Водовод и канализација“ не реагира на пријавите за течење пивка вода. Тревниците не треба да се уредуваат само пред Владата и пред Собранието. Ова се само дел од забелешките и реакциите на 500 скопјани кои телефонски и по случаен избор ги анкетираше Организацијата на потрошувачите на Македонија со цел да открие од каков вид услуги на јавните претпријатија граѓаните се најнезадоволни. Наспроти оваа анкета, нивните телефонските јавувања, пак, во канцеларијата на ОПМ укажуваат на фактот дека скопјани најмногу се жалат на дел од услугите на Интернет-провајдерите, на брзопотезното потпишување на пакет-договорите за комбинирани услуги, како и на услугите на кабелските оператори. Имало и поплаки на високите сметки на „Топлификација“ и на лошиот квалитет на греењето. Од ОПМ велат дека цели куќни совети доаѓале во нивната централа. Се жалеле на променетиот начин на наплата по мерач, кој неосновано им ги зголемува месечните трошоци. Сето ова велеле дека е поради нивните соседи кои имале плус радијатори на доградби и тераси. Од населбите Драчево, Кисела Вода, Припор и Ѓорче Петров се жалеле на услугите од ЕВН, поточно на често паѓање на напонот поради што им прегореле повеќе куќни апарати. Овие жители се пожалиле и на вработените од кол-центарот на ЕВН, кои најчесто не знаеле да им дадат точна информација за каков дефект се работи. Имало и поплаки од граѓани на високи сметки за струја што им биле доставени по поставувањето на новите струјомери. На однесувањето на вработените на ЕВН, кои не се легитимираат кога исклучуваат струја, се пожалиле оние што живеат во индивидуални куќи, посочувајќи дека без легитимација можеле да им влезат и арамии.

„Актуелни се понудите на пакет-услуги на Интернет-провајдерите. Но, граѓаните реагираат зошто тие немаат вработени агенти што ќе им објаснат кои се последиците доколку потоа го раскинат договорот. Никој не ги информира дека тоа треба да го најават еден месец однапред, како и тоа дека доколку не поминал рокот од една година, граѓаните ќе мора да плаќаат пенали. На нивните шалтери мора брзопотезно да ги потпишат договорите, избирајќи некој од пакетите за кој најчесто им се потенцира само цената. Граѓаните во овие случаи се ставаат во нерамноправна положба. Агенцијата за електронски комуникации ќе треба да ги контролира овие договори, кои се формални. Како регулаторно тело таа ќе мора да види и дали тие имаат фер клаузули,“ објасни Татјана Тасевска, правна советничка во ОПМ.

Од оваа организација посочуваат на потребата од кол-оператори кои ќе мора да ги информираат граѓаните за скапа линија на ТВ-квизовите, како и за поскапото чинење на разговорите во фиксната телефонија, кога станува збор за мигрирањето на телефонските броеви од еден на друг оператор.

Извор:С.К. (22.7.09). Скопјани се жалат на комуналните услуги и на Интернет-провајдерите. Утрнски

Вест: Еден милион денари за телефони и хонорари во МРТВ

Управниот одбор на Македонската радио-телевизија за пет месеци годинава потрошил речиси еден милион денари за хонорари и за телефонски сметки. Околу 830 илјади денари се исплатени за надоместоци на шесте членови - претседателот на Одборот Крсто Скубев, неговиот заменик Леонид Наков, претходниот директор на МРТВ Борис Ставров, Соња Чижбановска, Агим Мехмети и Зекир Селими. Во текот на мај надоместоците се движеле од 29 илјади денари за членовите до 32 илјади денари за претседателот. За телефонски сметки на пет члена во Одборот МРТВ платила 158 илјади денари, од кои 96 илјади денари се трошок на заменик - претседателот на Одборот Наков. Некои од месечните сметки за мобилен достигнуваат над 22 илјади денари, а лимитот за бројот е околу 5000 денари. Дали ексдиректорот Ставров користи службен телефон како член на Одборот не е јасно, бидејќи неговото име го нема во информацијата за висината на сметките што на барање на Советот на МРТВ ја подготвил финансискиот сектор.
Претседателот на Советот на МРТВ Миле Игњатовиќ вели дека на седница ги разгледале трошоците и донеле одлука за намалување на надоместоците и лимитирање на телефонските сметки.
"Досега надоместокот за членовите на Управниот одбор изнесуваше една и пол просечна плата, додека за претседателот и неговиот заменик износот се зголемуваше за 3000 денари, односно 1500 денари. Сега ги ограничивме надоместоците на фиксни износи до 26 илјади денари и му наложивме на УО да ги сведе сметките за телефон на разумно ниво и да го вратат она што го пречекориле", објаснува Игњатовиќ.
Според Игњатовиќ, членовите на Управниот одбор, кога Советот ги утврдувал новите надоместоци, објаснувале дека хонорарите не може да бидат пониски, бидејќи во МРТВ имаат континуирани активности и ангажмани од голем обем.
Јавниот сервис формално-правно парите треба да ги обезбедува од наплата на радиодифузната такса, но поради исклучително лошата организација за наплата на јавната давачка, МРТВ мака мачи да обезбеди пари за платите на вработените. Сервисот функционира со пари што ги добива од Владата, но иако тоа се буџетски пари, за МРТВ нема ограничување на висината на надоместоците на УО до околу 10 илјади денари, како што Владата пред неколку години им наложи на сите јавни претпријатија и институции.
"Советот и Управниот одбор на МРТВ не се како останатите управни одбори. УО на МРТВ е најспецифичен и членовите на конкурс ги избира Советот. УО и Советот не се владини тела, туку ингеренциите ги добиваат преку Собранието", одговара претседателот на Управниот одбор Крсто Скубев.
Заменик-претседателот на Одборот Наков, кој има највисоки телефонски сметки, објаснува дека износите за периодот од јануари заклучно со мај 2009 година се повисоки, бидејќи во тој период патувал во Словенија и во Женева, каде е номиниран за член во Стратегискиот комитет на ЕБУ, а оттаму за МРТВ донел бесплатна програма од 200 часа и договорил исплата на долгот на МРТВ кон ЕБУ на многу рати. Посебна Комисија ги одобрила пречекорувањата на сметките, бидејќи биле наменски потрошени.

Извор: (18.07.2009). Еден милион денари за телефони и хонорари во МРТВ. Вест.

Утрински: Училиштата останаа и без пари за компјутери и без партиципација

Без пари за компјутерски штети, за осигурување и за партиципација. Вака средните училишта ќе треба да ја дочекаат новата учебна година, откако пред околу еден месец пристигна забраната од Државниот просветен инспекторат дека училиштата не смеат да собираат пари од учениците за оштетените компјутери.

Сега директорите се жалат дека не знаат како да постапат за да излезат на крај со штетите на компјутерите, кои беа дел од проектот „Компјутер за секое дете“, а за што беа поднесени четириесетина кривични пријави против директорите. Некои директори, и покрај се', не се за жалење, бидејќи успеаја да соберат дел од парите за направените штети од учениците.

„Нe ни дозволуваат да собираме пари за направените штети, кои во некои училишта се огромни. Иако пролетва добивме правилник за тоа како да се наплатат штетите“, велат некои директори на скопски училишта. Состојбата со компјутерите, според нив, дополнително се комплицира поради фактот што немаат ниту пари да ги осигураат компјутерите, а сумата за осигурување, која им се бара за компјутерите, во просек изнесува околу 100.000 денари. Овие пари, како што тврдат директорите, не се во ситуација да ги обезбедат, па затоа се плашат како во иднина ќе успеат да ги зачуваат донираните компјутери од оштетувања, пожари, поплави.

Поради сето ова, дел од директорите најавуваат дека ќе побараат од ресорното Министерство да ги реши нивните проблеми, бидејќи без негова помош не можат тоа да го сторат. На листата на училишта каде што имаше најголеми оштетувања, регистрирано е дека се украдени или недостасуваат монитори и тастатури, но никој од училишните раководства не сака да го потврди тоа.

„Ние ги пријавивме нашите штети во Министерството за внатрешни работи. Во нашиот правилник за штети е наведено дека ако не се знае кој ученик ги оштетил, тогаш сите ќе платат за штетата. Сега, со одлуката на инспекторатот тоа веќе не ни е дозволено“, велат директорите.

Првиот човек во Државниот просветен инспекторат, Џорџе Арсов, е убеден дека училиштата не се за жалење.

„Незаконски е училиштата да собираат пари за направените штети, за тоа треба да се грижи директорот, кој треба да се докаже дека е добар менаџер. Тоа што сега училиштата нема веќе да можат да собираат пари не значи дека ќе останат без средства. Училиштата добиваат пари преку блок-дотациите и наменските дотации и тие средства им се сосема доволни за да ги покријат трошоците, кои ги пријавуваат до надлежните“ објаснува Арсов.

Но, кастрењето на буџетот на училиштата не завршува само со компјутерските штети и со партиципацијата. Како што дознавме, на училиштата им е забрането да собираат пари и за обезбедување без дозвола од секој родител, а од Mинистерството нема веќе да добиваат пари ниту за пишување свидетелства и дипломи

Извор:(17.07.2009). Училиштата останаа и без пари за компјутери и без партиципација. Утрински Весник.

Дневник: Во „Вип“ ги пренесле броевите 1.600 корисници

Мобилниот оператор „Вип“ ја поздравува последната одлука на Агенцијата за електронски комуникации за намалување на цената за преносливост на броевите од еден во друг оператор. Со одлуката цената се изедначува за сите оператори и изнесува 200 денари плус данокот на додадена вредност.

Никола Љушев, главен извршен директор на „Вип“, вели дека со последната одлука се дефинираат точно условите под кои не може корисник да премине кај друг оператор.

- Досега многу често се злоупотребуваа договорите за лојалност за да не му се дозволи на корисник да премине во друг оператор. Придобивка е и скратувањето на времето од 14 до 16 дена на само една недела за пренесување на бројот од еден кај друг оператор - вели тој.

Од 1 септември, од кога е воведена можноста за преносливост на броевите, 1.600 корисници од другите оператори ги пренесле своите броеви во „Вип“, а во истиот период 70 корисници од „Вип“ заминале кај другите оператори.

Љушев истакна дека од 3.800 барања, кои биле поднесени за преносливост на броевите, одбиени се 2.247 од операторите каде што биле корисниците на поднесените барања. Од страна на „Вип“ оператор биле одбиени 51 барање за преносливост на броевите.

Пазарниот удел на „Вип“ е девет отсто од вкупниот број корисници. За своите корисници најавуваат новини, а во рамките на летната понуда можност за меѓународни разговори од Македонија за 50 отсто, а за постпејд-корисниците можност за праќање порака за пет денари во определен временски период од денот.

Извор: (04.07.2009). Во „Вип“ ги пренесле броевите 1.600 корисници. Дневник.

Вечер: Најавено производство на компјутери и лаптопи

Триесетина кинески компании се заинтересирани да ја продлабочат економската соработка со македонските компании и со тоа да си овозможат влез на европскиот економски пазар. Тие на вчерашниот македонско-кинески бизнис форум, што се одржа во организација на Министерството за економија, конкретно пројавија интерес за лоцирање на некои производствени погони, сервисни или дистрибутивни центри во земјава, за да преку нив го покријат пазарот на Централна и Источна Европа. Тие потврдија дека наскоро ќе стратува и проектот ТИРЗ во производството и склопувањето на ЛЦД телевизори, персонални компјутери и лаптопи.

Според Виктор Мизо, директор на Агенцијата за странски инвестиции, за кинеските бизнисмени имаме добра бизнис клима, евтина работна сила и поевтини транспортни трошоци. Тој очекува на долг рок да се почувствува бенефитот од соработката.

Министерот за економија Фатмир Бесими укажа дека и во услови на светска економска криза единствено кинеската економија расте со позитивна стапки, заради што наскоро може да се очекуваат и конкретни договори.
- Кинезите се подготвени да и помогнат на земјава со конкретни проекти во енергетиката, но и да ја зајакнат економската и трговската соработка, најави Бесими по средбата со кинескиот заменик-министер за економија Јианг Зенгвеи. Тој додаде дека надворешно-трговската размена со оваа земја лани достигна 316,3 милиони долари, од коишто 315 милиони се однесуваат на увозот, а покриеноста на увозот со извозот е само 0,5 проценти.

Бесими гостите ги запознал и со туристичките можности на земјава, како и визните олеснувања за бизнисмените, бидејќи оние коишто имаат шенген виза не им треба дополнителна виза за влез во земјава.

Средба со Зенгвеи имаше и вицепремиерот Зоран Ставрески, на која кинескиот заменик-министер изразил интерес за кинески инвестиции во транспортниот и машинскиот сектор, како и во информатичката технологија. Ставрески најавил поагресивна промоција на македонската економија на кинескиот пазар.

Мизо укажа дека за 35 проценти годинава е зголемена посетата на странските компании споредено со истиот период лани.

Извор: В.Ма. (2.7.2009). Најавено производство на компјутери и лаптопи. Вечер.

Утрински: „Космофон“ ќе се ребрендира годинава

По здружувањето со „Он.нет“, заедничката компанија ќе добие ново име

Мобилниот оператор „Космофон“ ќе добие нов лик и име до крајот на годинава. Во градењето на новиот имиџ на компанијата ќе учествува и спојувањето со фиксниот и Интернет-провајдер „Он.нет“, чиј сопственик, исто како и на „Космофон“, е „Телеком Словенија“. Според Оливие Понсин, главен извршен директор на „Космофон“, се' уште не е утврдено новото име на компанијата, но тоа нема да ги содржи имињата ниту на „Космофон“ ниту на „Он.нет“. Што се однесува до можноста за намалување на цените на услугите на „Космофон“, Понсин нагласи дека пад на цените на нивните услуги нема да има, но дека ќе настојуваат да ја зголемат својата конкурентност преку понуда на нови услуги.

Понсин потврди дека ќе има намалување на бројот на вработени во новата фирма, предизвикано од спојувањето на мобилниот оператор и фиксниот и Интернет-провајдер, но не сакаше да прецизира колкаво ќе биде тоа.

„Ниту ’Телеком Словенија‘ ниту јас немаме некаков таен план за отпуштање на вработените. Откако ќе се направи спојувањето на двете компании, ќе се види дали има совпаѓање на работните места. Тогаш ќе има реорганизација и анализа на функциите. Некои од вработените ќе си заминат, но не се знае колку“, појасни Понсин.

Тој најави и дека за неколку дена во „Космофон“ и „Он.нет“ ќе бидат назначени нови менаџерски тимови.

Промените во раководството и реорганизацијата во „Космофон“ уследија откако негов нов сопственик на крајот на март годинава стана „Телеком Словенија“, кој го купи мобилниот оператор од грчки „Космоте“ за 190 милиони евра.

„Телеком Словенија“ неодамна од Агенцијата за електронски комуникации доби лиценца за услугата дигитална телевизија, чиј старт го најави за септември годинава. Според најавите од раководството на словенечката компанија, доскорешниот прв човек на „Он.нет“, Предраг Чемеригиќ, ќе ја раководи компанијата што ќе го менаџира работењето на дигиталната телевизија.

Извор: А.С. (01.07.2009). „Космофон“ ќе се ребрендира годинава. Утрински Весник.

Вечер: Космофон нема да се вика Космофон!

До крајот на годинава, Космофон и Он.нет ќе се спојат во една заедничка компанија и ќе работат под едно заедничко име кое засега одговорните во двете компании не сакаат да го обелоденат. Според првиот човек на Космофон, Оливие Понсин, новата заедничка компанија ќе има име кое нема да ги содржи сегашните комерцијални називи на двата оператори.
- Новиот назив на заедничката компанија ќе биде нешто ново и свежо, што нема да ги содржи имињата на Космофон и Он.нет, ниту пак некој назив на бренд од Телеком Словенија. Значајно е што ќе ги споиме сите технологии што ги поседуваат двете компании - нагласи Понсин.

Тој не прецизира колкаво намалување на бројот на вработени ќе предизвика спојувањето на мобилниот и фиксниот оператор со интернет провајдерот.
-Телеком Словенија, а ниту јас имаме некаков таен план за отпуштање на вработените. Откако ќе се направи спојувањето на двете компании ќе видиме дали има преклопување на работните места. Тогаш ќе има реорганизација и анализа на функциите. Некои од вработените ќе си заминат, но не се знае колку - појасни Понсин.

Тој најави дека за неколку дена во Космофон и Он.нет ќе бидат назначени нови менаџерски тимови. Промени во раководството и реорганизацијата во Космофон уследи откако негов нов сопственик кон крајот на март годинава стана Телеком Словенија, кој од грчки Космоте го купи мобилниот оператор и продажниот синџир Германос за 190 милиони евра.

Телеком Словенија неодамна од Агенцијата за електронски комуникации доби лиценца за услугата дигитална телевизија, чиј старт го најави за септември годинава. Според последните најави на раководството на Телеком Словенија, првиот човек на Он.нет, Предраг Чемерикиќ ќе ја раководи компанијата што ќе го менаџира работењето на дигиталната телевизија.
Понсин вели дека ќе учествуваат и на вториот тендер за фиксна телефонија на владините институции што ќе биде распишан наскоро.

Извор: (1.07.2009). Космофон нема да се вика Космофон!. Вечер