Нова Македонија: Урнат ТВ Парламентот

ТВПарламентот, кој неколку месеци стоеше на плоштадот Македонија, вчера, беше урнат од страна на градската комунална инспекција. Околу 25 работници со асистенција на полицијата вадеа делови од конструкцијата. “Леѓето од фирмата “Хот-Хот“ се наседнати и изманипулирани. Намерата била оваа шупа да стане постојан објект на плоштадот Македонија. Таа, мора да ја наречам шупа, е поставена без никакво одобрение или согласност од Градот, а не се платени никакви средства“, вели Александар Бошковиќ, раководител на одделението за инспекциски работи во град Скопје. Тој додава дека објектот не бил времен затоа што немало склучено договор, а за цврста градба не станува збор затоа што на тој дел неможело да се гради. “На почетокот мислевме дека станува збор за реклама, но кога видовме дека тука се снима емисија почнавме да реагираме. Испративме неколку предупредувања, но сопствениците ниту еднаш не се одзваа на поканата да дојдат. Затоа моравме да реагираме и објектот да се урне“, рече Бошковиќ. Понатаму, додава тој, ќе следува поднесување на кривична пријава за Ратко Савевски од општина Центар и градоначалникот Виолета Аларова. За А1 Телевизија, пак, Бошковиќ најави поднесување на прекршочна пријава. “Сите финансиски средства што се потрошени за уривањето, а се во висина од околу 200 илјади денари ќе биадт фактурирани на А1 Телевизија“, најави Бошковиќ. Случајот со ТВ Парламентот, вчера, се актуализираше и на седница на градсакиот Совет. Советникот Перивое Раниќ праша дали податоците што се презентираат на А1 Телевизија, а кои се однесуваат на висината на средствата што градоначалникот Трифун Костовски ги потрошил во неговиот досегашен мандат, се вистинити. На тоа доби одговор од претставник од градската администрација кој ги презентираше буџетите за 2005, 2006 и за 2007 година. “Основниот буџет во 2005 година изнесуваше 1,3 милијарда денари, за 2006 тој беше 1,1 милијарда денари. Заклучно со 30 септември годинава основниот буџет е 812 милиони денари“, образложи претставникот на администрацијата. На тоа, Раниќ нагласи дека бројките што ги слушнал се далеку од оние 90 милиони евра што се кажуваат во кампањата на А1 Телевизија.

Извор: К.С.Т. (30.11.2007). Урнат ТВ Парламентот. Нова Македонија.

Утрински: Софтверот на „Семос“ најдобар за преносливост на броеви

Речиси по двомесечно натегање, конечно, заврши изборот на компанија за изработка на софтвер за системот преносливост на броеви. Директорката на Агенцијата за електронски комуникации, Лилјана Денковска, пред три дена ја потпиша одлуката со која фирмата „Семос“ е избрана за најповолен понудувач што ќе го изработи софтверот. Со тоа практично се прекина неизвесноста околу тендерот за преносливост на броеви. Неколку месеци се тактизираше со официјалното објавување на името на фирмата за софтверот. Комисијата за јавни набавки, по одлука на Второстепената владина комисија, мораше да го повтори бодирањето на компаниите кои учествуваа на тендерот за избор на компанија за изработка на софтвер, а на која како најдобар понудувач беше „Семос“, кој побара 147.000 евра за услугата, или околу 100.000 евра помалку од второрангираниот „Искрател“. И по повтореното бодување на фирмите, Комисијата за јавни набавки ја оцени понудата на „Семос“ како најдобра, но работата со официјализирањето на одлуката се натегнуваше.

Од „Семос“ се жалеа дека станува збор за политички игри и за намерно одолжување на работата, со цел тендерот да се уништи, бидејќи на актуелната владејачка гарнитура не и' одговара фирмата, во која како акционер се води сопругата на претседателот Бранко Црвенковски, да го изработи софтверот за системот преносливост на броеви. Во јавноста дури и се шпекулираше дека е можно тендерот да се урне, бидејќи практично со имплементирањето на услугата ќе се нарушат бизнис-интересите на операторите, затоа што се проценува дека некои од нив ќе имаат загуба од по неколку милиони евра годишно доколку почнат корисниците да се префрлаат од еден кај друг оператор.

Портпаролот на Агенцијата за електронски комуникации, Виолета Цветковска, вчера потврди дека директорката на АЕК ја потпишала одлуката со која се потврдува дека „Семос“ е избран за најповолен понудувач по повтореното бодување. Цветковска појаснува дека преостанатите фирми што учествуваа на тендерот имаат право на жалба во рок од 7 дена. Доколку нема жалби, тогаш договорот со „Семос“ ќе биде потпишан. Покрај „Семос“, на тендерот учествуваа и „Искрател“, „Сивус“, „Неоком“, хрватската „Тис кис“ и „Пексим“.

За целиот случај околу изборот на компанија за софтвер за системот преносливост на броеви се заинтересира и европретставникот Ерван Фуере, бидејќи Македонија има законска обврска да ја имплементира оваа услуга, особено поради фактот што сме држава која е кандидат за членка на Унијата. Преносливост на броеви е услуга која овозможува корисниците да го задржат префиксот, односно постојниот телефонски број на еден мобилен или фиксен оператор, а да ги користат услугите на друг оператор.

Извор: В.Г. (30.11.2007). Софтверот на „Семос“ најдобар за преносливост на броеви. Утрински.

Вест: Центар нема да го урива ТВ - Парламентот на плоштад

Градските власти велат дека ќе поднесат кривична пријава против Општина Центар, ако таа не го отстрани времениот објект на А1 телевизија, бидејќи Општината издала дозвола без согласност од Градот
Општина Центар нема да го урива времениот објект на А1 телевизија на плоштадот, од каде се емитува програмата ТВ - Парламент. Од кабинетот на градоначалничката на Центар Виолета Аларова велат дека дозволата за негово поставување ја издале согласно Законот за Град Скопје.
"Општина Центар издаде времена дозвола за него, бидејќи е на локација која е дел од неизградениот плоштад Пела, за кој е надлежна нашата Општина. Вакви дозволи општините може да издаваат согласно член 15 од Законот за Град Скопје", велат од Општината.
Според надлежните во Центар, во дозволата не е наведен рокот до кога може да стои куќичката на плоштадот, бидејќи дозволите за времени објекти важат се додека не се реализира деталниот урбанистички план.
"Не е побарано да платат надомест за користење на јавната површина, бидејќи служи за некомерцијална емисија. Досега од никого не сме барале надомест за некомерцијална намена, туку само од оние субјекти што поставиле опрема или времен објект за комерцијални цели", велат во Општина Центар.
Скопскиот градоначалник Трифун Костовски деновиве побара од Општина Центар да го урне времениот објект на А1 телевизија на плоштадот, со образложение дека не е побарана согласност од Градот. Градските власти велат дека Општина Центар не е надлежна за просторот каде што е поставен времениот објект, бидејќи тој се води на улица 11 Октомври, која е во надлежност на Градот. Тие објаснуваат дека од А1 телевизија побарале уште во август да го отстрани времениот објект и дека неколку пати ја предупредувале телевизијата дека треба да постапат по писменото барање за отстранување на објектот.
"Само Градот има надлежност да издава согласност за користење на јавни површини и плоштади за поставување предмети, приредување изложби, забавни приредби и манифестации. Во согласност со законските надлежности, Општината е должна да го изврши решението на Градот, во спротивно ќе се соочи со кривична одговорност", велат од Одделението за односи со јавност на Градот.

Извор: Е.А. (29.11.2007). Центар нема да го урива ТВ - Парламентот на плоштад. Вест.

Вест: Центар нема да го урива ТВ - Парламентот на плоштад

Градските власти велат дека ќе поднесат кривична пријава против Општина Центар, ако таа не го отстрани времениот објект на А1 телевизија, бидејќи Општината издала дозвола без согласност од Градот

Општина Центар нема да го урива времениот објект на А1 телевизија на плоштадот, од каде се емитува програмата ТВ - Парламент. Од кабинетот на градоначалничката на Центар Виолета Аларова велат дека дозволата за негово поставување ја издале согласно Законот за Град Скопје.
"Општина Центар издаде времена дозвола за него, бидејќи е на локација која е дел од неизградениот плоштад Пела, за кој е надлежна нашата Општина. Вакви дозволи општините може да издаваат согласно член 15 од Законот за Град Скопје", велат од Општината.
Според надлежните во Центар, во дозволата не е наведен рокот до кога може да стои куќичката на плоштадот, бидејќи дозволите за времени објекти важат се додека не се реализира деталниот урбанистички план.
"Не е побарано да платат надомест за користење на јавната површина, бидејќи служи за некомерцијална емисија. Досега од никого не сме барале надомест за некомерцијална намена, туку само од оние субјекти што поставиле опрема или времен објект за комерцијални цели", велат во Општина Центар.
Скопскиот градоначалник Трифун Костовски деновиве побара од Општина Центар да го урне времениот објект на А1 телевизија на плоштадот, со образложение дека не е побарана согласност од Градот. Градските власти велат дека Општина Центар не е надлежна за просторот каде што е поставен времениот објект, бидејќи тој се води на улица 11 Октомври, која е во надлежност на Градот. Тие објаснуваат дека од А1 телевизија побарале уште во август да го отстрани времениот објект и дека неколку пати ја предупредувале телевизијата дека треба да постапат по писменото барање за отстранување на објектот.
"Само Градот има надлежност да издава согласност за користење на јавни површини и плоштади за поставување предмети, приредување изложби, забавни приредби и манифестации. Во согласност со законските надлежности, Општината е должна да го изврши решението на Градот, во спротивно ќе се соочи со кривична одговорност", велат од Одделението за односи со јавност на Градот.

Извор: Е.А.(29.11.2007). Центар нема да го урива ТВ - Парламентот на плоштад. Вест.

Време: ТВ-парламентот досега добивал само предупредувања

Градските власти уште од август ја предупредувале А1-телевизија да го отстрани објектот на ТВ-парламентот од плоштадот, но дури пред една недела донеле решение да го урнат, иако монтажната градба е поставена во јули. Од градот не коментираат дали има поврзаност меѓу решението за уривање и емисиите во кои се критикуваше работата на градоначалникот Трифун Костовски што му претходеа, а кои се снимија токму во објектот на ТВ-парламентот. Според градските инспектори, градбата е незаконски поставена, затоа што за неа не било издадено одобрение од надлежен градски орган. Сепак, телевизијата добила одобрение за објектот од општината Центар, со која и се дозволува да го постави објектот од 10 јули годинава. - За незаконитоста во поставувањето на привремениот објект ја известивме А1-телевизијата уште на 29 август, со службен акт број 14, и побаравме да го отстрани. На ова добивме одговор од телевизијата дека таа има уредна документација. Уште еднаш, со писмен допис, упативме предупредување на 29 септември и наложивме веднаш да се тргне објектот. Потоа градските инспектори уште двапати им укажаа на претставници од телевизијата да постапат според претходно упатените дописи. На крајот беше донесено конечно решение да се отстрани привремената градба - велат градските власти. Минатиот четврток претставници од градскиот комунален инспекторат направиле записник во кој се вели дека за објектот на ТВ-парламентот немало дозвола од надлежните градски органи. Тие наложиле веднаш да се отстрани градбата, а во спротивно најавиле дека ќе поднесат барање да се поведе прекршочна постапка пред Основниот суд Скопје 1. Претходно од истиот објект се емитуваше редовното продолжение на емисијата „ТВ-парламент“, во која универзитетски професори, новинари, екологисти и други гости ја критикуваа работата на градоначалникот Трифун Костовски. Во емисијата досега се одржале серија дебати за разни теми од актуелниот живот во градот. Решението со кое се дозволува да се постави монтажната градба на плоштадот го донел секретарот на општината Центар Ратко Савовски, а тоа е заверено и со општинскиот печат. Во него се вели дека и се дозволува на А1-телевизија да го намести импровизираното студио за да ја емитува емисијата „ТВ-парламент“.

Извор: Г.Т. (29.11.2007). ТВ-парламентот досега добивал само предупредувања. Време.

Време:На Интернет и банкарските сметки на одгледувачите на говеда

Стотици имиња и презимиња, матични броеви и банкарски сметки, Министерството за земјоделство и водостопанство неовластено ги објави на својата веб-страница. Поводот за објавување на овие податоци е исплатата на субвенции на одгледувачите на говеда за 2007 година, а последицата - кршење на Законот за лични податоци и можност за злоупотреба на податоците на овие лица.
Од Дирекцијата за заштита на личните податоци велат дека иако намерата на министерството најверојатно била најдобра, во овој случај е направена грешка. Министерството настојувало да биде транспарентно со тоа што ги објавило банкарските сметки и банките, меѓутоа со тоа објавило лични податоци и извршило повреда на доверливиот однос банка-клиент.
- Ако на пример отидете во банка и прашате дали тоа и тоа лице има сметка кај вас, тие не смеат да дадат таква информација, а да не зборуваме да ви го дадат бројот на сметката. Министерството за земјоделство на својата веб-страница ги открива сите овие информации - вели Зоран Пандев, заменик-директор во Дирекцијата за заштита на личните податоци.
Ова не е единствен случај Министерството за земјоделство бесправно да објавува лични податоци. За исплатата на субвенциите за 2006 година министерството покрај името и презимето на лицата на кои им се доделени субвенциите и сумата која им е исплатена, на својата веб-страница ги објави и нивните адреси.
- Во овој случај не можам, а да не мислам на тоа за што се може да бидат искористени овие информации. Помислете на сите оние лица кои живеат во руралните средини, сами. Идеална мета за крадците. Доволно е да ја отворат веб-страницата на министерството, да видат дека добиле 30 или 40 илјади денари, да ја прочитаат адресата и да појдат во поход. Колку пати се случило во изминативе години, старци да бидат нападнати во нивните домови и ограбени - вели Пандев.
Според него, ако министерството сакало да биде транспарентно доволно било да се објави името, презимето, датумот на раѓање , општината во која живее лицето и сумата која е доделена. На овој начин би биле заштитени и корисниците на субвенциите и министерството.
Од Министерството велат дека ова било ненамерна грешка која веднаш ќе ја исправат.
- Превид. Веднаш ќе реагираме и ќе ја поправиме грешката - вети Соња Трајкова, портпаролка на Министерството за земјоделство.
Таа остана на ветувањето бидејќи истиот ден податоците беа тргнати од веб-страницата на министерството.
Од 19 декември стапува на сила новиот Закон за заштита на лични податоци, според кој за објавување на лични податоци ќе може да се поднесе и прекршочна пријава. Досега Дирекцијата за заштита на лични податоци можеше на прекршителите да им достави само указ, а од декември прекршокот и ќе се казнува. За правни лица казната ќе изнесува од 200 до 300 илјади денари, додека за физички од 40 до 50 илјади денари. Во двата случаја може да се изрече и забрана за обработка на лични податоци.

Извор: Ивана Билбиловска. (28.11.2007). На Интернет и банкарските сметки на одгледувачите на говеда. Време.

Дневник: Кабелските телевизии без странски преводи

Во „Кејблтел“ велат дека веќе почнале преговори со странските телевизии за да обезбедат македонски титл

Кабелскиот оператор „Кејблтел“ од пред неколку дена ги исклучи преводите на хрватски, српски и на бугарски јазик на странските канали Холмарк, ТВ 1000, Дискавери, Нешнл географик, Фокс крајм по добиената прекршочна пријава на барање на Советот за радиодифузија. Според Законот за радиодифузната дејност, на овие канали мора да има превод на македонски јазик или кабелските оператори ќе мора да прекинат да ги реемитуваат.

Во „Кејблтел“, кој пред неколку месеци купи 13 кабелски телевизии во земјава, велат дека започнале преговори со странските телевизии за да обезбедат македонски превод.

- Странските телевизии поставуваат услов да имаме најмалку 100.000 претплатници за да пуштат македонски титл. Инаку не им се исплатело. Ова ќе го решиме наскоро бидејќи во завршница се преговорите за да купиме уште 30 кабелски телевизии со што ќе го исполниме лимитот. Ако треба, ќе им платиме поскапо на продуцентите, но македонски превод ќе обезбедиме - вели Стојан Ѓоргоски, директор на „Кејблтел“.

Советот за радиодифузија побара од сите кабелски оператори веднаш да престанат да ги реемитуваат програмските сервиси кои не се титлувани на македонски јазик.

- Мониторингот ќе продолжи. Пратено е барање до Министерството за култура и до Инспекцијата за авторски права да го проверат работењето на сите оператори. Законот мора да се почитува, како за преводот на македонски јазик така и за реемитување на програми за кои не се склучени договори за уредени авторски права - изјави Мирче Адамчевски, претседател на Советот за радиодифузија.

Советот се повикува на Законот за радиодифузната дејност, во кој е пропишано дека програмите што се реемитуваат и се титлуваат на поинаков јазик од оригиналниот мора да бидат преведени на македонски. Во спротивно, на кабелските оператори им се заканува глоба од 3.000 до 5.000 евра, а во краен случај против нив ќе се покрене прекршочна постапка со барање за забрана за работа од шест месеци до две години. Советот му наложи на „Кејблтел“ и да ги исклучи нерегистрираните телевизиски програми како Нова, Зона, Визион плус и Реалити.

- Кабелските оператори треба да донесат валиден договор со Нова дека имаат право да ја пренесуваат. Тогаш ќе им го регистрираме каналот во програмските пакети - вели Адамчевски.

Извор: Марјан Блажевски. (28.11.2007). Кабелските телевизии без странски преводи. Дневник.

Дневник: Плаќање со ваучер во рокот, а подигање на компјутерот може и подоцна

Плаќањето на компјутерите со ваучер студентите треба да го завршат до 15 декември, а испораката може да биде и подоцна од овој рок, велат од Владата. Смирувачките пораки доаѓаат по стравувањата на дел од компјутерските фирми дека нема да успеат да одговорат на побарувачката до крајниот рок, поради што ваучерите ќе пропаднат.

Некои од компјутерските фирми се разочарани бидејќи одѕивот на студентите за купување со ваучер засега бил многу слаб, односно досега реализирале едвај дваесетина отсто. Дел од сопствениците се исплашени дека студентите ќе навалат неколку дена пред истекот на рокот, поради што нема да имаат доволно компјутери за сите заинтересирани. Други фирми, пак, тврдат дека акцијата се одвива според планираното и оти досега продале поголем број компјутери, особено лаптопи.

Во Владата велат дека се' уште немаат точна информација како оди продажбата.

- Очекуваме деновиве да ја добиеме таа информација. Важно е студентите да ја завршат паричната трансакција до крајниот рок, односно до 15 декември. Целата процедура ќе биде под контрола на Управата за јавни приходи и на Министерството за финансии - вели владиниот портпарол Ивица Боцевски.

Според Законот за издавањето вредносни бонови, компјутерските фирми треба да ги достават реализираните ваучери до Владата најдоцна до 22 декември, а краен рок за да ги наплатат е четири дена подоцна.

Со последните измени во Законот се предвидува вредносни бонови за купување компјутер да добијат сите студенти што до објавувањето на измените во „Службен весник“ запишале завршна година од студиите.

Извор: Д.Т. (27.11.2007). Плаќање со ваучер во рокот, а подигање на компјутерот може и подоцна. Дневник.

Вест: Вработени во Т-Мобиле договарале штрајк по и-мејл

Група вработени во "Т-Мобиле Македонија", незадоволни од платите и условите за работа, преку и-мејл преписка со членството на Синдикатот, повикувале на штрајк. Синдикалната организација денеска организира редовен состанок за целото членство, на кое тие ќе можат да се изјаснат и дали ја поддржуваат идејата што изминатата недела кружела по интерната електронска пошта, или станува збор за несолена шега која почнала да создава проблеми. Според синдикалците, ваквите преписки не требало да се сфаќаат сериозно бидејќи најчесто вработените се шегувале меѓу себе и, обидувајќи се да се надмудрат и да испаднат подуховити, се добивал лажен впечаток оти постои проблем.
Претседателот на Синдикалната организација на "Т-Мобиле Македонија" Роберт Михајловски вчера не сакаше да ги коментира и-мејл преписките меѓу вработените, но еден час подоцна изјави:
"Штрајк нема ниту има размислување на таа тема. Утре има редовен состанок на Синдикатот", вели Михајловски.
Неофицијално, во договорите за вработување на "Т-Мобиле Македонија" се предвидува платите да го следат растот на животните трошоци и на инфлацијата, а во последниве години тој договор во компанијата не се почитувал.
Наши извори велат дека преписката меѓу незадоволните вработените почнала наивно, со една забелешка од вработен, кој се пожалил дека животните трошоци во изминатава година биле зголемени, а платите во компанијата тапкале во место. На ова незадоволство се надоврзале и оние што се со времено вработување преку надворешни агенции. Друг искоментирал дека во "Дојче телеком" за вакви проблеми се штрајкува и почнал да се дуе балонот од незадоволство. Неофицијално, вработените биле и прекорени дека не смеат да користат ресурси на компанијата за организирање штрајк, по што целата ситуација се смирила.
Извор: Т.Ј. (27.11.2007). Вработени во Т-Мобиле договарале штрајк по и-мејл .Вест.

Време: Стипендии за 125 информатичари

Сто дваесет и пет студенти со највисок просек од сите години на државните и приватните универзитети во земјава вчера добија стипендии како подарок од Владата. Премиерот Никола Груевски свечено им ги додели стипендиите на студентите, кои месечно ќе добиваат по 5.000 денари. - Со овој чекор сакаме да им помогнеме и да им дадеме на студентите морална поддршка, од кои многу очекуваме. Високообразовани кадри се главниот приоритет на Владата. Доказ за тоа е новоотворениот факултет по информатика на универзитетот „Гоце Делчев“ во Штип, а на скопскиот универзитет се зголеми квотата за прием на поголем број студенти-информатичари - рече Груевски. Студентите велат дека трката по стипендија била тешка. Според нив, условот што требало да го исполнуваат за да дојдат до неа било да имаат најмалку 9,00 просек. Но, поради големиот број пријавени, границата се поместила на 9,31. - Го поздравуваме овој чекор на Владата. Мора на овој начин да не стимулираат. Мора да се зголеми желбата за работа кај секого од нас. Токму ова е добар начин тоа да се постигне - вели Димитар Солев, студент во прва година на Електротехничкиот факултет, отсек информатика.

Извор: А. П. (26.11.2007). Стипендии за 125 информатичари. Време.

Утрински: „е-Македонија“ продолжува со поддршка на информатичкото општество

Над четириесет проекти за развој и унапредување на информатичкото општество се стигнати на конкурсот од Фондацијата „е-Македонија“, основана од „Македонски телекомуникации“. Се очекува деновиве Управниот одбор на Фондацијата да донесе одлука кои институции - невладини организации ќе добијат поддршка за реализација на проектите кои во себе вклучуваат едукација и информирање за можностите и придобивките од информатичката технологија. Од година во година интересот на институциите што аплицираат се зголемува, што само по себе зборува дека „е-Македонија“ се етаблира како фондација која води сметка за континуирано зголемување на употребата на информатичката технологија.

Буџетот на Фондацијата за поддршка на проектите изнесува 50.000 евра, исто како и минатата година. Но, лани, поради големиот интерес и квалитетните апликации, Управниот одбор на „е-Македонија“ одлучи буџетот од 50.000 евра да го зголеми за дополнителни 24.000 евра.

Клучен критериум при изборот на апликациите ќе биде целната група што ќе биде вклучена во реализацијата на проектите. Предност ќе имаат организациите што планираат да вршат обука за користење на информатичката технологија, пред се', на младите лица, на лицата со посебни потреби, невработените и етничките малцинства, како и оние што планираат да ја поттикнат употребата на Интернетот, првенствено на АДСЛ. Од Фондацијата „е-Македонија“, која по четврти пат ќе спонзорира проекти, истакнуваат дека ќе им помагаат и на невладините организации од внатрешноста на државава, со цел еднакво да се стимулира и поттикне информатичкото општество.

Буџетот од 50.000 евра Фондацијата ќе го искористи за доделување опрема-компјутер и на обезбедување Интернет, односно АДСЛ.

Извор: В.Г. (26.11.2007). „е-Македонија“ продолжува со поддршка на информатичкото општество. Утрински Весник.

Утрински: Владата стипендира 125 студенти по информатика

Премиерот Никола Груевски во Народната универзитетска библиотека „Климент Охридски“ свечено додели 125 стипендии по информатика, од планираните 500 во период од четири години, како дел од владината програма „Македонија земја на информатичари“. „Високообразовните кадри се главен капитал на една држава и претставуваат генератор на прогресот и просперитетот на општеството, а ја зголемуваат и конкурентноста на државата во привлекување странски инвестиции“, рече Груевски во обраќањето пред добитниците на стипендии, ректори и професори на универзитети и во присуство на министерот за информатичко општество, Иво Ивановски.

Владата вчера го промовираше и новиот проект за формирање секретаријат за информатичко општество. „Секретаријатот ќе биде место во Владата каде што ќе се следат трендовите поврзани со дигитализирањето, глобализацијата и информатичките текови“, изјави владиниот портпарол Ивица Боцевски.

Извор: МИА. (26.11.2007). Владата стипендира 125 студенти по информатика. Утрински весник.

Време: Имаме компјутери, немаме Интернет

На врвот на зградата во студентскиот дом „Гоце Делчев“ има еден куп предаватели преку кои на Интернет може да се приклучат граѓани од цело Скопје, а ние немаме никаква можност да се приклучиме кон мрежата, реагираат студенти во домот. Тие досега, како што тврдат, поднеле барања до сите македонски интернет-провајдери, но досега никој не се нафатил да приклучува цели студентски објекти на мрежата. Провајдерите стравуваат дека ако ги приклучат, студентите ќе прават злоупотреби - ќе симнувале премногу филмови и музика и, според тоа, дневно ќе се трошеле многу гигабајти. Од „Он.нет“ велат дека има реална можност студентите да сурфаат, но само ако се направи договор помеѓу раководството на домот и провајдерот, а не договор со секој студент поединечно. Во „Гоце Делчев“ има 600 студенти што имаат компјутери во собите, но само мал број користат Интернет. - Делот од зградите на домот што гледаат кон центарот на градот нема проблем и студентите можат да се приклучат на Интернет. Но, оние што се сместени во внатрешната страна не можат. Некои имаат направено своја интернет-мрежа - еден е легално приклучен на безжичен Интернет и од него користат уште четворица студенти, а месечната сметка ја делат - објаснува Ристе Шурбевски, потпретседател на Сојузот на студенти при универзитетот „Св. Кирил и Методиј“, кој е сместен во овој дом. Во „Гоце Делчев“ има интернет-кафуле каде што за еден час сурфање студентите плаќаат 30, а за цела вечер 100 денари. Надлежните во „Он.нет“, како и оние во кабелската телевизија „Кејблтел“, велат дека не е точно дека не постојат шанси студентските домови да добијат Интернет. Според нив, студентите требало само да изразат желба и тие ќе ги приклучеле. Самоил Малчевски, пак, претседателот на ССУКМ, вели дека посебен владин тим веќе извесно време работел на проектот за бесплатен Интернет по студентските домови. - Во моментов се подготвува технички елаборат. Членовите на тимот ги одредуваат техничките услови - се утврдува дали на Интернет ќе се приклучуваат цели студентски објекти или секоја соба посебно. Неофицијално, проектот ќе се реализира во февруари и ќе функционира неограничено, како и интернет-кафулињата што се отворија во повеќе градови во земјава - вели Малчевски.

Извор: Антонија Поповска. (25.11.07). Имаме компјутери, немаме Интернет. Време.

Утрински: Интернет користи секој петти Македонец

Бројот на Интернет-корисници во Македонија во изминатите седум години е зголемен за 1.210 отсто, односно од 30 илјади во 2000 на околу 400 илјади во 2007 година, покажуваат податоците објавени на специјализираната статистичка веб-страница „Интернет ворлд стат“.

Македонија е меѓу земјите со најбрз раст на бројот на Интернет-корисници, но и натаму заостанува во однос на европските стандарди и повеќето свои соседи. Од земјите во регионот Македонија е пред Албанија (15,3 отсто) и Србија (13,9 отсто), а зад Хрватска (35,3 отсто), Грција (33,5 отсто), Бугарија (21,7 отсто) и Босна и Херцеговина (20,3 отсто).

Во Европа, процентуално, најмногу корисници на глобалната веб-мрежа има во Исланд (86,3 отсто) и во Шведска (75,6 отсто), а најмалку во Ватикан (12,1 отсто) и во Украина (11,5 отсто).

Според „Интернет ворлд стат“, во светот користат Интернет околу 1,25 милијарди луѓе, најмногу во САД - 211 милиони, во Кина – 162 млн., Јапонија – 86 млн. и во Германија 50 милиони.

Извор: МИА. (25.11.07). Интернет користи секој петти Македонец. Утрински весник.

Дневник: Секој петти Македонец користи интернет

Бројот на корисниците на интернет во Македонија во изминатите седум години е зголемен за 1.210 отсто, односно од 30.000 во 2000 на околу 400.000 годинава, покажуваат податоците објавени на веб-страницата „Интернет ворлд стат“, јави МИА. Околу 20 отсто од населението во земјава користи интернет.

Македонија е меѓу земјите со најбрз пораст на бројот на интернет-корисниците, но и натаму заостанува зад европските стандарди и повеќето свои соседи. Од земјите во регионот, земјава е пред Албанија (15,3 отсто) и пред Србија (13,9 отсто), а зад Хрватска (35,3 отсто), Грција (33,5 отсто), Бугарија (21,7 отсто) и Босна и Херцеговина (20,3 отсто). Во Европа, најмногу корисници на глобалната веб-мрежа има во Исланд (86,3 отсто) и во Шведска (75,6 отсто), а најмалку во Ватикан (12,1 отсто) и во Украина (11,5 отсто).

Според „Интернет ворлд стат“, во светот интернет користат околу 1,25 милијарди луѓе, а најмногу во САД - 211 милиони, во Кина - 162 милиони, Јапонија - 86 милиони и во Германија - 50 милиони.

Извор: (24.11.2007). Секој петти Македонец користи интернет. Дневник.

Време: Антикорупциска гледа спотови, мижи за корупцијата

Државната комисија за спречување на корупцијата и УНДП вчера промовираа спот што од понеделник ќе се прикажува на електронските медиуми по четири пати дневно. Кампањата наречена „Стоп корупција“, како што велат од комисијата, треба да ја зајакне антикорупциската свест кај граѓаните. И покрај ова, една година по формирањето на комисијата, главните забелешки на јавноста одат во насока дека антикорупциската комисија промовира спотови, а од друга страна затајува во работењето и во отворањето корупциски случаи, односно не работи транспарентно како минатиот состав.
Откако почна да работи новиот состав на Државната комисија за спречување на корупцијата, беа објавени имотните листови на државните функционери на Интернет, но не во целост. Почнаа со претседателот, премиерот, министрите и пратениците, го објавија имотот на членовите на Судскиот совет, Врховниот и Уставниот суд, но имотот на судиите, обвинителите, градоначалниците остана тајна. Во последнава година комисијата отвори 12 случаи за непотизам и конфликт на интереси. Кај четири од нив не најде непотизам, а за другите, оние покрупните, се уште нема одговор. Антикорупциската комисија се прогласи за ненадлежна да одлучува како мајката на премиерот Никола Груевски ги купила четирите стана и не најде корупција и криминал во случајот со градежното земјиште зад „Рамстор“. И бизнисменот Љупчо Палевски до комисијата достави документација дека сопругата на претседателот Бранко Црвенковски уплатила пари за објектот „Тифани“. Комисијата не постапи по овој предмет затоа што го бараше оригиналниот документ за купопродажба на недвижниот имот. Од друга страна, антикорупционерите поведоа барање за прекршочна постапка против четириесетина функционери што воопшто не доставиле или ненавремено доставиле анкетен лист за имотната состојба. Позитивна оцена во јавноста доби донесувањето на Програмата за превенција и репресија на корупцијата и покренатата иницијатива за поведување постапка за кривично гонење на поранешната директорка на УЈП Петра Митева и на нејзината колешка од скопската регионална дирекција Мирка Мандевска. Сепак, ниту еден расветлен случај на организиран криминал и корупција досега не излезе од оваа институција. Од СДСМ неколкупати досега изјавија дека не ја признаваат Државната комисија за спречување на корупцијата.
- СДСМ поздравува секаква акција што оди кон борба против корупцијата. Изминативе 15 месеци видовме еден куп пропагандни спотови направени со народни пари, кои не вродија со плод. Затоа, ја повикуваме антикорупциската комисија конечно да се освести и да почне да работи во согласност со своите надлежности и да ги решава претставките поврзани со функционерите од власта - велат од партијата.

Извор: М.Ј. (24.11.07). Антикорупциска гледа спотови, мижи за корупцијата. Време.

Нова Македонија: Космофон со две нови пост пејд тарифи

Космофон, вториот мобилен оператор во Македонија, започна да нуди два нови пост-пејд тарифни модели Селецт Смарт и Селецт СМС. Како што наведуваат во соопштението на компанијата, станува збор за тарифи без месечна претплата. Првата понуда има два тарифни модела. Селецт Смарт 200, каде минута разговор ќе се наплатува 5,6 денари во текот на денот и 1,8 денари навечер и Селецт Смарт 500, каде минута разговор ќе чини 4,4 денари дење и 1,8 денари ноќе. Во новата тарифа за смс пораки Селецт СМС, пораките ќе чинат 0,9 денари во мрежата на Космофон.
Како што велат од Космофон, овие цени се дополнително 50 отсто намалени за повици и СМС пораки кон трите омилени броеви во “Мојот свет“. За користење на новите тарифни модели корисниците треба да остварат месечен сообраќај во минимален износ од 200 денари за СЕЛЕЦТ СМАРТ 200, 500 денари за СЕЛЕЦТ 500 и 300 денари за СЕЛЕЦТ СМС.

Извор: (24.11.07). Космофон со две нови пост пејд тарифи. Нова Македонија.

Време: Лаптопи за поинтересна настава

Вторачиња од две паралелки во основните училишта „Војдан Чернодрински“ во општината Карпош и „Дитурија“ во Сарај од минатата недела почнале наставата на часовите да ја следат со помош на лаптоп-компјутери. Решаваат задачи, пишуваат и цртаат на компјутерите што ги добиле како донација од американската фондација ОЛПЦ. Студијата, која вклучува и обука на наставниците, е финансирана од УНДП, Програма за развој при Обединети нации, со поддршка од Министерство за информатичко општество. Наставниците велат дека часовите станале поинтересни откако дел од наставата се одвива преку лаптопи. - Се цели кон тоа постепено наставата по сите предмети да се одржува преку компјутер. Овој начин на работа е нов и интересен, како за децата, така и за мене. Тие имаа за домашна задача со помош на вградената камера во компјутерот да ги фотографираат нивните родители и потоа да напишат нешто за нив. Освен тоа, тие на часовите пишуваат и решаваат задачи по математика. Но, се уште се одржуваат и класични часови, на кои се работи нормално - со учебници и тетратки - вели Билјана Нелоска, наставничка во „Војдан Чернодрински“. Розалинда Стојова, пак, координаторка на студијата во УНДП, објасни дека менијата на апликациите не се сложени и се приспособени за деца од шест до 16 години. - Има повеќе функции, но не се сложени и не им се тешки на децата. Менито е на англиски јазик и тоа воопшто не им е проблем. Лаптопот има опција за цртање, пишување, играње игри, снимање аудио и видеозаписи и нивна репродукција. Има можност и децата да се приклучат на Интернет. Има вградено и камера, микрофон, слушалки и антени, а со тоа им се овозможува групно да работат на часот и надвор од училиштето. Еден ваков лаптоп чини околу 200 долари, но не може да се набави на парче. Набавката за овие лаптопи се одвива по посебни процедури - објасни Стојова. Таа додаде дека училиштата што се пријавиле за овие компјутери требало да исполнуваат низа критериуми. УНДП по извесен период ќе и даде препорака на Владата за тоа колку е ефикасна наставата што се одвива преку работа на овие компјутери.

Извор: Антонија Поповска. (22.11.2007). Лаптопи за поинтересна настава. Време.

Вест: За 8 дена штрајк во МРТ

Штрајкот на вработените во МРТ почнува за осум дена. В.д. претседателката на синдикалната организација Љубица Пуцаревиќ вчера донесе одлука во текот на осумдневниот законски рок да се договорат дали штрајкот ќе биде генерален со прекин на сите програми на МРТ. Според синдикалците, досега немам никаква комуникација меѓу извршните директори и Синдикатот, а тоа ќе биде решавачки критериум дали програмата ќе биде целосно прекината.

"Извршниот директор цело време најавува имплементација на санационата програма, но се уште немаат дефинирано социјални пакети. Тоа не може да се направи без дијалог со Синдикатот", вели Пуцаревиќ.
Според Синдикатот, во МРТ нема услови за имплементација на санационата програма.
"Извршните уредници на програмските пакети до Управниот одбор доставија приговори на новата систематизација и реорганизација зашто е зголемен обемот на работа, а се превидува намалување на бројот на вработени", вели Пуцаревиќ.

Вчера од кабинетот на извршниот директор на МРТ Јанез Сајовиц најавија дека изминал законскиот рок за приговори на санационата програма и оти почнува нејзината примена. Според менаџментот, во следните 90 дена ќе се направи изборот кои вработени со истекот на овој период ќе добијат отказни решенија. Прво ќе се формираат комисии кои, заедно со уредниците, ќе ја одберат екипата која останува да работи во јавниот радиодифузер. Бројката од 338 вработени се уште не е дефинитивна, според менаџментот може да расне или да се намали.

Извор: Т.Ј. (22.11.2007). За 8 дена штрајк во МРТ. Вест.

Дневник: Електричари готват терен за владините компјутери

Околу 90 основни и средни училишта во земјава имаат стара електрична инсталација, која не одговара за компјутерите што Владата ги набави за учениците. Поради тоа стручни екипи ја оспособуваат електричната мрежа во училиштата каде што тоа е неопходно. Контролата што екипите на ЕСМ-ЕВН ја извршиле по барање на Министерството за образование покажала дека електричната мрежа во овие училишта нема доволен капацитет за работење на апаратите од владиниот проект „Компјутер за секое дете“.

Недоволната моќност на мрежата беше главниот проблем што директорите на училиштата го истакнуваа откако Владата го најави проектот. Тие стравуваа дека инсталирањето на новите компјутери може да предизвика колапс на мрежата, па дури и да предизвика пожари.

Од ЕСМ-ЕВН објаснуваат дека нивните екипи извршиле целосно снимање на состојбата и од завчера интервенираат во проблематичните училишта. Тие ја надградуваат електричната мрежа и го зголемуваат капацитетот на трафостаниците.

- Работите се одвиваат во договор со директорите. Крајниот рок за средување на инсталацијата, кој го договоривме со Министерството за образование, е 15 декември, поради што интензивно се работи. Целиот проект за подобрување на мрежата ќе биде на наш трошок, како донација за Владата - вели Ленче Карпузовска, портпаролка на ЕСМ-ЕВН.

Планирано е во средните и во дел од основните училишта да се инсталираат околу 100.000 компјутери, набавени од Кина. Досега во земјава пристигнале околу 52.000 од нарачаните компјутери.

- Инсталирањето ќе почне кога ќе стаса и последната тура, но и откако ќе завршат работите на електричната мрежа во училиштата. Прво ќе се опремат средните, а по нив и дел од основните училишта. Очекуваме инсталирањето да заврши до март - вели Дрита Мамути, портпаролка на Министерството за образование.

Првичните најави на Владата и Министерството беа дека опремувањето на училиштата ќе почне од септември. Тогаш беа инсталирани компјутери во три средни училишта, а премиерот Никола Груевски најави дека преостанатите ќе ги добијат до крајот на ноември. Но, оттогаш акцијата запре. Од Министерството за образование велат дека се задоволни од досегашната реализација на проектот и оти очекуваат да заврши до предвидениот рок.

Извор: Даница Тунтевска. (22.11.2007). Електричари готват терен за владините компјутери. Дневник.

Вест: Владата ќе преземе 50 вработени од МРТ

Преземените работници ќе ја одржуваат и чистат големата зграда која е во сопственост на Владата и МРТ, а точната бројка на технолошки вишок ќе се утврдува во дијалог со Синдикатот, тврди директорот на МРТ Јанез Сајовиц

Околу 50 вработени, од вкупно 338 во Македонската радио-телевизија, чии имиња треба да се најдат на листата за технолошки вишок, се предвидува да ги преземе владината Служба за заеднички работи. Извршниот директор на МРТ Јанез Сајовиц објаснува дека преземањето на овие вработени е дел од преговорите меѓу раководството на јавниот радиодифузен сервис и владината Служба за да се надминат проблемите со одржувањето на висококатницата. МРТ во оваа зграда користи три, од вкупно 22 ката, но сите сметки за нејзиното одржување пристигнуваат кај јавниот радиодифузер.
"Според катастарските документи, зградата е во сопственост и на Владата и на МРТ. Претходното раководство го отстапило просторот без никаков надоместок и ниеден кираџија не плаќа кирија. Целта е трошоците да ги преземат владините институции и останатите кираџии кои се сместени во зградата. Дел од договорот е 50 вработени од МРТ да останат да го одржуваат и чистат просторот", вели Сајовиц.
Висококатницата има и 8 лифта, од кои само неколку работат, зашто нема пари за нивно одржување. Сајовиц објаснува дека поради големите трошоци што зградата ги влече со себе, дел од парите кои Владата и ги префрла на МРТ, наместо за плати за вработените и за потребите на телевизијата, се трошат за наплата на отужени побарувања. "Топлификација" побарува околу 1,6 милиони евра, УЈП 810 илјади евра, "Македонски телекомуникации" 500 илјади евра. "Сите овие тужби се со извршни решенија", вели Сајовиц.
Бројката од 338 лица, кои ќе бидат прогласени за технолошки вишок, според Сајовиц, е се уште прелиминарна и во дијалог со синдикалната организација ќе се дефинира конечната листа за отпуштање, како и висината на испратнините. "При спроведувањето на новата систематизација клучно е да имаме дијалог со синдикалната организација, за да може да се избориме за подобри услови за оние што треба да ја напуштат МРТ. Во оваа фаза од санационата програма клучно е да има дијалог со синдикалната организација", вели Сајовиц.
Дел од вработените што треба да бидат прогласени за технолошки вишок во МРТ за неколку години треба да се пензионираат.

Извор: Т.Ј. (20.11.2007). Владата ќе преземе 50 вработени од МРТ. Вест.

Вечер: Во училиштата инсталирани 52.000 компјутери

Веќе 52.000 компјутери од 100.000 компјутери преку проектот на македонската Влада се пристигнати во училиштата, и тоа прво во средните, а потоа и во основните училишта. Во насока на зајакнување на овој проект во училиштата се формираат тимови за одржување на компјутерите, активност што се реализира со помош на УСАИД. Во тимовите се вклучени ученици од седмо и осмо одделение во 164 училишта во земјата, а нивниот број во наредниот период се очекува да се зголеми за уште 200 училишта. Тие имаат задача да ги оддржуваат компјутерите и да нудат помош како на учениците, така и на наставниците. Вчера три училишни тима од Скопје, Куманово и Кочани беа прогласени за победници од натпреварот за избор на лого за Проектот за поддршка на студентскиот технички клуб.

- Училишните тимови се важни за одржување на компјутери што постојат во 164 училишта и тоа не само за одржување на компјутерите, туку и за подигнување на интересот на учениците во врска со информатичко-комуникациските технологии. Нашата цел со проектот "Компјутер за секое дете" не е компјутерите да бидат само поставени во училиштата, туку тие да бидат како алатки кои ќе се употребуваат во образованието, вели министерот за образование Сулејман Рушити.
Тој најави дека стоте илјади компјутери се инсталираат во предвидената динамика и како што доаѓаат компјутерите, така се инсталираат. Во некои училишта веќе е почнато и подобрувањето на надворешната електрична мрежа со поддршка од ЕВН.

- Листата на училиштата во кои треба да се поправа надворешната инсталација е веќе испратена во ЕВН, рече министерот Рушити. За следната година тој посочи дека во Министерството за образование ќе започнат со креирање на нови дигитални содржини и обука на наставниците.

Извор: М.Г. (20.11.2007). Во училиштата инсталирани 52.000 компјутери. Вечер.

Дневник: Недостапен договорот за ЕСМ поставен на интернет

Граѓаните и стручната јавност вчера не можеа да го видат договорот за продажба на ЕСМ на австриската компанија ЕВН, иако Владата го постави на својата веб-страница. Документот не можеше да се отвори поради бавното симнување на податоците, а требаше и авторизација со корисничко име и лозинка.Најавата на Владата дека ќе го објави договорот предизвика силен потрес во односите со Австријците. Од централата на ЕВН во Виена велат дека според меѓународната пракса за објавување договор, треба согласност од двете страни. Владиниот портпарол Ивица Боцевски тврди дека во договорот нема одредба за обострана согласност за објавување.

- Во договорот пишува дека може да биде објавен една година по потпишувањето. Во знак на добра волја ја известивме ЕВН за објавата на интернет - вели тој.

Според Боцевски, клучно за интересот на граѓаните е да знаат според кои меѓународни практики продавачот треба да враќа пари, откако ќе продаде нешто.

Односите помеѓу Владата и ЕВН се влошија откако од кабинетот на Никола Груевски ги објавија измените на Законот за енергетиката, за кои Австријците имаа многу забелешки. Владата го зголеми притисокот со изјавата дека сака да ја откупи компанијата од ЕВН. Состојбата се вжешти до меѓудржавен спор по најавата од Владата дека јавно ќе го обелоденат купопродажбениот договор и дека Австријците ќе плаќаат пенали за неисполнетите инвестиции.

Неофицијално, нашата амбасадорка во Виена, Весна Борозан, била повикана во Министерството за надворешни работи на Австрија за да и' изразат протест за односот на македонските власти кон австрискиот инвеститор.

Во македонското МНР не добиле информација дека Виена протестирала во врска со компанијата ЕВН.

Извор: Марјан Блажевски (20.11.2007). Недостапен договорот за ЕСМ поставен на интернет. Дневник.

Нова Македонија: Третиот мобилен оператор со постпејд услуги

Третиот мобилен оператор во Македонија од вчера воведува постпејд тарифен модел со цена од 5,7 денари за една минута кон сите мрежи.
Како што соопштија од Вип, корисниците ќе имаат можност до 10 декември да станат постпејд корисници без да платат месечна претплата во наредните три месеци.
Третиот оператор воведува четири постпејд понуди со тарифни модели почнувајќи од 200 до 1.500 денари месечна претплата, со можност за избор на три Вип пријатели кон кои повиците и СМС пораките ќе се тарифираат по цена од 4 денари.
Постпејд корисниците ќе го користат префиксот 078, а главниот извршен директор на компанијата, Младен Пејковиќ, првиот постпејд му го даде на македонскиот музичар Влатко Стефановски.

Извор: (7.11.07). Третиот мобилен оператор со постпејд услуги. Нова Македонија.