Дневник: Кабелските телевизии без странски преводи

Во „Кејблтел“ велат дека веќе почнале преговори со странските телевизии за да обезбедат македонски титл

Кабелскиот оператор „Кејблтел“ од пред неколку дена ги исклучи преводите на хрватски, српски и на бугарски јазик на странските канали Холмарк, ТВ 1000, Дискавери, Нешнл географик, Фокс крајм по добиената прекршочна пријава на барање на Советот за радиодифузија. Според Законот за радиодифузната дејност, на овие канали мора да има превод на македонски јазик или кабелските оператори ќе мора да прекинат да ги реемитуваат.

Во „Кејблтел“, кој пред неколку месеци купи 13 кабелски телевизии во земјава, велат дека започнале преговори со странските телевизии за да обезбедат македонски превод.

- Странските телевизии поставуваат услов да имаме најмалку 100.000 претплатници за да пуштат македонски титл. Инаку не им се исплатело. Ова ќе го решиме наскоро бидејќи во завршница се преговорите за да купиме уште 30 кабелски телевизии со што ќе го исполниме лимитот. Ако треба, ќе им платиме поскапо на продуцентите, но македонски превод ќе обезбедиме - вели Стојан Ѓоргоски, директор на „Кејблтел“.

Советот за радиодифузија побара од сите кабелски оператори веднаш да престанат да ги реемитуваат програмските сервиси кои не се титлувани на македонски јазик.

- Мониторингот ќе продолжи. Пратено е барање до Министерството за култура и до Инспекцијата за авторски права да го проверат работењето на сите оператори. Законот мора да се почитува, како за преводот на македонски јазик така и за реемитување на програми за кои не се склучени договори за уредени авторски права - изјави Мирче Адамчевски, претседател на Советот за радиодифузија.

Советот се повикува на Законот за радиодифузната дејност, во кој е пропишано дека програмите што се реемитуваат и се титлуваат на поинаков јазик од оригиналниот мора да бидат преведени на македонски. Во спротивно, на кабелските оператори им се заканува глоба од 3.000 до 5.000 евра, а во краен случај против нив ќе се покрене прекршочна постапка со барање за забрана за работа од шест месеци до две години. Советот му наложи на „Кејблтел“ и да ги исклучи нерегистрираните телевизиски програми како Нова, Зона, Визион плус и Реалити.

- Кабелските оператори треба да донесат валиден договор со Нова дека имаат право да ја пренесуваат. Тогаш ќе им го регистрираме каналот во програмските пакети - вели Адамчевски.

Извор: Марјан Блажевски. (28.11.2007). Кабелските телевизии без странски преводи. Дневник.