Утрински: Долговите го запреа проектот за компјутерите

Проектот „Компјутер за секое дете“ е во застој поради неисплатени долгови кон фирмите-изведувачи на опремата и инсталацијата во основните училишта, тврдат доброупатени извори за „Утрински весник“. Со месеци Јавното претпријатие „Македонска радиодифузија“ не им исплаќало фактури на фирмите за набавената опрема и инсталација, а ситуацијата сега се комплицира и поради директорската смена во претпријатието кое е под лупа на ревизорите. Трпението на фирмите е при крај и тие сега се закануваат дека ќе ја тужат „Македонска радиодифузија“ ако не им бидат исплатени побарувањата. Извори во Министерството за информатичко општество потврдија дека проектот за компјутерите е во застој поради хаотичната состојба во „Македонска радиодифузија“. Според нив, причини за задоцнетата исплата биле бирократските процедури околу одобрувањето на пристигнатите побарувања на фирмите, чиј вкупен износ изнесува 320 милиони денари или 5,2 милиона евра. „Ако во текот на идната недела ’Македонска радиодифузија’ не ни префрли пари во износ од 150 милиони денари, колку што ни должи, ќе се повикаме на договорот и побарувањата ќе ги наплатиме по судски пат“, велат во скопската фирма „Електроелемент“, која набавила опрема за инсталирање на мрежата во училиштата на која треба да се приклучат компјутерите. Оваа фирма испорачала 80 отсто од опремата за основните училишта, а не им е исплатен ниту денар. Во договорот со „Македонска радиодифузија“ стои дека на фирмата ќе и' бидат исплатени средства по пристигнувањето на фактурите. Од „Електроелемент“ велат дека досега на сметка не им легнале пари за изведената работа, иако досега испратиле неколку фактури. „Сега имаме и усно и писмено уверување од сегашната директорка во ’Македонска радиодифузија‘ дека парите ќе ни бидат исплатени“, велат во „Електроелемент“, која е само една од неколкуте фирми што работат на набавка на опрема и инсталација во скопските основни училишта. Деновиве „Македонска радиодифузија“ е под лупа на ревизорите кои, меѓу другото, проверуваат и зошто досега не им се исплаќани пари на изведувачите кои не сакаат отворено да зборуваат за причините за задоцнетата исплата. Новата директорка во ова претпријатие, Јулијана Спировска, вчера беше на состаноци и не сакаше да даде каква било изјава за целиот случај. Молчат и во Министерството за образование и наука.Надлежните во Министерството за информатичко општество признаваат дека проектот е во застој, но тие не очекуваат негово целосно блокирање. Оттаму уверуваат дека проектот ќе продолжи да се реализира како што е предвидено, но со задоцнување поради директорската смена во „Македонска радиодифузија“. Во Министерството објаснуваат дека исплатите на фирмите претходно доцнеле поради изборите, а сега доцни поради смената на раководството во „Македонска радиодифузија“. Поради овие бирократски пречки, според нив, досега парите лежеле на сметка на Министерството за образование наместо да бидат префрлени на„Македонска радиодифузија“. „Проектот не е стопиран. Во ’Македонска радиодифузија‘ имаше промена на раководството и нормално е новата директорка да направи примопредавање за да биде начисто со работите. Затоа и побараа од ревизорите да ја прегледаат обемната документација. Тоа малку ќе ги забави работите, но се надеваме дека од понеделник ќе продолжиме со проектот“, велат во Министерството за информатичко општество. Во Владата најавија дека од понеделник ќе почне компјутеризацијата на шеесетина основни училишта во урбани средини. Со проектот „Компјутер за секое дете“ е предвидено да бидат опфатени вкупно 350 основни училишта.

Извор: (15.11.08). Долговите го запреа проектот за компјутерите. Утрински Весник.