Нова Македонија: Родителите одбиваат да платат за оштетените компјутери

Директорите на училиштата на родителските средби ни даваат да потпишеме изјави дека за оштетени или украдени компјутери ќе платат нашите деца, односно ние, тврдат родители. Дури имало и закани ако не потпишат родителите ќе ги избркаат децата од училиште.

- Никој не не' праша кога ги поставуваа компјутерите, туку само ни ги тутнаа. Тие тогаш не ни спомнаа дека нашите деца ќе се задолжуваат за нив. Не плаќам за нешто што не сум го добил. Децата не може 24 часа да внимаваат на нив - додаваа револтираните родители. Директорката на средното училиште „Ѓорѓи Димитров“, Валентина Муцунска вели дека чекаат од Министерството за образование и наука да им дадат упатство што понатаму да прават.

- Усно ги известивме родителите за тоа. Компјутерите не се осигурани, но под гаранција се. Родителите знаат дека децата се задолжени за компјутерите. Во тек е изготвувањето на правилникот со податоците за тоа како ќе се наплаќаат штетите - вели Муцунска.

Наставниците потврдуваат дека директорите барале да се потпишуваат изјави и дека меѓу децата владее страв.

- Родителите мора да ги потпишат изјавите иако некои од нив се бунеа. Сега се јавува проблемот што децата ќе се приковаат за клупи, за да ги чуваат компјутерите. Не знам зошто децата да плаќаат, треба Владата да ги осигура затоа што децата навечер не се во училиште, па ако дојде некој арамија и ги украде, децата ќе треба и тоа да го плаќаат - велат наставниците.Од Државниот инспекторат во МO велат дека училиштата не смеат да ги тераат родителите да потпишуваат изјави ако се' уште немаат донесено правилник.

Од Министерството за информатичко општество, пак, вината за оштетувањата ја гледаат во директорите кои не можат да се справат со учениците и дека тие треба да им обезбедат услови на децата. Тие признаваат дека може да дојде до обвинување на некое невино дете, но дека директорот е тој кој треба да се справи со проблемот.

- Ние им ги дадовме компјутерите на училиштата и тие треба да се грижат за нив. Не можеме да најмуваме осигурителна компанија затоа што тоа би не чинело многу пари. Никој не води грижа за компјутерите и не можеме да се бориме против самоволието на учениците. Тие ги кршат компјутерите - велат од ресорното министерство.

Извор: (31.1.09). Родителите одбиваат да платат за оштетените компјутери. Дневник.

Вечер: Телеком Словенија ги купи Космофон и Германос

Телеком Словенија е новиот газда на Космофон и неговиот продажен ланец Германос во Скопје. Купопродажниот договор беше потпишан вчера во Атина и за стопроцентна сопственост во двете компании, словенечкиот Телеком ќе плати 190 милиони евра. Од Космоте, досегашниот сопственик на Космофон и Германос, не обелоденуваат повеќе детали од договорот, ниту колкави биле понудите на другите две компании - турските Туркчел и Турк Телеком. Купопродажниот договор го потпишале главниот извршен директор на Групацијата Космоте, Михаел Цамаз и претседателот на Бордот на директори на Телеком Словенија, Бојан Дремељ.
- Задоволни сме од успешното завршување на продажниот процес и од заинтересираноста од неколку телекомуникациски групации. Во иднина им посакувам многу успех на вработените во Космофон и Германос Телеком и убеден сум дека Телеком Словенија ќе има успешна работа за предизвикувачкиот пазар во Македонија - изјавил Цамаз.

Оваа зделка за Дремељ претставува продолжување на активностите што Телеком Словенија ги има во Македонија и е во насока стратегијата за експанзија во Југоисточна Европа.
Продажбата на Космофон ја наложи Комисијата за заштита на конкуренцијата откако Дојче Телеком, кој е сопственик на Мактел и Т-Мобиле Македонија, стана сопственик на 25 проценти од грчки ОТЕ. Токму Антимонополската комисија е таа која треба да го направи конечното одобрување на купопродажниот договор за Космофон и Германос.

Словенечки Телеком преку Космофон добива над 600.000 корисници, што е пазарен удел од 30 отсто од мобилната телефонија, 3-Г лиценца, една национална и шест регионални вајмакс лиценци, како и фиксната безжична мрежа АЛЛО. Од Германос Телеком наследува 66 продавници низ земјава. Телеком Словенија е една од најголемите телекомуникациски групации во ЈИЕ. Под своја капа го има најголемиот мобилен оператор во матичната земја, а нуди и фиксни линии и броудбенд сервиси. Во Македонија се присутни повеќе години преку Он.нет, вториот по големина интернет провајдер. Има компании-ќерки во Косово во интернет провајдерот Ипко во кого вложуваат 200 милиони евра за развој на мрежата, потоа во БиХ и Албанија, а е 50-процентен сопственик и во националниот оператор на Гибралтар - Гибтелком. Лани, групацијата на Телеком Словенија оствари приходи од 842,4 милиони евра и добивка пред оданочување од 312,2 милиони евра. Групацијата има над 320.000 броудбенд конекции, 1,5 милиони мобилни корисници и 650.000 фиксни телефонски линии.

Извор: (31.03.2009). Телеком Словенија ги купи Космофон и Германос. Вечер

Дневник: Учениците ќе плаќаат за украдените компјутери

Државниот просветен инспекторат поднесол пријави на 42 средни училишта од вкупно 93 за оштетувања и кражба на компјутери, монитори, глувчиња и тастатури. Штетата ќе ја плаќаат учениците, зашто училиштата, по укинувањето на партиципацијата што ја плаќаа учениците за тековно одржување, немаат пари да ги осигураат компјутерите. Со проектот „Компјутер за секое дете“ во средните училишта беа инсталирани 55.000 компјутери во 93 училишта.

Директорот на Државниот просветен инспекторат, Роберт Ѓоргиев, вели дека средните училишта треба да имаат обезбедување од општините за да се спречат крадците. Компјутерите ги обезбеди Министерството за образование и наука. Ѓоргиев додава дека училиштата треба да направат правилници за надоместување на штетата на компјутерите. Надоместокот ќе го одредува секое училиште посебно.

- Многу компјутери недостигаат. Директорите на овие училишта каде што се случиле кражбите и оштетувањата ќе добијат прекршочни пријави. Најголем бој украдени компјутери и компјутерска опрема има во средното училиште од Струга „Ибраим Темо“, но и во училиштата во Скопје. Во средното училиште „Владо Тасевски“, во „Панче Караѓозов“, „Цветан Димов“ и други - вели Ѓоргиев.

Според инспекторатот, во струшкото средно училиште е направена најголема штета. Констатирано е дека недостигаат 52 компјутери, 171 монитор, 246 тастатури и 319 глувчиња.

Директорите од средните училишта велат дека се' уште компјутерите се водат на Министерството за информатичко општество, но дека за нив се задолжени училиштата. Тие додаваат дека од ресорното министерство добиле само допис да направат правилници за надоместување на штети за компјутерите. Не знаат колкава треба да биде казната и како да ја наплаќаат штетата. Директорите се жалат дека немаат пари да ги осигураат компјутерите. Малку од училиштата го направиле тоа.

Директорот на средното медицинско училиште „Панче Караѓозов“, Марјан Алабаковски, вели дека осигурување на компјутерите нема, затоа што училиштето нема пари, а има и вишок на паралелки.

- Кога дојде осигурителната компанија и виде дека наставата не е во еден клас и откако видоа дека не можат да го обезбедат, се откажаа. Имаме пријавено оштетувања, но тие ќе си ги плати ученикот - вели Алабаковски.Наставниците велат дека за компјутерите се задолжени учениците. Во училиштата по еден монитор им следува на двајца ученици, по еден во двете смени. Од струшкото средно училиште „Ибраим Темо“, директорот Муса Мусаи вели дека има оштетени и украдени компјутери, но дека тоа е пријавено во полиција и дека крадците се' уште не се откриени.

- Ни наредија само да ги поставиме, без да знаат колкав е бројот на ученици. Знаеме дека има штета, но немаме соодветна комисија која би проценила колкава е. Од Министерството не ни кажуваат колкава да биде висината на казните. Компјутерите не се осигурани зашто уште не ни се предадени од Министерството за информатичко општество - вели Мусаи.Од средното училиште „Владо Тасевски“ велат дека осигурување ќе има ако Министерството за образование даде средства за тоа. Велат дека партиципацијата ја вратиле, па сега немаат пари за тоа.

- Во Министерството ни рекоа да направиме правилници. Во нив да стои дека штетата ќе ја плати ученикот со тоа што сумата ќе ја уплати на сметка на училиштето. Тоа ќе биде тешко, бидејќи имаме само по еден администратор кој е задолжен во пет училишта. Друг проблем е што треба да се научат учениците да не ги оштетуваат компјутерите - вели директорката Снежана Божиновска.

Државниот секретар во Министерството за образование, Дарко Митевски, вели дека пари во блок-дотации се префрлени во Општината на град Скопје и дека тие се задолжени да ги распределат и да се погрижат да ги осигураат компјутерите.Ниту од Министерството за информатичко општество не знаат колкава е точно штетата направена во училиштата.

- Собираме информации, ама не знаеме колкава е штетата, но казни ќе добијат директорите. Треба време да утврдиме каква е состојбата во училиштата - велат од Министерството.

Извор: (27.1.09). Учениците ќе плаќаат за украдените компјутери. Дневник.

Утрински: Веб-сајтовите на партиите замрзнати пред избори

Македонскиот политички простор на Интернет е речиси замрзнат, а од посетите на Интернет како да се нема впечаток дека до претседателските и локалните избори не' делат неполни три месеци. Додека цела Америка и светот му аплаудираат на Барак Обама за успехот што го постигна претставувајќи се на Интернет, македонските партии како да спијат во длабок сон. Ниту една од партиите не сака да истрча со електронското претставување, но и не откриваат како ќе ги анимираат гласачите за избори. Затоа, по малку апсурдно звучеше предлогот на Владата на претстојните избори да се проба со електронско гласање во некои пилот-средини.На веб-сајтовите на партиите ретко можат да се најдат содржини поврзани со претстојните избори, со исклучок на актуелни прес-конференции, колумни или ставови на партиските лидери. А некои од нив живеат уште во времето пред две години, па се прикажуваат извештаи од говори на експретседатели. Повеќето од партиите најавија дека пред изборите ќе официјализираат посебни веб-страници на кои ќе има најразлични содржини за анимирање на гласачите, што било редовна практика и претходно. Нови веб-страници пред изборите најавија ВМРО-ДПМНЕ и ДУИ, додека СДСМ се' уште го нема дефинирано ова прашање. Нова страница најавија и ЛДП, иако нивниот официјален сајт веќе подолго време не функционира. ДПА ќе има посебен дел за гласачите на нивната официјална страница на партијата. Ако се прави некаква споредба, партискиот сајт на ВМРО-ДПМНЕ е најажурен, а секој момент се полни со нови информации за тековните активности на партиските активисти. Посетителите на сајтот можат да се запознаат како да станат членови на партијата, за која се наведени и десет причини зошто некој треба да стане член на партијата. На страницата подетално се објаснети и резултатите од досегашните избори. „Секогаш за изборите правиме сајт посветен на кампањата кој е различен од официјалниот партиски сајт и тоа го правиме веќе неколку избори по ред. На сајтот ќе може да се прочитаат имињата на кандидати, биографии, програми, агенди, настани, активности“, објаснува Илија Димовски од ВМРО-ДПМНЕ. Сепак, партијата се' уште не го стави на сајтот најавениот интерен конкурс за избор на претседател. Интерен конкурс за самокандидирање стои и на сајтот на СДСМ, но тој се однесува за градоначалници и е одамна изминат. Во СДСМ велат дека сајтот веќе извесно време им е во изработка и се чека на негово ажурирање. Но, според партиски извори, самокандидирањето се однесува и за претседателските кандидати кои можат да се кандидираат во општините. „За стратегијата за промовирање на партијата пред избори ќе одлучи Централниот изборен штаб, кој ќе биде формиран непосредно пред кампањата. Вообичаено изготвуваме посебна веб-страница за изборите каде што се презентираат сите активности поврзани со изборите“, велат во партијата. ДУИ и ДПА им се обраќаат на своите гласачи преку веб-сајтовите кои се напишани само на албански. Иако размислуваат да ги направат и на македонски. Од ДУИ најавуваат нова веб-страница за изборите, но не кажуваат какви содржини ќе има. ДПА , пак, ќе има посебен линк на страницата. Од некогаш ажурираната страница на ВМРО-Народна останале само говорите на сега почесниот лидер Љупчо Георгиевски објавени уште пред две-три години. Сегашниот лидер на партијата, Марјан Додовски вели дека прашање на денови е кога страницата ќе добие нов лик, а ја најавува и можноста да имаат и посебна веб-страница за изборите.

Извор: (20.1.09). Веб-сајтовите на партиите замрзнати пред избори. Утрински Весник.

Вест: "Вип" нема податоци за корисниците

"Вип оператор" изминатиов месец во повеќе кафулиња на гостите им делеше припејд СИМ картички со ваучер за разговор преку неговата мрежа без да побара лични податоци од лицето што ја зело картичката, иако законската регулатива ги обврзува мобилните оператори да водат евиденција за сите корисници. Од Агенцијата за електронски комуникации велат дека сите оператори мораат да имаат податоци за корисниците, независно дали за разговор плаќаат однапред со припејд ваучер или следниот месец со фактура. "Во Правилникот за општи видови и услуги стои дека операторот мора да води евиденција за своите претплатници, нивните адреси и кориснички броеви, и операторите треба да работат согласно оваа обврска. Кај операторите се врши инспекциски надзор и ако има жалби од корисници постапуваме по нив", објаснуваат од Агенцијата.Од "Вип оператор" одговараат дека не знаат оти во промотивната акција не биле запишувани лични податоци за новите корисници. Даниела Начевска - Стојчевска од "Вип оператор" објаснува дека СИМ картичките ги делат преку надворешни агенции на кои им дале и формулари кои граѓаните требало да ги пополнат пред да ја добијат СИМ картичката. "'Вип оператор' работи целосно во согласност со важечката регулатива во Република Македонија. Во однос на промотивната акција која траеше една седмица, за да добијат можност да ги тестираат услугите на 'Вип' и најновата припејд промоција, заинтересираните граѓани требаше да ги остават своите податоци", објаснува Даниела Начевска - Стојчевска од "Вип оператор".

Извор: (16.1.09). "Вип" нема податоци за корисниците. Вест.

Утрински: „Кејблтел“ им ги кине нервите на корисниците

Прекини на телевизијата и по неколку часа, слаб сигнал, исклучување канали и предводи, паѓање на Интернет сообраќајот - се проблеми со кои секојдневно се соочуваат корисниците на услугите на кабелскиот оператор „Кејблтел“. Граѓаните се жалат дека навремено ги плаќаат сите сметки, кои пред неколку месеци поскапеа за 100 денари, поточно од 350 на 450 денари, а за возврат добиваат прекини во Интернет и кабелските услуги. Тоа најинтензивно се случуваше за време на новогодишните и божикните празници, кога најмногу се користи Интернет и се гледа телевизија. Од „Кејблтел“ на овие поплаки одговараат дека проблемот наскоро ќе биде решен, бидејќи нивните екипи од вчера излегле на терен за да ги отстранат недостатоците. Но, корисниците реагираат дека таквата инертност е недопустлива ако се знае дека проблемот со кабелското опслужување постои повеќе од еден месец наназад. „Му плаќам на ’Кејблтел‘ 450 денари за кабелска, плус 350 за дигитална телевизија, поради дополнителните канали и плус 500 денари за Интернет. Тоа значи дека овој оператор од мене добива 1.400 денари секој месец, а се што добивам од него се чести прекини во програмата и Интернет- конекцијата. Најчести прекини имаше за време на новогодишните празници, кога овие услуги ми беа и најпотребни. Најдраматичен беше моментот кога го гледав натпреварот меѓу Динамо, кој го обожавам, и Хајдук, кој не можам да го смислам, и ми снема сигнал. Е, тогаш бев подготвен на се'. Згора на се', кога сакам да го пријавам прекинот, никој никогаш не се јавува на дежурниот телефон“, се жали еден скопјанец, жител на Општина Кисела Вода. Овој пример на незадоволен корисник на услугите на „Кејблтел“ не е осамен. Повеќе жители реагираат на лошите услуги. И додека граѓаните на Кисела Вода најмногу се соочуваат со проблемот на прекини во конекцијата на сигналите, жителите од другите делови на градот се жалат на подолг прекин на некои канали, како што е ТВ Нова.„Ја исклучуваа Нова во време кога се емитуваше ’Операција триумф‘, но и по завршувањето на ова шоу, ние апстинираме од гледање на овој канал, бидејќи ’Кејблтел‘ често не го вклучува. Освен тоа, сигналот на оние програми кои ни се на располагање е многу слаб. Се' на се', овој оператор не нуди никаква услуга“, вели жителка на Карпош.Образложението на „Кејблтел“ за честите прекини во опслужувањето на граѓаните со нивните услуги е дека тоа било поради прекинот во напојување со електрична енергија. „Во реонот на Кисела Вода изминатиов период имаше прекин во напојувањето со електрична енергија, поради што нашата мрежа не можеше да дистрибуира сигнал до корисниците и поради тоа немаше можност да се следат програмите и да се користи Интернет-услугата“, вели менаџерот за програмски пакети во „Кејблтел“, Лидија Голубова.Таа најавува дека деновиве проблемот ќе биде решен, бидејќи вчера екипи излегле на терен и работат на надминување на проблемот. „И за нас не е пријатна ситуација, бидејќи имаме чести поплаки за прекините, но со интервенцијата на терен се надеваме дека овие проблеми ќе бидат отстранети и клиентите ќе добијат редовна дистрибуција на сигналите“, објаснува Голубова. Поплаките на граѓаните се од оние делови каде што нема алтернативен избор за кабелски оператор. Еден од најголемите конкуренти на овој странски оператор, е домашниот „Телекабел“, кој се' уште се нема проширено во сите населби низ Скопје. Дел од незадоволните тврдат дека се пријавиле за „Макс ТВ“ на „Т-хоум“, бидејќи таа понуда е подобра, иако е поскапа. Што се однесува до негодувањето на граѓаните дека не можат ниту да се пожалат на лошата услуга на „Кејблтел“, бидејќи никој не се јавува на телефоните, од овој кабелски оператор велат дека кога сите оператори се зафатени, корисникот добива сигнал за слободна линија, но мора да се почека или да се јави повторно. Но, оттаму изразуваат и сомневање дека операторите намерно не се јавуваат на дежурните линии.

Извор: (13.1.09). „Кејблтел“ им ги кине нервите на корисниците . Утрински Весник.

Утрински: МРТ преку извршители и без најава ја наплаќа радиодифузната такса

Стотина фирми, од кои најголемиот број во Скопје, пред новогодишните празници биле олеснети за неколку илјади денари од сметките без никакво предходно предупредување или најава. Затечени, дури откако ги изгубиле парите, сопствениците се информирале дека извршители, во името на Македонската радио-телевизија, им наплатиле заостанат долг за неплатена радиодифузна такса. Да биде изненадувањето уште поголемо, покрај заостанатиот долг, си платиле и надомест за извршителот, нотарот и банката каде што е извршена трансакцијата. За целиот случај во МРТ не добивме објаснување ниту, пак, ни беше одговорено дали сите клиенти навремено биле известени за наплатата на долгот. Нејасно е засега дали овој тип наплата ќе продолжи и во иднина и дали ќе биде насочена само на правните лица или ќе се прошири и на граѓаните кои имаат ненамирени сметки кон МРТ.„Неколку дена пред празниците открив дека на сметката немам пари, иако знаев дека има неколку илјади денари. На шалтерот ме информираа дека ми се повлечени средства преку трансакциската сметка по налог на извршител и дека за да биде целосно наплатена сумата, треба дури и дополнително да уплатам средства. Претходно немав добиено никакво известување дека воопшто должам нешто и некому“, вели Зорица Николиќ, сопственик на училиште за странски јазици.Таа вели дека по првиот шок, за што всушност станува збор и' објасниле во сметководствената фирма што ја ангажирала. Имено, за неплатени сметки за радиодифузна такса за шест месеци во 2007 година нејзината фирма должела 2.700 денари, а од сметката и' биле наплатени над 9.000 денари, од кои 3.600 како награда за извршителот. Николиќ вели дека еден од извршителите на сопственици на уште десетина фирми кои настрадале како нејзината им презентирал решенија за известување дека ќе се реализира извршувањето. Решенијата биле потпишани дека се уредно доставени до фирмите пред да се спроведе тоа. Таа тврди дека такво решение ниту видела ниту потпишала и прашува кој го фалсификувал нејзиниот потпис.Слично поминал и Душко Андоновски, сопственик на фирма за сервисирање биротехничка опрема. Тој за долг од 2.200 денари платил 9.000 денари. Известување дека од пошта треба да си подигне решение, во кое инаку пишува дека откако ќе го добие има право во одреден рок да се жали, добил седум дена откако истото решение било веќе извршено, односно парите биле симнати од сметката на фирмата. Поштарот го оставил известувањето пред вратата на фирмата, без да побара некој да потпише за доставата.Андоновски се обратил и до МРТ, но добил одговор дека не постои служба во која тој би можел да се пожали или каде што би можел да се информира уште колку должи и како да плати, а притоа да ги избегне извршителите и дополнителните трошоци. Во Комората на извршители велат дека тие само ги спроведуваат налозите што ги добиваат од институциите. Немаат законска обврска да го информираат сопственикот на фирмата дека од сметката ќе му се земаат пари, туку известување добива само банката. Од Комората велат дека институцијата што бара наплата треба да ги извести своите клиенти, по што решението може да стане правосилно и извршно. Оттаму не се сомневаат дека МРТ го направила тоа ниту, пак, ја доведуваат во прашање веродостојноста на потписите за доставата на решенијата.
Извор: (12.1.09). МРТ преку извршители и без најава ја наплаќа радиодифузната такса. Утрински Весник.

Утрински: Слободата го претвори Интернетот во нов медиум во Македонија

Пратеникот на ДУИ Хисен Џемаили, кој е еден од обвинетите за случајот „Мавровски работници“, можеби е недостапен за полицијата, но е една од главните фаци на „Фејсбук“, социјалната мрежа за Интернет-комуникација. На оваа информација деновиве посочи и Интернет-порталот „Он нет“, на чиј сајт стои коментарот: „Не можеле никако да го најдат Хисен Џемаили. А, типот не дека се крие нешто темелно како Радован Караџиќ. Да го побараа на ’Фејсбук‘?“ Блогови, „Фејсбук“, „Јутјуб“... Интернет-сајтовите се' повеќе добиваат на цена во македонскиот медиумски простор каде што бројот на членовите секојдневно расте. Ако некогаш важеше правилото дека медиумите се „watchdog“ (чувари) на општеството, сега може да се каже дека блоговите се „watchdog“ на медиумите. Долга е листата на политичари, интелектуалци, новинари кои буквално во секој момент „висат“ на некоја од веб-страниците преку кои или се вклучуваат во жестока јавна дебата и полемизираат или, пак, разменуваат фотографии. Моментно најкористена социјална мрежа за Интернет-комуникација е „Фејсбук“, за кој експертите посочуваат дека го користат дваесетина илјади луѓе во земјава. Генерално, непознатост е колку многу се користат другите Интернет-страници. Но, кога станува збор за дебатите, тука водат блоговите, а ги има многу, бидејќи важи правилото дека на Интернет секој може да каже се' што сака и тоа без цензура.
Меѓу најактивните на Интернет е Филип Петровски, директор на Градската библиотека „Браќа Миладиновци“ во Скопје. Постојано можете да го најдете на некој од веб-сајтовите, каде што испраќа видео, аудио и пишани коментари, но вели дека „ниеден не е доволно ефикасен за да се потпреш само на него“. Оние што користат Интернет најмногу го препознаваат преку неговиот блог. „Ги користам сите канали. Блогови, ’Фејсбук‘, ’Јутјуб‘. Имам повеќе од 200 постови, односно наслови на блогот. Тоа е една област која допрва политичарите ќе сфатат дека може да ја користат. Тие немаат инвентивност и комуникација со луѓето“, смета Петровски. Тој нема слушнато дека некој политичар користи блог, за разлика од другите држави каде што блоговите имаат значајно влијание во вкупните општествено-политички збиднувања. Како пример ни го посочи изборот на Барак Обама за претседател на САД, чиј успех, според анализите, се должи на неговиот настап на Интернет.
Различни коментари можеа да се прочитаат за актуелниот вицепремиер Ивица Боцевски, кој по назначувањето за портпарол во Владата, престана да го користи блогот. Некои македонски блогери не можеа да му го простат тоа и сметаат дека „тој го предал блогерството“. Боцевски вели дека додека бил портпарол, не се занимавал со блогерство, бидејќи сметал дека тоа е неспојливо со новата функција. Но, сега откако стана вицепремиер, размислува повторно да му се врати на блогерството. „Блогерството е едно од најдобрите места за дебатирање, каде што запознав многу пријатели. Блогот го подразбирам како предизвик, место каде што се судруваат ставови, идеи, теми што го скокоткаат секој посетител“, објаснува вицепремиерот. Поранешната лидерка на СДСМ Радмила Шекеринска веќе подолго време користи Интернет-комуникација. „Интернетот нуди можност за пишување без цензура, да пишуваш, а да останеш анонимен. Предноста на Интернет-комуникацијата е што ти нуди шанса да се сконцентрираш на човекот со кого контактираш и на темата за која контактираш“, ни кажа Шекеринска. Таа додава: „Некогаш можеш да препознаеш политичар или партија која се користи под друго име блог за да го нападне противникот. Но, ако има аргументи, барем треба да има храброст да се потпише“, вели таа.
Шекеринска е најактивна на „Фејсбук“, веб-сајтот за социјална интеракција, каде што секој посетител може да создаде личен профил, оставајќи лични податоци, по кои подоцна и се пронаоѓаат пријателите. „Фејсбук“ го употребува за да се заштити од можноста за крадење идентитети, но и тоа не било гаранција, бидејќи со сопругот на своја кожа ги почувствувале злоупотребите. „Се смеевме со сопругот како е можно некој во негово име да направи профил на ’Фејсбук‘“, вели Шекеринска. Таа објаснува дека преку „Фејсбук“ станала член на форуми каде што се дискутира непартиски. Интернет-порталот за испраќање видеосодржини „Јутјуб“, кој е релативно нов за нашиве простори, го користела изминатава година за следење други кампањи и занимливости. Чита и некои од блоговите, но повеќе странски отколку домашни. Премиерот Никола Груевски е честа тема на Интернет-форумите и блоговите каде што можат да се најдат пофални зборови за него, од тоа дека е четврти најмлад лидер во светот до погрдни зборови за неговите лични карактеристики. А, ако некој сака да дојде до премиерот Никола Груевски, тоа најлесно може да го направи ако се приклучи на „Фејсбук“, каде што премиерот има цела страница на која секој може да влезе и да најде податоци од неговата биографија. На „Фејсбук“ се и голем број други сегашни и поранешни политичари, како што се директорот на Центарот за комуникации на ВМРО-ДПМНЕ, Илија Димовски, потоа лидерот на ДУИ, Али Ахмети, и портпаролката на партијата, Ермира Мехмети, како и многу други. Меѓу блогерите многу активни се поранешната претседателка на Хелсиншкиот комитет Мирјана Најчевска со нејзиниот блог „Црна овца“ и професорката Билјана Ванковска.
Колку реално созреваат македонската блогосфера и, воопшто, македонскиот Интернет-простор? И дали Македонија наскоро би можела да извлече некакви поуки од Хрватска, каде што пред неколку недели хрватските блогери организираа протести во неколку града под мотото „Стегнете ги вие ремените, бандо лоповска“, како израз на незадоволство од политиката на премиерот Санадер. Експертите велат дека Интернет-порталите се' повеќе се на цена кај публиката, пред се' поради убеденоста дека медиумите се подложни на секакви влијанија. „Блогосферата, дефинитивно, е алтернатива за стеснетиот простор за јавна дебата и критичко размислување во класичните медиуми. Тоа не значи дека не е подложна на влијанија“, коментира Филип Стојановски од фондацијата за одржливи ИТ-решенија „Метаморфозис“. Според него, постојат технички можности за анонимно ширење информации од прва рака, па затоа тој прогнозира дека можеби во иднина ќе се појават такви блогови на „whistleblowers" („тастери“ или поткажувачи), односно луѓе кои ќе укажуваат на корупција или злоупотреби во институциите или фирмите во кои работат со презентирање доволно докази за да поттикнат и официјални истраги. Сепак, Стојановски предупредува дека ваквите напори се бесполезни се' додека не профункционира Законот за слободен пристап до информациите.

Извор: (31.12.2008). Слободата го претвори Интернетот во нов медиум во Македонија. Утрински Весник.

Утрински: Мобилното „ало“ на „Космофон“ пак најевтино за административците

„Космофон“ даде најевтина понуда за разговор меѓу административците во наредните две години. Сепак, допрва ќе се прави евалуација, а одлуката кој ќе биде избран за опслужување на државната администрација со мобилни разговори ќе се знае по Нова година. „Мобилниот оператор ’Космофон‘, по одредени ставки, достави најниска цена на тендерот за избор на оператор преку кој во наредните две години ќе разговара државната администрација, но допрва ќе се врши евалуација и по други критериуми“, изјави Слободан Буковски, претседател на Комисијата што ја спроведува набавката, по отворањето на понудите на тендерот, распишан од Службата за заеднички и општи работи на Владата. Покрај „Космофон“, понуди имаат доставено и „Т- мобиле“ и ВИП. Според Буковски, сите три мобилни оператори доставиле валидни понуди, а отворањето поминало без никакви проблеми. „Официјалната одлука за победникот на тендерот ќе се знае во првите денови по Нова година, до кога ќе бидат комплетно евалуирани понудите. Главниот критериум во евалуацијата ќе биде цената што ја нудат операторите според три критериуми, во национален сообраќај, во роаминг и во меѓународен сообраќај“, информира Буковски.Тој нагласи дека победникот на тендерот ќе опслужува разговор за 3.300 броеви во Владата и другите органи од државната управа. Горан Андревски, директор на правна регулатива во „Космофон“, изјави дека неговата компанија повторно дала најдобра понуда за услуги во мобилната телефонија за Службата за заеднички и општи работи на Владата. „Очекуваме во наредните две години, како и досега, да останеме провајдер за услуги на Владата. ’Космофон‘ уште еднаш се докажа како технолошки лидер во мобилната технологија и очекуваме така да остане“, изјави Андревски. Победник на минатогодишниот тендер беше „Космофон“, кој тогаш понуди најевтин телефонски импулс.

Извор: (30.12.08). „Космофон“ пак најевтино за административците. Утрински Весник.

Вест: Досие Тониќ на Именденска бб

Случајот писмо на Слободан Томиќ до Премиерот Никола Груевски, објавено на Интернет, како пример на сервилно новинарство мотивираше и други изрази на јавно мислење преку хумор за работата на Владата. Така еден блогер со псевдоним "рибаро" ги искористил завршните сцени од филмот "Последните денови на Хитлер" и со превод на македонски се исмејува на состојбата со медиумите во Македонија. Клипот блогерот го пуштил на познатиот интернет сајт "Јутјуб".Во наводното писмо, авторот Томиќ го нарекува Груевски "пастир" на македонскиот народ и му се заблагодарува што го прифатил интервјуто за неговата емисија "Гласот на народот" која се емитува на јавниот сервис МТВ.Емисијата закажана за во саботата, сепак, не се емитуваше, иако имаше целодневни најави. Од Владата објаснија дека премиерот ниту потврдил учество во емисијата, а рекоа и дека во тој термин имал други обврски. Во клипот со наслов "Досие Именденска бб", кој е пуштен на Интернет, Хитлер прашувајќи каде Јанкуровска ги собира околу себе блиските соработници Боцепски, Ставрепски, Славепски и ги обвинува дека не сработиле добро тоа што требало, па им вели:"Викнете ја Јанкуровска да ги најде интернетџиите?", но добива одговор дека таа си ја повредила раката садејќи дрвца."Каде се сега платените медиуми? Каде е мајчиниот портпарол Бичиклипски? Сигурно цмиздри некаде? Да се мобилизираат веднаш МРТВ, Сител и Вечер! 24/7 исполнуваме. А што исполнувате вие позери?", им вели Хитлер.Потоа приказната продолжува:"Каде се сега Латас, Ивона, Миленко и другите придружни сателити? Очајно ми требаат, да ми ги донесете одма. Инаку ќе ги избришам од платниот список".Потоа монологот на Хитлер оди вака:"Што ќе кажувам сега во 'Гасот на Народот', а да не се избламирам. Смислил Тониќ цело сценарио за емисијата, го видов. Ќе воспоставел линк и со нашите во Германија? Фино скоцкана лага за глупавиов народ да зајдува. Ама недоветен е тој Тониќ. Што мислел кога му го давал сценариото на Бичиклипски. Како сега да се вадам пред народов? ", вели Хитлер и му наредува на Ивица да им даде лопати на Тониќ и на Бичиклипски и да ги прати да садат дрвца. Ваков сличен клип со истите сцени од филмот за Хитлер на Интернет се вртеше и за хрватскиот премиер Иво Санадер, а во Србија за претседателот на радикалите Воислав Шешељ.

Извор: Д.Д. (30.12.2008). Досие Тониќ на Именденска бб. Вест.