Вечер: Од април поевтина фиксна телефонија и интернет

Компанијата Некском, која ја доби националната WiMAX лиценца, ќе понуди многу пониски цени во фиксната телефонија и во интернетот од оние на Македонски телекомуникации, откако од април годинава компанијата ќе почне со комерцијална работа во земјава. До тогаш Некском, ќе го тестира функционирањето на првите базни станици што ги поставува во скопската населба Аеродром. Генералниот директор на Некском Македонија, Тодор Цветковски вели дека ќе биде запазен рокот зададен од Агенцијата за електронски комуникации за почеток на работа во рок од шест месеци.

- По овој тест период, ќе продолжиме со поставување на базни станици на територијата на Скопје, а паралелно ќе ја градиме и мрежата во другите градови, пред се во Битола, Штип, Струмица и Тетово, а до крајот на јуни планираме целосна покриеност на Македонија. Бројот на базни станици до крајот на годинава очекуваме да достигне 100, а овој број планираме двојно да го зголемиме во текот на идната година - истакна Цветковски.

Оваа технологија, бидејќи се базира на базни станици, овозможува достапност и на места каде што не можат да се постават кабли. Сигналот на базната станица покрива радиус од 15 километри, што дава голема предност во споредба со постоечкиот ADSL на Телеком, бидејќи не е врзан со фиксна телефонска линија. Од друга страна, преносот на податоци со оваа технологија е до 30 пати поголем од GPRS технологијата на мобилната телефонија и до 10 пати побрза од 3G технологијата што наскоро треба да се појави на пазарот.

Директорката за маркетинг, Билјана Трајковска, вели дека корисникот ќе може да избере дали да ги има двете услуги или поединечно - само фиксна телефонија или само интернет. Освен што во сопствената мрежа ќе нудат фиксна телефонија за своите корисници, кои ќе имаат нумерички број на Некском, претплатниците ќе можат да се јавуваат и на броеви на Македонски телекомуникации, кон трите мобилни мрежи и за меѓународни разговори. Од Некском велат дека преговараат со мобилните оператори за склучување на интерконекциски договор, а таков веќе имаат од минатата година потпишано и со Телеком. Од оваа компанија се надеваат дека досегашните високопрофесионални односи што ги имаат со сите интерконекциски партнери ќе продолжат и откако ќе почнат со воведување на WiMAX услугите. Досега оваа компанија беше позната со нудење на услугата 1001 која на граѓаните им овозможува избор на оператор за меѓународни разговори.

Извор: (18.1.08). Од април поевтина фиксна телефонија и интернет. Вечер.

Дневник: Интернетот и фиксната телефонија ќе поевтинат

Цените на интернетот и на фиксната телефонија ќе се преполоват кога од идниот месец ќе проработат вајмакс-операторите за безжични електронски комуникации, посочуваат експертите. Преку оваа услуга се овозможува користење интернет со голем капацитет и брзина, како и пренос на податоци, говор, звук и слика без да се користат мрежата и ресурсите на „Македонски телекомуникации“.- Со оглед дека вајмакс услугата е независна од телекомот, односно од цените што тој ги диктира со интерконекциските договори, реално е да се очекува дека новите оператори ќе понудат пониски цени. Особено за разговори од еден на друг телефонски број во рамките на мрежата. Со тоа ќе се добие и вистинска конкуренција за Македонски телекомуникации - велат во Министерството за транспорт и врски.

До крајот на месецов истекува рокот во кој двата идни национални вајмакс-оператори, грчки „Космотелко“ и американската „Некском“ треба да почнат со работа. Во спротивно, како што најавуваат од Агенцијата за електронски комуникации, концесиите ќе им бидат одземени. Двете компании при потпишувањето на договорот за добивање радиофреквенција најавија дека ќе ги запазат роковите дадени со јавниот повик да почнат со работа за шест месеци. Тие најавија и значителни инвестиции - „Некском“ од 10 милиони евра, а „Космотелко“ 500 милиони.

„Вајмакс“ или безжичен фиксен пристап е технологија која е широко распространета не само во европските земји туку и во регионов. Се очекува оваа технологија првпат вистински да ја разниша доминантната позиција на Македонски телекомуникации бидејќи независно од нивната мрежа ќе овозможува брз интернет и фиксна телефонија.

Вајмакс-радиофреквенциите се пренесуваат преку базни станици како кај мобилната телефонија. Но тие имаат многу поголем проток на сообраќај. Со оваа технологија веќе нема потреба од поставување кабли, како кај класичната фиксна телефонија, па во светот таа се користи за поврзување на тешкопристапни терени.

Затоа се очекува дека вајмакс-операторите ќе бидат главните конкуренти на Македонски телекомуникации. Другите фирми што во моментот нудат услуги во фиксната телефонија не можат да му конкурираат на телекомот бидејќи му плаќаат висока цена за интерконекција. Тие нудат главно меѓународни разговори. „Актон комуникации“ користи интернет-телефонија за меѓународни разговори, но услугата ја нуди само на фирми. Поевтини меѓународни разговори нудат и „Он нет“ со услугата „1010“ и „Некском“ со користење на кодот за избор на оператор 1001.

Извор: Марјан Блажевски. (8.1.08). Интернетот и фиксната телефонија ќе поевтинат. Дневник.

Утрински: Интернет користи секој петти Македонец

Бројот на Интернет-корисници во Македонија во изминатите седум години е зголемен за 1.210 отсто, односно од 30 илјади во 2000 на околу 400 илјади во 2007 година, покажуваат податоците објавени на специјализираната статистичка веб-страница „Интернет ворлд стат“.

Македонија е меѓу земјите со најбрз раст на бројот на Интернет-корисници, но и натаму заостанува во однос на европските стандарди и повеќето свои соседи. Од земјите во регионот Македонија е пред Албанија (15,3 отсто) и Србија (13,9 отсто), а зад Хрватска (35,3 отсто), Грција (33,5 отсто), Бугарија (21,7 отсто) и Босна и Херцеговина (20,3 отсто).

Во Европа, процентуално, најмногу корисници на глобалната веб-мрежа има во Исланд (86,3 отсто) и во Шведска (75,6 отсто), а најмалку во Ватикан (12,1 отсто) и во Украина (11,5 отсто).

Според „Интернет ворлд стат“, во светот користат Интернет околу 1,25 милијарди луѓе, најмногу во САД - 211 милиони, во Кина – 162 млн., Јапонија – 86 млн. и во Германија 50 милиони.

Извор: МИА. (25.11.07). Интернет користи секој петти Македонец. Утрински весник.

Дневник: Секој петти Македонец користи интернет

Бројот на корисниците на интернет во Македонија во изминатите седум години е зголемен за 1.210 отсто, односно од 30.000 во 2000 на околу 400.000 годинава, покажуваат податоците објавени на веб-страницата „Интернет ворлд стат“, јави МИА. Околу 20 отсто од населението во земјава користи интернет.

Македонија е меѓу земјите со најбрз пораст на бројот на интернет-корисниците, но и натаму заостанува зад европските стандарди и повеќето свои соседи. Од земјите во регионот, земјава е пред Албанија (15,3 отсто) и пред Србија (13,9 отсто), а зад Хрватска (35,3 отсто), Грција (33,5 отсто), Бугарија (21,7 отсто) и Босна и Херцеговина (20,3 отсто). Во Европа, најмногу корисници на глобалната веб-мрежа има во Исланд (86,3 отсто) и во Шведска (75,6 отсто), а најмалку во Ватикан (12,1 отсто) и во Украина (11,5 отсто).

Според „Интернет ворлд стат“, во светот интернет користат околу 1,25 милијарди луѓе, а најмногу во САД - 211 милиони, во Кина - 162 милиони, Јапонија - 86 милиони и во Германија - 50 милиони.

Извор: (24.11.2007). Секој петти Македонец користи интернет. Дневник.

Нова Македонија: Околу 20 отсто од Македонците користат интернет

Во Македонија годинава интернет користат околу 400 илјади луѓе или 19,2 отсто од населението, покажуваат податоците на специјализираниот статистички веб сајт Интернет ворлд стат. Од земјите во регионот пред Македонија се Словенија со 55,5, Грција со 33,5, Хрватска со 32,9 и Бугарија со 28,7 проценти. Помалку од Македонците интернет користат граѓаните на Босна и Херцеговина (17,3), на Црна Гора (17,6), на Србија (13,9), а на дното е Албанија со само 6,1 отсто. Според податоците, пак, на европската статистичка организација Еуростат, во 2006 година интернет во Македонија користеле 21 процент од населението и 14 отсто од домаќинствата. Интернет корисници се 51,8 отсто од граѓаните на ЕУ, а од вкупно 810 милиони европејци пристап на глобалната он лајн мрежа имаат 322 милиона. Процентуално интернетот најмногу го користат граѓаните на Исланд со 86,3 отсто, а најмалку жителите на Албанија. Во светот, според Интернет ворлд стат, интернет користат милијарда и 173 милиони луѓе.

Извор: (10.8.2007). Околу 20 отсто од Македонците користат интернет. Нова Македонија.

Дневник: Интернет користат 20 отсто од Македонците

Во Македонија во 2007 година интернет користат околу 400 илјади луѓе или 19,2 отсто од населението, покажуваат податоците на специјализираниот статистички веб-страница Интернет ворлд стат.

Од земјите во регионот пред Македонија се Словенија со 55,5, Грција со 33,5, Хрватска со 32,9 и Бугарија со 28,7 отсто. Помалку од Македонците интернет користат граѓаните на Босна и Херцеговина (17,3), на Црна Гора (17,6), на Србија (13,9), а на дното е Албанија со само 6,1 отсто.

Според податоците, пак, на европската статистичка организација Еуростат, во 2006 година интернет во Македонија користеле 21 отсто од населението и 14 отсто од домаќинствата.

Интернет-корисници се 51,8 отсто од граѓаните на ЕУ, а од вкупно 810 милиони Европејци пристап на светската онлајн-мрежа имаат 322 милиона. Процентуално, интернетот најмногу го користат граѓаните на Исланд со 86,3 отсто, а најмалку жителите на Албанија. Во светот, според Интернет ворлд стат, интернет користат милијарда и 173 милиони луѓе.

Извор: (10.8.2007). Интернет користат 20 отсто од Македонците. Дневник.