Дневник: Телефонските разговори прескапи

Дури 81 отсто од испитаниците одговориле дека евентуален нов мобилен оператор треба да понуди подобри цени за разговор за да станат негов корисник

Македонските граѓани сметаат дека прескапо плаќаат за разговорите по мобилен телефон. Ова го покажува испитувањето на пазарот што го спроведе Агенцијата за електронски комуникации (АЕК), според кое дури 81 отсто од испитаниците одговориле дека евентуален нов мобилен оператор треба да понуди подобри цени за разговор за да станат негов корисник. За 7 отсто од испитаниците изборот на евентуалниот нов оператор би зависел од квалитетот на услугите, а само за три отсто од подобрите цени за СМС и ММС-пораките.

Според испитувањето, 80 отсто од анкетираните се служат со мобилен телефон, а фиксната телефонија е присутна во 69 отсто од домовите. Вкупно 49 отсто од македонските граѓани користат интернет, што е значително подобар процент споредено со 2008 година, кога интернет користеле 36 отсто или со 2007 година - 26 отсто.

Според портпаролот на АЕК, Марјан Пејовски, дали на македонскиот телекомуникациски пазар има потреба од четврти мобилен оператор ќе се знае по октомври, кога треба да заврши анализата на пазарот. АЕК досега не упатила препорака до Министерството за транспорт и врски за да се распише тендер за четврт мобилен оператор.

Потврден одговор на прашањето дали сакаат поголем избор на мобилни оператори дале 77 отсто од испитаниците, а 21 отсто се изјасниле негативно. Резултатите од испитувањето покажуваат дека „Т-Мобиле“ е главен мобилен оператор за 69 отсто, за 22 отсто тоа е „Космофон“, а за 9 отсто „Вип“. Од испитаниците кои се изјасниле дека го промениле операторот на мобилна телефонија, 73 отсто тоа го направиле поради подобри цени, а 27 за подобри услуги.

Фиксна телефонија користат 69 отсто од домаќинствата. Скапите сметки се причината што ја навеле 35 отсто од анкетираните за некористење на фиксна телефонија, а за 32 отсто тоа е употребата на мобилни телефони. Од квалитетот на услугите во фиксната телефонија се задоволни 85 отсто од анкетираните, а од цените 50 отсто. Петнаесет отсто го промениле операторот во фиксна телефонија, по што на 88 отсто од нив им се намалила сметката. Поплаки до операторот во фиксната телефонија имале 24 отсто од испитаниците, а 46 отсто одговориле дека не го оствариле своето право како корисници.

Според испитувањето, интернет најчесто се користи дома (81 отсто), во интернет-кафе - (8 отсто), на работа (7 отсто). Најчест пристап до интернет, испитаниците имаат преку АДСЛ - 58 отсто, по кој следи кабелскиот интернет со 25 отсто.

Со истражувањето се опфатени 1.100 испитаници над 16 години, врз основа на репрезентативен примерок, а го спроведе од 3 до 9 овој месец маркетинг-агенцијата „Стратеџик маркетинг енд медија рисрч“.

Извор: (24.09.09). Телефонските разговори прескапи. Дневник.

Утрински: ВИП - две години на македонскиот пазар

ВИП-операторот вчера одбележа две години од стартот со комерцијално работење на македонскиот пазар и ги најави идните активности за продолжување на инвестициите во мрежата и за нови услуги за корисниците. Според главниот извршен директор, Никола Љушев, компанијата ги исполнила обврските од лиценцата, реализирала повеќе од ветеното, со што придонела за намалување на цените во мобилната телефонија за 50 проценти.

„Според финансиските резултати за второто тримесечје, за една година ВИП двојно ги зголемил своите приходи, а постојано бележи и пораст на корисничката база, која се приближи до четвртина милион корисници“, рече Љушев на прес-конференцијата. Тој информира дека за две години компанијата остварила пазарен удел од десет проценти, отворила повеќе од 200 работни места и индиректно над 500 вработувања кај локалните партнери и дистрибутери. Изградени се 300 базни станици, со што со сигнал се покриени над 95 проценти од населението. Компанијата имала неколку ситуации со тендери за големи деловни корисници каде што конкурентите настапиле со дампинг цени.

Извор: (16.9.09). ВИП - две години на македонскиот пазар. Утрински весник.

Утрински: Мобилките и Интернетот растат, паѓа фиксната телефонија

Приходите на пазарот за електронски комуникации од година в година бележат значителен раст во сите сегменти, освен во фиксната телефонија. Најголем дел од вкупните приходи и' припаѓаат на мобилната телефонија и тоа 58 проценти, фиксната телефонија учествува со 32 отсто, Интернет-услугите со осум проценти, а најмал дел од два отсто има преносот на радио-телевизиска програма до крајните корисници. На пазарот за фиксна телефонија во Македонија во првото тримесечје од годинава активни биле шест оператори, на пазарот за мобилна телефонија три, како и 70 кабелски оператори, 52 Интернет провајдери и 42 даватели на јавно достапни телефонски услуги на фиксна локација. Овие податоци се наведени во Извештајот за развојот на пазарот за електронски комуникации за првиот квартал од годинава, што вчера го објави Агенцијата за електронски комуникации.

Раководителот на Секторот за анализа на пазар при АЕК, Васка Петровиќ, истакна дека кај фиксната телефонија е утврден значителен процент на опаѓање на фиксните линии во однос на првиот квартал од 2008 година, од 399.975 линии, на 375.461. Тоа не се однесува на деловните линии во фиксната телефонија, кои од квартал во квартал одат во нагорна линија, од 37.057 крајни корисници на 41.535.

Според уделот на пазарот на фиксна телефонија, „Македонски телеком“ бележи пад - од 95,49 отсто во првиот квартал од 2008 година на 88,81 отсто во првиот квартал оваа година, на сметка на учеството на алтернативните оператори чиј удел се зголемува и во овој квартал изнесува 11,19 проценти. „Учеството на ’Македонски телеком‘ постојано се намалува, меѓутоа, тоа се' уште е значително големо и е доволна причина моментно да ја правиме анализата во согласност со препораките од ЕК, со цел да се констатира дали на пазарот има ефикасна конкуренција или има оператор кој може да дејствува независно од останатите во однос на понудата и цените“, истакна Петровиќ.

Во однос на пристапот до Интернет, бројот на резиденцијални претплатници што користат теснопојасен пристап на Интернет континуирано се намалува, од 9.412 на 4.483 за анализираниот период. Тој тренд е присутен и кај деловните претплатници. Наспроти ова, континуирано се зголемува бројката на корисници на широкопојасен пристап на Интернет и кај резиденцијалните и кај деловните претплатници.

Во константен пораст е пазарот на мобилна телефонија каде што постојано се зголемува бројот на претплатници. Моментно во Македонија има 2.299.068 активни претплатници на мобилна телефонија.

Забележана е тенденција на намалување на припејт корисниците, за сметка на зголемувањето на постпејт претплатниците.

Од трите оператори во мобилната телефонија „Т-мобиле“ бележи незначително опаѓање во вкупниот удел на пазарот - од 61,03 проценти во првиот квартал 2008 година на 58,83 проценти од првиот квартал оваа година. „Космофон“ има пораст на уделот од еден процентуален поен и изнесува 31,91 процент, а учеството на ВИП од 8,15 проценти во првиот квартал лани, во првите три месеци од годинава бил 9,26 отсто.

Според АЕК, сите мобилни оператори ја почитуваат одлуката на АЕК донесена пред една година за асиметрична интерконекција во мобилната телефонија.

Извор: А.С. (29.7.09). Мобилките и Интернетот растат, паѓа фиксната телефонија. Утрински Весник.

Вечер: Фиксното "ало" во Македонија меѓу најевтините

Македонија и натаму ја држи златната средина на пазарот на електронски комуникации во Западен Балкан во однос на цените на телекомуникациските услуги. Според најновиот извештај што го објави CULLEN INTERNATIONAL, компанија која се занимава со советнички и истражувачки услуги во телекомуникациите во САД, земјите-членки на ЕУ и во уште 30-тина држави, вклучително и во Македонија, покажува дека од 2006 година до сега, кај нас речиси и да нема корекција на цените на локалните и националните разговори во фиксната телефонија и на месечната претплата што ја плаќаат корисниците. Во овој период е забележано само намалување на цените на меѓународните разговори преку фиксна линија.

Стандардната месечна претплата за користење на фиксен телефон во Македонија, за чие укинување од поодамна постои граѓанска иницијатива, изнесува 7,67 евра. Од CULLEN INTERNATIONAL не наведуваат дали и колку има вклучено бесплатни минути во претплатата. Поскапа претплата од нас плаќаат корисниците во Косово (8,07 евра со вклучени 10 евра во разговори) и во Хрватска (10,13 евра со вклучени 1,7 евра во разговори). Најевтина претплата имаат корисниците во Албанија со 2,33 евра и во Србија - 2,6 евра.

Ние сме меѓу поевтините земји по однос на плаќањето на еднократен надоместок за добивање на нова фиксна линија. За нов телефонски број плаќаме само 24 евра. Поевтини од нас се во Косово со 10 евра и Турција со 3,13 евра. Во БиХ, корисниците за нова линија одвојуваат од 36 до 54 евра, во Црна Гора и Србија по 65, односно 66,5 евра, Во Хрватска надоместокот е 85 евра, а во Албанија дури 116 евра.

За разлика од другите земји, Македонија, Хрватска и Албанија имаат најскапи тарифи на повиците од фиксен кон мобилен телефон. Триминутен разговор кон мобилен број, корисниците на фиксна линија во Хрватска и кај нас ги чини 0,8 евра, а во Албанија - 0,92 евра. За истата минутажа, корисниците во Косово и Турција плаќаат по 0,56 евра, во Црна Гора чини 0,67 евра, а најевтини се во Србија - 0,36 евра и БиХ од 0,26 до 0,28 евра.

За мобилната телефонија не може да се направи слично разграничување на цените бидејќи мобилните оператори имаат различни пакети што им ги нудат на своите корисници.
Овде од CULLEN INTERNATIONAL направиле поделба според ниско, средно и големо користење на пакет на услуги. Во однос на нискиот пакет, Т-Мобиле е меѓу најевтините со 7,37 евра, а Космофон со 9,61 евро. Најевтиниот пакет во Албанија на Водафон чини 18 евра и е најскап од сите земји опфатени со овој извештај. За споредба, најевтиниот пакет на мобилна телефонија во земјите на ЕУ во просек чини 12,5 евра.

Извештајот на Цуллен Интернатионал го опфаќа прогресот на електронските комуникации што лани бил во Хрватска, БиХ, Србија, Црна Гора, Косово, Албанија, Македонија и Турција. Збирно гледано, пазарот во овие земји продолжил да покажува знаци на силен и позитивен раст и покрај економската криза. Прогнозите за 2009 година се помалку оптимистички како резултат на вкупното економско назадување, недостигот на извори за финансирање и намалените странски инвестиции што би можеле да предизвикаат негативни ефекти на растот на овој сектор. Сепак, Европската централна банка и ММФ, оценуваат дека вкупниот економски раст на овие земји ќе почне да се обновува веќе од наредната година и ќе биде повисок од оној во еврозоната.

Извор: (16.6.09). Фиксното "ало" во Македонија меѓу најевтините. Вечер.

Вечер: Загубата на фиксниот ја компензира мобилниот оператор

Т-Мобиле Македонија лани работела подобро од својата компанија-мајка Македонски телеком. Мобилниот оператор во 2008 година остварил добивка пред оданочување од 93,5 милиони евра, а фиксниот од 64,7 милиони евра. Според податоците, што ги објави Маѓар телеком, Т-Мобиле лани ја зголемил добивката за 8,5 милиони евра во споредба со 2007 година, додека Македонски телеком имал полош резултат од претходната година за 9,3 милиони евра. Двете компании лани заработиле вкупно 158,2 милиони евра.
Финансискиот извештај на Маѓар телеком објавен вчера на нивната веб страница покажува дека нивниот фиксен оператор во Македонија во 2008 година остварил вкупни приходи од 159,7 милиони евра, а мобилниот - од 178 милиони евра.
Фиксниот оператор ги губи и претплатниците. Само за една година има одлевање на 34.361 корисник. Бројките покажуваат дека на крајот на 2007 година Македонски телеком имала 492.376 претплатници, а минатата година 458.015 корисници. На опаѓањето на приходите на Телеком влијаеле и намалениот број на минути во разговори за 17 проценти и ниските цени.Единствено добри резултати Македонски телеком покажува во Интернетот. Има зголемување на бројот на АДСЛ корисниците дури за 105 проценти. Ако пред две години бројката на претплатници за АДСЛ била 48.214, до 31 декември 2008 година таа изнесувала 98.866 корисници. На приходите влијаела и продажбата на повеќе АДСЛ модеми, персонални компјутери и ТВ сетови.
Мобилниот оператор и натаму бележи добри резултати иако работи во конкурентна средина, покрај Космофон и ВИП. Претплатничката база на Т-Мобиле пораснала за 13,7 проценти достигнувајќи 1.379.191 корисници на крајот на 2008 година, од кои 26,2 отсто биле пост-пеид претплатници. Космофон и ВИП лани и го намалиле делот од пазарниот удел на Т-Мобиле. Ако во 2007 година Т-Мобиле имала 62,3 проценти од вкупните мобилни корисници во земјава, лани тој процент опаднал на само 59,4.
И во годинешниот извештај акцент е ставен на истрагата што ја води американската консултантска куќа White and Case за утврдената проневера на 6,7 милиони евра од страна на поранешни директори на Македонски телеком кои, од 2004 до 2006 година склучувале фиктивни договори за консултантски услуги со кипарската фирма Chaptex Limited. Во извештајот се наведува дека македонското МВР исто така врши истрага за случајот, но не сакаат да прејудицираат кога таа ќе заврши. Сепак, од Маѓар телеком истакнуваат дека надлежните македонски владини органи можат да побараат криминални или цивилни санкции, вклучувајќи и финансиски пенали против унгарската компанија или кон Македонски телеком, но и дополнителни промени во бизнис плановите.

Извор: (25.2.2009). Загубата на фиксниот ја компензира мобилниот оператор. Вечер.

Дневник: „Т-хоум“ ќе инвестира 90 милиони евра

Македонски телеком во следните три години ќе инвестира над 90 милиони евра. Инвестициите во најголем дел ќе бидат за реализација на проектот „оптички кабел до секој дом“, за надградба на мрежата и за телекомуникациска опрема, изјави Николај Бејкерс, главен извршен директор на компанијата.

Според Бејкерс, инвестиции со приближно ист износ може да се очекуваат и од фирмата ќерка, „Т-мобиле Македонија“, но одлуката уште не е поминатата низ компаниските процедури.„Дојче телеком“ веќе доставил предлог до Владата за поделба на дивиденда од ланскиот профит. Според Бејкерс, одлуката за висината на дивидендата се очекува да биде донесена со едногласен договор со сите акционери.

Извор: (13.2.09). „Т-хоум“ ќе инвестира 90 милиони евра. Дневник.

Вест: "Вип" нема податоци за корисниците

"Вип оператор" изминатиов месец во повеќе кафулиња на гостите им делеше припејд СИМ картички со ваучер за разговор преку неговата мрежа без да побара лични податоци од лицето што ја зело картичката, иако законската регулатива ги обврзува мобилните оператори да водат евиденција за сите корисници. Од Агенцијата за електронски комуникации велат дека сите оператори мораат да имаат податоци за корисниците, независно дали за разговор плаќаат однапред со припејд ваучер или следниот месец со фактура. "Во Правилникот за општи видови и услуги стои дека операторот мора да води евиденција за своите претплатници, нивните адреси и кориснички броеви, и операторите треба да работат согласно оваа обврска. Кај операторите се врши инспекциски надзор и ако има жалби од корисници постапуваме по нив", објаснуваат од Агенцијата.Од "Вип оператор" одговараат дека не знаат оти во промотивната акција не биле запишувани лични податоци за новите корисници. Даниела Начевска - Стојчевска од "Вип оператор" објаснува дека СИМ картичките ги делат преку надворешни агенции на кои им дале и формулари кои граѓаните требало да ги пополнат пред да ја добијат СИМ картичката. "'Вип оператор' работи целосно во согласност со важечката регулатива во Република Македонија. Во однос на промотивната акција која траеше една седмица, за да добијат можност да ги тестираат услугите на 'Вип' и најновата припејд промоција, заинтересираните граѓани требаше да ги остават своите податоци", објаснува Даниела Начевска - Стојчевска од "Вип оператор".

Извор: (16.1.09). "Вип" нема податоци за корисниците. Вест.

Утрински: Мобилното „ало“ на „Космофон“ пак најевтино за административците

„Космофон“ даде најевтина понуда за разговор меѓу административците во наредните две години. Сепак, допрва ќе се прави евалуација, а одлуката кој ќе биде избран за опслужување на државната администрација со мобилни разговори ќе се знае по Нова година. „Мобилниот оператор ’Космофон‘, по одредени ставки, достави најниска цена на тендерот за избор на оператор преку кој во наредните две години ќе разговара државната администрација, но допрва ќе се врши евалуација и по други критериуми“, изјави Слободан Буковски, претседател на Комисијата што ја спроведува набавката, по отворањето на понудите на тендерот, распишан од Службата за заеднички и општи работи на Владата. Покрај „Космофон“, понуди имаат доставено и „Т- мобиле“ и ВИП. Според Буковски, сите три мобилни оператори доставиле валидни понуди, а отворањето поминало без никакви проблеми. „Официјалната одлука за победникот на тендерот ќе се знае во првите денови по Нова година, до кога ќе бидат комплетно евалуирани понудите. Главниот критериум во евалуацијата ќе биде цената што ја нудат операторите според три критериуми, во национален сообраќај, во роаминг и во меѓународен сообраќај“, информира Буковски.Тој нагласи дека победникот на тендерот ќе опслужува разговор за 3.300 броеви во Владата и другите органи од државната управа. Горан Андревски, директор на правна регулатива во „Космофон“, изјави дека неговата компанија повторно дала најдобра понуда за услуги во мобилната телефонија за Службата за заеднички и општи работи на Владата. „Очекуваме во наредните две години, како и досега, да останеме провајдер за услуги на Владата. ’Космофон‘ уште еднаш се докажа како технолошки лидер во мобилната технологија и очекуваме така да остане“, изјави Андревски. Победник на минатогодишниот тендер беше „Космофон“, кој тогаш понуди најевтин телефонски импулс.

Извор: (30.12.08). „Космофон“ пак најевтино за административците. Утрински Весник.

Утрински: Телеком Словенија сака да го купи Космофон

Словенечки „Телеком“ соопшти дека сака да го купи вториот оператор за мобилна телефонија во Македонија „Космофон“. „Сега сме концентрирани на најавената продажба на вториот мобилен оператор во Македонија“, се наведува во соопштение на „Телеком Словенија“.„Космофон“, кој е сопственост на грчки ОТЕ, се очекува да биде продаден во февруари или во март идната година поради заштита на конкуренцијата откако „Дојче телеком“ купи 25 отсто од ОТЕ“, рече портпаролката на словенечки „Телеком“, Даринка Павлишиќ-Камиен.Словенечки „Телеком“ преговара со банките за обезбедување 400 милиони евра заем наменет за планираните преземања во регионот на поранешна Југославија.„Телеком Словенија“, покрај за „Космофон“, заинтересиран е и за купување на најголемиот босански телеком-оператор „БХ телеком“ и бара можност за инвестирање и во Хрватска. „Телеком Словенија“ е најголем фиксен, мобилен и Интернет-оператор во Словенија, со пазарна капитализација од 951,4 милиони евра.

Извор: (25.11.08). Телеком Словенија сака да го купи Космофон. Утрински Весник.

Вечер: Донесовме конкуренција во мобилната, а сега и во фиксната телефонија

ПЕТРОС ЛЕФКОВИЦ, ГЕНЕРАЛЕН ИЗВРШЕН ДИРЕКТОР НА КОСМОФОН

Донесовме конкуренција во мобилната, а сега и во фиксната телефонија

Можеме да им понудиме на нашите корисници сеопфатни решенија што ги покриваат и најсофистицираните комуникациски потреби, не само во фиксната и мобилната телефонија, туку и интегрирани решенија во сферата на интернет, 3-Г и безжична комуникација, вели Лефковиц

Работиме со полна пареа со цел да ги финализираме сите неопходни работи и во следните неколку недели да ги воведеме услугите 3-Г и WiMax. И двете технологии ќе им овозможат на нашите корисници влез во еден нов свет на телекомуникации, полн со можности и придобивки. Ова го тврди генералниот извршен директор на Космофон, Петрос Лефковиц со кого поразговаравме за овие тековни и амбициозни проекти, со кои очекува неговата компанија да ја зацврсти позицијата на технолошки лидер во земјата.

Во текот на последните пет години, Космофон успешно се позиционираше на домашниот пазар на мобилна телефонија. Колку сте задоволни со постигнатото, имајќи предвид дека работите со конкуренција во текот на целиот овој период?
Работењето во конкурентна средина не е ништо ново за нас. Како дел од семејството на Космоте, кое е присутно на пет пазари во Југоисточна Европа, знаеме што значи вистинска конкуренција. Всушност, ние ја донесовме конкуренцијата во мобилната телефонија во земјата. Исто така, ние сега воведуваме вистинска конкуренција и во фиксната телефонија. Се разбира, конкуренцијата мора да биде фер, транспарентна и да важат исти правила за сите пазарни субјекти. Ако постојат вакви услови, корисниците се тие кои имаат најголема корист, што е секогаш наш прв приоритет. Имаме одлични производи и услуги, воведовме нови технологии, најсовремена мрежа, имаме високо квалитетен и исклучително посветен персонал. Поради сите овие аспекти, ние сме силни и конкурентни на пазарот, со што ја стекнавме довербата на над 620.000 корисници.

Што се однесува до нашите резултати, тие зборуваат сами за себе. За само пет години постоење на пазарот, Космофон ја прошири својата телекомуникациска мрежа која во моментов покрива 99,8 проценти од населението низ целата земја, нуди широко портфолио на конкурентни производи и квалитетни услуги, истовремено развивајќи силна малопродажна мрежа од 218 продавници и околу 5.500 продажни места низ целата земја. Преку партнерството Космоте - Германос, се создаде значајна основа за придобивање на нови корисници. Ова се исклучителни резултати и достигнувања. Во Космофон сме навистина горди на тоа и мотивирани да постигнеме уште повеќе.

Минатата година беше многу успешна за Космофон. Го добивте тендерот за обезбедување телекомуникациски услуги на државната администрација; добивте 3-Г и WiMax лиценци и влеговте во фиксната телефонија. Кажете ни нешто повеќе за ова.
Последните 12 месеца беа многу важни за нас. Го добивме тендерот за обезбедување телекомуникациски услуги на Владата, добивме 3-Г и WiMax лиценци како резултат на тоа што имавме најдобри понуди. Влеговме во фиксната телефонија и понудивме конкурентни, технолошки напредни и едноставни решенија, со големи придобивки за корисниците.

Што се однесува до 3-Г и WiMax, работиме со полна пареа со цел да ги финализираме сите неопходни работи и да ги воведеме услугите во следните неколку недели. И двете технологии ќе им овозможат на нашите корисници влез во еден нов свет на телекомуникации, полн со можности и придобивки.

Со сите овие тековни и амбициозни проекти, Космофон ја зацврсти својата позиција на технолошки лидер во земјата, нудејќи најдобри и најконкурентни, технолошки напредни решенија по мерка, дури и на најпребирливите корисници. Со нашето широко и сеопфатно портфолио, кое покрај мобилните услуги вклучува и фиксна телефонија, 3-Г и WiMax, ние сме единствениот оператор кој може да понуди комплетно комуникациско решение на пазарот.

Кажете ни поконкретно, како може мобилен оператор да нуди фиксна телефонија?
Не е необично некоја компанија да го прошири своето портфолио и да влезе во друга бизнис сфера. Во нашиот случај, станува збор за телекомуникациска компанија која влегува во друг сектор на пазарот. Нашата фиксна телефонија ALLO се заснова врз ГСМ технологија, а се реализира преку најсовремена телекомуникациска мрежа која покрива над 99,8 проценти од населението низ целата земја. Фиксна телефонија преку ГСМ значи дека нема потреба од инсталирање на кабли, со што на корисниците им се заштедува време и пари. На овој начин, фиксната телефонија сега е лесна за користење и достапна за сите, дури и во најоддалечените области на земјата, исто како и мобилната телефонија.
Зошто корисниците би избрале мобилен наместо фиксен оператор за услуги на фиксната телефонија? Кои се причините за успехот на мобилните оператори низ цела Европа?
Мобилните оператори се повеќе се претвораат во место каде корисниците можат да ги покријат сите свои комуникациски потреби. На пример, Космофон влезе во фиксната телефонија и наскоро ќе воведе 3-Г и WiMax. Во тоа е нашата најголема моќ: ние можеме да им понудиме на нашите корисници сеопфатни решенија што ги покриваат и најсофистицираните комуникациски потреби, не само во сферата на фиксната и мобилната телефонија, туку и интегрирани решенија во сферата на интернет, 3-Г и безжична комуникација. Корисниците знаат дека какви и да се нивните комуникациски потреби, ние ќе им ја овозможиме вистинската услуга по вистинска цена. Ова создава многу важна конкурентна предност за нас и за сите оператори што го прошириле своето портфолио.

Станува се појасно дека Deutsche Telekom влегува во ОТЕ, со што тие стануваат сопственици и на Космофон. Во тој случај, Deutsche Telekom ќе ги поседува двата најголеми и најмоќни оператори во земјата, Т-Мобиле и Космофон, кои заедно држат 90 проценти од пазарот. Домашната регулатива предвидува дека секое групирање што надминува 40 проценти од клиентите и услугите на пазарот е предуслов за постоење на монопол. Се шпекулираше и дека Космофон ќе се затвора или ќе работи само како WiMax оператор. Што се случува со Космофон во вакви околности?
Да, ги слушнав тие шпекулации. Космофон категорично ги негираше како неосновани, а и јас самиот неколку пати го сторив истото. Неодамна и претседателот и извршен директор на ОТЕ и Космоте, г. Панагис Вурлумис ги карактеризираше тие шпекулации за Космофон како "неодговорни новинарски информации" и јасно ги негираше сите шпекулации за затворање на компанијата. Јас само уште еднаш ќе го повторам она што веќе е кажано: Космофон продолжува да работи, инвестира и расте. Ние имплементиравме и се уште работиме на бројни големи и амбициозни проекти, инвестиравме повеќе од 200 милиони евра во земјата и не постои бизнис логика која би го оправдала затворањето на компанијата.

Работите во Космофон веќе половина година. Кое е вашето мислење за потенцијалот на вашите вработени?
Јас сум многу горд на нашите вработени. Тоа се млади, динамични и предани луѓе кои ја извршуваат својата работа со висок професионализам, фокусирајќи ги својот ентузијазам и енергија кон остварување на компаниската визија и цели. Квалитетот и преданоста на вработените на Космофон ми беа познати и пред да станам генерален директор на компанијата. Сепак, навистина е убаво и инспирира фактот што моите очекувања се надминати. Пред нас е реализација на уште многу планови и јас навистина се потпирам на нивната преданост и професионализам во остварувањето на заедничките цели.

Сте биле на водечка позиција во многу познати компании, вклучувајќи и компании од телекомуникацискиот сектор. Како го гледате телекомуникацискиот пазар во регионот во следните пет до десет години?
Тоа е навистина долг период за еден динамичен пазар како што е телекомуникацискиот, каде работите се менуваат секојдневно. Иновации во технологијата се случуваат секој момент, а и на пазарот се случуваат пресврти многу често. Сведоци сме на консолидација на западните пазари веќе подолго време, а тој тренд сега стигнува и во Југоисточна Европа. Од друга страна, пак, очекувам дека многубројните технолошки иновации ќе станат секојдневие за потрошувачите на овие простори, како што се: т.н. Triple Play пакети (интернет, ТВ и телефонија), проширување на интерактивните услуги, како и поширока примена на м(мобилна)трговија, м(мобилно)плаќање итн, се разбира, доколку во тоа се вклучат и другите засегнати институции, како на пример банките. Тоа значи дека за еволуцијата ќе придонесуваат и другите индустрии, а не само мобилните оператори. Телекомуникацискиот пазар е и ќе остане многу возбудлив и интересен, ќе продолжи да носи бројни технолошки напредни производи и услуги што ќе ја олеснуваат нашата комуникација, ќе ни овозможуваат повеќе избор и извори за забава, образование и информации. Искрено, ме радува што сум дел од сето тоа.

Извор: Светлана Блажевска. (14.7.2008). Донесовме конкуренција во мобилната, а сега и во фиксната телефонија. Вечер.

Утрински: Огромна побарувачка за фиксни линии од „Космофон“

Ден по објавата за лансирање услуги во фиксната телефонија под брендот АЛЛО, во „Космофон“ пристигнале над 1.000 барања за приклучок. Ова го изјави генералниот извршен директор Петрос Лефковиц во своето обраќање до претставниците на медиумите за време на забавата по повод пет години комерцијално работење на компанијата.

Според Лефковиц, ова е само дел од амбициозните планови на компанијата, кои се планирани за блиска иднина. Имено, во најскоро време се очекува "Космофон" да лансира и услуги на 3Г и вајмакс-технологиите, кои на корисниците ќе им донесат неограничени можности за комуникација. 

Извор: (21.6.08). Огромна побарувачка за фиксни линии од „Космофон“. Утрински Весник.

Вест: Космофон станува дел од Дојче телеком

"Дојче телеком" уште не ја информирал Комисијата за заштита на конкуренцијата за неговите планови со "Космофон", откако вчера грчкиот Парламент ја одобри продажбата на дел од телекомуникационата компанија ОТЕ на германската компанија. ОТЕ, преку грчкиот мобилен оператор "Космоте", е сопственик на "Космофон", кој на домашниот пазар понуди и услуги во фиксната телефонија. Согласно акционерскиот договор, "Дојче телеком" во ОТЕ ќе поседува 25 отсто, колку што има и грчката Влада, но ќе го преземе и управувањето со компанијата, со што се создаваат услови германскиот оператор да си го врати монополот во телефонијата во Македонија.
Од "Дојче телеком" вчера информираа дека договорот допрва треба да добие одобрување од надлежните антимонополски институции, меѓу кои се Комисијата на Европската унија и надлежните регулатори во Атина и Македонија.
"Очекуваме трансакцијата да заврши во втората половина од годинава. ' Дојче телеком' е целосно свесен за потенцијалното влијание на трансакцијата врз конкурентноста на македонскиот телекомуникациски пазар. Ние комунициравме со Комисијата за заштита на конкуренцијата уште во почетната фаза, со цел да ја потенцираме нашата подготвеност да соработуваме со надлежните институции", изјави Ана Бисхоф од "Дојче телеком". 
Претседателот на Комисијата за заштита на конкуренцијата Чедомир Краљевски објаснува дека по вклучувањето на "Космофон" на пазарот со фиксна телефонија, дополнително се концентрира моќ кај "Дојче телеком", кој управува со доминантниот "Македонски телеком" и најголемиот мобилен оператор "Т-Мобиле Македонија". 
"Во моментот кога 'Дојче телеком' ќе го преземе управувањето со грчки ОТЕ настанува и обврската да не информираат за концентрацијата на моќ на домашниот пазар", изјави вчера Краљевски.

Извор: Т.Ј. (20.6.2008). Космофон станува дел од Дојче телеком. Вест

Утрински: Фиксно „ало“ од вчера и преку „Космофон“

Мобилниот оператор „Космофон“ вчера го најави стартот на фиксната телефонија АЛЛО со понуда за корисниците и во постпејд и во при-пејд. Корисниците имаат можност да одберат уред за фиксна линија со кој ќе го поврзат својот постоен телефон или да одберат целосно решение, односно телефон со вграден уред за фиксна линија. Користењето на уредите во промотивниот период е бесплатно со склучување договор од 24 месеци. „Космофон“ ги нуди услугите во фиксната телефонија преку својата ГСМ-мрежа низ целата земја, со што моментно покрива 99,8 проценти од населението.

Во постпејд „Космофон“ нуди три тарифни модели, „АЛЛО 199“ со месечна претплата од 199 денари и 0,99 денари минута кон фиксната телефонија, „АЛЛО 299“ со месечна претплата од 299 денари, која вклучува 100 бесплатни минути кон сите национални фиксни мрежи и „АЛЛО 599“ со месечна претплата од 599 денари, која вклучува 600 бесплатни минути кон сите национални фиксни мрежи. Сите нови постпејд-корисници на АЛЛО што ќе се активираат во промотивниот период до 31 август добиваат и 1.000 бесплатни минути за разговор кон сите корисници на АЛЛО, кои треба да ги искористат во рок од три месеци од денот на активација, и три месеци без месечна претплата.

Во при-пејд сегментот, АЛЛО го нуди тарифниот модел „АЛЛО при-пејд“, кој овозможува фиксна линија без месечна претплата и без договор, како и достапност во период од 12 месеци без дополнување на сметката и 100 денари бесплатни разговори кон сите мрежи при активација на фиксната линија. Сите нови корисници на тарифниот модел „АЛЛО при-пејд“ активирани во промотивниот период до 31 август добиваат дополнителни 1.000 бесплатни минути кон сите броеви на АЛЛО, кои треба да ги искористат во рок од три месеци од денот на активација.

„Со воведувањето фиксни телефонски услуги, ’Космофон‘ уште еднаш го одржува своето ветување кон корисниците за конкурентна, едноставна и достапна комуникација за сите“, истакнува главниот извршен директор Петрос Лефковиц. 

Влезот на „Космофон“ во фиксната телефонија се случува во сенка на преземањето на ОТЕ од страна на „Дојче телеком“ и очекувањето што ќе се случи со „Космофон“ со оглед на тоа дека на тој начин се создава монопол на нашиот пазар. Во знак на револт, вработените во грчката ОТЕ вчера повторно стапија во штрајк поради најавениот договор на грчката држава со германски „Дојче телеком“. Вработените најавија одржување протестен митинг пред грчкиот парламент, каде што пратениците вчера требаше да го ратификуваат договорот за стратегиско партнерство на државата со „Дојче телеком“. Аналитичарите очекуваат дека договорот ќе го добие потребното минимално мнозинство пратеници. Двата оператора се присутни и на македонскиот пазар за мобилна телефонија преку „Космофон“ и „Т-мобиле“. 

Извршниот директор на „Македонски телеком“, Николај Бејкерс, смета дека прашањето за создавање монопол ги засега „Дојче телеком“ и ОТЕ и моментно тоа не влијае на „Македонски телеком“, кој е сопственост на „Маѓар телеком“, односно „Дојче телеком“.

Извор: (19.6.08). Фиксно „ало“ од вчера и преку „Космофон“. Утрински Весник.

Утрински: „Космофон“ демантира дека ќе биде затворен

Мобилниот оператор „Космофон“ ги отфрли како целосно неосновани најавите дека ќе биде затворен, со цел да се избегне монополот во Македонија. Реакцијата на компанијата следува по објавените информации во грчките медиуми дека грчки ОТЕ ќе го затвори „Космофон“ за да не им наштети на интересите на „Дојче телеком“, кој со преземањето на ОТЕ во Македонија станува сопственик на двата оператора - на „Т-мобиле“ и на „Космофон“, кои поседуваат околу 90 отсто од пазарот на мобилна телефонија во земјата. 

„’Космофон‘ е значајна, мултимилионска инвестиција за групацијата ’Космоте‘ и ќе продолжи да ги исполнува своите планови со цел да ја максимизира својата вредност и потенцијал на пазарот. Целосно сме предадени во остварувањето на обврските спрема нашите акционери, нашите вработени и, пред се', спрема нашите корисници кои ја покажуваат својата доверба во ’Космофон‘“, се вели во соопштението од компанијата. 

Од „Космофон“ сметаат дека засега не може да стане збор за негово затворање или за прецизирање на која било поинаква судбина од сегашната, бидејќи договорот меѓу грчката влада и „Дојче телеком“ за преземање на ОТЕ се' уште не е ратификуван во парламентот на Грција. Од компанијата најавуваат дека продолжуваат со реализација на бизнис-планот. Инаку, досега се одолжуваше почетокот на расправата за ратификацијата на спогодбата меѓу грчката влада и „Дојче телеком“ околу продажба на грчки ОТЕ, а според грчките медиуми, таа треба да почне неделава.

Од Комисијата за заштита на конкуренцијата информираат дека до нив се' уште не е стигнато никакво известување од „Дојче телеком“, кое евентуално би дало насока каква би била судбината на вториот мобилен оператор во земјава, поточно дали тој ќе се затвора, дали ќе се продава или ќе продолжи да работи, што би создало концентрација на моќ и би создало монопол. Според пишувањата на грчки „Та неа“, најавата за затворање на „Космофон“ е поради намерата на ОТЕ да ја прекине работата на мобилните оператори во Македонија и во Црна Гора, бидејќи во овие држави „Дојче телеком“ е застапен со брендот „Т-мобиле“.

Според упатените, судбината на „Космофон“ целосно е во рацете на новиот сопственик „Дојче телеком“, кој има два избора - да го продаде мобилниот оператор или да го затвори. Како и да е, и двата избора ќе бидат со последици. Продажбата ќе значи внесување здрава конкуренција на пазарот на мобилната телефонија, што не му одговара на „Дојче телеком“, додека затворањето ќе значи крај на профитабилниот бизнис во кој се вртат десетици милиони евра годишно. Можеби најлогичен потег би било „Космофон“ да влезе на пазарот на фиксната телефонија, за што имаше најава, но и во тој случај ќе има монопол на пазарот, бидејќи „Космофон“ е во сопственост на „Дојче телеком“, кој, пак, е присутен на пазарот на фиксната телефонија преку „Т-хоум“.

Извор: Александрија Стевковска. (10.6.08). „Космофон“ демантира дека ќе биде затворен. Утрински Весник.

Вечер: Speak up weekend - 3,9 денари за минута

Космофон воведе нова при пејд понуда за млади во рамките на брендот Speak up. Станува збор за нов тарифен модел Speak up weekend, кој освен за младата популација е наменет и за сите оние кои сакаат да ги искористат предностите што ги нуди, а тие овозможуваат разговори за само 3,9 денари за минута и СМС-пораки за 1,9 денари кон сите броеви од мрежата на Космофон за време на викендите. Кон другите мрежи, вечерната тарифа е 5,9 денари за минута и СМС пораки за 2,9 денари. ММС пораките се само 9 денари.

Извор: (23.4.08). Speak up weekend - 3,9 денари за минута. Вечер.

Вечер: Разговори за еден денар минута

Новите припејд корисници на Вип, нови постпејд претплатници на Вип постпејд флат пакетите, како и постојните припејд корисници кои ќе ја надополнат својата сметка за 300 или повеќе денари, ќе можат до крајот на јули годинава да зборуваат за само 1 денар минута (1,18 денари со ДДВ) во Вип мрежата.
Истото важи и за сите корисници кои до крајот на јуни ќе склучат нов постпејд договор од тарифните модели Флат 200, 400, 800 или 1500. Тие ќе можат да разговараат со сите корисници во Вип мрежата за еден денар за минута, со 0 денари за воспоставување на повик до крајот на август оваа година. Постојните постпејд корисници од Флат тарифните модели ќе треба да испратат СМС порака со текст "Промо" на специјалниот број 144 350, за месечна претплата од само 50 денари.
- Продолжуваме да ги наградуваме сите наши корисници со уште поповолни разговори со цел да им овозможиме повеќе можности за комуникација - - изјави Никола Љушев, извршен директор на Вип.

Извор: (23.4.08). Разговори за еден денар минута. Вечер.

Нова Македонија: Speak up weekend со намалена тарифа

Космофон го збогатува при пејд брендот Speak up weekend со нов тарифен модел, што може да се користи преку викендот. Оваа понуда е најприфатлива за младите. Предностите на Speak up weekend е намалената цена на импулсот, што значи минута разговор во саботите и неделите чини 3,9 денари и СМС пораки за 1.9 денари кон сите броеви на мрежата на Космофон. Вечерната тарифа од 5,9 денари за минута разговор и СМС пораки за 2,9 денари кон сите национални мрежи. ММС пораките чинат 9 денари.
Извор: (22.4.08). Speak up weekend со намалена тарифа. Нова Македонија.

Вечер: Македонското АЛО меѓу најевтините во регионот

Македонија се приближи до земјите од регионот со најевтини телефонски разговори преку мобилна мрежа. По влегувањето на македонскиот пазар на третиот мобилен оператор - ВИП, не само што се зголеми конкуренцијата и се подигна квалитетот, туку дојде до значително намалување на цените на телефонските разговори. Новите тарифи што сега ги нудат трите македонски оператори се значително пониски од некои земји во регионот. Операторите велат дека при формирањето на цените се водат од условите на пазарот и навиките на корисниците, но и за стандардот на граѓаните.

Анализата што ја направивме на мобилните пазари на сите поранешни југословенски републики (без Словенија), како и Грција, Бугарија, Романија, Унгарија и Австрија, впрочем во сите овие земји каде се присутни сопствениците на трите мобилни оператори во Македонија, покажа дека мобилната телефонија е еден од најдобрите примери како конкуренцијата може да влијае на цените на услугите. Според анализата, во Србија, Хрватска и Австрија имаат најниски при-пејд тарифи, додека Бугарите и Романците зборуваат најскапо во при-пејд. Македонија се наоѓа во средина со просечни телефонски разговори во при-пејд од 0,12 евра (7,3 денари) во својата мрежа и 0,15 евра (9,2 денари) кон другите оператори и кон фискната телефонија.

Во пост-пејд, Македонците разговараат уште поевтино. Најниската месечна претплата изнесува 250 денари, а една минута разговор во сопствената мрежа е околу 0,11 евра (6,75 денари/дење) и 0,05 евра (3 денари/ноќе). Најевтини пост-пејд разговори имаат Грците и Хрватите, а иста цена со нас имаат корисниците во Србија, БиХ и Црна Гора. Сепак, ние имаме предност бидејќи користиме и евтина ноќна тарифа, а имаме и иста цена на разговорите и кон другите мрежи во мобилната телефонија.

Иако цените на телефонските услуги на овие пазари секојдневно се намалуваат, експертите велат дека мобилната телефонија може да биде уште поевтина бидејќи има простор за давање на услуги по поволни цени. Ова поради фактот што мобилните оператори под притисок на конкуренцијата се присилени да ги намалат сопствените трошоци и на корисниците да им понудат нови содржини како Интернет, аудиовизуелни содржини и разни пакети на услуги по пониски цени. Оттука и фактот што цените во рамките на сопствената мрежа на мобилните оператори, како и на националните разговори забележуваат значително намалување.

Меѓународната компанија ИДЦ пред две години прогнозираше дека до 2010 година во Македонија ќе има најголем пораст на бројот на корисници на мобилна телефонија. Според податоците на мобилните оператори, во Македонија во моментов има околу 1,9 милиони претплатници и нешто над два милиони жители. За споредба, во соседна Србија која има 9 милиони жители, регистрирани се околу 8 милиони претплатници. Според студијата на ИДЦ, на крајот на 2008 година во регионот ќе има 14 милиони корисници, пенетрацијата ќе се зголеми на 69 проценти, а вкупната вредност на услугите во мобилната телефонија ќе надмине две милијарди долари.

Извор: (21.1.08). Македонското АЛО меѓу најевтините во регионот. Вечер.