Дневник: Стечајот е неприфатливо сценарио за МРТ

РЕАКЦИИ ПО НАЈАВЕНИТЕ МЕРКИ ОД ВЛАДАТА

Ние очекувавме решение со кое ќе ни се помогне, а не да се закопаат сите наши надежи велат во Синдикатот на МРТ

Вработените во Македонската радио-телевизија се во шок по најавата дека јавниот сервис ќе оди во стечај откако Собранието изгласа да се воведе таква законска можност.

Синдикатот на МРТ вчера попладне заседаваше за да изгради став за намерата на Владата преку стечајна постапка да се отпуштат сите вработени, а потоа да се изврши вработувања за нова државна радио-телевизија.Стечајот или ликвидација е тоа што најмалку го очекувавме дека ќе ни се случи. Ние очекувавме решение со кое ќе ни се помогне, а не да се закопаат сите наши надежи. Отпуштањето на сите вработени е најлошото нешто што можеше да ни се случи. Нашето основно барање беше да се обезбеди наплата на радиодифузната такса и вработените да се прераспределат според нова систематизација.

Кога ќе се реши тоа, ќе се види дека МРТ може да опстане како систем - изјавија вчера во Синдикатот на МРТ.Тие велат дека не се точни тврдењата на Владата оти постои превработеност во информативната куќа.

- Сега има 842 постојано вработени и околу 100 хонорарни соработници,кои произведуваат програма на девет јазици. Тоа е за половина помалку отколку што некогаш имало вработени. Кога ќе се направи реална систематизација, ќе се види дека, всушност, тука има помалку вработени отколку што е реално потребно. На една просечно голема телевизија за нормално работење и' се потребни околу 400 вработени, а ние сме државен јавен сервис. Стравуваме дека новите вработувања ќе се вршат по партиски линии - објаснуваат вработените.Владиниот портпарол Ивица Боцевски вчера немаше информации за тоа што во иднина ќе се случува со МРТ, чии загуби изнесуваат од 10 до 15 милиони евра. Во најголема мерка тие се однесуваат на долговите кон комуналните претпријатија. Со законската промена во иднина ќе може да се одвојуваат и буџетските пари за нејзиното финансирање, а месечната претплата ќе изнесува 130 денари. Последниве години износот на претплатата што ја плаќаа граѓаните постојано се намалуваше така што сега речиси никој не ја плаќа обврската. Недостапен за коментар беше и Тренчо Миленковски, новоизбраниот претседател на Управниот одбор на МРТ.

Извор: Б.Ѓ. (26.07.2008). Стечајот е неприфатливо сценарио за МРТ. Дневник.

Нова Македонија: Владата ќе бара отштета за проневерите во телекомот

Владата ќе поведе постапка за обесштетување поради финансиските малверзации во „Македонски телекомуникации“, со кои од касата на компанијата од 2004 до 2006 година биле проневерени околу 6,7 милиони евра. Правници велат дека Владата, која е сопственик на акционерски капитал во компанијата, има легитимно право да бара одговорност и обесштетување за финансиските проневери. Во телекомот немаат коментар за овој случај.
Ивица Боцевски, портпарол на Владата, вели дека дефинитивно ќе се поведе постапка.
- Апсолутно ќе поведеме постапка за обесштетување. Ќе ги следиме сите наоди од истрагата. Откако ќе има конечни наоди, ќе следува постапка - вели Ивица Боцевски, портпарол на Владата.
Борче Давитковски, професор на Правниот факултет и поранешен член на одборот на директори на телекомот, вели дека одлуките за вакви услуги никогаш не биле одобрувани од одборот. Тој додава дека во купопродажниот договор имало клаузула со која доминантните сопственици можеле извесна сума пари да ја трошат на консултантски услуги без претходно одобрување од одборот на директори. Давитковски вели дека државата има право да бара отштета од „Маџар телеком“.
- Во тоа време државата поседуваше речиси 49 отсто од капиталот во телекомот. Така што, како оштетен акционер има легитимно право во судска постапка да побара одговорност и финансиски средства како обесштетување - вели Давитковски.
Завчера „Маџар телеком“, мнозински акционер во телекомот, објави дека од „Македонски телекомуникации“ од 2004 до 2006 година незаконски се одлеале 6,7 милиони евра. Оттаму презентираа дел од извештајот на американската ревизорска куќа „Вајт и Кејс“, ангажирана да открие нерегуларности во работата на телекомот, во кој се вели дека има потврдени докази за незаконитост во формирањето и спроведувањето шест договори за советодавни и маркетинг-услуги, извештаи за работата на компанијата и лобирање во Македонија во периодот 2004-2006 година. Во извештајот се вели дека спорните договори биле склучени со консултантска компанија од Кипар. Финансиските малверзации во телекомот беа извршени кога прв човек на компанијата беше Атила Сендреи. Откако беа откриени незаконските исплати од касата на телекомот, на „Маџар телеком“, компанија што котира на берзата во Њујорк, и беше наложено да ја ангажира познатата ревизорска куќа од САД за детално да го испита случајот. Тогаш Атила Сендреи беше сменет и од функцијата, а според официјалната верзија тој се повлече од здравствени причини. Според неофицијалните податоци, токму со одобрување од Сендреи во неколку наврати на сметката на кипарската „Чаптекс холдинг лимитед“ биле префрлани суми од по еден милион евра. Неколкуте договори со консултантската куќа биле потпишувани на оваа сума за да не се бара одобрување од одборот на директори. Се испитува дали телекомот воопшто добивал некакви услуги од оваа фирма. Истрагите за финансиските проневери во телекомот предизвикаа дополнителни штети, бидејќи „Маџар телеком“ не можеше навреме да ги подготви финансиските извештаи, поради што добиваше казни од надлежните институции. Во телекомот велат дека нема да го коментираат случајот, со оглед на тоа што истрагата ја води „Маџар телеком“ и се уште е во тек.

Извор: В.Н. (23.5.08). Владата ќе бара отштета за проневерите во телекомот. Нова Македонија.

Вест: Владата ќе прави нов универзитет за информатика

Владата ќе прави нов државен универзитет за информатички технологии. Новата институција се очекува да проработи најрано во 2009 или во 2010 година. Не се знае каде ќе биде лоциран новиот универзитет. Наставата ќе биде на англиски јазик, а половина од кадарот ќе биде од најреномираните универзитети од Европа и од САД. Останатите предавачи ќе бидат домашни експерти од оваа област.
"Формиран е иницијативен одбор со професори од Природно-математичкиот и од Електротехничкиот факултет, кој работи на елаборат за функционирањето на универзитетот. На неговите факултети и институти ќе бидат опфатени сите области на информатиката - од аспект на техниката и технологијата и на менаџментот", рече на вчерашната прес-конференција владиниот портпаролот Ивица Боцевски. Тој не кажа колку пари точно ќе бидат вложени, но "се работи за неколку милиони евра, обезбедени од Буџетот".
Боцевски рече дека отворањето на Универзитет нема да го загрози функционирањето на постојните факултети за информатика и оти Владата и натаму ќе инвестира во нив.
Извор: Р.Ф.(25.1.2008). Владата ќе прави нов универзитет за информатика. Вест

Нова Македонија: Реализирани 7,547 ваучери за компјутери

Владата информира дека досега се реализирани 7.547 ваучери за компјутери. Владиниот портпарол, Ивица Боцевски, напомена дека рокот за реализирање на ваучерите истекува и апелираше до студентите што поскоро да ги искористат ваучерите.
Ваучерите ги доделува Владата на сите студенти кои за прв пат запишале апсолвентска година и се во вредност од 200 евра.

Извор: (13.12.2007). Реализирани 7,547 ваучери за компјутери. Нова Македонија.

Дневник: Недостапен договорот за ЕСМ поставен на интернет

Граѓаните и стручната јавност вчера не можеа да го видат договорот за продажба на ЕСМ на австриската компанија ЕВН, иако Владата го постави на својата веб-страница. Документот не можеше да се отвори поради бавното симнување на податоците, а требаше и авторизација со корисничко име и лозинка.Најавата на Владата дека ќе го објави договорот предизвика силен потрес во односите со Австријците. Од централата на ЕВН во Виена велат дека според меѓународната пракса за објавување договор, треба согласност од двете страни. Владиниот портпарол Ивица Боцевски тврди дека во договорот нема одредба за обострана согласност за објавување.

- Во договорот пишува дека може да биде објавен една година по потпишувањето. Во знак на добра волја ја известивме ЕВН за објавата на интернет - вели тој.

Според Боцевски, клучно за интересот на граѓаните е да знаат според кои меѓународни практики продавачот треба да враќа пари, откако ќе продаде нешто.

Односите помеѓу Владата и ЕВН се влошија откако од кабинетот на Никола Груевски ги објавија измените на Законот за енергетиката, за кои Австријците имаа многу забелешки. Владата го зголеми притисокот со изјавата дека сака да ја откупи компанијата од ЕВН. Состојбата се вжешти до меѓудржавен спор по најавата од Владата дека јавно ќе го обелоденат купопродажбениот договор и дека Австријците ќе плаќаат пенали за неисполнетите инвестиции.

Неофицијално, нашата амбасадорка во Виена, Весна Борозан, била повикана во Министерството за надворешни работи на Австрија за да и' изразат протест за односот на македонските власти кон австрискиот инвеститор.

Во македонското МНР не добиле информација дека Виена протестирала во врска со компанијата ЕВН.

Извор: Марјан Блажевски (20.11.2007). Недостапен договорот за ЕСМ поставен на интернет. Дневник.

Нова Македонија: Со информатичко комуникациска технологија до транспарентно правосудство

Владата ја претстави Стратегијата за Информатичко комуникациска технологија во македонското правосудство. Со оваа Стратегијата чие имплементирање треба да заврши до 2010 година, Владата очекува граѓаните, општата и стручната јавност во Македонија да добијат силен и транспарентен увид во целиот правосуден систем, од кој мошне лесно ќе се мери ефикасноста, транспарентноста и евентуалната коруптивност. -Главна цел на ова Стратегија е можноста да се добие прозорец за работата на правосудниот систем за да може и лаикот, и обичниот граѓанин, но и медиумите, да ја следат работата на судовите, нивната ефикасност и брзината со која судат, па и во секој момент да се види колку предмети има кај еден судија и како тој работи, вели портпаролот на Владата Ивица Боцевски, образложувајќи ги главните сегменти од Стратегијата. Стратегијата се предвидува да биде имплементирана преку Управен комитет во кој ќе членуваат претставници на Министерството за правда и сите судови во Македонија, на Јавното Обвинителство, на Нотаријатот и на Адвокатската комора. Со Стратегијата правосудниот систем ќе добие подобрување на квалитетот на услугите на правосудните органи, намалување на должината на траење на постапките, постепено елиминирање на чувањето податоци на хартија и нивна замена со електронски форми на податоци, симплификација на комплексните судски процеси, поддршка во редизајнирањето на судските процеси, стандардизација на процедурите, процесите и номенклатурите на централно ниво. Исто така, ќе се добие и достапност на јавните информации, брз пристап до законодавството и судската пракса, реална интеграција на системот на информатичко комуникациска технологија во правосудниот систем, електронско унифицирано водење на статистика во правосудните институции, поефикасно водење со човековите и материјалните ресурси. Во оваа и наредната година, значи на краток рок, Владата се очекува да обезбеди кадри за работа во овој ИКТ систем во македонското правосудство, како и нивна перманентна обука, а планира да обезбеди и негова системска поддршка. Воедно се планира и набавка на хардверска опрема и надградба на софтверски апликации и нивно одржување, како и воведување Интернет во сите правосудни институции. До 2010 година Владата планира изградба на апликација за менаџирање на номенклатурите во правосудниот систем, реализацаија на проектот за правосудна мрежа и надградба на проектот за правна база на податоци, развој и имплементација на проектот за документ-менаџмент систем, развој на софтверска апликација на државниот правосуден инспекторат, на Министсрството за правда, на Судскиот совет, на јавните обвинителства, во казнено поправните установи.

Извор: (14.8.2007). Со информатичко комуникациска технологија до транспарентно правосудство. Нова Македонија.