Дневник: Компјутерите побрзи од струјата

Владата набавува нови 65 илјади компјутери за основните училишта во земјава, иако над 40 илјади од претходниот тендер се' уште не се инсталирани. Од Министерството за информатичко општество ни потврдија дека тендерот е во тек, како втора фаза од проектот на Владата „Компјутер за секое дете“. За нив не е спорно што над 40 проценти од претходно набавените 100 илјади компјутери, поради несоодветна инфраструктура, се' уште не се во функција, бидејќи, како што велат, тој проблем ќе го решеле најмногу за два месеца.

Во Министерството за информатичко општество не можеа да кажат колку државата ќе ја чини втората набавка на компјутерите, бидејќи прво мора да се видат понудите на заинтересираните фирми, кои треба да бидат доставени до 30 септември.

- Новите компјутери што ќе ги набавиме се наменети за основните училишта, со што целосно ќе биде заокружен проектот за компјутеризација на образованието. При првата набавка 55 илјади компјутери беа поставени во средните училишта, а другите 45 илјади требаше да бидат поставени во основното образование. Поради лошата електрична мрежа и недоразбирања со ЕВН тие компјутери уште не се инсталирани. Реализацијата е при крај и очекуваме тоа да се реши за најмногу два месеца - вели Антонио Атанасов од ресорното министерство.

Тој вели дека, иако компјутерите досега стоеле во магацин и е поминато повеќе од една година од нивната набавка, нивната вредност не е воопшто или многу малку е намалена, бидејќи тие многу лесно може да се надградат.

Неофицијалните процени се дека втората набавка ќе чини над 10 милиони евра, бидејќи при набавката на првите 100 илјади се потрошени 21 милион евра. Пратеничката група на ЛДП во петокот писмено побара од Владата да објасни зошто се прават вакви штети на државниот буџет и зошто „непромислено“ се трошат парите на граѓаните, кога изминатиов период се докажа дека овој проект на Владата доживеа целосно фијаско.

- Јавноста е добро запознаена со дебаклот што го доживеа проектот „Компјутер за секое дете“. За жал, голем дел од компјутерите фаќаат прашина и целосно се неупотребливи. Компјутери не само што не се користат, туку на децата им пречат бидејќи им зафаќаат голем дел од клупата. Зачудува што Владата продолжува со овој проект, иако самата признава дека голем дел од нив не се инсталирани. Исто така беше најавено дека учениците ќе користат електронски учебници, а од нив ништо нема. Колку и да не сакаме, останува сомнежот дека единствениот мотив е да се префрлаат државните пари во приватни џебови - вели Андреј Жерновски, потпретседател на ЛДП.

Од Министерството за информатичко општество велат дека со компјутеризацијата ќе бидат опфатени сите основни училишта во кои има настава од прво до осмо одделение. Без компјутери ќе останат училиштата во руралните средини, каде што се одржува настава само од прво до четврто одделение.

Проектот „Компјутер за секое дете“ од самиот почеток беше следен со проблеми и недоречености. Прво Владата ги набави компјутерите, па потоа увиде дека во училиштата нема ниту соодветна електрична инсталација, ниту просторни услови за нивно поставување. Потоа не се знаеше кој ќе биде одговорен за евентуалните штети, па имаше обид целата одговорност да падне врз децата и родителите.

Извор: (28.09.09). Компјутерите побрзи од струјата. Дневник.

Утрински: „Т-хоум“ го доби државното фиксно ало, „Космофон“ ќе се жали

Откако Владата ја избра понудата на „Т-хоум“ како најповолна на тендерот за фиксна телефонија за државната администрација, „Космофон“ излезе со став дека ќе ја обжали одлуката на Службата за општи и заеднички работи.

Компанијата „Космофон“, воедно, ќе поднесе и пријава против „Т-хоум“ до Комисијата за заштита на конкуренцијата за загрозување на конкурентноста со предаторските цени што се дадени на тендерот, а кои се под нивото на утврдените интерконекциски цени.

„Космофон“ ќе поднесе и пријава до Агенцијата за електронски комуникации. „Очекуваме надлежните органи да преземат соодветни мерки против ваквото монополско однесување на ’Т-хоум‘“, се вели во соопштението од компанијата.

Реакциите на „Космофон“ вчера веднаш ги отфрлија од избраната компанија „Т-хоум“ на тендерот за фиксна телефонија во државната администрација. „’Македонски телеком‘ ги отфрла реакциите наведени во соопштението на ’Космофон‘ дека цените се под нивото на утврдените интерконекциски цени. ’Македонски телеком‘ смета дека поднесената понуда на тендерот не е предаторска и со неа воопшто не се истиснуваат алтернативните оператори од пазарот на фиксни говорни телефонски услуги“, се вели во соопштението на „Македонски телеком“.

Во него се наведува дека понудената цена била во согласност со бараните критериуми во тендерот што го распиша Владата и се во согласност со обврските кои „Македонски телеком“ ги има како оператор со значителна моќ на пазарот за фиксни говорни телефонски услуги, а кои произлегуваат од одредбите од Законот за електронски комуникации и одредбите од Законот за заштита на конкуренцијата.

Извор: (25.08.2009). „Т-хоум“ го доби државното фиксно ало, „Космофон“ ќе се жали. Утрински весник.

Утрински: Ваучери од 15.500 денари за компјутери на апсолвентите

Владата и Министерството за информатичко општество одлучија да спроведат програма за доделување вредносни ваучери како директна субвенција при купување компјутери. Министерот за информатичко општество, Иво Ивановски, информира дека сите студенти кои најдоцна до 15 ноември ќе запишат четврта година на универзитетите во земјава ќе добијат од Владата вредносни ваучери од 15.500 денари наменети за купување компјутер. Ваучерите се наменети за редовните студенти кои првпат во последна студиска година ќе се запишат во учебната 2008/2009 година.

Извор: Ек.Р. (16.10.2008). Ваучери од 15.500 денари за компјутери на апсолвентите. Утрински весник.

Дневник: Метаморфозис бара учебници на интернет

Фондацијата за одржливи информатички решенија „Метаморфозис“ бара Владата да обезбеди на интернет бесплатен пристап до учебници и други образовни содржини. Тие истакнуваат дека новиот Закон за учебниците за основно и средно образование, со кој се предвидува државата да ги откупува авторските права на учебниците, е одлична основа изданијата да бидат достапни бесплатно на интернет.

Во отвореното писмо до Владата се вели дека пристап до овие содржини ќе имаат сите граѓани на Македонија, кои како даночни обврзници веќе платиле за нив.

Извор: Дневник. (15.10.2008). Метаморфозис бара учебници на интернет.

Дневник: Стечајот е неприфатливо сценарио за МРТ

РЕАКЦИИ ПО НАЈАВЕНИТЕ МЕРКИ ОД ВЛАДАТА

Ние очекувавме решение со кое ќе ни се помогне, а не да се закопаат сите наши надежи велат во Синдикатот на МРТ

Вработените во Македонската радио-телевизија се во шок по најавата дека јавниот сервис ќе оди во стечај откако Собранието изгласа да се воведе таква законска можност.

Синдикатот на МРТ вчера попладне заседаваше за да изгради став за намерата на Владата преку стечајна постапка да се отпуштат сите вработени, а потоа да се изврши вработувања за нова државна радио-телевизија.Стечајот или ликвидација е тоа што најмалку го очекувавме дека ќе ни се случи. Ние очекувавме решение со кое ќе ни се помогне, а не да се закопаат сите наши надежи. Отпуштањето на сите вработени е најлошото нешто што можеше да ни се случи. Нашето основно барање беше да се обезбеди наплата на радиодифузната такса и вработените да се прераспределат според нова систематизација.

Кога ќе се реши тоа, ќе се види дека МРТ може да опстане како систем - изјавија вчера во Синдикатот на МРТ.Тие велат дека не се точни тврдењата на Владата оти постои превработеност во информативната куќа.

- Сега има 842 постојано вработени и околу 100 хонорарни соработници,кои произведуваат програма на девет јазици. Тоа е за половина помалку отколку што некогаш имало вработени. Кога ќе се направи реална систематизација, ќе се види дека, всушност, тука има помалку вработени отколку што е реално потребно. На една просечно голема телевизија за нормално работење и' се потребни околу 400 вработени, а ние сме државен јавен сервис. Стравуваме дека новите вработувања ќе се вршат по партиски линии - објаснуваат вработените.Владиниот портпарол Ивица Боцевски вчера немаше информации за тоа што во иднина ќе се случува со МРТ, чии загуби изнесуваат од 10 до 15 милиони евра. Во најголема мерка тие се однесуваат на долговите кон комуналните претпријатија. Со законската промена во иднина ќе може да се одвојуваат и буџетските пари за нејзиното финансирање, а месечната претплата ќе изнесува 130 денари. Последниве години износот на претплатата што ја плаќаа граѓаните постојано се намалуваше така што сега речиси никој не ја плаќа обврската. Недостапен за коментар беше и Тренчо Миленковски, новоизбраниот претседател на Управниот одбор на МРТ.

Извор: Б.Ѓ. (26.07.2008). Стечајот е неприфатливо сценарио за МРТ. Дневник.

Утрински: Владата „победи“, ќе ќари 61 милион евра од „Телеком“

Дивидендата беше причина за прекин на седницата на две акционерски собранија

Владата ќе добие околу 61 милион евра од дивидендата на „Македонски телекомуникации“ за 2006 и 2007 година, одлучи Бордот на директори на компанијата. Дивидендата беше причина за прекин на седницата на две акционерски собранија, бидејќи Владата првично, како втор најголем акционер во „Телеком“, бараше 61 милион евра, со образложение дека компанијата го нема реализирано инвестицискиот план, а „Телеком“ нудеше исплата на половина дивиденда.

Во меѓувреме, Владата веќе ја испланира исплатата на целиот износ на дивидендата, за што сведочи и ребалансот на Буџетот, во чија ставка за прилив на средства за реализација на планираните расходи беше и дивидендата од „Телеком“. Бордот на директори, конечно, попушти под владините притисоци и завчеравечер даде зелено светло за целосна исплата на дивидендата за изминатите две години. Се очекува парите да „легнат“ на државна сметка на крајот на септември.

Главниот извршен директор на „Македонски телеком“, Николај Бејкерс, потенцира дека имало интензивна дискусија меѓу акционерите и оти првичното разбирање, односно желба на акционерите на „Телеком“ била да биде финансиски оправдана дивидендата, односно да се остават средства и за вложување, бидејќи компанијата планира да има големи инвестиции во иднина.

„По преговори со Владата, „Маѓар телеком“ изрази целосно разбирање за намерите на Владата да инвестира и во идни проекти и затоа дојдовме до ова решение. Моменталната финансиска состојба на компанијата покажува дека може да ја исплатиме целосната дивиденда и истовремено да инвестираме“, посочи Бејкерс.

Оваа констатација ја потврди и владиниот претставник во Бордот на директори. „Компанијата мора да ја поддржи Владата во развојот. Ги прифатија ставовите дека Владата сака да направи реформи во многу сегменти и во развојот на општеството и по мало убедување и разговори прифатија сите располжливи средства што се за дивиденда да и' бидат исплатени на Владата“, изјави претседателот на Одборот на директори на „Македонски телеком“, Жарко Луковски.

„Македонски телеком“ соопшти дека Одборот на директори донел нов предлог кој ќе се адресира до Собранието на акционери за исплата на дивидендата за 2007 година во вкупен бруто-износ од 9.783.071.539 денари или 113,42 денари за акција. Согласно со предлогот на Одборот на директори, сите акционери кои ќе бидат евидентирани во Книгата на акционери на „Македонски телеком“ до 12 септември годинава, имаат право на дивиденда за 2007 година. Последен ден на тргување со право на дивиденда за 2007 година е 9 септември, а прв ден на тргување без право на дивиденда за 2007 година е 10 септември. „Исплатата на дивидендата ќе се изврши на 30 септември, по усвојувањето на одлуката за исплата на дивидендата од страна на Собранието на „Македонски телеком“, кое е закажано за 3 септември“, информираат од компанијата.

Оваа информација вчера веднаш ја зголеми цената на акциите на „Македонски телеком“ на Берзата. Вчера вредноста на акциите порасна за 9,97 проценти.

Одборот на директори донесе одлука да се зголемат капиталните инвестиции на „Македонски телеком“ годинава на 28 милиони евра.

Извор: Александрија Стевковска. (17.07.2008).Владата „победи“, ќе ќари 61 милион евра од „Телеком“. Утрински.

Дневник: Државната телевизија пред стечај

Владата предложила законски промени со кои ќе се дозволи ликвидација на презадолжениот и нефункционален јавен сервис.

Македонската радио-телевизија ќе оди во стечај бидејќи веќе не е во состојба да ја извршува функцијата на ефикасен јавен радиодифузен сервис. Стечајната постапка ќе почне штом ќе бидат усвоени промените во Законот за радиодифузната дејност, кои вчера беа доставени во Собранието. Со измените во Законот што ги предложила Владата ќе се воведе „стечај и ликвидација на јавно радиодифузно претпријатие и трговско радиодифузно друштво“. Таквата можност досега не постоеше. Владата предвидува во иднина да може да се одвојуваат и „државни буџетски пари за постигнување и одржување поголем степен на програмски и технолошкиот развој на јавниот радиодифузен сервис“. Истовремено, се предлага граѓаните да плаќаат радиодифузна такса од 130 денари.„И покрај активностите за реализација на санациската програма ЈП МРТ се соочува со проблемот на сервисирањето на обврските. Во вакви услови, поради напластените долгогодишни проблеми и долгови не е во состојба да биде транспарентен и независен јавен сервис. Нема ниту систем што би овозможил прибирање на радиодифузната такса. МРТ повеќратно е празадожена и со евидентна превработеност и несоодветен стручен кадар“, пишува во предлогот на Владата.

Според сознанијата, сценариото на Владата за МРТ предвидува целосна ликвидација на фирмата и отпуштање на сите околу 1.110 вработени. Потоа, би се формирало ново јавно радиодифузно претпријатие со помалку вработени. Се навестува оти тогаш ќе се решава и за името на новиот јавен сервис и за евентуалното преименување во Радио-телевизија Македонија.Долгот на МРТ кон различни доверители сега се движи од 10 до 15 милиони евра, а е најголем кон комуналните претпријатија. Вработените веќе неколку месеци не примиле плата и повеќе недели штрајкуваат. Кризата со финансирањето Владата досега ја решаваше со префрлување на парите позајмени од другите јавни претпријатија. Една од причините за лошата финансиска состојба е неможноста да се наплатува радиодифузната такса. Влошувањето на состојбите во МРТ, која своевремено беше една од најразвиените национални информативни куќи, трае цели петнаесетина години.

Укинати се повеќе сектори и служби, а се отпуштени и голем број вработени. Состојбите наликуваат на хаос поради постојаниот конфликт помеѓу синдикатот и директорот Јанез Сајовиц околу предвидените отпуштања како една од мерките за санирање на состојбите. Во минатиот месец, во МРТ околу 130 вработени беа прогласени за технолошки вишок, а откази беа најавени и за сите дописници. Нивното отпуштање, според најавите, требало да се изврши во септември.Генералниот директор Јанез Сајовиц вчера не беше достапен на мобилен телефон за коментар на намерата на Владата за стечај на МРТ. Во МРТ неодамна се случи и промена на чело на Управниот одбор при што на местото на сменетиот Леонид Наков беше назначен Тренчо Миленкоски. Во круговите на МРТ тогаш имаше неофицијални навестување дека наскоро ќе се изврши стечајот на претпријатието. При ова, не се предвидува прекин на работата на јавниот сервис бидејќи веднаш ќе се основа нов јавен радиодифузер, без долгови и со нов совет и управен одбор.Од пратеничката група на владејачката ВМРО-ДПМНЕ вчера изјавија дека тие побарале „консултации“ за предложените промени на законот.

Извор: М.Т. - Б.Ѓ. (25.07.2008). Државната телевизија пред стечај. Дневник.

Вечер: Немаме тастатури со македонско кирилично писмо

- Во Македонија не постојат тастатури кои го имаат македонското кирилично писмо. Ова е голем проблем за Македонија. Владата прави големи напори за да се обезбедат тастатури кои ќе бидат со кирилично писмо.

Ова вчера го изјави министерот за информатичко општество, Иво Ивановски, на трибината "Кирилицата и информатичката технологија" одржана во Стопанска комора на Македонија. Министерот Ивановски ја потенцираше и агресивната кампања на Владата за подобрување на информатичкото општество, но додаде дека во тој случај не смеат да бидат заборавени нашиот мајчин јазик и писмо. "Кирилицата постои, но не постои во некои фонтови", рече министерот Ивановски. "Друг проблем е пробивот на термини од англиско потекло, со кој се повеќе и повеќе ќе згаснува мајчиниот јазик", додаде тој. Запрашан за чинењето на евентуална кампања за кирилицата, Ивановски одговори дека не би требало да се разговара за финансиски средства кога е во прашање таква важна работа за македонскиот народ.

На трибината каде присутни беа 30-тина професори, лингвисти, писатели, директорот на Мајкрософт Македонија, Илија Гаговски, кажа дека во рамките на кампањата е изработен и кириличен фонт. Верзија на ТТФ фонт, е слободна за симнување на страната www.mojatakirilica.com.mk, каде е поставено и провокативното прашање: Ја убиваат ли компјутерите македонската кирилица?

Кампањата со мото "Го чувам своето - додека пишувам кирилица - постојам!", почна на 23 април и ќе трае до 10 јуни. Иницирана е од маркетинг агенцијата "Идеа плус комуникации" и Македонската информативна агенција - МИА, а поддржана од научната и уметничката јавност, од институции, бизнис-заедницата и од медиумите.

Извор: Де.т. (5.06.2008). Немаме тастатури со македонско кирилично писмо. Вечер.

Нова Македонија: Владата ќе бара отштета за проневерите во телекомот

Владата ќе поведе постапка за обесштетување поради финансиските малверзации во „Македонски телекомуникации“, со кои од касата на компанијата од 2004 до 2006 година биле проневерени околу 6,7 милиони евра. Правници велат дека Владата, која е сопственик на акционерски капитал во компанијата, има легитимно право да бара одговорност и обесштетување за финансиските проневери. Во телекомот немаат коментар за овој случај.
Ивица Боцевски, портпарол на Владата, вели дека дефинитивно ќе се поведе постапка.
- Апсолутно ќе поведеме постапка за обесштетување. Ќе ги следиме сите наоди од истрагата. Откако ќе има конечни наоди, ќе следува постапка - вели Ивица Боцевски, портпарол на Владата.
Борче Давитковски, професор на Правниот факултет и поранешен член на одборот на директори на телекомот, вели дека одлуките за вакви услуги никогаш не биле одобрувани од одборот. Тој додава дека во купопродажниот договор имало клаузула со која доминантните сопственици можеле извесна сума пари да ја трошат на консултантски услуги без претходно одобрување од одборот на директори. Давитковски вели дека државата има право да бара отштета од „Маџар телеком“.
- Во тоа време државата поседуваше речиси 49 отсто од капиталот во телекомот. Така што, како оштетен акционер има легитимно право во судска постапка да побара одговорност и финансиски средства како обесштетување - вели Давитковски.
Завчера „Маџар телеком“, мнозински акционер во телекомот, објави дека од „Македонски телекомуникации“ од 2004 до 2006 година незаконски се одлеале 6,7 милиони евра. Оттаму презентираа дел од извештајот на американската ревизорска куќа „Вајт и Кејс“, ангажирана да открие нерегуларности во работата на телекомот, во кој се вели дека има потврдени докази за незаконитост во формирањето и спроведувањето шест договори за советодавни и маркетинг-услуги, извештаи за работата на компанијата и лобирање во Македонија во периодот 2004-2006 година. Во извештајот се вели дека спорните договори биле склучени со консултантска компанија од Кипар. Финансиските малверзации во телекомот беа извршени кога прв човек на компанијата беше Атила Сендреи. Откако беа откриени незаконските исплати од касата на телекомот, на „Маџар телеком“, компанија што котира на берзата во Њујорк, и беше наложено да ја ангажира познатата ревизорска куќа од САД за детално да го испита случајот. Тогаш Атила Сендреи беше сменет и од функцијата, а според официјалната верзија тој се повлече од здравствени причини. Според неофицијалните податоци, токму со одобрување од Сендреи во неколку наврати на сметката на кипарската „Чаптекс холдинг лимитед“ биле префрлани суми од по еден милион евра. Неколкуте договори со консултантската куќа биле потпишувани на оваа сума за да не се бара одобрување од одборот на директори. Се испитува дали телекомот воопшто добивал некакви услуги од оваа фирма. Истрагите за финансиските проневери во телекомот предизвикаа дополнителни штети, бидејќи „Маџар телеком“ не можеше навреме да ги подготви финансиските извештаи, поради што добиваше казни од надлежните институции. Во телекомот велат дека нема да го коментираат случајот, со оглед на тоа што истрагата ја води „Маџар телеком“ и се уште е во тек.

Извор: В.Н. (23.5.08). Владата ќе бара отштета за проневерите во телекомот. Нова Македонија.

Вест: Владата ја дрибла антикорупциската комисија

Уште од 2006 година за кампањата "100 дена Влада" Антикорупциската комисија чека отчет од Владата за потрошените народни пари за оваа реклама. На вчерашниот прес претседателката на Комисијата Мирјана Димовска потврди дека се уште тој случај не е затворен, бидејќи се чекале одговорите на потпрашањата кои биле испратени до Владата, откако таа не дала комплетен извештај.
Антикорупциската комисија кон крајот на минатиот месец побарала информација од Владата дали владината кампања "Во каква Македонија живееш? - Од тебе зависи" е согласно Законот за јавните набавки, дали таа била предвидена со годишниот план за јавни набавки и за кој период колку буџетски средства биле предвидени за неа?...
"Одговор нема", рече Димовска.
Комисијата препорачала за време на предизборната кампања да се запрат огласите за вработување во министерствата за култура и за здравство, во Струшката болница, како и на 70-темина лица во ЈП "Охридски комуналец", а укажала да се запре и владиниот оглас за стипендирање помлади асистенти до завршувањето на изборниот процес.
Димовска соопшти дека од вкупно 120 пратеници, на кои пред еден месец им престана мандатот, 91 пратеник поднеле анкетен лист за имотната состојба. Од нив 67 се наоѓале на новите листи на пратеници.

Извор: С.К.Д. (17.5.2008). Владата ја дрибла антикорупциската комисија. Вест.

Вест: Телеком во јуни ќе дели дивиденда

Акционерите кои до 19 јуни годинава ќе се запишат во акционерската книга на Македонски телеком, ќе добијат дивиденда од 56,71 денар по акција од профитот на компанијата за 2007 година. Дефинитивната одлука за исплата на дивиденда во вредност од 50 отсто од добивката околу девет милијарди денари (околу 160 милиони евра) од 2007 година треба да ја донесе Собранието на акционери на 11 јуни годинава. Потоа, најдоцна до 30 јуни треба да стартува исплатата на дивидендата на сите акционери.
Од Телеком вчера немаше официјално информација како ќе се делат 80-те милиони евра, но грубо пресметано според бројот на акции, Владата, која поседува околу 34 отсто од капиталот, треба да добие околу 30 милиони евра, додека странскиот партнер "Камени мост" (во ликвидација) ќе изнесе околу 45 милиони евра. Околу 1,5 милиони евра ќе му следат на ИФЦ. Околу 3.000 мали акционери треба да поделат околу 2 милиона евра.
Телеком, пак, самиот себеси ќе си исплати дивиденда над 8 милиони евра.
Телеком за 2006 година не исплати дивиденда. Управниот одбор во средината на декември 2007 предложи исплата на дивиденда за 2006 година, но Собранието на акционери не го прифати предлогот и одлучи парите да останат во Телеком. Околу 30 милиони евра од Телеком и 50 милиони евра од "Т-Мобиле Македонија", односно вкупно 80 милиони евра се префрлија на сметката за 2007 година, како акумулирана добивка. Тогаш акционерите најавија дека околу 72 милиона евра од нив ќе бидат распредели како дивиденда од добивката од 2007 година.

Извор: Т.Ј. (17.5.2008). Телеком во јуни ќе дели дивиденда. Вест.

Утрински: Новата влада ќе ја троши дивидендата од „Телеком“

„Македонски телеком“ одлучи да дели дивиденда во износ од 79,5 милиони евра за акционерите, од добивката искажана за 2007 година. Од вкупната добивка која за 2007 година достигнала 147 милиони евра, компанијата како дивиденда ќе подели 50 проценти, односно 79,5 милиони евра. Исплатата на дивидендата ќе стартува од 30 јуни оваа година.

Инаку, познато е дека за 2006 година акционерите на „Македонски телеком“ одлучија нето-добивката за таа година да се распредели во акумулирана добивка. Односно, од неа не беше поделена дивиденда. Сега, пак, при утврдувањето на дивидендата за 2007 година, ќе се имаат предвид и акумулираната добивка од 2006 и нето-добивката за 2007 година.

Од ова може да се изведе заклучок дека „Македонски телеком“, всушност, сега заедно ќе ја дели дивидендата и за 2007 и за 2006 година.

Притоа, треба да се има предвид дека станува збор за вкупна добивка што ја оствари „Македонски телеком“, односно заедно со својата фирма-ќерка „Т-мобиле“.

Колкава сума ќе добие македонската Влада, која е втор по големина акционер во „Телеком“, засега се' уште точно не се прецизира. Но, со оглед на фактот што Владата поседува акционерски пакет од околу 35 - 36 проценти, доколку се направат пресметки согласно со нејзиното учество во капиталот, тие покажуваат дека таа би можела да се надева на дивиденда од околу 28 милиони евра. Но, таа сума засега останува само во сферата на шпекулациите, бидејќи точниот износ ќе се утврди на Собранието на акционери.

Тоа значи дека во државниот буџет во почетокот на јули годинава би требало да легнат околу 28 милиони евра. Што ќе се прави со нив, ќе одлучи новата влада, што ќе ја формираат победничките партии на претстојните парламентарни избори.

„Македонски телеком“ вчера информираше дека одлуката за распределба на дивидендата треба да ја верификуваат уште и акционерите, на нивното Годишно собрание што треба да се одржи на 11 јуни годинава.

„Одборот на директори на ’Македонски телеком‘ донесе одлука да му предложи на Собранието на акционери исплата на дивиденда за 2007 година. Според одлуката, Одборот предлага да се исплати 50 отсто од добивката за 2007 година, која изнесува 9.043.912.770 денари, или за исплата на дивиденда за изминатата година се предвидени 4.891.535.769 денари. Вредноста по една акција е во висина од 56,71 денар“, се вели во соопштението од компанијата.

Инаку, неофицијално се дознава дека покрај „Маѓар телеком“ и Владата, како два најголеми акционера во „Македонски телеком“, дивиденда ќе добијат и околу 3.000 малцински акционери на компанијата. Или поточно, сите акционери кои ќе бидат евидентирани во книгата на акционери на „Македонски телеком“ на 19 јуни 2008 година имаат право на дивиденда за 2007 година.

По информацијата дека ќе се дели дивиденда, акцијата на „Македонски телеком“ вчера на Македонската берза порасна за 3,82 процента во однос на претходниот ден, а се продаваше по цена од 621,37 денари за акција. Беше истргувана количина од 3.169 акции на компанијата.

Извор: (17.5.08). Новата влада ќе ја троши дивидендата од „Телеком“ . Утрински Весник.

Нова Македонија: Договор за антикорупциски мерки во образованието

Во Владата на Република Македонија вчера беше потпишан Меморандум за разбирање во рамките на проектот „Антикорупциски мерки во образованието“, кој го спроведува Секретаријатот за европски прашања на Владата, а го финансира Владата на Кралството Норвешка.
Проектот „Антикорупциски мерки во образованието“ е финансиран во рамките на Програмата за норвешка билатерална проектна поддршка на Република Македонија. За имплементацијата на овој проект, Владата на Кралството Норвешка издвои неповратен грант чија основна намена ќе биде насочена кон воведување антикорупциски мерки во високото образование, а со тоа и намалување на корупцијата и перцепцијата во високообразовниот систем. Посебен фокус во рамките на овој проект, покрај компонентата за подигање на јавната антикорупциска свест, е ставен и на афирмацијата и реформирање и законското уредување на институцијата „студентски правобранител“.

Извор: (28.3.08). Договор за антикорупциски мерки во образованието. Нова Македонија.

„Т-мобиле“ и „Космофон“ конкурираат за видеотелефонија

Мобилните оператори „Т-мобиле“ и „Космофон“ доставија понуди на огласот за една дозвола за користење радиофреквенција за 3Г-технологија, која овозможува многу брз пренос на слика, говор, интернет и видеоматеријали преку мобилни телефони. Комисијата за спроведување на огласот вчера ги отвори понудите, а во рок од седум дена треба да достави извештај и предлог до Агенцијата за електронски комуникации за најповолен понудувач. До 25 јануари ќе се знае кој од двата оператора ќе добие одобрение за користење на радиофреквенцијата.

Третата генерација мобилна телефонија ќе стане достапна годинава. Идниот оператор треба да почне да работи во рок од шест месеци отако ќе ја добие дозволата, а во следните шест услугата треба да ја донесе до 50 отсто од населението. Тој има обврска за три години да покрие со мрежа 80 отсто од населението.

Според условите на огласот, при бодувањето на понудите најважна ќе биде цената по која ќе им се нуди услугата на други оператори, а потоа цената за корисниците. Најнискиот почетен износ на еднократниот надомест е 10 милиони евра. Одобрението за користење на радиофреквенцијата се издава за 10 години со право важноста да му се продолжи.

За да може граѓаните да ги користат благодатите на третата генерација мобилна телефонија, односно да остваруваат видеоповик, мора да имаат телефони што се опремени со две камери. И, секако, да бидат подготвени да ја платат цената за оваа услуга, која е повеќе од десетпати поскапа од обичен повик преку мобилен телефон.

Одлуката на Владата да додели само една радиофреквенција предизвика спротиставени мислења во стручната јавност. Според едни, за мал пазар како нашиот е доволна една дозвола, а според други, на овој начин се внесува монопол во овој сегмент од мобилната телефонија.

- Анализите покажуваат дека ако се доделат повеќе радиофреквенции, подолго ќе се градат 3Г-мрежите, а со тоа ќе се забави комерцијалниот почеток на услугата. За да не се случи операторот што ќе ја добие дозволата за 3Г да биде монопол на пазарот, компанијата што ќе победи на огласот има обврска во рок од шест месеци откако ќе почне да работи да им ја понуди оваа услуга и на другите мобилни оператори на пазарот - вели Миле Јанакиески, министер за транспорт и врски.

Извор: Марјан Блажевски. (12.1.08). „Т-мобиле“ и „Космофон“ конкурираат за видеотелефонија. Дневник

Вест: Космофон ги победи Т-мобиле и ВИП

Космофон победи на првиот јавен повик за избор на мобилни услуги за Владата и државната администрација во текот на 2008 година. Владиниот портпарол Ивица Боцевски вели оти изборот значи дека премиерот, министрите, како и сите владини служби ќе добијат нови службени броеви од Космофон. Боцевски не знае како ќе следува префрлањето на мрежата на Космофон, ниту пак, има коментар на фактот што постапката ќе беше олеснета ако Агенцијата за електронски комуникации ја воведеше услугата преносливост на броеви, која овозможува корисникот со бројот да го задржи и повикувачкиот префикс од старата мрежа, а сметките да ги добива од Космофон. Боцевски објасни дека Космофон ќе опслужува од 900 до 1.200 вработени во државната администрација, кои користат службен мобилен телефон.
Понудената месечна претплата изнесува: ВИП- 4.484 денари, Космофон - нула денари, а Т-Мобиле - 1.769 денари, воспоставување повик: ВИП - нула денари, Космофон - 3,54 денари и Т-Мобиле - 4,72 денари, а една секунда разговор: ВИП - 0,051 денар, Т - Мобиле - 0,059 денари и Космофон - 0,039 денари.

Извор: Т.Ј. (31.12.2007). Космофон ги победи Т-Мобиле и ВИП. Вест.

Дневник: Жестока битка за владините мобилни телефони

По вчерашното отворање на понудите на трите мобилни оператори, претставници на „Космофон“ изјавија дека нивната понуда е најдобра

Космофон очекува да победи на јавниот оглас за избор на мобилен оператор чии услуги ќе ги користат Владата и вработените во органите на државната управа. По вчерашното отворање на понудите на трите мобилни оператори, претставниците на „Космофон“ изјавија дека нивната понуда од два денара за минута разговор и 0,9 денари за СМС-порака и без месечна претплата е за 30 отсто подобра од едниот оператор, а за 50 отсто од другиот конкурент.Дознаваме дека „Т-мобиле“ понудил три денари за минута разговор со 1.500 денари месечна претплата, а понудата на „Вип“ била 2,6 денари за минута со 3.800 денари за месечна претплата. Според критериумите од јавниот повик, цената за секунда разговор учествува со 55 отсто во вкупната оценка на понудата, цената на СМС со 10 отсто, а цените за роаминг со пет отсто. Името на победникот на јавниот повик официјално ќе биде познато денеска.

- Веруваме дека од 1 јануари дел од државните службеници ќе станат наши претплатници. Иако рокот беше краток, мило ни е што Владата го распиша повикот со што ни овозможи да потврдиме дека сме оператор што секогаш доаѓа со најдобри, најконкурентни и најекономични понуди на пазарот. Според критериумите, веруваме дека ќе бидеме избрани и ќе имаме дел од колачот на Владата - изјави Емилија Трајковиќ-Христова, директорка за односи со јавноста во „Космофон“.

Во „Т-мобиле“ вчера немаа коментар за јавниот повик. Претставниците на „Вип“ ја поздравија иницијативата на Владата првпат да распише ваков јавен оглас, но истакнаа дека во иднина очекуваат постапката да биде потранспарентна и според Законот за јавните набавки.

Владата ќе потпише едногодишен договор за користење услуги за мобилна телефонија со избраниот оператор. Станува збор за договор со кој државата се обврзува да земе најмалку 1.200 броеви за мобилен телефон. Според податоците од Службата за општи и заеднички работи на Владата, оваа година на околу 4.000 државни службеници од буџетот им биле плаќани разговорите на мобилен телефон. Најмногу службени мобилни телефони има во Министерството за внатрешни работи - 1.750. Во Министерството за одбрана се користат 624 службени мобилки. Собранието плаќа за 201 службен мобилен телефон, кои ги користат пратениците и службите. Владината Служба за општи и заеднички работи на 220 вработени им дала мобилен телефон. Во Царинската управа службен телефон користат 145 лица, а во Управата за јавни приходи на 90 вработени им се плаќаат мобилните. Во Министерството за надворешни работи има 66 корисници на службен телефон, а во финансии 59. Кај Народниот правобранител 14 луѓе имаат право да разговараат на државна сметка.

Секоја институција определува лимит за телефонската сметка на корисниците на службен мобилен. Во просек таа се движи од 50 до 100 евра, а за раководителите, пратениците и министрите тој е многу поголем. Грубите процени покажуваат дека годишно од буџетот се трошат околу 50 милиони евра за мобилна и за фиксна телефонија.

Досега 99 отсто од државните органи користеа службени телефони од „Т-мобиле“, но договорот со Владата им истекува на 31 декември. Владата планира в година да распише јавен оглас и за фиксната телефонија или да ги поврзе државните броеви преку сопствена телефонска централа.

Извор: Марјан Блажевски. (29.12.2007). Жестока битка за владините мобилни телефони. Дневник.

Дневник: Владини компјутери за бизнис-центар во Куманово

Министерството за економија вчера донира 15 компјутери на бизнис-центарот во Куманово, јави МИА.

- Новите компјутери ќе овозможат мрежно поврзување на кумановскиот со другите бизнис-центри во Македонија. Компјутерите може да ги користат и граѓаните што се заинтересирани за отворање сопствен бизнис - изјави министерката за економија Вера Рафајловска.

Таа најави отворање на бизнис-центри и во други градови во земјава.

Компјутерите се наменети за бизнисмените да се информираат за новите можности за кредитирање на деловните активности и за поволностите што ги нуди Владата.

Новата програма на Владата нуди финансиска помош при отворање нови бизниси. Владината поддршка се движи од 3.000 до 15.000 евра.

Министерката Рафајловска посочи дека македонските фирми преку информативните програми може да аплицираат за европски проекти и да се поврзат со компании од земјите-членки на Европската Унија.

Средствата за оваа програма не се ограничени, а се наменети за проекти во енергетиката и во информатичкото општество. Во наредниот период Министерството за економија ќе подготви проект со кој ќе се едуцираат бизнисмените за да можат да ги користат парите.

Ивор: (26.12.2007). Владини компјутери за бизнис-центар во Куманово. Дневник.

Време: Блокиран бесплатниот интернет

Граѓаните се жалат дека бесплатниот Интернет кој го нуди и рекламира Владата не е функционален зашто со денови не можеле да се приклучат во мрежата. Тие велат дека дури и кога успевале да се приклучат, Интернет имале само половина час, а потоа автоматски биле исклучувани. Иво Ивановски, министерот за информатичко општество вчера објасни дека проблемот настанал поради преголемата заинтересираност за владиниот Интернет.
- Има одреден број порти, кои кога ќе се преполнат со корисници, се блокираат. Потоа мора да се чека некој од корисниците да се исклучи за да може на негово место да се приклучи друг корисник. И минатата година имаше ваков проблем, затоа годинава ги зголемивме портите за три пати, но, заинтересираноста е многу голема - изјави Ивановски.

Извор: А. П. (19.12.07). Блокиран бесплатниот интернет. Време.

Дневник: Над 12.000 студенти купиле компјутер

Точно 12.099 студенти купиле компјутер со владините ваучери од 200 евра, а само 129 останале неискористени, информираа вчера од Владата.

Министерот за развој на информатичкото општество, Иво Ивановски, ја оцени акцијата како многу успешна, но Владата не планира да ја продолжи и в година.

Продажбата на компјутерите преку ваучери се вршеше во 218 фирми, за што беа издвоени околу 2,5 милиона евра од државниот буџет.

Извор: Д.Т. (19.12.2007). Над 12.000 студенти купиле компјутер. Дневник.

Вечер: Истекува рокот за вредносните ваучери

Рокот за искористување на вредносните ваучери истекува в сабота 15 декември 2007 година, кој е последен ден за нивно искористување, соопштуваат од Владата. Како што е познато ваучерите можат да се искористат за купување на лаптоп или декстоп компјутер или за купување на куќиштето од десктоп компјутерот. До крајниот датум треба да биде извршена трансакцијата, односно да биде купен компјутерот од фирмите кои продаваат компјутери и издаваат фискална сметка за тоа, а испораката на компјутерот може да се случи подоцна. Според податоците со кои располага Владата на Република Македонија, до завчера искористени се точно 9298 ваучери, а Универзитетите и факултетите досега подигнаа вкупно 11.200 ваучери.

Извор: (14.12.2007). Истекува рокот за вредносните ваучери. Вечер.