Дневник: М Р Т испрати погрешни сметки

Македонската радио-телевизија испечати погрешна жиро-сметка во решенијата за наплата на радиодифузната такса, кои се веќе доста вени до 70.000 фирми во земјава. Поради тоа, компаниите не може да го платат долгот за радиодифузна такса за целата измината година. Од МРТВ признаваат дека на сметките е наведена погрешна жиро-сметка. Тие апелираат до фирмите да избришат една нула, која е вишок во жиро-сметката, и да ја платат сметката. МРТВ нема да достави нови решенија до фирмите, а решенијата за 480.000 домаќинства, на кои жиро-сметката не им е згрешена, планираат да ги дистрибуираат од 1 септември.Компаниите реагираат бидејќи ако не ги платат веќе стасаните решенија ќе им симнуваат пари од банкарска сметка, што може да ги блокира. Граѓаните се револтирани дека радиодифузната такса треба да ја плаќаат ретроактивно за цела измината година.

Ние добивме такво решение и сакавме уредно да го платиме. Но, во решенијата има напишано погрешна жиро-сметка со што наплатата е невозможна. Бројот на сметката има една цифра повеќе така што не знам како јавниот сервис ќе биде во состојба да си ја наплати таксата - велат од компаниите што реагираа до нашата редакција.Оттаму потенцираат дека кога се обиделе телефонски да ја контактираат МРТВ за да прашаат каде е грешката и како да уплатат пари, од Службата за информации на Телекомот -188 ги известиле дека МРТВ нема пријавено телефонски број кај нив.

- Многу сме револтирани од несериозниот однос на јавниот сервис и не знаеме што да правиме. Ако не платиме, не по наша вина, ќе почнат да ни симнуваат пари од сметки што може да го блокира нашето работење - тврдат во компаниите.Во МРТВ вината ја префрлаат на фирмата која ги печатела решенијата за наплата на радиодифузна такса како и на претходното раководство, кое не ја согледало грешката навреме.

- Не можам да коментирам што се случило бидејќи тоа било направено пред јас да ја преземам функцијата. Но постои грешка, односно една нула е вишок во објавената жиро-сметка. Веќе пристигнуваат наплати од некои фирми и затоа апелирам до компаниите да ја подмират законската обврска за наплата на радиодифузна такса и да уплаќаат на жиро-сметка на која ќе ја нема последната нула - вели извршниот директор, Петар Каранаков.

Тој вели дека иако радиодифузната такса е јавна давачка и побарувањата не застаруваат, тие можат на суд да наплатат само за изминатите 12 месеци. Затоа апелира до фирмите ако може да го подмират и целосниот долг, бидејќи од 2007 до 2008 година МРТВ не достави фактури и се финансираше од буџетот.

- Очекуваме, ако граѓаните редовно ја намируваат обврската, да собираме околу 15 милиони евра годишно, од кои 12 милиони евра би останувале за МРТ. Сметаме дека на овој начин ќе може редовно да им исплаќаме плати на вработените и да ја исполниме нашата должност како јавен сервис и да го вратиме стариот лик на МРТВ - вели Каранаков.Од Советот за радиодифузија сметаат дека ретроактивното плаќање ќе предизвика само револт кај граѓаните и фирмите и може да има контрарезултати.

- Сакам да се плаќа таксата, но сметам дека ова ретроактивно побарување ќе предизвика револт кај граѓаните. Факт е дека мора да го имаме јавниот сервис, но требало навреме да се почне со постапката, бидејќи граѓаните не се виновни што тоа доцнело. Според најавите, мислам дека ќе има проблем во наплатата - вели Зоран Стефаноски, претседател на Совет за радиодифузија.

Обврска да плаќаат радиодифузна такса имаат сите домаќинства кои имаат ТВ- приемник и сите правни лица и сопственици на деловен простор и тоа на секои 20 вработени по една радиодифузна такса. Хотелите и мотелите плаќаат по една радиодифузна такса за секои пет соби, а сопствениците на угостителски и други јавни објекти за секој приемник по една такса.

Околу 480.000 домаќинства од 1 септември ќе ги добијат сметките за цела измината година. За периодот од јуни лани до јуни годинава, граѓаните ќе добиваат по две решенија, од кои едното за месеците јуни, јули и август лани, а таксата е пресметана по стариот закон и изнесува околу 390 денари, а второто за периодот од септември лани до јуни годинава, каде што месечната такса изнесува по 130 денари.

Извор: (08.08.2009). М Р Т испрати погрешни сметки. Дневник.

Дневник: Јавниот сервис пак на јавна сметка

Граѓаните, сакале или не, ќе мора редовно да ги плаќаат сметките за радиодифузна такса, кои наскоро ќе ги добијат во своите поштенски сандачиња за цела измината година. Од МРТВ информираат дека тие веќе се доставени за над 70.000 фирми, а сега се очекува да ги добијат и околу 480.000 домаќинства, кои според законот треба да плаќаат по 130 денари месечно или три пати помалку отколку што беше одредено со претходното решение, секој 15-ти во месецот.

МРТ неплатениот износ присилно ќе го наплатува, со овластени извршители, кои ќе запленуваат предмети во домаќинствата. На фирмите долгот присилно ќе им се наплаќа преку тансакциска или каква било друга банкарска сметка. Од МТВ апелираат до граѓаните редовно да ги намируваат долговите за да се избегнат дополнителните трошоци за извршителите што паѓаат на сметка на должникот.

Според законот, секое домаќинство, фирма и угостителски објект е должно да плаќа радиодифузна такса, без разлика дали има телевизор, дали ги следи или не програмите на Македонската радио-телевизија или е приклучено на кабелска телевизија.

- Од минатиот месец, решенијата до обврзниците - правни субјекти ги доставивме преку Македонски пошти и почна со наплата на радиодифузната такса. Наплатата се однесува за периодот од јуни лани до јуни минатиот месец, а наскоро нив треба да ги добијат и домаќинствата. Плаќањата може да се извршат еднократно или на рати, најдоцна до 15-ти во месецот. За секое доцнење се плаќа камата утврдена со закон - објаснуваат од МРТ.

Според извршниот директор, Петар Каранаков, со редовната наплата на таксата ќе се овозможи финансиска независност на јавниот сервис, со што ќе се јакне создавањето политички урамнотежени дневни информативни емисии, како и нова продукција.

- Очекуваме ако граѓаните редовно ја намируваат обврската да собираме околу 15 милиони евра годишно, од кои 12 милиони евра би останувале за МРТ. Сметаме дека на овој начин ќе можеме редовно да им исплаќаме плати на вработените и да ја исполниме нашата должност како јавен сервис. Наша цел не е наплатата да оди преку извршители, не сакаме да отвараме пазар за извршителите бидејќи граѓаните ќе плаќаат многу повеќе од тие 130 денари за трошоците за извршителот. Но, наша законска обврска за која одговараме е да ја наплатиме таксата. Затоа апелираме до граѓаните да ја плаќаат таксата, а ние се обврзуваме дека со сите сили ќе ја оправдаме нивната доверба со поинтересни содржини за да го вратиме стариот лик на МРТ - вели Петар Каранаков, извршен директор на телевизијата.

Оттаму информираат дека за периодот од јуни лани до јуни годинава, граѓаните добиваат по две решенија, од кои едното се однесува за месеците јуни, јули и август лани, а таксата е пресметана по стариот закон, а второто решение е за периодот од септември лани до јуни годинава, каде што месечната РДТ изнесува по 130 денари.

Поради големите трошоци за печатење и за дистрибуција на овие решенија, МРТ во натамошниот период решенијата ќе ги доставува еднаш во годината.

„Долгот за радиодифузната такса како јавна давачка не застарува, како што е тоа случај и со другите сметки за комуналии. За правните и физичките лица што нема да ја извршуваат оваа законска обврска, МРТ ќе биде принудена наплатата да ја извршува преку извршители, при што не се исклучува и наплатата по судски пат“ - информираат од МРТ.

Неплаќањето на радиодифузна такса изминатиот период доведе до тешка финансиска криза во МРТ и другите корисници на парите. Од радиодифузната такса МРТ добива 76,5 отсто, за ЈП „Македонска радиодифузија“ одат 19,5 отсто, а за Советот за радиодифузија се одделуваат 4 отсто. Граѓаните неплаќањето на таксата го правдаа со незадоволството од програмата што ја добиваат од МРТ како јавен радиодифузен сервис.

Последен пат МРТ ја наплати радиодифузната такса во 2007 година, по што во 2008 година престанаа да доставуваат фактури, а јавниот радиодифузен сервис се финансираше со пари од буџетот.

Покрај домаќинствата, обврска да плаќаат радиодифузна такса имаат и сите правни лица и сопственици на деловен простор и тоа на секои 20 вработени по една радиодифузна такса. Хотелите и мотелите плаќаат по една радиодифузна такса за секои пет соби, а сопствениците на угостителски и други јавни објекти за секој приемник по една такса. Стопанствениците реагираа дека на овој начин дополнително се оптоваруваат со нови трошоци.

Извор: (29.07.2009). Јавниот сервис пак на јавна сметка. Дневник.

Утрински: МРТ преку извршители и без најава ја наплаќа радиодифузната такса

Стотина фирми, од кои најголемиот број во Скопје, пред новогодишните празници биле олеснети за неколку илјади денари од сметките без никакво предходно предупредување или најава. Затечени, дури откако ги изгубиле парите, сопствениците се информирале дека извршители, во името на Македонската радио-телевизија, им наплатиле заостанат долг за неплатена радиодифузна такса. Да биде изненадувањето уште поголемо, покрај заостанатиот долг, си платиле и надомест за извршителот, нотарот и банката каде што е извршена трансакцијата. За целиот случај во МРТ не добивме објаснување ниту, пак, ни беше одговорено дали сите клиенти навремено биле известени за наплатата на долгот. Нејасно е засега дали овој тип наплата ќе продолжи и во иднина и дали ќе биде насочена само на правните лица или ќе се прошири и на граѓаните кои имаат ненамирени сметки кон МРТ.„Неколку дена пред празниците открив дека на сметката немам пари, иако знаев дека има неколку илјади денари. На шалтерот ме информираа дека ми се повлечени средства преку трансакциската сметка по налог на извршител и дека за да биде целосно наплатена сумата, треба дури и дополнително да уплатам средства. Претходно немав добиено никакво известување дека воопшто должам нешто и некому“, вели Зорица Николиќ, сопственик на училиште за странски јазици.Таа вели дека по првиот шок, за што всушност станува збор и' објасниле во сметководствената фирма што ја ангажирала. Имено, за неплатени сметки за радиодифузна такса за шест месеци во 2007 година нејзината фирма должела 2.700 денари, а од сметката и' биле наплатени над 9.000 денари, од кои 3.600 како награда за извршителот. Николиќ вели дека еден од извршителите на сопственици на уште десетина фирми кои настрадале како нејзината им презентирал решенија за известување дека ќе се реализира извршувањето. Решенијата биле потпишани дека се уредно доставени до фирмите пред да се спроведе тоа. Таа тврди дека такво решение ниту видела ниту потпишала и прашува кој го фалсификувал нејзиниот потпис.Слично поминал и Душко Андоновски, сопственик на фирма за сервисирање биротехничка опрема. Тој за долг од 2.200 денари платил 9.000 денари. Известување дека од пошта треба да си подигне решение, во кое инаку пишува дека откако ќе го добие има право во одреден рок да се жали, добил седум дена откако истото решение било веќе извршено, односно парите биле симнати од сметката на фирмата. Поштарот го оставил известувањето пред вратата на фирмата, без да побара некој да потпише за доставата.Андоновски се обратил и до МРТ, но добил одговор дека не постои служба во која тој би можел да се пожали или каде што би можел да се информира уште колку должи и како да плати, а притоа да ги избегне извршителите и дополнителните трошоци. Во Комората на извршители велат дека тие само ги спроведуваат налозите што ги добиваат од институциите. Немаат законска обврска да го информираат сопственикот на фирмата дека од сметката ќе му се земаат пари, туку известување добива само банката. Од Комората велат дека институцијата што бара наплата треба да ги извести своите клиенти, по што решението може да стане правосилно и извршно. Оттаму не се сомневаат дека МРТ го направила тоа ниту, пак, ја доведуваат во прашање веродостојноста на потписите за доставата на решенијата.
Извор: (12.1.09). МРТ преку извршители и без најава ја наплаќа радиодифузната такса. Утрински Весник.

Вест: 400 денари месечно за телевизија

МРТ ги подготвува сметките за радиодифузна такса за 2008 година. Директорот на Македонската радио-телевизија Ефтим Гашев вели дистрибуцијата на сметките ќе биде околу новогодишните празници, а висината на радиодифузната такса ќе биде пресметана и по новата цена и по старата, која беше во сила до август годинава. "Согласно законската регулатива, до август годинава висината на радиодифузната такса е 2,5 отсто од просечната плата, додека од август до крајот на 2008 година таа изнесува 130 денари месечно. Ќе се предвиди и одредена динамика на уплата на износот за целата година, и таа, најверојатно, ќе биде во договор со физичкото лице. Ако се земе предвид дека таксата се пресметува на период од три месеци, тогаш веројатно и уплатата ќе треба да се направи на четири рати", објаснува директорот Гашев. "Вест" направи груба пресметка на износот на таксата за првите седум месеца врз основа на фактот дека просечната плата во 2008 година беше во пораст и се движеше над 15 илјади денари. Според тоа, и месечната такса треба да се движи околу 400 денари. Според директорот Гашев, во интерес на граѓаните е да ја платат радиодифузната такса. "Ако наплатата на таксата се прави преку извршители, тие наплаќаат и надомест кој значително го зголемува вкупниот износ", вели Гашев.

Извор: Т.Ј. (3.12.08). 400 денари месечно за телевизија. Вест.

Утрински: Бројни неправилности во работата на МРТ

Државниот завод за ревизија неделава го објави ревизорскиот извештај за работата на ЈП „Македонска радио-телевизија“ во 2006 година со бројни забелешки и утврдени неправилности околу работењето, трошоците и располагањето со имотот. Првите забелешки се однесуваат на начинот на кој се располагало со опремата. „При реализацијата на наведените активности е присутна појава голем дел од расходуваните основни средства и залихи подолг временски период да бидат несоодветно обезбедени (по ходниците, подрумите и помошните простории во зградата) без документирање и контрола на сите процеси на нивно преместување, отуѓување, продажба, односно изнесување од просториите користени од страна на јавното претпријатие“, се наведува во ревизорскиот извештај. Ревизорот при контролата има утврдено бројни неправилности при исплаќањето на платите и располагањето со буџетот на јавното претпријатие. Во извештајот се забележува дека на вработените не им е соодветно евидентирано работното време. Како одговорни лица кои во 2006 година раководеа со МРТ во извештајот се прозиваат

Ивор: Гордана Стошиќ, Љупчо Лазаревски, Миле Перушевски и Борис Ставров. (А.П.). (22.10.2008). Бројни неправилности во работата на МРТ. Утрински.

Нова Македонија: Господ нека му е на помош на новиот директор на МРТ

Неблагодарно е уште сега јавно да кажувам какви чекори ќе следуваат во Македонската радио-телевизија, со оглед на тоа што само што ме избраа на оваа функција, изјави за „Нова Македонија“ Ефтим Гаштев, кој од пред неколку дена е извршен директор на националниот сервис. Тој има завршено одбранбени и мировни студии при Филозофскиот факултет. Гаштев на јавноста ѝ е познат како водител на забавно-контактни емисии што во изминатиов период во организација на „Лимиер продукција“ се емитуваа на повеќе приватни телевизии. Македонските граѓани најмногу го паметат Гаштев по квиз-емисијата „Суперишка“. Тој веќе 18 месеци работи како главен програмски продуцент во МРТ.
Реакциите на вработените во куќата не се баш најповолни од изборот на првиот човек на МРТВ. Господ нека му е на помош и на овој директор, велат тие и се чудат на ваквиот избор на власта.
Гаштев доаѓа на местото од Словенецот Јанез Сајовиц, кој за да биде на чело на националниот сервис зеде македонско државјанство. Сајовиц беше избран за извршен директор на МРТ во мај минатата година. Според договорот, тој добиваше месечна плата од 6.500 евра, а покрај тоа му беа исплатени уште и околу 30.000 евра за изработката на санациската програма.
Иако дојде на ова место како експерт од ОБСЕ, Сајовиц не најде заеднички јазик со членовите на управниот одбор. Наместо санирање на националната куќа, во изминатиов период таму се случуваа секојдневни конфликти меѓу УО и Сајовиц, како и чести штрајкови на вработените. На сметка на Сајовиц имаше многубројни обвинувања за незаконско работење. Тој, пак, по разрешувањето бараше од МРТ да му бидат исплатени заостанатите плати во согласност со менаџерскиот договор. Вработени во МРТ велат дека само Господ може да му помогне на новиот директор, со оглед на катастрофалната состојба во која се наоѓа јавниот сервис.

Извор: В.Н. (25.09.2008). Господ нека му е на помош на новиот директор на МРТ. Нова Македонија.

Дневник: Стечајот е неприфатливо сценарио за МРТ

РЕАКЦИИ ПО НАЈАВЕНИТЕ МЕРКИ ОД ВЛАДАТА

Ние очекувавме решение со кое ќе ни се помогне, а не да се закопаат сите наши надежи велат во Синдикатот на МРТ

Вработените во Македонската радио-телевизија се во шок по најавата дека јавниот сервис ќе оди во стечај откако Собранието изгласа да се воведе таква законска можност.

Синдикатот на МРТ вчера попладне заседаваше за да изгради став за намерата на Владата преку стечајна постапка да се отпуштат сите вработени, а потоа да се изврши вработувања за нова државна радио-телевизија.Стечајот или ликвидација е тоа што најмалку го очекувавме дека ќе ни се случи. Ние очекувавме решение со кое ќе ни се помогне, а не да се закопаат сите наши надежи. Отпуштањето на сите вработени е најлошото нешто што можеше да ни се случи. Нашето основно барање беше да се обезбеди наплата на радиодифузната такса и вработените да се прераспределат според нова систематизација.

Кога ќе се реши тоа, ќе се види дека МРТ може да опстане како систем - изјавија вчера во Синдикатот на МРТ.Тие велат дека не се точни тврдењата на Владата оти постои превработеност во информативната куќа.

- Сега има 842 постојано вработени и околу 100 хонорарни соработници,кои произведуваат програма на девет јазици. Тоа е за половина помалку отколку што некогаш имало вработени. Кога ќе се направи реална систематизација, ќе се види дека, всушност, тука има помалку вработени отколку што е реално потребно. На една просечно голема телевизија за нормално работење и' се потребни околу 400 вработени, а ние сме државен јавен сервис. Стравуваме дека новите вработувања ќе се вршат по партиски линии - објаснуваат вработените.Владиниот портпарол Ивица Боцевски вчера немаше информации за тоа што во иднина ќе се случува со МРТ, чии загуби изнесуваат од 10 до 15 милиони евра. Во најголема мерка тие се однесуваат на долговите кон комуналните претпријатија. Со законската промена во иднина ќе може да се одвојуваат и буџетските пари за нејзиното финансирање, а месечната претплата ќе изнесува 130 денари. Последниве години износот на претплатата што ја плаќаа граѓаните постојано се намалуваше така што сега речиси никој не ја плаќа обврската. Недостапен за коментар беше и Тренчо Миленковски, новоизбраниот претседател на Управниот одбор на МРТ.

Извор: Б.Ѓ. (26.07.2008). Стечајот е неприфатливо сценарио за МРТ. Дневник.

Нова Македонија: Никој ништо не знае за судбината на МРТ

Македонската радио-телевизија (МРТ) подолго време е во агонија. Програмската понуда е бездушна, вработените не знаат што да работат поради тоа што не можат да врзат крај со крај, други се под стрес очекувајќи дали ќе се најдат на листата за принудно заминување од фирмата. Оние, пак, што доброволно заминаа, околу 300 работници, не ги добиваат ветените рати за отштета, а похрабрите, всушност и најпотребните во МРТ, заминуваат во другите телевизиски куќи.

Деновиве беше разрешен извршниот директор Јанез Сајовиц, кој беше најавуван како џокер за излегување од тешката ситуација. Тој, пак, сите свои неуспеси ги префрли на управниот одбор и на вториот, разрешен, извршен директор Маја Мишковска.

Вработените слушаат разни гласини за судбината на националната телевизиска куќа, но најточно е тоа дека никој не знае што точно ќе се случи со МРТ. Оние што останаа на работа се иритирани од барањата за отштета на лицата што доброволно си заминале, затоа што и тие чекале да земат плата. Тие слушнале верзија дека раководството планирало да им ги исплати сите заостанати плати до крајот на август, а потоа да се пристапи кон суштинско решавање на статусот на куќата.

Во јавноста најчесто спомнувана опција е МРТ да оди во стечај, иако некои сметаат дека таа треба да се ликвидира. Премиерот Никола Груевски неодамна изјави дека во моментот нема решение за МРТ и дека тоа прашање е во надлежност на Министерството за транспорт и врски.

- Со Законот за радиодифузна дејност е овозможено, ако бидат исполнети условите за тоа, МРТ да биде опфатена со Законот за трговски друштва, односно да оди во стечај. Тоа не значи дека за националната куќа е планиран стечај - велат во Министерството.

Како една од причините за застој во трансформацијата на МРТ се посочува лошата комуникација меѓу извршните директори и управниот одбор од една страна, и меѓу Сајовиц и заменик-извршниот директор Назиф Буши, кој сега е в.д. извршен директор.

Првобитниот договор меѓу ОБСЕ и УО на МРТ предвидувал на националниот сервис да му се обезбедат консултанти, кои требало да престојуваат шест месеци во куќата. За почеток, од ОБСЕ имале пари за консултант за организациска поставеност, а УО го избрал Јанез Сајовиц од Словенија, кој до крајот на 2007 година требало да понуди програма. Тоа не се случи.

Некои од поранешните членови на УО велат дека треба да се пристапи кон реализација на првобитно поставениот план - да се реши финансирањето, за да се направи нешто, и да се направи програмски план, за да се знае што ќе се работи.

Ликвидацијата се препорачува како единствен лек во сегашната ситуација, со која ќе отпаднат сите сомнителни договори што ? нанеле финансиска штета на МРТ. Бидејќи долгот на куќата бил околу 16 милиони евра, од кои осум отпаѓале на плати и придонеси, преостанатите осум милиони ќе се репрограмирале со државни гаранции. На овој начин, со исчистени сметки, ќе може да се регулира бројот на вработените во куќата, зашто тоа би се направило со повик.

Извор: (15.8.08). Никој ништо не знае за судбината на МРТ. Нова Македонија.

Вест: Колку пари толку коментатори во Пекинг

Директорот на МРТ Јанез Сајовиц најавува дека во Пекинг ќе испрати деветчлена новинарска екипа, но вработените велат дека преносот ќе зависи од тоа колку пари ќе се обезбедат.
Македонската радио - телевизија (МРТ) се подготвува за пренос на Летните олимписките игри 2008, кои од петок, 8 август, до 24 август ќе се одржат во Пекинг, Кина. Главниот извршен директор Јанез Сајовиц вели дека МРТ до крајот на неделава на најголемиот светски спектакл во Пекинг ќе испрати деветчлена новинарска екипа, од кои еден спортски новинар минатата недела веќе заминал за Кина и за кој е сигурно дека ќе известува од отворањето на Игрите.
"Денеска за Пекинг треба да заминат уште двајца новинари од екипата, а најдоцна во петок или сабота да им се придружат и останатите. Пренос од Олимпијадата ќе има, а во Пекинг треба да известува екипа од вкупно девет репортери", вели Сајовиц.
Но, неофицијално од МРТ коментираат дека може да се случи за Пекинг да не замине целата екипа зашто јавниот сервис нема пари.
"Ние зборуваме за стечај на МРТ, вие прашувате за Олимпијада", коментираа вчера новинари од јавниот сервис.
Од тоа колку репортери и сниматели на МТВ ќе бидат во Пекинг, ќе зависи и бројот на натпревари што јавниот сервис ќе ги пренесува на своите канали и од каде што ќе се коментираат.
Целата екипа се планира да обезбеди двојазичен пренос на натпреварите, кои ќе почнуваат секој ден во 3 часот изутрина. Околу пладне се најавува получасовна пауза, во која ќе се емитува емисија од скопското студио, а потоа повторно ќе следува директен пренос од Пекинг до 18.30 часот.
Според најлошата варијанта, ако новинарите останат дома, Игрите би се коментирале од скопските студија на МТВ.
Уредникот на Спортската редакција Горан Милковски вели дека и покрај финансиските потешкотии во кои се наоѓа МТВ, Спортската редакција се подготвува за Олимпијадата, како и дека вработените се ентузијасти дека ќе направат пренос на Игрите каков што се правел во времето кога јавниот сервис немал финансиски проблеми.
Директорот на МРТ Јанез Сајовиц вчера не беше конкретен околу прашањето колку пари обезбедила МРТ за преносот на Олимпијадата од Пекинг, но потврди дека МРТ на Европската унија за радиодифузија (ЕБУ) се уште и нема платено 200.000 американски долари за телевизиските права за преносот на Олимпијадата во Атина од 2004 година, додека директорка беше Гордана Стошиќ. За Игрите во Пекинг, пак, МРТ на ЕБУ ќе треба да и плати уште 210 илјади швајцарски франци.

Извор: Т.Ј. (05.08.2008). Колку пари толку коментатори во Пекинг. Вест.

Нова Македонија: Странските донатори бегаат од Македонската радио-телевизија

Мисијата на ОБСЕ ја откажа помошта за претходно договорената донаторска конференција за Македонската радио-телевизија (МРТ) поради континуирано лошите случувања во националниот телевизиски сервис, а ќе размисли дали ќе помага во иднина. Ова го потврди портпаролката на ОБСЕ, Сали Браутон. 
ОБСЕ е најголем и постојан донатор во МРТВ. Според податоци од ОБСЕ, оваа организација има вложено околу половина милион евра во опрема и обуки за вработените во МРТ во периодот од 2003 година досега. Иницијативата за донаторска конференција била на МРТВ, а ОБСЕ требало да помогне таа да се реализира. 
- Проектот е откажан поради неисполнување на договорот од страна на МРТВ. Разочарани сме тоа во кој правец се движи куќата. Има совет, има управен одбор, сите заедно треба да бараат решение на проблемите - изјави Браутон за „Нова Македонија“. 
Претходно, на МРТ и помагаше и холандската асоцијација „Прес нау“, која ги поддржува медиумите во конфликтни региони и земји во транзиција и уште една германска асоцијација. Тие се повлекле пред две години. Официјалното образложение е дека загубиле интерес за Македонија.
Маја Мишковска, извршна директорка на МРТ, вели дека до неа не стигнала информација дека ОБСЕ ја откажува соработката. Таа уверува дека ќе се решат проблемите и куќата ќе продолжи да функционира како национален сервис. 
Мишковска вчера ги повика надлежните институции да спроведат истрага и да ги тужат сите што потпишувале неовластени вирмани, а посочи дека меѓу нив има и луѓе од нејзиниот кабинет. Додека донаторите креваат раце од МРТ, првиот јавен национален сервис продолжува да тоне. Вработените веќе две недели штрајкуваат, а раководството продолжува со јавните пресметки за тоа кој е виновен за пропаѓањето на куќата. МРТ го допре дното со нехигиената во зградата и со исклучувањето на телефоните и на Интернетот. 
Синдикатот засега немо ги следи случувањата. 
- Хаос е. Не знаеме што се случува, ниту некој нешто ни кажува. Ние од 4 јуни штрајкуваме. Ќе реагираме ако продолжат отпуштањата на вработените онака како што предвидоа со санациската програма - вели Љубица Пуцаревиќ, претставничка на синдикатот.

Извор: С.С. (21-22.6.08). Странските донатори бегаат од Македонската радио-телевизија. Нова Македонија.

Дневник: Вработените во МРТ го обвинија директорот Сајовиц за диктатура

Во Македонската радио-телевизија е воведена диктатура зад која стои извршниот директор Јанез Сајовиц, обвинија вчера вработените во овој јавен информативен сервис. Обвинувањата уследија откако, по налог од раководството на МРТ, на известувачите од други информативни куќи вчера им беше забрането да присуствуваат на собирот на синдикалната организација. Повеќе обезбедувачи, по налог на раководството, не им дозволија на новинарите да влезат во салата за состаноци. Во знак на револт, вработените ја напуштија салата и излегоа пред главниот влез на МРТ. Тие ќе упатат и протестно писмо до ОБСЕ и ЕУ поради ваквата постапка на директорот. - Недостојно е ова што се случува. Се вративме во периодот на 1949 година. Како може да се забранува во јавноста да се слушне вистината за состојбите во МРТ. Куќата тоне во се' поголеми долгови и се вршат притисоци врз вработените - изјави вчера Оливер Симоновски, член на Претседателството на синдикатот на МРТ. Вработените бараат итна средба со претставници на Управниот одбор за да се расчисти дали ова тело ја поддржува или не Санационата програма предложена од Сајовиц. Со неа, покрај другото, се предвидува отпуштање на 330 вработени.

- Ние ја поддржуваме санацијата на МРТ, но не како што предлага Сајовиц. Постои излез од ситуацијата преку изноаѓање соодветен начин на финансирање и санациона програма. Наместо да се постигне тоа, ние имаме се' полоши услови за работа - вели Решат Камбери, член на синдикалната организација.Вработените тврдат дека Сајовиц досега имал катастрофални деловни резултати.

- Откако е на функција, ја задолжил куќата за над еден милион евра, а во наредните години ќе стасаат долговите што ги направил од 4 до 5 милиони евра. Значи, досега оствари загуба од шест-седум милиони евра. Тој не донесе никаков приход во куќата. Таков човек не може да управува со МРТ - тврдат вработените.

Извор: Б.Ѓ. (1.3.08). Вработените во МРТ го обвинија директорот Сајовиц за диктатура. Дневник.

Утрински: МРТ нуди и до 7.000 евра за оние што ќе си заминат

Вработените во Македонската радио-телевизија кои имаат уште пет години до пензионирање, доколку доброволно заминат од куќата, ќе добијат социјален пакет во висина од 27 плати. Ова е последниот предлог за испратнини за оние луѓе што треба да ја напуштат МРТ, кој Управниот одбор го достави до Синдикатот. Понудата важи за сите лица кои по правило треба да се пензионираат до првата половина на 2012 година, односно имаат уште пет години од работниот век. Според предлогот, секој од оние што треба да се пензионираат до 2012 ќе добие испратнина која ќе се пресмета од 6 негови плати, а остатокот од 21 плата ќе биде во висина од просечна плата во Македонската радио-телевизија, која е идентична на просекот на личниот доход во државава што во ноември лани изнесува околу 15.600 денари. Тоа значи дека, според грубите пресметки, вработените во МРТ што ги исполнуваат условите и имаат уште пет години до пензионирање би требало да земат по околу 7.000 евра. Покрај овие пари, додека не се пензионираат, од Агенцијата за вработување вработените од МРТ во првата година ќе добиваат месечно пари во висина од 60 отсто од нивната последна плата, а другите четири години по 40 отсто.Управниот одбор подготви и предложи социјални пакети и за другите кои сакаат доброволно да го напуштат своето работно место од Македонската радио-телевизија. Услов за доброволно заминување е да имаат работен стаж во куќата од минимум пет години, но не повеќе од 24 години работно искуство во МРТ. За доброволците се предвидени 12 плати, плус за секоја година работен стаж по уште една плата. Овие предлози за социјални пакети, во основа според Синдикатот, досега се најкоректни и добри. Но, тоа не значи дека се веднаш прифатливи. Оливер Симоновски од Синдикатот вели дека понудените социјални пакети се добра основа за евентуални разговори. Синдикатот има рок до 15 февруари да ги разгледа пакетите и да се договори со Управниот одбор за можни корекции, односно за подобрување на социјалните услови за лицата што ќе бидат прогласени за технолошки вишок. Според планот за систематизација и организација, од Македонската радио-телевизија треба да бидат прогласени за технолошки вишок околу 330 луѓе. Моментално во куќата има вработено 1.090 лица. Оливер Симоновски појаснува дека согласно со евиденцијата со која располагаат, 130 луѓе имаат уште пет години до пензионирање, така што доколку ги прифатат условите и заминат, вкупниот број вработени ќе биде 960, што не е многу за еден јавен сервис. Тогаш, според Симоновски, ќе биде многу полесно да се преговара со надлежните во МРТ дали е неопходно да се отпуштат уште 200 луѓе од предвидените 330. Тој појаснува дека направената систематизација и организација на работни места е полна со дупки. Со систематизацијата има многу раководители, а малку извршители, што значи дека е потребен дополнителен кадар во одделни сектори каде што е направен превид и без соодветна анализа е намален бројот на вработените.

Извор: Верче Георгиевска. (31.1.08). МРТ нуди и до 7.000 евра за оние што ќе си заминат. Утрински.

Утрински: Музичката продукција нема да биде под капата на МРТ

Музичката продукција, која досега функционираше како составен дел на Македонската радио-телевизија, ќе се издвои како посебна целина и ќе биде независна од јавниот сервис. Според новата систематизација, музичката продукција која е формирана уште од создавањето на МРТ, сама ќе се грижи за остварување приходи преку организирање настапи и концерти.

ВО музичката продукција работат околу 70 луѓе. Во нејзин состав влегуваат „Бинг бенд“ или забавниот оркестар, народниот оркестар, оркестарот на народни инструменти, музичките продуценти, редакциите за сериозна, за забавна музика итн. Во фонотеката на оваа продукција има околу еден милион снимки кои постојано се емитуваат на програмата на МРТ и претставуваат вистински музички национален архив. Таа истовремено е нераскинливо поврзана и ги следи сите значајни музички настани во земјава: „Охридско лето“, „Мајски оперски вечери“, „Денови на македонска музика“, „Интерфест“.

Вработените во музичката продукција сметаат дека со новата систематизација, раководството на МРТ сака продукцијата да згасне и сите да останат на улица. Тие стравуваат дека без работа ќе останат познати имиња на композитори, уметници и аранжери.

„Музичката продукција во изминатите децении одигра значајна улога и во афирмација на автентичното и квалитетно творештво и на македонската популарна музика, што претставува, всушност, идентитет на нашиот народ што некои соседи сакаат да ни го укинат. Дури и светот не' препознава по фолклорот и традицијата, кои сме должни да ги надградуваме. Раководството треба да се замисли дека уметниците во ниедно општество не се пречка за развојот, туку поттик“, велат вработените во музичката продукција на МРТ кои нагласуваат дека таму поминале сите музички имиња, почнувајќи од Сариевски, Бадев, Калиопи, па се' до нашата најголема ѕвезда, која трагично го загуби животот, Тоше Проески.

Но, од Управниот одбор велат дека музичката продукција нема да се укине или да згасне. Едноставно, вработените нема да бидат директно под капата на јавниот сервис, односно на платен список на МРТ, туку сами ќе заработуваат. Ќе имаат посебна жиро-сметка и ќе се регистрираат како ДООЕЛ. На почетокот, помошта од менаџментот, како што нагласуваат од УО, ќе биде сигурно обезбедена.

Од кабинетот на извршниот директор на МРТ, Јанез Сајовиц, појаснуваат дека не е целта да се избркаат луѓето и да се затвори музичката продукција, туку да се најде нејзината суштина. Од кабинетот велат дека музичката продукција ќе функционира според системот на проекти, кои дел и самите вработени ќе ги предлагаат, а меѓу нив влегуваат и организирање концерти во земјава и странство, од што ќе се обезбедуваат пари. Но, осмислувањето на иднината на музичката продукција се' уште трае, така што сите сугестии од вработените ќе бидат разгледани.

Од Управниот одбор, пак, на МРТ истовремено истакнуваат дека целата архива која е создадена од музичката продукција нема да биде заборавена или отфрлена, туку таа ќе се префрли и ќе биде во сопственост на продукцијата со заштитени авторски права.

Извор: Верче Георгиевска. (10.12.2007). Музичката продукција нема да биде под капата на МРТ. Утрински Весник.

Вест: За 8 дена штрајк во МРТ

Штрајкот на вработените во МРТ почнува за осум дена. В.д. претседателката на синдикалната организација Љубица Пуцаревиќ вчера донесе одлука во текот на осумдневниот законски рок да се договорат дали штрајкот ќе биде генерален со прекин на сите програми на МРТ. Според синдикалците, досега немам никаква комуникација меѓу извршните директори и Синдикатот, а тоа ќе биде решавачки критериум дали програмата ќе биде целосно прекината.

"Извршниот директор цело време најавува имплементација на санационата програма, но се уште немаат дефинирано социјални пакети. Тоа не може да се направи без дијалог со Синдикатот", вели Пуцаревиќ.
Според Синдикатот, во МРТ нема услови за имплементација на санационата програма.
"Извршните уредници на програмските пакети до Управниот одбор доставија приговори на новата систематизација и реорганизација зашто е зголемен обемот на работа, а се превидува намалување на бројот на вработени", вели Пуцаревиќ.

Вчера од кабинетот на извршниот директор на МРТ Јанез Сајовиц најавија дека изминал законскиот рок за приговори на санационата програма и оти почнува нејзината примена. Според менаџментот, во следните 90 дена ќе се направи изборот кои вработени со истекот на овој период ќе добијат отказни решенија. Прво ќе се формираат комисии кои, заедно со уредниците, ќе ја одберат екипата која останува да работи во јавниот радиодифузер. Бројката од 338 вработени се уште не е дефинитивна, според менаџментот може да расне или да се намали.

Извор: Т.Ј. (22.11.2007). За 8 дена штрајк во МРТ. Вест.

Вест: Владата ќе преземе 50 вработени од МРТ

Преземените работници ќе ја одржуваат и чистат големата зграда која е во сопственост на Владата и МРТ, а точната бројка на технолошки вишок ќе се утврдува во дијалог со Синдикатот, тврди директорот на МРТ Јанез Сајовиц

Околу 50 вработени, од вкупно 338 во Македонската радио-телевизија, чии имиња треба да се најдат на листата за технолошки вишок, се предвидува да ги преземе владината Служба за заеднички работи. Извршниот директор на МРТ Јанез Сајовиц објаснува дека преземањето на овие вработени е дел од преговорите меѓу раководството на јавниот радиодифузен сервис и владината Служба за да се надминат проблемите со одржувањето на висококатницата. МРТ во оваа зграда користи три, од вкупно 22 ката, но сите сметки за нејзиното одржување пристигнуваат кај јавниот радиодифузер.
"Според катастарските документи, зградата е во сопственост и на Владата и на МРТ. Претходното раководство го отстапило просторот без никаков надоместок и ниеден кираџија не плаќа кирија. Целта е трошоците да ги преземат владините институции и останатите кираџии кои се сместени во зградата. Дел од договорот е 50 вработени од МРТ да останат да го одржуваат и чистат просторот", вели Сајовиц.
Висококатницата има и 8 лифта, од кои само неколку работат, зашто нема пари за нивно одржување. Сајовиц објаснува дека поради големите трошоци што зградата ги влече со себе, дел од парите кои Владата и ги префрла на МРТ, наместо за плати за вработените и за потребите на телевизијата, се трошат за наплата на отужени побарувања. "Топлификација" побарува околу 1,6 милиони евра, УЈП 810 илјади евра, "Македонски телекомуникации" 500 илјади евра. "Сите овие тужби се со извршни решенија", вели Сајовиц.
Бројката од 338 лица, кои ќе бидат прогласени за технолошки вишок, според Сајовиц, е се уште прелиминарна и во дијалог со синдикалната организација ќе се дефинира конечната листа за отпуштање, како и висината на испратнините. "При спроведувањето на новата систематизација клучно е да имаме дијалог со синдикалната организација, за да може да се избориме за подобри услови за оние што треба да ја напуштат МРТ. Во оваа фаза од санационата програма клучно е да има дијалог со синдикалната организација", вели Сајовиц.
Дел од вработените што треба да бидат прогласени за технолошки вишок во МРТ за неколку години треба да се пензионираат.

Извор: Т.Ј. (20.11.2007). Владата ќе преземе 50 вработени од МРТ. Вест.

Утрински: Неизвесна иднината на МРТ

Измените во Законот за радиодифузна дејност со кои се создава можност за ставање под стечај и ликвидирање на Македонската радио-телевизија предизвика паника и конфузија меѓу вработените. Засега останува неизвесно дали јавното претпријатие, по измените во Законот, ќе оди во стечај и дали ќе биде ликвидирано. Од Владата одбиваат да коментираат што ќе се случува со МРТ. Неофицијално, од извори во Собранието, по измените во Законот се планира ликвидирање на јавниот радиодифузен сервис и негово повторно отворање, но овој пат под името Радио-телевизија на Македонија. На работа ќе се примаат оние лица што ќе бидат најнеопходни за работа, а вишокот вработени ќе останат без работно место. Овој т.н. француски модел предизвика реакции меѓу вработените во МТВ. Според дел од вработените кои веќе подолго време се занимаваат со проблемите на јавниот сервис, одлуката е нелогична.

„Одлуката е несоодветна и се коси со Законот за јавни претпријатија. Во тој закон се наведува дека јавно претпријатие не може да стапи во стечај ниту, пак, да биде ликвидирано. Со оглед на тоа, новите измени во Законот за радиодифузија не се основани“, објаснува вработен во МРТВ кој побара да остане анонимен.

Од менаџментот на јавниот сервис не се достапни за коментар. Атмосферата во МРТВ е хаотична. Секој од вработените има своја теорија за тоа што ќе се случува со јавниот сервис во иднина. Едни сметаат дека, иако постои можност, нема да се случи ликвидација. Други, пак, го очекуваат најлошото. Речиси сите од вработените кои не се на годишен одмор одбиваат да даваат официјални изјави. Повеќето од вработените кои заминале на одмор се враќаат за подетални информации околу последните случувања.

Од Советот за радиодифузија изразуваат надеж дека со измените во Законот ќе се овозможи подобра наплата на радиодифузната такса и ќе се стабилизира јавниот сервис.

„Советот за радиодифузија смета дека намалувањето на радиодифузната такса ќе ги стимулира граѓаните да ја извршат обврската, бидејќи сумата го овозможува тоа“, вели претседателот на Советот, Зоран Стефаноски. Во име на Советот, тој изрази надеж дека со новите законски мерки МРТВ, конечно, ќе се стабилизира.

„Се надеваме дека со последните измени на Законот за радиодифузија, Владата со својот план ќе придонесе кон конечно стабилизирање на Македонската радио-телевизија“, додава Стефаноски.

Инаку, пред измените во Законот за радиодифузија, кои по итна постапка беа изгласани во Собранието пред пет дена, во МРТВ во тек беше систематизација. Досега повеќе од 300 вработени беа прогласени за технолошки вишок. Ним им беше обезбеден паричен надомест до пензионирање. Дел од вработените тврдеа дека целокупната систематизација е некоректна, бидејќи менаџментот се ослободувал од вработени кои му се потребни на претпријатието. Последната група што беше прогласена за технолошки вишок броеше 123 вработени кои тврдат дека не биле информирани за одлуката на менаџментот. Во оваа група беа вклучени дописници, новинари и техничари.

Извор: Александар Пешев. (31.07.2007). Неизвесна иднината на МРТ. Утрински.