Дневник: Он-лајн регистрација на вработувања

Работодавците од приватниот сектор од денеска може да ги пријавуваат и одјавуваат вработените преку систем за електронска регистрација на вработувања, www.avrm.gov.mk/PrijavaOdjava.Софтверот е изработен за потребите на Агенцијата за вработување, преку проектот е-Влада, финансиран од УСАИД. За да можат да ја користат, работодавците мора да поседуваат валиден дигитален сертификат и компјутер поврзан на интернет.Според директорката на Агенцијата за вработување, Билјана Јовановска, работодавците што немаат услови да го користат системот, овие услуги и понатаму ќе ги добиваат во центрите за вработување.

Извор: (4.12.08). Он-лајн регистрација на вработувања. Дневник.

Утрински: Електронска поделба на барањата за меѓународен превоз на стоки

Поднесувањето барања за сите видови дозволи за меѓународен превоз на стоки и нивната распределба од 15 август задолжително ќе се врши по електронски пат. Тоа е предвидено со финализирањето на електронскиот систем за управување со дозволи за меѓународен превоз на стоки што го воспостави Министерството за транспорт и врски во соработка со проектот е-Влада на УСАИД. Системот ќе се применува во управувањето со годишните и месечните ЦЕМТ-дозволи, како и со поединечните дозволи за меѓународен превоз на стоки. Според министерот за транспорт и врски, Миле Јанакиески, системот значително ќе го намали административниот товар за транспортните компании и ќе ја зголеми ефикасноста. „Преку овој систем на компаниите ќе им се овозможи достапност на услугата 24 часа, заштеда на време и трошоци, зголемена ефикасност на процесот за одобрување и издавање на дозволите и целосно елиминирање на неправилностите“, рече Јанакиески. Новиот начин на поднесување барања ќе го користат сите подносители, за сите видови дозволи за меѓународен превоз на стоки.

Извор: (12.8.08). Електронска поделба на барањата за меѓународен превоз на стоки. Утрински Весник.

Дневник: „Е-влада“ ќе донесе поквалитетни услуги за граѓаните

Проектот „е-влада“, кој датира од пред неколку години, треба да обезбеди електронско поврзување на речиси сите државни институции. Тоа ќе ја модернизира државната администрација, ќе овозможи прецизен и навремен увид во податоците и ќе ги подобри услугите што државата им ги нуди на граѓаните и на фирмите. Компјутерскиот гигант „Мајкрософт“ со своите софтверски решенија е активно вклучен во реализацијата на овој проект во Македонија и во другите земји во регионот. Вилфред Громен, менаџер во „Мајкрософт“ за Југоисточна Европа, вели дека технологијата е подготвена да постигне големи резултати во оваа насока, но за тоа се потребни разработена организациска и правна димензија во секоја земја. - Врз основа на соработката со повеќе од 20 влади можам да кажам дека најголема пречка за реализација на проектот „е-влада“ се управувањето и законодавството. За да се постигне стратегијата за „е-влада“, односно „поврзана влада“, како што ја нарекуваат во ОН, некој со зајакнати капацитети треба да ги раководи сите министерства кон крајната цел - обезбедување подобри услуги за граѓаните и за бизнисите. Тоа бара политичка волја, стратегија и зајакнување на капацитетите. Честопати законите треба да се изменат за да се дозволи постоење на „е-влада“. На пример, за плаќањето даноци преку интернет (он-лајн) да стане законска обврска во многу од земјите, треба да се приспособи законодавството, односно да се воведе електронски потпис и да се регулираат прашањата поврзани со приватноста и со безбедноста.* Иновацијата во секој случај бара технолошки просперитет. Кои се клучните решенија што треба да се имплементираат за проектот да заживее? - За да се постигне ефикасна „е-влада“ треба да се земат предвид интероперабилноста и отворените стандарди. Станува збор за поврзување на различни министерства, системи, разни нивоа на управување, од централна власт до градско собрание. Претходно мора да се поминат стадиумите на дијалог и на учење. Постојат многу важни примери на интероперабилност, а најважниот е интеграцијата на различните апликации. Ова е свет на веб-услуги. Постојат дискусии за управување со системи и постигнување сценарио за намалување на трошоците со помош на технологија на виртуелен сервер, но и дебати на тема дигитални идентитети и управување со нив. * Дигиталниот идентитет е клучен за максимална заштита на податоците при комуникација преку интернет, но и за повисоко ниво на услуги во една држава. Кој се' може да биде обезбедувач на „е-идентитет“?- Владата секогаш ќе биде главниот управувач на граѓанскиот идентитет. Таа ќе организира тела за сертифицирање кои на граѓаните ќе им даваат дигитални идентитети. Но владата нема да биде единствениот обезбедувач на идентитети. На пример во банките луѓето употребуваат банкарски картички за да извршат плаќања. Кога пазарат користат готовина или картички, кога одат во сала за вежбање употребуваат претплатничка картичка или идентитет доделен од салата. Истото ќе се случува и на интернет. Луѓето ќе употребуваат различни идентитети на различни портали. Ние го нарекуваме тоа управување на идентитети насочено кон корисникот. За да се оствари тоа, потребен е систем што е интероперабилен и овозможува размена на доверливи идентитети. Така кога ќе одите во градското собрание, ќе ви ја признаат за валидна државната е-картичка на идентитет. Денес во светот постојат стандарди што го овозможуваат тоа, како стандардите за веб-услуги.* До каде е Македонија во овој поглед?- Голем број партнерски компании на „Мајкрософт“ во Македонија веќе подолго време интензивно инвестираат во знаење и вештини поврзани со нашите технологии. За нив интероперабилноста е неопходен услов за да бидат успешни на пазарот. Бројот на нашите партнери постојан расте, што ни дава за право да веруваме дека и делот со интероперабилноста го обработуваме на вистински начин. Подготвеноста на Македонија за примена на технологиите не заостанува зад која било земја од регионот.* Како се спроведува стратегискиот партнерски договор помеѓу „Мајкрософт“ и македонската влада?- Реализацијата на Договорот за стратегиско партнерство со Владата се одвива во рамките на очекувањата и дефинираните активности. За нас Владата е клучен партнер за создавање бизнис-клима што ќе поттикне конкурентност и спроведување на регулативата за заштита на правата на интелектуална сопственост. Кога овие две работи се реализираат на вистински начин, се отвара широко поле за работа на ИТ-компаниите. Најголем дел од земјите во Централна и во Источна Европа навистина сакаат да постигнат економски пораст преку големи иновации. Тоа е нивна најважна грижа, односно политички приоритет. За да се постигне тоа, треба да се препознае важноста на постоење стратегија за иновација, претприемачки дух и информатичка технологија како алатка што сето тоа го овозможува.

Извор: Спасијка Јованова. (18.2.08). „Е-влада“ ќе донесе поквалитетни услуги за граѓаните. Дневник.

Вечер: Компјутерот дели легла

Министерството за образование вчера на транспарентен начин ја објави прелиминарната листа на студентите кои електронски аплицираа за сместување во дом. Во трката за 4.570 легла во студентските домови во земјата се пуштија 5.996 кандидати. Студентите годинава првпат се пријавуваа по електронски пат, а кандидатите имаат рок во наредните осум денови со документи да ја потврдат веродстојноста на податоците наведени во електронската апликација во домот во којшто конкурирале.

- Воведувањето на информатичката технологија, како и електронски апликациии и форми на комуникација се стратешка определба на Владата. Морам да го пофалам интересот што го покажаа студентите за овој начин на аплицирање, за што зборува и бројката од 5 996 апликации. Бројка која покажува дека е зголемен бројот на апликантите во споредба со минатата година, рече министерот за образование, Сулејман Рушити на презентацијата на прелиминарната листа во Владата на РМ.

Тој потенцираше дека на ваков начин потполно се елиминира човечкиот фактор при бодувањето на апликациите, се зголемува личната одговорност на апликантите при поднесување на апликацијата и се избегнуваат сите неправилности и недоследности при распределувањето на студентските легла што се појавуваа минатите години.

Дека и студентите се задоволни од он-лајн пријавувањето потврдува и претседателот на Сојузот на студенти при Универзитетот "Св.Кирил и Методиј", Самоил Малчески. Според него, првпат при пресметките се одбегнува човековиот фактор и било какво влијание.

- Компјутерот сам ги пресметува бодовите. На студентите им останува она што го внеле во електронската апликација да го докажат со документи. Оние студенти кои манипулирале со електронската апликација ќе бидат исфрлени и нема да добијат легло. Досега најмногу манипулираше Комисијата за сметсување во домовите. Сега, првпат сите легла се на конкурс, нема скриени или кои дополнително ќе излезат и кои досега беа подложни на продажба. Таа комисија сега е исфрлена како фактор, вели Малчески.

Во рангирањето на кандидатите се земени предвид успехот од школувањето, редовноста, семејно-материјалната состојба на студентот и оддалеченоста од местото на живеење. Министерството за образование во соработка со Е-Влада и УСАИД ја воведе електронакста апликација. Со неа, само за пријави, коишто лани чинеа 100 денари, се заштедени околу 6 илјади евра.
Прелиминарниот списокот е објавен и на веб-страницата на ресорното Министерство www.mon.gov.mk

Извор: Милена Георгиевска. (17.8.07). Компјутерот дели легла. Вест.

Дневник: Македонија ја шие половина Европа

На светската листа на Е-влади, нашата земја е рангирана на 31. место, а споредено со нашите соседи, Србија е на 48, а Хрватска и Грција се на 86. место

Македонија е рангирана на 31. место на последната светска листа на Е-влади за 2006 година и зад себе ги остави половината од земјите на ЕУ и соседите. На листата што секоја година ја прават експерти од универзитетот „Браун“ во САД, доминираат азиските земји, кои ги зазедоа првите три од петте највисоки места.

На листата води Јужна Кореја, која лани била дури на 86. место, а по неа следуваат Тајван, Сингапур, САД и Канада.

Пред Македонија, од членките на ЕУ на листата се наоѓаат Велика Британија, Ирска, Германија, Шпанија, Шведска, Холандија, Франција, Естонија и Малта. Зад Македонија се сите останати членки на Унијата, како и соседните земји. Србија е на 48. место, Хрватска и Грција го делат 86. место, Бугарија е на 113. место на листата, а Албанија е рангирана како 132.

Последни на листата на која се наоѓаат сите земји во светот се Чад и Бурунди.

Експертскиот тим што го водел истражувањето, листата ја составува според оценките за владините интернет-страници, базирани на повеќе критериуми, вклучувајќи го пристапот, публикациите, базите на податоци, приватност и безбедносна политика, контактни информации, како и голем број електронски услуги. Досега се направени пет листи на „Е-влади“ за периодот од 2001 до 2005 година.

За последната листа, објавена пред една недела, се разгледувале 1.782 владини интернет-страници од 198 земји, и тоа во периодот јуни-јули 2006 година. Биле анализирани различни страници, вклучувајќи ги тие на извршната, законодавната и на судската власт, како и на министерствата за здравство, образование, надворешни работи, внатрешни работи, финансии, природни ресурски, странски инвестиции, транспорт, армија, туризам и телекомуникации.

Студијата покажува дека лани 29 отсто од владините агенции нуделе електронски услуги, во споредба со 2005 година, кога тој процент бил 19 отсто.

За да се подобрат електронските влади, во студијата им се сугерира на владите да преземат некои чекори за да го постигнат целосниот потенцијал за пристапност и ефикасност. На владите им се препорачува своите страници да ги направат „попријателски“ за корисниците со подобрување на дизајнот, да ги намалат предолгите текстови во делот за навигација, како и да обезбедат линкови од своите портали до министерствата и агенциите. Освен тоа, треба да водат сметка за секојдневното обновување на страниците, за да се обезбедат навремени и целосни информации.

Меѓу препораките е и таа да не се насочуваат само кон туристите, туку да нудат услуги за сите граѓани.

Извор: Жана П. Божиновска. (8.8.07). Македонија ја шие половина Европа. Дневник.