Време: Ваучерите за компјутери до 10 ноември

Надлежните во факултетите од сите приватни и државни универзитети, имаат рок до петок да ги подигнат ваучерите за набавка на компјутери, а најдоцна до 10 ноември да им ги поделат на студентите, им порача вчера министерот за финансии Трајко Славески на ректорите од државните и приватните универзитети во земјава. - Ректорите се добро информирани за овој проект и затоа сме оптимисти дека тој успешно ќе се реализира. Не постои можност за фалсификување на ваучерите зашто тие се заштитени со сите познати видови заштита. Со веб-апликацијата за која се известени надлежните во факултетите, до крај ќе се обезбеди заштита. Дури постои место на ваучерот каде што се впишува и бројот на личната карта на корисникот - објасни министерот Славески. Ѓорѓи Мартиновски, ректорот на универзитетот „Св. Кирил и Методиј“ рече дека на средбата со Славески се договориле како побргу да им се дадат вредносните бонови на студентите, за тие да имале повеќе време да одлучат каде ќе ги набават компјутерите. Министерството за финансии ќе подели 10.000 ваучери, а вредноста на секој од нив изнесува 12.300 денари. Со нив студентите од завршните години можат да набават компјутери од фирми што претходно се пријавиле дека се заинтересирани за продажба.

Извор: А. П. (31.10.2007). Ваучерите за компјутери до 10 ноември. Време.

Утрински: Факултетите до петок ќе ги подигаат ваучерите за компјутери

Министерот за финансии Трајко Славески ја исклучува можноста за фалсификување на вредносните бонови од 12.300 денари

Државните и приватните факултети најдоцна до петок од Министерството за финансии ќе можат да ги подигнат ваучерите за студентите од завршните години на студии, кои се наменети за набавка на компјутери. Некои од високообразовните институции, како што информираше министерот за финансии Трајко Славески, почнале да ги подигаат ваучерите уште од завчера. Но, на вчерашната средба на министерот со ректорите на високообразовните државни и приватни универзитети е договорено подигањето да заврши заклучно до петок до 12 часот. Овој рок, според Славески, е договорен за да им се остави на факултетите повеќе простор да ги поделат ваучерите. Студентите, кои прв пат запишале завршна трета или четврта година, како и студентите кои се евидентирани како лица со хендикеп, ќе можат да ги подигаат ваучерите почнувајќи од 1 ноември, а министерот им препорача на ректорите распределбата да заврши до 10 ноември.

Владата одлучи да подели околу 10.000 ваучери, секој со поединечна вредност од 12.300 денари, со кои студентите од завршните години можат да набават компјутери од фирми кои претходно ќе се пријават дека се заинтересирани за продажба на компјутери за студентите преку бонови. Досега се пријавени околу 50 компании кои се заинтересирани и кои потврдиле дека ги исполнуваат условите за продажба на компјутерска опрема. Компаниите имаат рок најдоцна до 6 ноември да аплицираат дека се подготвени да се вклучат во проектот. Студентите ќе можат да ги искористат ваучерите и да купат компјутер до 15 декември. Компаниите, пак, кои ги исполниле условите ќе ги достават ваучерите заедно со фискалната сметка до Генералниот секретеријат на Владата најдоцна до 22 декември за да може до 27 декември да ги подигнат парите во висина од 12.300 денари, колку што е вредносниот бон.

Министерот за финансии Трајко Славески ја исклучува можноста за фалсификување на ваучерите, бидејќи, како што истакнува, вредносниот бон бил заштитен со сите видови заштита, поради што не се очекуваат злоупотреби.

„Со веб-апликацијата за која се известени факултетите и универзитетите докрај ќе се обезбеди заштитата, зашто контролата е на максимално можно ниво. На ваучерот постои место каде што се впишува и бројот на личната карта на корисникот“, изјави вчера министерот Славески.

Министерот не знае која фирма ги изработила ваучерите. Бидејќи сумата на набавката била мала под 3.000 евра, не било потребно да се распишува јавен повик, туку од осум компании било побарано да достават понуди, при што бил избрана најповолната, но која, Славески не е информиран.

Извор: В.Г. (31.10.2007). Факултетите до петок ќе ги подигаат ваучерите за компјутери. Утрински.

Време: Ќе се формира секретаријат за информатика

Владата деновиве поведе иницијатива во нејзините рамки да се формира секретаријат за информатичко општество, најави владиниот портпарол Ивица Боцевски. - Во овој секретаријат ќе се следат најновите трендови во дигитализацијата, како и услугите што ги нуди владиниот сектор преку Интернет. Во рамките на Владата ќе се формира агенција за унапредување и поддршка за туризмот - рече Боцевски.

Извор: (26.11.2007). Ќе се формира секретаријат за информатика. Време.

Вечер: Апсолвентски подарок од Владата

Десет илјади студенти од завршната година на студирањето од утре ќе можат да ги подигаат ваучерите за набавка на компјутери што им ги доделува владата во износ од 200 евра. Ќе бидат опфатени апсолвенти од државните и приватните универзитети во земјата, а ваучерите деновиве им се делат на факултетите од каде тие ќе можат да се подигнат. Вчера во Министерството за финансии се одржа состанок со претставници на Владата и ректорите на универзитетите со цел да се операционализира владината одлука. Факултетите најдоцна до петок во 12 часот ќе можат да ги подигаат ваучерите од Министерството за финансии.

- Идејата е студентите да се екипираат со потребна опрема за подобра комуникација преку информатичката технологија. Се договоривме како и каде студентите да ги подигнат ваучерите за да имаат доволно време да се одлучат каде да ги набават компјутерите, изјави по средбата ректорот на Универзитетот "Св.Кирил и Метдодиј", Ѓорѓи Мартиновски.
Сите студенти што ќе добијат ваучери имаат рок до 15 декември да одберат фирма од каде ќе ги купат компјутерите. Досега во Министерството за финансии се пријавени околку 50 фирми од земјата кои продаваат компјутери и од каде ќе можат да се набавуваат, така што студентите ќе имаат голем избор.

- Имаме одлична соработка со факултетите и оптимисти сме дека проектот успешно ќе биде реализиран. Нашата препорака е ваучерите да бидат распределени на студентите до 10 ноември, велат од Владата.

Целиот проект чини 2 милиони евра, пари кои се веќе определени во буџетот. Како што најавуваат од Владата, според пазарните цени со ваучерот може да се купи добар компјутер со извесна доплата од студентот за екран кој може да се набави за мали пари.
Ваучерите се заштитени од можни манипулации прво преку хартијата, а потоа и со веб-апликацијата, а постои и место на ваучерот каде се впишува бројот на личната карта на студентот.

Извор: М.Г. (21.10.2007). Апсолвентски подарок од Владата. Вечер

Нова Македонија: Телеком да ги врати парите на граѓаните!

Граѓанското здружение Отпор, со седиште во Штип, ги засилува своите активности. Најавуваат нови тужби против Македонски телекомуникации. Охрабрени се од последната одлука на Комисијата за заштита на конкуренцијата, која констатира дека Телеком нема законска подлога да ги наплаќа манипулативните трошоци на претплатниците. Изречената казна на Телеком од страна на државната комисија за заштита на конкуренцијата, Отпор бара парите од казната да им се вратат на граѓаните.Според еден од лидерите на Отпор, Јанко Стојковски, сега се очекува и судот да донесе позитивни одлуки по поднесените тужби против Телеком. Судската власт ќе треба да ја има предвид и одлуката на државната комисија за заштита на конкуренцијата, вели Јанко Стојковски.Во наредните денови Отпор најавува кампања и преку медиумите за, како што велат, незаконитото работење на Телеком и за обештетување на граѓаните. Ќе се бара и поддршка од медиумите, кои би требало, како што велат во Отпор, да ја поддржат нивната акција, која е во интерес на сите граѓани.

Извор: К. Манев. (19.9.07). Телеком да ги врати парите на граѓаните!. Нова Македонија.

Дневник: Камерите во болниците ја нарушуваат приватноста

Има места во болницата на кои не смее да се постават камери, зашто може да се наруши приватноста на пациентите, смета Дирекцијата за заштита на лични податоци. Таа не дала согласност за снимањето, како што изјавија од Министерството за здравство, но не е против оваа мерка ако со неа се подобруваат здравствените услуги.
- Сметаме дека камерите сепак се премногу агресивно средство за да се постигне саканата цел. Никако не смеат да се снимаат шалтери и други чувствителни места во болницата, бидејќи може да се наруши приватноста на пациентите. Ќе предложиме, ако е можно, со камерите да се постигне таква резолуција на снимката со која нема да може да се идентификуваат пациентите - вели директорката на Дирекцијата, Маријана Марушиќ.

Портпаролот на Владата, Ивица Боцевски, најави дека ќе се снимаат влезови, шалтери и чекалници во болниците, односно сите места што и сега се јавни. Во врска со одлуката за поставување видеомониторинг во сите јавни здравствени установи, министерот за здравство Имер Селмани објаснува дека тоа е пракса во сите болници во светот, но нагласува дека нема да се снимаат местата каде ќе што се врши преглед на пациенти.

Во Дирекцијата велат дека досега никој од Министерството не им се обратил за мислење.

Паричните казни за повреда на личните податоци се од 50.000 денари, за физички, до 300.000, за правни лица.

- Бидејќи сме се' уште во транзиција, казните за повреда на личните податоци ќе се изрекув

Извор: Љ.Б. (18.9.07). Камерите во болниците ја нарушуваат приватноста. Дневник.

Нова Македонија: Македонија прва ќе обезбеди компјутер за секој ученик

Македонија станува првата земја во светот што ќе обезбеди компјутер за секој ученик преку кампањата на македонската Влада „Компјутер за секое дете“ што започна на почетокот на училишната година, пренесуваат светските портали и дел од медиумите.
Најамбициозниот потфат на македонската Влада кој што е преземен досега, ќе ги стандардизира сите училишта околу единствена технолошка платформа „Компјутер за секое дете“, проект на македонското Министерство за образование и наука, согласно кој ќе бидат инсталирани 180.000 работни станици овозможени преку НЦомпутинг, што ќе овозможи секој ученик од основно и средно училиште да се обезбеди со сопствен компјутер во училницата, пренесуваат светските портали.
“Иницијативата „Компјутер за секое дете“ е најголемиот и најважен образовен проект преземен во 15-годишната историја на независна Македонија. Нашата цел е да изградиме економија базирана врз знаење во која целокупната работна сила ќе биде едуцирана да да ја користи информатичката и комуникациската технологија во наредните пет години, ја пренесува германскиот портал „Ад-хок Њуз“ изјавата на македонскиот министер без ресор задолжен за информатичко општество Иво Ивановски. Според него, како што објавува германскиот портал, „како и многу училишни системи во светот, така и македонскиот образовен систем сепак има ограничени финансиски и инфраструктурни извори за да одговори на предизвикот“. Со прифаќање на компјутерската технологија со ниски трошоци НЦомпутинг, Македонија ја презема водечката улога во обезбедувањето компјутерско образование за училишните деца.

Извор: (18.9.2007). Македонија прва ќе обезбеди компјутер за секој ученик. Нова Македонија.

Вечер: За пиратите казна и до 10.000 евра

Со новиот предлог-закон за именување и дополнување на Законот за авторско право и сродните права, надлежностите околу неправилностите при дистрибуцијата, производството, репродукцијата, ускладувањето и снимањето на компјутерските, музичките и аудиовизуелни носачи на тон и слика ќе ги врши Државниот пазарен инспекторат, односно Министерството за внатрешни работи. Со оваа измена, како што велат од Министерството за култура, се прави чекор понатаму кон спогодбата за стабилизација и асоцијација. Со префрлањето на надлежностите во МВР на Министерството за култура му останува надлежноста за надзор кон колективните здруженија, односно културните институции.

Секој кој би ги прекршил авторските права ќе подлежи на глоба - минимален износ за правно лице е 2,5 илјади евра, а максимален до 5.000 евра. Зголемени се и износите за законскиот максимум за користољубие, кој изнесува 10.000 за правно лице и 6.000 евра за физичко лице, како и одговорните - трговец поединец и поединец кој врши самостојна дејност. Тоа би значело дека било кој вид пиратерија би можело пиратите да ги чини и 6.000 евра. Минималната глоба за физичко лице е зголемено на 1.000 евра, односно 1.500 евра на одговорното лице на правниот субјект , додека максимумот изнесува и до 3.000 евра.

Со заложбите на Владата за забрзување на административните постапки намален е рокот за давање согласност на актите на здруженијата за колективно остварување на 30 дена.

Извор: Б.Г. (21.8.2007). За пиратите казна и до 10.000 евра. Вечер.

Време: Избрани најдобрите фирми за интернет-пристапот вајмакс

По повторениот тендер за доделување лиценци за интернет-пристапот вајмакс се определени најповолните понудувачи за шесте региони на територија на Македонија, јавија од Агенцијата за електронски телекомуникации. Доделени се вкупно 18 одобренија, и тоа по три за секој регион. Фирмите „Неотел“ и „Истел“ од Скопје добија лиценци за сите шест региони, „Космофон“ за првиот, четвртиот, петтиот и шестиот регион, „Мател“ од Скопје за вториот регион и „РЖ Услуги“ АД Скопје за третиот регион. Директорот на Агенцијата за електронски телекомуникации треба да ги издаде одобренијата за користење радиофреквенции за фиксен безжичен пристап најдоцна до 23-ти идниот месец. Лиценците се доделуваат на времетраење од 10 години, со право на продолжување.

Извор: Р. П. (31.8.2007). Избрани најдобрите фирми за интернет-пристапот вајмакс. Време.

Време: Триесет понуди за безжичен Интернет на регионално ниво

Девет компании со 30 понуди учествуваат во трката за добивање одобренија за нудење безжичен интернет-пристап (ЊиМаџ) на регионално ниво. На вчерашното јавно отворање на пристиганите понуди во Агенцијата за електронски комуникации беше констатирано дека сите доставени понуди се со комплетна документација. АЕК, во согласност со објавениот тендер, доделува по три лиценци во шест региони во државава. Одделни понуди за сите региони доставија домашните компании „Неотел“ и „Истел“. Понуди за првиот, вториот, третиот, четвртиот и за петтиот регион има и од „Мател МК“ ДОО Скопје, а мобилниот оператор „Космофон“ конкурира за лиценци за првиот, четвртиот, петтиот и шестиот регион. Со четири понуди, за вториот, третиот, петтиот и шестиот регион настапува и „Хидрас“ ДОО Тетово, а РЖ „Услуги“ АД Скопје со две, за првиот и за третиот регион. Првиот регион е атрактивен и за компанијата „Ток телекомуникации“, а третиот и за „Неткабел“ ДООЕЛ Струмица и ДПТ „Флоу“ ДОЕЛ Кавадарци. Втората фаза од тендерот за доделување на одобренијата предвидува комисијата за спроведување на тендерот да направи оцена на формалноправната содржина на доставената документација и најдоцна за пет дена да достави извештај до комисијата на Агенцијата за електронски комуникации, која, пак, треба да донесе одлука за избраните компании до 29-ти овој месец. Избраните компании најдоцна до 20-ти идниот месец треба да ги уплатат парите што ги понудиле за лиценцата во согласност со својата финансиска понуда, а странските компании и да регистрираат фирма во државава. Крајниот рок за издавање на одобренијата е 23 септември. Во согласност со тендерот, првиот регион ги опфаќа општините: град Скопје, Илинден, Петровец, Зелениково, Студеничани, Сопиште, Чучер Сандево и Арачиново, а вториот Берово, Виница, Делчево, Зрновци, Карбинци, Кочани, Лозово, Македонска Каменица, Пехчево, Пробиштип, Свети Николе, Чешиново-Облешево, Штип, Кратово, Крива Паланка, Куманово, Липково, Ранковце и Старо Нагоричане. Со третиот регион се опфатени Велес, Чашка, Градско, Росоман, Кавадарци, Неготино, Демир Капија, Струмица, Радовиш, Конче, Василево, Босилево, Ново Село, Гевгелија, Валандово, Богданци и Дојран, а во четвртиот Битола, Прилеп, Демир Хисар, Крушево, Долнени, Кривогаштани, Могила, Новаци и Ресен. Општините Охрид, Струга, Дебарца, Вевчани, Кичево, М. Брод, Другово, Зајас, Осломеј, Вранештица, Пласница, Дебар и Центар Жупа се дел од петтиот, а Тетово, Гостивар, Теарце, Јегуновце, Желино, Брвеница, Боговиње, Врапчиште, Маврово и Ростуше од шестиот регион. Ова е втор обид за распределба на одобренија за безжичен интернет-пристап на регионално ниво, откако првиот тендер што се однесуваше на регионалните лиценци беше поништен поради несоодветната документација на компаниите што конкурираа. На првиот тендер АЕК додели одобренија за ЊиМаџџ на национално ниво на компаниите „Космотелко“ и „Некском“.

Извор: (21.8.2007). Триесет понуди за безжичен Интернет на регионално ниво. Време.