Вест: "Телеком Словенија" победи на тендерот за дигитална телевизија

"Телеком Словенија" победи на тендерот за пренос на дигитални телевизиски услуги преку јавна комуникациска мрежа (ДВБ-Т) на територијата на Македонија.
Агенцијата за електронски комуникации соопштио дека "Телеком Словенија", според условите на тендерот треба да овозможи покриеност на целата територија на Македонија во рок од една година со што ќе овозможи пренос на триесет телевизиски програми со многу висок квалитет. За ова треба да се инвестираат околу десет милиони евра.
Телеком Словенија ќе треба да инвестира околу 20 милиони евра во дигитални приемници/декодери кои бесплатно ќе им се доделуваат на домаќинствата.

Извор: (27.04.2009). "Телеком Словенија" победи на тендерот за дигитална телевизија. Вест.

Дневник: Новите советници на Кисела Вода без компјутери

Претходниот состав ги задржа лаптопите како замена за неисплатени паушали, за што е поднесена иницијатива за преиспитување на уставноста и законитоста на одлуката

На еден ден пред конститутивната седница на новиот совет на Општина Кисела Вода, сите советници од досегашниот состав не ги вратиле лаптопите. „Дневник“ веќе пишуваше дека советниците си ги задржаа компјутерите како замена за нивните неисплатени паушали за јануари, февруари и за март за работа во посебни координативни или работни тела и комисии во Советот. Го врати единствено советничката Славица Новачевска од СДСМ која ќе биде и во новиот состав на советот. Таа на вчерашната седница, беше обвинета од останатите советници дека нејзината постапка била некоректна, бидејќи од неа потекнала иницијативата да се земат компјутерите како замена за неплатените паушали.

- Никој нема право да ме обвинува за тоа што го вратив компјутерот. Тоа е моја лична одлука и сметав дека така е исправно, одговори на нападите Новачевска. Неофицијално, уште четворица советници ги вратиле општинските компјутери.

- Колку компјутери се вратени и кој од советниците ги вратил, официјално ќе се знае в четврток, кога ќе биде и првата конститутивна седница на новиот совет на Општина Кисела Вода. Тогаш ќе знаеме со име и презиме кој од советниците го вратил компјутерот, велат од Општина Кисела Вода.Оттаму информираат дека е поднесена иницијатива за преиспитување на уставноста и законитоста на одлуката за компензација на надомест до Уставниот суд и до антикорупциската комисија. Но, ако в четврток сите советници не ги вратат компјутерите, тоа ќе биде хендикеп во работата на новиот совет.

- Ќе се чека одговорот од наведените институции, но дотогаш новите советници ќе бидат спречени нормално да работат, бидејќи материјалите не ќе можат да одат по електронски пат. За нови компјутери ќе требаат дополнителни средства и време, бидејќи ќе треба да се распише нов јавен повик, велат општинарите.

Првата одлука за компензација на надомест советниците од Кисела Вода ја донесоа на 27 февруари, а ја потврдија и на 17 март, кога со тоа го отфрлија решението на градоначалникот Џорџе Арсов за нејзино запирање. Арсов решението го образложи со Законот за спречувањето на корупција, според кој не може да се отуѓува државен капитал во тек на изборна кампања, а со закон не е предвидена исплата на посебен надомест за работата во посебни координативни или работни тела и комисии што ги основа општината. Советниците се оглушија и на укажувањето на антикорупциската комисија дека одлуката е спротивна на законското располагање со јавните средства. Вкупната вредност на 24-те лаптопи е 586.000 денари.

Извор: А.П. (15.04.2009). Новите советници на Кисела Вода без компјутери. Дневник.

Вечер: Виртуелно купување, плаќање и достава преку картичка на нет

За да одберете некој производ наместо да одите низ продавниците кои имаат ограничено работно време, истото ќе можете да го сторите преку прегледување и пребарување на производите на првата македонска Е-продавница, која од денес е во функција на граѓаните корисници на интернет низ земјава. Станува збор за веб-страницата www.ex.mk на Компанијата Ексвизит, која во соработка со Уни банка, прв пат во Македонија со плаќање преку мастер картички и сигурен софтвер ќе им овозможи дваесет и четиричасовна електронска трговија на сите посетители.

Биљана Радоњин, менаџер во Еквизит, на вчерашната презентација на сајтот го изрази своето задоволство од развојот на електронската трговија во Македонија и напомена дека во блиска иднина се надева на уште поголем подвиг на интернет купувањето, како во светските држави.

Шопинг центарот засега располага со околу 300 производи, и работи постојано, во текот на денот, седум дена во неделата. Ограничувачки фактор е тоа што производите кои се на страницата се само од оние компании кои сакаат да се продаваат таму, а не сите оние кои постојат.
- Во моментов на заедничко задоволство се наоѓаме пред нов предизвик, а тоа е започнување на соработката со Еквизит и пуштањето во употреба на првиот македонски веб шопинг центар, во кој ќе се најде широк асортиман на производи за сите вкусови и потреби, рече Верица Гица Серафимов, менаџер од Уни банка. Таа објасни дека плаќањето е електронски со платежни картички, преку Уни банка која гарантира максимална сигурност на потрошувачите.

Околу дистрибуцијата, како трет сегмент од оваа активност кој опфаќа достава до адресата наведена од страна на нарачателот, ќе биде во период од 24 до 48 часа во зависност дали е нарачателот е од Скопје или во некои од градовите низ Македонија.

Инаку, ова не е популарниот таканаречен PayPal комерцијален начин на интернет трансфер на пари познат во компјутерскиот свет, кој ги заменува традиционалните методи на чекови и кеш пари за шопинг, туку почеток во тој виртуелен пазар најавен од Уни банка и Компанијата Ексвизит и одлична почетна иницијатива за негово наскоро комплетно имплементирање во Македонија во текот на наредните месеци.

Извор: Д.С. (15.04.2009). Виртуелно купување, плаќање и достава преку картичка на нет. Вечер

Дневник: Телеком Словенија нов газда на „Космофон“

Телеком Словенија за 190 милиони евра го купи „Космофон“, втор по големина мобилен оператор во земјава. Словенците станаа сопственици и на неговиот продажбен синџир „Германос“ во Македонија.Групацијата Телеком Словенија е веќе присутна на македонскиот телекомуникациски пазар преку „Он.нет“, вториот по големина интернет-провајдер во земјава, кој нуди и фиксна телефонија. Ова преземање ги дополнува нашите постојни активности во Македонија и ја продолжува нашата стратегија за прераснување во еден од водечките телекомуникациски провајдери во југоисточна Европа - изјави Бојан Дремељ, претседател на Одборот на директори на Телеком Словенија, по потпишувањето на купопродажбениот договор.Зделката ќе биде завршена кога договорот за преземање ќе го одобри македонската Комисија за заштита на конкуренцијата.Според неофицијалните информации, „Космофон“ ќе го менува името, односно ќе го земе брендот на словенечкиот телеком.

Словенечката компанија најави дека ако го добие „Космофон“, на македонските корисниците ќе им понуди конвергирани фиксни мобилни услуги, кои ќе вклучуваат широкопојасен интернет со фиксна и мобилна телефонија и телевизија преку интернет-протокол. Словенечкиот телеком е добитник и на дозволата за дигиталната телевизиска мрежа во земјава. Преку „Он.нет“ ќе обезбедат за секое домаќинство бесплатен ресивер (сет-топ бокс) за прием на дигиталниот телевизиски сигнал.

Телеком Словенија е во доминантна државна сопственост. Словенечката влада има нешто повеќе од 50 отсто од капиталот, уште 25 отсто поседуваат два државни пензиски фонда, а остатокот е кај странски инвестициски фондови, малцински акционери и вработените. Телеком Словенија е водечка телекомуникациска компанија во оваа поранешна југословенска република и е присутна на пазарите во Хрватска, БиХ, Србија, Косово, Албанија и Македонија.

„Космофон“ почна со работа во јуни 2003 година. Минатата година ја заврши со над 700 илјади корисници и пазарен удел од 30 отсто. „Германос“ има 66 продажбени места во земјава.Продажбата на мобилниот оператор следуваше откако германски „Дојче телеком“ купи 25 отсто од акциите на грчки ОТЕ, мнозинскиот сопственик на „Космофон“, со што се создаде недозволена концентрација на телекомуникацискиот пазар. „Дојче телеком“, во земјава ги поседува „Македонски телеком“ и „Т-мобиле“.На јавниот конкурс што ОТЕ го распиша за продажба на „Космофон“ покрај Телеком Словенија се јавија уште две турски компании, „Турк телеком“ и „Туркчел“.

Извор: М.Б. (31.03.2009). Телеком Словенија нов газда на „Космофон“. Дневник.

Дневник: Пуштен во употреба системот за интегрирано гранично управување

Системот за интегрирано гранично управување (ИСИГУ), кој ќе го поврзува МВР со 14 други институции и преку кој ќе разменуваат информации за следењето на законското работење на компаниите и на физичките лица, вчера беше пуштен во употреба. Системот е последниот од техничките услови што нашата земја треба да го исполни за целосна визна либерализација со ЕУ.

- Станува збор за еден од најнапредните вакви системи во Европа, кој доби позитивни оценки од сите три оценувачки мисии што годинава Брисел ги спроведе за негова проверка - изјави премиерот Никола Груевски.Со ИСИГУ се надградува и заокружува Националниот координативен центар за гранично управување, кој покрај Дежурниот центар за состојби, добива и центар за размена на информации и центар за анализи. Системот треба да им обезбедува информации на сите институции задолжени за контрола и проток на патници и стоки преку државните граници. Сето тоа треба да вроди со значително скусување на времето за влез и излез од земјава, како и на целокупната гранична контрола и процедура.

Покрај МВР, инсталираните моќни сервери ќе сервисираат уште 14 други министерства и институции во рамките на Националниот центар за интегрирано гранично управување. Токму преку нив ќе се разменуваат сите неопходни информации и практично секоја институција ќе има пристап до базите на податоци на останатите надлежни институции, така што во најкус можен рок ќе може да се направат сите неопходни проверки. Конкретно МВР, санитарниот инспекторат, Дирекцијата за радијациона сигурност, Бирото за лекови или Дирекцијата за храна ќе може да ги користат податоците на министерството за транспорт и врски, министерството за одбрана, локална самоуправа, Царината, ветеринарската или фитосанитарната инспекција и обратно.

Извор: Д.В. (27.03.2009). Пуштен во употреба системот за интегрирано гранично управување. Дневник.

Дневник: Катанец на секој компјутер

Акцијата компјутер за секое дете се претвори во катанец за секој компјутер. Така, со клуч, бидејќи нема пари за осигурување, директорите се обидуваат да ги заштитат од масовните кражби деловите на комјутерите што завршуваат на пазарот на старо или во интернет-кафулињата. Од скопското средно училиште „Цветан Димов“ пријавиле дека се украдени четири компјутери. Ставиле катанци, но учениците ги кршат и продолжуваат да крадат. Ваквото однесување, според вработените, е поради недостиг од домашно воспитување, но и поради тоа што компјутерите не се користат доволно.

- Кражбите се зголемија во второто полугодие со зголемувањето на паралелките. Немаме пари за осигурување, па штетата ја плаќа тој што ја направил. Ако не го откриеме виновникот или класот не сака да го каже, ќе платат сите - вели директорот Миле Блажевски.

Средношколците велат украдените делови се препродаваат во интернет-кафулињата, но и на пазарот на старо под Кале. Иако има катанци на компјутерот, тие може да се отворат и да се извадат компонентите - вели ученик од четврта година.Директорот на средното училиште „Михајло Пупин“, Ефтим Проевски, вели дека е во полоша ситуација, зашто учениците се од електро-насока и точно знаат што да земат, а компјутерот да изгледа дека е во ред.

- Компјутерите ни ги дадоа и должни сме да ги зачуваме како што знаеме. Куќиштата ги обезбедивме со нитни, зашто катанците не беа решение. За нитните ќе им треба посебен алат - вели Проевски.

Во средните училишта сметаат дека Министерството за образование целиот проект го почнало обратно. Тие велат дека голем дел од штетите се направени поради лошата инсталација, несоодветните клупи и слично. Просветниот инспекторат предупредува дека состојбата е се' полоша, зашто утврдил дека од 93 училишта во 61 се регистрирани штети на компјутерите.

- Има директори што не го пријавуваат тоа и спрема нив поднесовме кривични пријави. Не знаеме колкава е вкупната штета бидејќи нема точни податоци од училиштата - вели Сефедин Елези, раководител на секторот за инспекциски надзор.Се очекува и Министерството за образование да преземе мерки за санација за обезбедување на компјутерите.

Извор: (26.3.2009). Катанец на секој компјутер. Дневник.

Утрински: Новиот портал „Окно“ ја збогатува он-лајн понудата

Во електронскиот етер од завчера Контрапункт - Културен центар „Точка“ го пушти новиот портал кој носи наслов „Окно“ или „Ок(н)о“, со кое навестува дека ќе се обиде да погледне поинаку. И веќе на прв поглед може да се види дека овој портал се обидува да понуди различни содржини и едно поинакво он-лајн издание. Впрочем, неговата најава и гласи „вртиме нова страница“, која може да се отвори на адресата www.okno.mk.

Став, Општество, Култура, Живот, Музика, Ретро. Под овие наслови се групирани неговите содржини кои нудат најразновидни теми од стрип, анимација, културни феномени, до тековни настани, историја, палеонтологија, интернет. Пристапот на порталот е едноставен, необврзувачки, неоптоварен со шеми, па сепак понудата на теми и начинот на кои тие се обработени е исклучително интересен. „Окно“ успева да понуди голем број познати содржини на еден поинаков начин, како содржински, така и графички. Неговиот акцент, иако ги содржи и најновите вести и случувања, е пред се' на феномените на нештата, на феноменот на културата, на откритијата и настаните кои успеале да ги раздвижат или променат нештата.

Во него може да се прочита за Семјуел Бекет, за стогодишнината на футуризмот, за феноменот на порнофилмот „Длабоко грло“, за Алан Форд или за басистот на „Секс пистолс“ Сид Вишз, но од еден друг агол, нудејќи една поинаква слика. Во рамките на одбележувањето на годината на Галилеј и Дарвин на овој портал може да се најде и квиз за да се провери сопственото знаење. Порталот нуди музикчки видео клипови, најавува нова е-библиотека, презентира ставови и осветлува одредени актуелни општествени појави. Интересно е дека овие текстови често се и едукативни, но се чини дека најмногу се фокусираат на феноменот на траењето на нештата низ годините. А сето тоа во обид да се создаде една ризница која ќе може да се чита секогаш. Можеби затоа и нивната најава дека имаат намера да соберат и објават барем 28.000 прилози и не звучи неостварливо. Им посакуваме уште толку...

Извор: (21.3.09). Новиот портал „Окно“ ја збогатува он-лајн понудата. Утрински Весник.

Дневник: „Телеком Словенија“ загреан за „Космофон“ и за дигитална телевизија

Словенците се подготвени да платат преку 250 милиони за мобилниот оператор и да инвестираат 33 милиони евра во дигитална телевизиска мрежа
„Телеком Словенија“ е заинтересиран да го купи мобилниот оператор „Космофон“ и да отвори дигитална телевизија во земјава.Според Бојан Демељ, претседател на управата на компанијата, до идниот четврток ќе ја достават понудата за „Космофон“, кој од сопственикот, грчки ОТЕ е проценет од 250 до 300 милиони евра. Словенечкиот телеком како единствен кандидат на јавниот повик за радиофреквенции за пренос на дигитална телевизија преку јавна предавателска мрежа (ДВБ-Т) најавува инвестиција од 33 милиони евра ако ја добие дозволата.- Со „Космофон“ ќе ја засилиме позицијата во Македонија, каде што сме веќе присутни преку „Он-нет“. На корисниците ќе им понудиме ковергирани фиксни мобилни услуги, кои ќе вклучуваат широкопојасен интернет со фиксна и мобилна телефонија и телевизија преку интернет протокол. Со мрежата на „Космофон“ ќе можеме да ги нудиме овие услуги без пречки од „Македонски телеком“ - вели Демељ.Во словенечкиот телеком велат дека се одлучни да го купат „Космофон“, но ако не успеат во тоа тогаш ќе работат како виртуелен мобилен оператор во земјава. Главни конкуренти на Словенците се турските „Турк телеком“ и „Туркцел“, како и „Мобилком Австрија“, кој во земјава го поседува мобилниот оператор „Вип“.Демељ најавува дека летово ќе почне да поставуваат дигиталната телевизиска мрежа со која ќе покријат 80 отсто од населението за 12 месеци. Преку „Он-нет“ ќе обезбедат за секое домаќинство бесплатен ресивер (сет-топ бокс) за прием на дигиталниот телевизиски сигнал.„Телеком Словенија“ е во доминантна државна сопственост. Словенечката влада има нешто повеќе од 50 отсто од капиталот, уште 25 отсто поседуваат два државни пензиски фонда, а остатокот е кај странски инвестициски фондови, малцински акционери и вработените. „Телеком Словенија“ е водечка телекомуникациска компанија во оваа поранешна југословенска република и е присутна на пазарите во Хрватска, БиХ, Србија, Косово, Албанија и Македонија.
Извор: (05.03.2009). „Телеком Словенија“ загреан за „Космофон“ и за дигитална телевизија. Дневник.

Дневник: „Т-мобиле“ почнува да продава „ајфон“

„Т-мобиле“ од утре ќе почне со продажба на „ајфон 3Г“ по цена на иновативниот телефонски апарат од 1 денар за месечна претплата од 3.600 денари, кои може да се искористат за 10 часа разговор и СМС-пораки и со вклучени 4 гигабајти пренос на податоци. Во другите два тарифни модела, апаратот ќе чини 21.590 денари, односно 12.390 за месечна претплата од 900 и 1.800 денари и податочен сообраќај од 1 ГБ, односно 2 ГБ.„Ајфонот“ ќе биде достапен на пет продажбени салони во Скопје, како и во Тетово, Охрид, Битола, Струмица и во Куманово.- Многу се гордееме што го донесовме „ајфон“ во Македонија. Нашите корисници со нетрпение го очекуваат иновативниот апарат - изјави Мајкл Лоренс, главен извршен директор на „Т-мобиле“ - Македонија.

Извор: (5.3.09). „Т-мобиле“ почнува да продава „ајфон“. Дневник.

Вечер: Космофон со најдобра понуда и за фиксниот колач

Космофон доставил најдобра понуда на владиниот тендер што го распиша Бирото за јавни набавки, а на кој се бараше компанија која ќе и понуди пониски цени на разговори во фиксната телефонија. Рокот за доставувањето на понудите заврши завчера и како што дознаваме од седумте понудувачи, меѓу кои е и Македонски телеком и некои кабелски оператори, Космофон понудил најниски цени за разговорите. Заинтересираните оператори требаше да достават потврда дека се регистрирани во оваа дејност, да овозможат задржување на бројот, идентификација на повик, забрана за повици и со анекс да им овозможат на министерствата да се приклучат кон пакетот.
Ова е прв пат Владата да избира фиксен оператор преку кој ќе зборува јавната администрација. Досега Македонски Телеком ја опслужуваше администрацијата. Директорот на владината Служба за општи и заеднички работи, Васе Доневски во јануари, кога беше распишан тендерот ни изјави дека Владата сака да ги намали трошоците за користење на телефон. -Месечните трошоци на телефоните во владината зграда и некои главни централи годишно изнесуваат околу 30 милиони денари или 500 илјади евра, пари кои ексклузивно ги добива(ше) Македонски телеком. Во оваа сума не влегуваат телефонските сметки што ги прават вработените во министерствата и другите државни институции - изјави Доневски.
Со овој тендер се обезбедуваат фиксни телефонски линии за Генералниот секретаријат, министерствата за финансии и за информатичко општество и за некои државни институции. Во тек е еваулација на понудите, но како што информираат од владината Служба, неколку критериуми се пресудни за изборот, а тоа се цената на претплатата и сообраќајот што ќе се врши од фиксен кон фиксен и од фиксен кон мобилен телефон. За два месеци фиксниот оператор ќе треба да го имплементира договорот со важност од една година.

Извор: (4.3.2009). Космофон со најдобра понуда и за фиксниот колач. Вечер.