Време: „Ти-мобајл“ го доби милионитиот корисник

Во јули првиот мобилен оператор во земјава „Ти-мобајл“ го доби милионитиот претплатник. Сегашниот број на претплатници на овој оператор е веќе1.030.000 корисници. Вкупниот број постпејд-корисници е зголемен за 51 отсто, а истовремено е зголемен и сообраќајот на припејд-корисниците за 52 отсто, објави на средбата со новинарите главниот извршен директор Рубин Заревски. - На мобилниот пазар учествуваме со 66 отсто, што покажува дека половина од населението во Македонија ги користи нашите услуги - рече Заревски. Според последниот извештај, компанијата го зголемила приходот за 15 отсто во однос на лани, а зголемени се и инвестициите, кои за годинава изнесуваат над 25 милиони евра. Два милиони евра се вложени во новата станица Бе-ес-це, отворена во Гостивар, која претставува процесирачки систем за податоци и е петта по ред во Македонија. Помош од 20 илјади евра од „Ти-мобајл“ е донирана за гасење на пожарите што ја зафатија Македонија во изминатиов период. Како што соопшти Заревски, компанијата пред неколку дена аплицирала и за добивање 3Г-лиценца и во моментот очекува одговор од Агенцијата за електронски телекомуникации. На новинарското прашање за проблемот со мрежата што настана по двочасовниот прекин на струја минатата недела, од „Ти-мобајл“ одговорија дека 250 базни станици биле во функција, со што се обезбедило до 50 проценти покриеност на мрежата.

Извор: Р. П. (1.8.07). „Ти-мобајл“ го доби милионитиот корисник. Време.