Вест: Телеком од денеска исплаќа дивиденда за 2005

Од денеска почнува исплатата на дивидендата од Македонски телекомуникации. Собранието на акционери на Телеком на вчерашната седница ги усвои завршните ревидирани финансиски извештаи за 2005 година, согласно кои донесоа и одлука за исплата на дивидендата во износ од над 7,4 милијарди денари, информираше по седницата претседателот на Собранието Зоран Трајчевски. Секој акционер кој бил запишан во Акционерската книга на 20 јули годинава, ќе добие по 86,10 денари по акција. Владината дивиденда изнесува околу 47 милиони евра.
"Собранието ги усвои финансиските извештаи за 2005 година и годишниот извештај за работењето на компанијата за 2005 година. Владините претставници во Собранието на акционери се воздржаа од гласање по предлогот за одобрување на работењето на членовите на Бордот на директори на Македонски телекомуникации во 2005 година", вели Трајчевски.
Собранието вчера од Бордот на директори го отповика и Атила Сендреи, се уште актуелниот главен извршен директор на компанијата. Официјално смената на Сендреи стапува во сила од 10 септември годинава, кога, пак, почнува ангажманот на Николај Ј.Б. Бекерс, кој вчера беше избран за член во Одборот на директори на Телеком. Собранието вчера ја прифати и оставката на Золтан Тисаи од Одборот на директори и на негово место го избра Јанош Сабо.

Извор: Т.Ј. (2.8.07). Телеком од денеска исплаќа дивиденда за 2005. Вест.